རྒྱལ་སྤྱིའི་ནང་པའི་ལྷན་ཚོགས་སུ་ཆིབས་བསྒྱུར་དང་བཀའ་སློབ་བཀའ་དྲིན་བསྩལ།
ཟླ་འདིའི་ཚེས་༢༡ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལིར་ཚོགས་བཞིན་པའི་རྒྱལ་སྤྱིའི་ནང་པའི་ལྷན་ཚོགས་ཐེངས་དང་པོའི་ཉིན་གཉིས་པའི་ཚོགས་མགོན་དུ་ཆིབས་བསྒྱུར་གྱིས་བཀའ་སློབ་བཀའ་དྲིན་བསྩལ་སོང་།

སྐབས་དེ་༧གོང་ས་མཆོག་གིས་ང་ཚོའི་བསམ་བློའི་འགྲོ་སྟངས་ཀྱི་ཐོག་ནས་ང་ཞེས་ཧ་ཅང་རྩ་ཆེན་པོ་རྩི་དུས། དེ་དང་འབྲེལ་ནས་གཉེན་གྱི་ཕྱོགས་ལ་ཆགས་སེམས་སྐྱེ་ཞིང་། ང་ལ་ཕྲན་བུ་མ་འགྲིག་པ་བཟོ་མཁན་དེར་དགྲ་བོའི་འདུ་ཤེས་བཞག་ནས་སེམས་ནས་སྡང་སེམས་བཟུང་སྟེ་ཆགས་སྡང་གཉིས་ཡོང་གི་ཡོད་པ་དེ་གཙོ་བོ་ངར་འཛིན་པའི་བློ་དེས་ཡོང་གི་ཡོད་ཅེས་དང་། དེ་བཞིན་ངོས་རང་ལ་དཔེ་བཞག་ན། ལོ་བརྒྱད་ཅུ་ནང་ལ་སླེབས་ཡོད་ཀྱང་། ད་ལྟ་ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་དུས་རེ་བ་ཞིག་སླེབས་ཀྱི་འདུག ཚེ་འདི་ལ་མཐོང་ལམ་ཁག་པོ་ཡིན་འགྲོ སྦྱོར་ལམ་ཐོབ་ཀྱི་རེད་བསམ་པའི་བློ་ལ་ཚོད་དཔག་ཐེབས་ཀྱི་འདུག ངོས་ཀྱིས་ཆུང་དུས་ནས་ལྷའི་རྣལ་འབྱོར་འཇིག་བྱེད་ལྟ་བུ་སྒོམ་གྱི་ཡོད། སེམས་ལ་ངོ་ཐོག་འགྱུར་བ་གཏོང་མཁན་དེ་བཤད་མ་ཐག་པའི་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་དེ་རེད་འདུག ཁྱེད་རང་ཚོ་ཆོས་གྲོགས་རྣམ་པ་ཚོས་ཀྱང་སྒོམ་བརྒྱབ། བསམ་བློ་བཏང་ནས་རིམ་པས་སེམས་མ་རུང་བ་དེ་ཞི་ཞིང་དུལ་བ་ཆགས། ཟབ་མོ་དེ་ཁོ་ན་ཉིད་ཀྱི་དོན་ལ་བློ་ཇེ་ཉེར་འགྲོ་ཐུབ་པར་བྱ་དགོས། ངོས་ཀྱིས་ལོ་ངོ་དེ་དག་གི་རིང་སྒོམ་འགའ་རབ་བརྒྱབ་ཡོད། ཁྱེད་རང་ཚོས་ཀྱང་དེ་ལྟར་ཟབ་པ་དང་རྒྱ་ཆེ་བའི་ཆོས་ལ་ཉིན་རེ་བཞིན་དུ་བསམ་བློ་བཏང་ནས་ཕྱིན་ན་འགྱུར་བ་ཏན་ཏན་འགྲོ་གི་རེད། ཁྱེད་ཚོས་དཔྱད་འཇོག་ཟུང་འབྲེལ་ཐོག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་རྒྱུར་ཚང་མས་ཤུགས་སྐྱོན་ནས་ཧུར་ཐག་གནང་ཤོག་ཅེས་དང་།
ང་ཚོ་བོད་པའི་གནས་སྟངས་ལ་ཧོབ་དེ་བལྟས་ན་གནས་ཚུལ་སྐྱོ་བོ་ཞིག་ཆགས་ཡོད་ཀྱང་། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཕྲན་བུ་ཡོད་པའི་ཐོག་རྐྱེན་ངན་བྱང་ཆུབ་ཀྱི་ལམ་དུ་སྒྱུར་ཤེས་མཁན་ཞིག་ཡོད་ན། ཇི་ཙམ་རྐྱེན་ངན་མང་བ་བྱུང་བའི་ཚོད་ཀྱིས་སེམས་ལ་བློ་སྐྱེད་ཡོང་རྒྱུ་དང་། རྣམ་མཁྱེན་སྒྲུབ་རྒྱུའི་རྒྱུ་ལ་ཇེ་ཉེ་འགྲོ་རྒྱུ་ཡོང་། དེར་བརྟེན། ཚང་མས་བསམ་བློ་གཏོང་སྟངས་ཀྱི་ཐོག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཤུགས་རྒྱག་རྒྱུ་ཧ་ཅང་གལ་ཆེན་པོ་རེད། རྐྱེན་ངན་བྱང་ཆུབ་ཀྱི་ལམ་དུ་སྒྱུར་ཤེས་ན་ང་ཚོའི་དཀའ་ངལ་ཚང་མ་སེལ་ཐུབ། ངོས་རང་ལ་ཆ་བཞག་ན་མདོ་སྨད་ས་མཐར་སྐྱེས་པའི་མི་ཞིག་ཆགས་ཡོད། ཆུང་དུས་ནས་ལྷ་སར་སླེབས་ཏེ་གཞུང་དེ་དག་ལ་སློབ་གཉེར་བྱས། བཙན་བྱོལ་དུ་སླེབས་པའི་རྗེས་སུའང་གཞུང་དེ་དག་ལ་བསམ་བློ་ཧ་ཅང་བཏང་ཡོད། བློ་ལ་ཧ་ཅང་ཕན་པོ་ཡོད་པ་མིག་མཐོང་ལག་ཟིན་བྱུང་། བློ་སྦྱངས་ཞེས་པའི་རྒྱུ་མཚན་དེ་སོ་སོའི་ཁེ་ཕན་ཡག་ཤོས་དེ་བློ་སྦྱངས་པའི་ཐོག་ནས་ཡོང་གི་ཡོད་པས་ཡིན། ཚང་མས་ཧུར་ཐག་གནང་རོགས་གནང་ཞུ་རྒྱུ་ཡིན།དེ་རིང་འདིར་སངས་རྒྱས་པའི་ཆོས་ཀྱི་སྐོར་ཚོགས་ཀྱི་ཡོད་པ་རེད། སྤྱིར་ཆོས་ལུགས་ཚང་མ་མི་ལ་ཕན་ཐོགས་ཡོད་པ་ཧ་ཅང་ཡག་པོ་རེད། འོན་ཀྱང་། སེམས་དཔྱད་འཇོག་ཟུང་སྦྲེལ་ཐོག་ནས་ཟབ་པ་དང་རྒྱ་ཆེ་བའི་ཆོས་ཚུལ་ལ་བསམ་བློ་གཏོང་རྒྱུ་ཡོད་པ་དེ་ནང་པའི་ཆོས་ཀྱི་ཁྱད་ཆོས་ཆགས་འདུག འདི་ལྟ་བུའི་ཆོས་ཚུལ་འདི་ང་ཚོའི་ཕ་མེས་ནས་བརྒྱུད་པའི་ཆོས་ཚུལ་ཆགས་ཀྱི་ཡོད། དེ་རིན་ཐང་ཅན་ཞིག་ཡིན་པ་ངོ་ཤེས་པའི་ཐོག་ཅི་ཐུབ་ཀྱིས་ཉམས་ལེན་བྱས་ཏེ་ཤུགས་སྒྲིལ་ན། འཛམ་གླིང་སྒང་ལ་ཆོས་ལུགས་མེད་པའང་ཡོད་པ་དང་། ཆོས་ལུགས་འདྲ་མིན་ཡོད། མིག་སྔར་སངས་རྒྱས་པའི་ཆོས་ཉམས་ལེན་བྱེད་མཁན་དེ་དག་ཁ་ཡོད་ལག་ཡོད་ཀྱིས་གྲུབ་འབྲས་དགའ་རབ་མཐོང་རྒྱུ་འདུག་བསམ་པ་བྱུང་ན་བསྟན་པའི་ཞབས་འདེགས་སྒྲུབ་པ་རེད། སྟོན་པའི་བཀའ་དྲིན་གསབ་པ་རེད། དེ་ལ་ཚང་མས་དགོངས་པ་བཞེས་ཏེ་ཧུར་ཐག་གནང་ཤོག་ཅེས་བཀའ་སློབ་བསྩལ་འདུག
རྒྱ་གར་དབུས་གཞུང་རིག་གཞུང་ལྷན་ཁང་དང་རྒྱལ་སྤྱིའི་ནང་པའི་ལྷན་ཚོགས་ཟུང་སྦྲེལ་གྱིས་འཛམ་གླིང་སྟོབས་ཆེན་རྒྱལ་ཁབ་ཉི་ཤུའི་ཚོགས་འདུའི་ཆ་ཤས་སུ་གོ་སྒྲིག་ཞུས་པའི་རྒྱལ་སྤྱིའི་ནང་པའི་ལྷན་ཚོགས་ཐེངས་དང་པོའི་ཐོག་འཛམ་གླིང་རྒྱལ་ཁབ་གསུམ་བཅུ་ཙམ་ནས་ནང་པའི་བླ་ཆེན་དང་། གསུང་བཤད་པ། གཞུང་ཚབ་ཆེན་མོ་སོགས་ཚོགས་བཅར་བ་དྲུག་བརྒྱ་ལྷག་མཉམ་ཞུགས་ཀྱིས་ནང་པའི་ཆོས་ཐོག་ནས་དེང་རབས་ཀྱི་དཀའ་ངལ་ལ་གདོང་ལེན་བྱེད་ཕྱོགས་ཇི་དགེའི་ཐོག་བགྲོ་གླེང་དང་བཀའ་བསྡུར་གནང་ཡོད་འདུག།
གསར་འགོད་པ། བློ་བཟང་རྒྱ་མཚོ།