རྒྱ་ནག་གི་གཙུག་ལག་སློབ་དཔོན་མང་པོ་ཞིག་གྲོངས་ཡོད་འདུག
ཟླ་བ་འདིའི་ཚེས་༢༦ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལ། ད་ལྟའི་ཆར་རྒྱ་ནག་ནང་ཏོག་ནད་ཀྱི་འགོས་ཁྱབ་ཤུགས་ཆེ་རུ་སོང་ནས་ཉིན་རྟག་པར་མི་མང་པོ་གྲོངས་བཞིན་ཡོད་པའི་གནས་ཚུལ་ཐོན་བཞིན་པའི་གནས་སྟངས་ཆགས་ཡོད་པའི་སྐབས་དེར། ཟླ་བ་འདིའི་ཚེས་༢༥ བར་རྒྱ་ནག་གི་ཚན་རིག་དང་བཟོ་སྐྲུན་རིག་གནས་ཀྱི་གཙུག་ལག་སློབ་དཔོན་ཁྱོན་བསྡོམས་༡༥ གྲོངས་ཡོད་པའི་གནས་ཚུལ་ཐོན་འདུག
དམར་ཤོག་ཚོགས་པའི་ཚོགས་མི་དང་། རྒྱ་ནག་གི་ཚན་རིག་དང་བཟོ་སྐྲུན་རིག་གནས་ཀྱི་སློབ་དཔོན་ ༡༥ གྲོངས་པའི་རྒྱུ་རྐྱེན་རྣམས། རྒྱ་ནག་གཞུང་གིས་ཁ་གསལ་བསྟན་མེད་ཀྱང་། གྲོངས་མཁན་མི་གཅིག་ནི་གློ་བུར་དུ་བརྡབ་རྨས་བྱུང་ནས་སྨན་ཁང་དུ་སྐྱོབ་མི་ཐུབ་བར་གྲོངས་ཡོད་པ་ལས་གཞན་མི་༡༤ རྣམས་ནི་རྒྱ་ནག་ནང་ནད་ཡམས་ཁྱབ་ཚད་ཆེ་ཤོས་སྐབས་གྲོངས་ཡོད་རབས་བརྗོད་འདུག
དེ་བཞིན་གྲོངས་མཁན་མི་གྲངས་༡༥ ཁོངས་ནས་ལོ་ཆུང་ཤོས་༥༧ དང་ལོ་ཆེ་ཤོས་༡༠༢ ཡིན་པ་དང་། འདིའི་ནང་ནས་མི་ ༥ ཚན་རིག་གཙུག་ལག་སློབ་དཔོན་དང་གཞན་མི་༡༠རྣམས་ནི་བཟོ་སྐྲུན་རིག་གནས་ཀྱི་གཙུག་ལག་སློབ་དཔོན་ཡིན་པའི་གནས་ཚུལ་ཐོན་འདུག
དེ་བཞིན་<VISION TIMES >ཀྱིས་གནས་ཚུལ་སྤེལ་གསལ། ཟླ་བ་འདིའི་ཚེས་༢༣ གྱི་དགོང་མོར། པེ་ཅིང་གྱི་སྨན་ཁང་༣༠༡ ནང་གློར་བུར་དུ་སྨན་ཁང་གི་ཉལ་ཁང་མང་པོའི་གློག་སྤར་བ་དང་། མི་མང་ཕར་འགྲོ་ཚུར་འོང་བྱེད་མཁན་ལ་བཀག་སྡོམ་ཤུགས་ཆེན་བྱས་ཡོད་པས། མི་མང་པོ་ཞིག་གིས་རྒྱ་ནག་གི་མི་སྣ་གལ་ཆེན་ཞིག་གམ། ཡང་ན་ནང་མི་ཞིག་གྲོངས་ཡོད་པའི་ཚོད་དཔག་བྱས་པའི་གནས་ཚུལ་ཐོན་ཡོད་འདུག་ལ། གནས་ཚུལ་དེ་འབྲེལ་རྒྱ་ནག་གཞུང་འབྲེལ་གྱི་གསལ་བསྒྲགས་གང་ཡང་སྤེལ་མེད་ཀྱང་། མི་མང་པོ་ཞིག་གིས་དྲ་ཐོག་ཏུ་འདིའི་དགོང་མོར། ཞི་ཅིང་ཕིང་གི་ཨ་མ་གྲོངས་ཡོད་རབས་ཀྱི་གནས་ཚུལ་འགྲེམས་སྤེལ་བྱས་ཡོད་པས་གནས་ཚུལ་ཐོན་འདུག་ཀྱང་། གནས་ཚུལ་འདི་དངོས་ཡོད་ཡིན་མིན་ཤེས་ཐབས་བྲལ་བ་ཡིན་འདུག
དེ་བཞིན་སྨན་ཁང་༣༠༡ ཞེས་པ་དེ་ནི་རྒྱ་ནག་གི་པེ་ཅིང་ནང་ཡོད་ཅིང་། སྨན་ཁང་དེ་ནི་རྒྱ་ནག་བཅིངས་གྲོལ་དམག་མི་ཡི་སྨན་ཁང་གི་སློབ་གྲྭ་དང་། དེ་བཞིན་རྒྱ་ནག་དཔོན་རིགས་དང་ནང་མི་རྣམས་ཀྱི་སྨན་བཅོས་བྱེད་སའི་སྨན་བཅོས་ཀྱི་དགོས་ངེས་རིགས་ཆ་ཚང་ཚུད་པའི་སྨན་ཁང་ཆེ་ཤོས་ཤིག་ཡིན་འདུག །
གསར་འགོད་པ་བདེ་སྒྲོན།
