ཆེད་བརྗོད།
ནང་པ་སངས་རྒྱས་པའི་གཞུང་ལུགས་ཀྱི་ཐོག་ནས་འཚེ་བ་མེད་པ་ནི་སེམས་ནས་བསམ། ལག་ལེན་དུ་འདེབས་དགོས་ཀྱང་། རང་ཉིད་ཐེ་བས་བཙན་བྱོལ་བོད་མི་ཕལ་མོ་ཆེས་འཚེ་བ་མེད་པ་ནི་ཁ་ཙམ་ལས་དོན་དངོས་ཀྱི་ལག་ལེན་ཐུབ་མིན་བསམ་བློ་གཏོང་མཁན་ཧ་ཅང་དཀོན། བཙན་བྱོལ་བོད་པའི་ངོས་ནས་འཚེ་མེད་དང་མཉམ་དུ་ཞི་བདེ་ཡང་འབྲལ་མེད་ལྟ་བུར་འབོད་པ་དང་། བོད་རྒྱལ་ཁབ་བཙན་འཕྲོག་དང་བོད་མི་འབུམ་བཅུ་གཉིས་ལྷག་དམར་གསོད་གཏོང་མཁན་རྒྱ་དམར་དྲག་པོའི་གཞུང་ལ་འཚེ་བ་མེད་པའི་ལག་ལེན་བསྟར་དགོས་པའི་བསམ་ཚུལ་ཡོད་མཁན་བོད་མི་དཀྱུས་མ་མང་པོ་ཡོད་པ་མ་ཟད། མི་མང་གིས་འོས་འདེམས་བྱས་པ་དང་། རང་མོས་འགོ་ཁྲིད་བཅས་ཀྱི་ནང་རྒྱ་དམར་གཞུང་ལ་འཚེ་མེད་ཞི་བའི་ཐོག་ནས་བསྟུན་མཁས་དང་གུ་ཡངས་བྱེད་དགོས་པ་མ་ཟད། སྙིང་རྗེ་བལྟ་བ་ལས་ཁོང་ཁྲོ་བྱེད་མི་འོས་པའི་བསམ་ཚུལ་ཤོད་མཁན་ནི་ཧ་ཅང་མང་པོ་ཡོད་ཀྱང་། དེའི་རིགས་ཀྱིས་བཙན་བྱོལ་བོད་མི་ནང་ཁུལ་དུ་ཁྱོད་ཤི་ང་གསོན་ཁོ་ན་ལས་འཚེ་མེད་ཞི་བ་དང་མཆམ་མཐུན་ཞེས་པ་འདི་ཚོར་བེད་སྤྱོད་གཏན་ནས་མེད།
དེར་བརྟེན་ནང་པའི་འཚེ་མེད་སེམས་དང་། བོད་པའི་འཚེ་མེད་ཁ་ཞེས་བརྗོད་ན་འོས། བོད་མི་ཕལ་ཆེ་བ་ནང་པ་སངས་རྒྱས་པའི་རྗེས་འབྲངས་ཡིན་པ་དང་། རང་ཉིད་ཀྱི་ངོས་ནས་ཀྱང་ནང་པ་ཡིན་པར་ཡིད་ཆེས་བྱེད་ནའང་། དོན་དངོས་སུ་ནང་པའི་གཞུང་ལུགས་སུ་གསུངས་པ་ཕལ་ཆེ་བ་ལག་ལེན་གྱི་ཐོག་ཏུ་འཁེལ་བར་ནང་པ་མ་ཡིན་པ་དག་ལས་ཀྱང་ཉུང་བའི་ཚོད་དུ་གྱུར་ཡོད་པ་ལྟ་བུ་རེད། དེ་ནི་དད་མོས་ཅུང་ཙམ་ལས་བླང་དོར་གྱི་གནས་ལ་སློབ་སྦྱོང་དང་ཞིབ་འཇུག་བྱེད་མཁན་མེད་པས་རེད། ནང་པ་སངས་རྒྱས་པའི་རྗེས་འབྲངས་ཤིག་ཡིན་ན། དད་མོས་ཡོད་པ་གཞིར་བཞག་གི་ཐོག་ནས་བླང་དོར་གྱི་གནས་ལ་སློབ་སྦྱོང་དང་རྟོག་དཔྱོད་བྱེད་དགོས་པ་དེ་གལ་ཆེ་ཤོས་ཡིན་པ་ལས། རྟོག་དཔྱོད་ཉི་ཚེ་བ་ཙམ་རེ་བྱས་ནའང་།དད་མོས་དང་དགའ་ཞེན་གཏན་ནས་མེད་ན་ལག་ལེན་དངོས་སུ་བསྟར་མི་ཐུབ་ལ།དད་མོས་ཙམ་ཡོད་ནའང་བླང་དོར་གྱི་གནས་ལ་རྨོངས་ན་ཆོས་ཡང་དག་པ་ཞིག་ཡོང་ཐབས་མེད་པས། ནང་ཆོས་ཀྱི་རྗེས་འབྲངས་པ་ཞིག་ཡིན་ན་དད་པ་དང་ཤེས་རབ་གཉིས་ཁ་འབྲལ་ཐབས་མེད་པ་ཞིག་ཏུ་གྱུར་ཡོད།
ད་ལྟའི་དུས་འདིར་བཙན་བྱོལ་བོད་པའི་ངོས་ནས་ནང་པའི་རྗེས་འཇུག་པ་ཡིན་ཞེས་བརྗོད་པ་ཙམ་ལས། དོན་དངོས་སུ་ནང་པ་བྱེད་འདོད་ཆེན་པོ་མེད་ལ། ད་ལྟའི་ཆར་བཙན་བྱོལ་བོད་པའི་དགོན་སྡེེ་ཁག་ཏུ་བོད་མི་ན་གཞོན་ཆོས་སྒོར་ཞུགས་ནས་ནང་ཆོས་སློབ་གཉེར་བྱེད་མཁན་ནི་ཕལ་ཆེར་ཉིན་མོའི་སྐར་མ་ལྟ་བུ་དཀོན་པོར་གྱུར་ཟིན། འདི་ཡང་གཙོ་བོ་ནང་པ་སངས་རྒྱས་པ་ངོ་མ་ཞིག་བྱེད་འདོད་མེད་པས་རེད་ལ། གནས་སྐབས་ཀྱི་ཟས་གོས་གནས་མལ་འགྲིག་ངེས་ཤིག་བྱུང་ན་བུ་རབས་ཚ་བརྒྱུད་ལ་བོད་པ་གཙང་མ་ཞིག་བྱེད་མ་ཐུབ་ཀྱང་། དེ་བློས་གཏོང་ཐུབ་མཁན་ཡང་མང་པོ་ཡོད། གནད་དོན་འདི་ལྟ་བུ་ཞིག་ཏུ་འགྱུར་དགོས་པའི་རྒྱུ་མཚན་ཡང་གཙོ་བོ་སློབ་གསོ་ལ་རག་ལས་ཤིང་། མི་རིགས་དང་རྒྱལ་ཁབ། རིག་གནས་བཅས་ལ་ལར་ཞེན་ཆེ་བའི་མི་རིགས་ཤིག་སྐྱེད་སྲིང་བྱེད་ཐུབ་མིན་ནི་གཙོ་བོ་སློབ་གསོ་ལ་ཐུག་ཡོད། བཙན་བྱོལ་བོད་མི་ལ་མཚོན་ན་གཙོ་བོ་རྒྱལ་ཞེན་གྱི་སློབ་གསོས་མ་འདེང་པ་ནི། ད་ལྟའི་ཆར་རིག་གཞུང་རྒྱུད་འཛིན་དང་། འཐབ་རྩོད་སོགས་གང་ཐད་ནས་འཐུས་ཤོར་གྱི་གཞི་རྩ་གཙོ་བོར་གྱུར་འདུག
འཛམ་གླིང་འཁྲུག་ཆེན་གཉིས་པའི་རྗེས་མི་རིགས་རིང་ལུགས་ཀྱི་བསམ་བློ་ལ་དགག་པ་རྒྱག་མཁན་མང་པོ་བྱུང་བ་དང་། མ་འོངས་པར་འདི་ལ་བརྟེན་ནས་གོ་ལའི་ཁྱོན་འདིར་དཀའ་ངལ་མང་པོ་ཞིག་འཕྲད་ཡོད་པར་ངོས་འཛིན་བྱས་ཡོད། མི་ལོ་བདུན་ཅུ་ཙམ་གྱི་སྔོན་དང་བསྡུར་ན་ད་ལྟ་སླར་ཡང་མི་རིགས་དང་རྒྱལ་ཞེན་གྱི་འབོད་སྒྲ་གོ་ལའི་ཁྱོན་འདིར་མངོན་གསལ་ཆེ་རུ་འགྱུར་བཞིན་པ་དང་། མ་འོངས་པར་གནས་སྟངས་འདི་ལ་འགྱུར་བ་འགྲོ་རྒྱུ་ཡིན་མིན་བཤད་དཀའ་ཡང་། གཞན་ལ་བཙན་འཛུལ་དང་ཐུབ་ཚོད་བཤད་མཁན་གྱི་རྒྱལ་ཁབ་དང་མི་འདྲ་བར། གཞན་གྱི་དབང་བསྒྱུར་འོག་ཡོད་པའི་མི་རིགས་ཉམས་ཆུང་ཞིག་ལ་མཚོན་ན། འཆི་གསོན་གྱི་འགག་རྩ་ལ་ཐུག་པའི་སློབ་གསོ་ནི་རྒྱལ་ཞེན་ཁོ་ན་ལ་ཐུག་ཡོད། རྒྱལ་ཞེན་དང་བྲལ་བའི་སློབ་གསོ་ག་འདྲ་ཞིག་ཡིན་ནའང་། སྙིང་ལ་རུས་པ་བཅུག་ནས་སློབ་སྦྱོང་བྱེད་མི་ཐུབ་པ་དང་། གནས་སྐབས་ཟས་གོས་ཀྱི་དཀའ་ངལ་སེལ་བར་བོད་ཀྱི་རིག་གནས་ལས་མི་རིགས་གཞན་གྱིས་རིག་གནས་ཕན་ཐོགས་ཆེ་བ་ཡོད་པའི་བསམ་ཚུལ་འདི་ཡང་ལས་སླ་པོ་ཞིག་འགོག་ཐབས་མེད།
མདོར་ན་བཙན་བྱོལ་བོད་པའི་སྤྱི་ཚོགས་འདི་ཁ་བཤད་ལག་ལེན་དུ་འཁེལ་མི་ཐུབ་མཁན་དང་། མི་རིགས་དང་རིག་གཞུང་ལས་རང་ཉིད་ཀྱི་ཟས་གོས་གནས་མལ་ཙམ་གཙོ་བོར་འཛིན་མཁན་ཞིག་ཏུ་འགྱུར་བཞིན་ཡོད་པས། ཕྱོགས་གང་ཐད་ནས་གྲུབ་འབྲས་རྒྱ་ཆེན་པོ་ཞིག་འཐོན་རྒྱུའི་རེ་བ་ཆུང་དུ་འགྲོ་བཞིན་ཡོད། རྒྱལ་ཞེན་དང་རིགས་ཞེན་གྱི་སློབ་གསོ་གཞི་རྩར་འཛིན་ཐུབ་ན། རིག་གནས་ཀྱི་ལ་རྒྱ་དང་རྒྱལ་ཁབ་ཀྱི་ལ་རྒྱ་སླེབས་ཐུབ་ལ། འཐབ་རྩོད་དང་རིག་གནས་བདག་པོ་རྒྱག་ཐུབ་པར་ཡང་རྒྱལ་ཞེན་དང་རིགས་ཞེན་གཙོ་བོར་གྱུར་ཡོད། དེ་མ་ཡིན་པའི་འགྲོ་བ་མིའི་ཐོབ་ཐང་སོགས་སྤྱིར་བཏང་གི་གནས་སྟངས་རྣམས་རྩོད་རྒྱུའི་བསམ་བློ་ནི། མིའི་སྤྱི་ཚོགས་སྤྱི་ལ་འཕྲད་པའི་དཀའ་ངལ་ཞིག་ཡིན་པ་ལས། བོད་པ་གཅིག་པུར་འཕྲད་པའི་དཀའ་ངལ་ཞིག་གཏན་ནས་མིན། དེར་བརྟེན་གནའ་དེང་གི་ཤེས་ཡོད་པའི་ཐོག་རྒྱལ་ཞེན་དང་རིགས་ཞེན་གྱི་བསམ་བློ་ཡག་པོ་ཞིག་བསྐྲུན་མ་ཐུབ་ན། རིམ་པས་དགྲ་སུ་ཡིན་དང་། གཉེན་སུ་ཡིན། མགོན་སུ་ཡིན་བཅས་གཏན་ནས་མི་ཤེས་མཁན་དུ་གྱུར་ནས་རྩ་དོན་འཐབ་རྩོད་དེ་གཏན་ནས་ཡོང་མི་སྲིད་པ་རེད།།
