རྒྱལ་སྤྱིའི་བོད་རྒྱ་མཐུན་ཚོགས་ཀྱི་ཚོགས་ཆེན་ཐེངས་དང་པོའི་ཡོངས་ཁྱབ་བསྒྲགས་གཏམ།

ཟླ་འདིའི་ཚེས་༢༢ ནས་ཉིན་གསུན་རིང་ཐའེ་ཝན་རྒྱལ་ས་ཐའེ་པེ་རུ་རྒྱལ་སྤྱིའི་བོད་རྒྱ་མཐུན་ཚོགས་ཐེངས་དང་པོ་དེ་བསྐོང་ཚོགས་གནང་ཡོད་པ་དང་། ཐེངས་འདིར་ཚོགས་ཞུགས་གནང་མཁན་ཁོངས་ཨ་རི་དང་། ཨོ་སི་ཊོ་ལི་ཡ། ཡུ་རོབ། ནིའུ་ཛི་ལན་ཌི། ཨི་སི་རལ། སི་པན། རྒྱ་གར། ཧོང་ཀོང་། ཐེ་ཝན་སོགས་ཡུལ་གྲུ་འདྲ་མིན་ནས་བོད་རྒྱའི་མི་རིགས་ཁྱོན་མི་གྲངས་བརྒྱ་དང་ལྔ་བཅུ་ལྷག་མཉམ་འཛོམས་བྱས་ཡོད་པ་རེད།

0001
tibet.net

ཚོགས་ཆེན་ཉིན་མཐའ་མའི་ཐོག་ཡོངས་ཁྱབ་བསྒྲགས་གཏམ་ཞིག་སྤེལ་ཡོད་པ་དང་། དེ་ཡང་རྒྱ་གཞུང་གི་དབང་སྒྱུར་འོག་བོད་ཀྱི་སྐྱེ་ཁམས་ཁོར་ཡུག་དང་། ཆོས་དང་རིག་གཞུང་། འགྲོ་བ་མིའི་ཐོབ་ཐང་བཅས་ཀྱི་གནས་སྟངས་རྒྱུན་མཐུད་ཉམས་དམས་སུ་འགྲོ་བཞིན་པར་བརྟེན། ཕྱི་ལོ་ ༢༠༡༦ ལོར་འཛམ་གླིང་ཡུལ་གྲུ་གང་ས་ནས་ཡོང་བའི་བོད་རིགས་དང་། རྒྱ་རིགས་ཀྱི་ཚོགས་སྡེ། ཆེད་ལས་མཁས་པ་བཅས་ཐའེ་ཝན་དུ་ལྷན་འཛོམས་ཀྱིས་རྒྱལ་སྤྱིའི་བོད་རྒྱ་མཐུན་ཚོགས་ཀྱི་ཚོགས་ཆེན་ཐེངས་དང་པོ་བསྐོང་ཚོགས་གནང་ཡོད།

ཐེངས་འདིའི་ཚོགས་ཆེན་ཐའེ་ཝན་དུ་བསྐོང་ཚོགས་གནང་བ་ལྟར། ཚང་མས་ཐའེ་ཝན་གྱི་མང་གཙོའི་ཉམས་མྱོང་ལ་གཅེས་སྤྲས་དང་། རྒྱ་གཞུང་གིས་ཐའེ་ཝན་གྱི་རང་དབང་མང་གཙོ་དང་། རྒྱལ་སྤྱིའི་ཁོར་ཡུག་ཐོག་གནོན་བཙིར་བྱས་པ་ལ་མཐའ་གཅིག་ཏུ་འགོག་རྒོལ་བྱ་རྒྱུའི་འབོད་སྐུལ་ཞུ་རྒྱུ། དངོས་དོན་འཚོལ་ཞིབ་དང་། ཁོར་ཡུག་སྲུང་སྐྱོབ། ཁྲིམས་སྲིད་མངོན་གྱུར། ཕན་ཚུན་གྲོས་མོལ་བྱ་རྒྱུ་ནི་ཐེངས་འདིའི་ཚོགས་ཆེན་ཐོག་ཐུན་མོང་གིས་ངོས་འཛིན་བྱས་པའི་རིན་ཐང་གི་ལྟ་བ་ཡིན་པ་དང་། འདི་ནི་མ་འོངས་ལས་དོན་བྱེད་སྐབས་ངེས་པར་དུ་བརྩི་སྲུང་ཞུ་དགོས་པའི་གཞི་རྩའི་རྩ་དོན་ཞིག་ཀྱང་ཡིན།

ཚོགས་འདུའི་ཐུན་མོང་གི་ངོས་འཛིན་ནི།

༡) ལོ་རྒྱུས་ཀྱི་དངོས་དོན་གཞིར་བཟུང་བ་ཡིན་ན། བོད་ནི་ལོ་རྒྱུས་ཐོག་རང་བཙན་གྱི་རྒྱལ་ཁབ་ཅིག་ཡིན།
༢) མི་རིགས་རང་ཐག་རང་གཅོད་ནི་བོད་མིའི་ལྷན་སྐྱེས་ཀྱི་ཐོབ་ཐང་ཡིན།
༣) བོད་མིར་མིང་དོན་མཚུངས་པའི་རང་སྲིད་རང་སྐྱོང་མངོན་འགྱུར་བྱ་རྒྱུ་ནི་རྒྱ་ནག་གི་ཁྲིམས་སྲིད་སྤོ་སྒྱུར་གྱི་གྲུབ་ཆ་གལ་ཆེན་ཞིག་ཡིན།
༤) རྒྱ་གཞུང་གིས་ ༢༠༡༥ ལོར་བོད་ལྗོངས་འཕེལ་རྒྱས་འགྲོ་ལམ་གྱི་ལོ་རྒྱུས་ཀྱི་གདམ་ག་ཞེས་པའི་རྒྱབ་ཤ་དཀར་པོའི་དེབ་འདོན་སྤེལ་བྱས་ཏེ། དབུ་མའི་ལམ་ལ་འགྲེལ་ལོག་དང་དགག་གཞག་བྱས་པ་དེར་ཚོགས་ཆེན་འདིའི་ཐོག་ནས་སུན་འབྱིན་བྱ་རྒྱུ་དང་། ༸གོང་ས་ཏཱ་ལའི་བླ་མ་མཆོག་དང་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་ཞུ་རྒྱུ་ཡིན།
༥) རྒྱ་ནག་གཞུང་གིས་བོད་ཀྱི་གནད་དོན་ནི་ཁོ་པའི་ནང་སྲིད་ཀྱི་གནད་དོན་ཁོ་ན་ཡིན་ཟེར་བ་དེར་ང་ཚོས་ངོ་རྒོལ་བྱ་རྒྱུ་དང་། བོད་ཀྱི་འགྲོ་བ་མིའི་ཐོབ་ཐང་དང་། ཆོས་དང་རིག་གཞུང་། སྐད་ཡིག སྐྱེ་ཁམས་ཁོར་ཡུག་སོགས་ཀྱི་གནད་དོན་ལ་དོ་ཁུར་བྱ་རྒྱུ་ནི་རྒྱལ་སྤྱིའི་སྤྱི་ཚོགས་ཀྱི་ཐོབ་ཐང་ཡིན་པ་མ་ཟད། རྒྱལ་སྤྱིའི་སྤྱི་ཚོགས་ཀྱི་འགན་ཁུར་ཞིག་ཀྱང་ཆགས་ཡོད།

རྒྱལ་སྤྱིའི་སྤྱི་ཚོགས་ལ་འབོད་སྐུལ།

༡) མཉམ་འབྲེལ་རྒྱལ་ཚོགས་དང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གི་ལྟ་སྐུལ་འོག རྒྱ་ནག་གཞུང་གིས་༸གོང་ས་ཏཱ་ལའི་བླ་མ་མཆོག་དང་། བོད་མིའི་སྒྲིག་འཛུགས་ལྷན་བོད་ཀྱི་གནད་དོན་ཐད་ཡོངས་བསྒྲགས་ཐོག་གྲོས་མོལ་བྱ་རྒྱུའི་སྐུལ་འདེབས་བྱ་རྒྱུ།
༢) བོད་ཀྱི་སྐྱེ་ཁམས་སྲུང་སྐྱོབ་ནི་འགྲོ་བ་མི་ཡོད་དོ་ཅོག་གི་སྐྱེ་ཁམས་ཁོར་ཡུག་དང་། མ་འོངས་བདེ་རྩར་ཐད་ཀར་འབྲེལ་བ་ཆགས་ཡོད་སྟབས། རྒྱལ་སྤྱིའི་སྤྱི་ཚོགས་ནས་ཐུན་མོང་ཐོག་དོ་ཁུར་གནང་རྒྱུར་འབོད་སྐུལ་ཞུ་རྒྱུ།
༣) རང་དབང་གི་རྟོག་ཞིབ་ཚོགས་པ་ཞིག་བཙུགས་ཏེ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་བཙོན་ཁང་དུ་འདས་གྲོངས་ཕྱིན་པའི་རྒྱུ་རྐྱེན་དང་། བོད་མི་ཆབ་སྲིད་བཙོན་པར་སྡུག་སྦྱོང་མནར་གཅོད་དང་། བཙོན་འཇུག་བཀག་ཉར་བྱ་ཡུལ་ཁག་ཏུ་འདས་གྲོངས་སུ་གྱུར་པའི་དངོས་ཡོད་གནས་ཚུལ་ལ་རྟོག་ཞིབ་བྱེད་དགོས།

རྒྱ་ནག་གཞུང་ལ་འབོད་སྐུལ།

༤) བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ལམ་ལུགས་ནི་བོད་ཀྱི་རིག་གཞུང་གི་གྲུབ་ཆ་ཞིག་ཡིན་པ་དང་། རྒྱ་ནག་གཞུང་གིས་ཡང་སྲིད་ངོས་འཛིན་གྱི་གནད་དོན་ཐོག་ཡ་ང་བག་ཚ་མེད་པའི་ཐེ་བྱུས་བྱེད་པ་ལ་ངོ་རྒོལ་བྱ་རྒྱུ། ༸གོང་ས་ཏཱ་ལའི་བླ་མ་མཆོག་གི་སྐུའི་ཡང་སྲིད་ཀྱི་གནད་དོན་ཐག་གཅོད་གནང་རྒྱུའི་སྐུ་དབང་ནི་༸གོང་ས་ཏཱ་ལའི་བླ་མ་མཆོག་སྐུ་སྒེར་ཁོ་ནར་ཡོད།
༥) རྒྱ་གཞུང་གིས་༸ཀུན་གཟིགས་པཎ་ཆེན་རིན་པོ་ཆེ་དང་། བོད་ཀྱི་ཆབ་སྲིད་བཙོན་པ་ཡོངས་རྫོགས་འཕྲལ་དུ་གློད་གྲོལ་གཏོང་དགོས།
༦) དཔལ་འབྱོར་གསར་སྤེལ་གྱིས་བོད་ཀྱི་སྐྱེ་ཁམས་ཁོར་ཡུག་གཏོར་བཤིག་གཏོང་མི་རུང་བ་དང་། སྲིད་བྱུས་ཐག་གཅོད་ཀྱི་བརྒྱུད་རིམ་ནང་བོད་མིའི་ཁེ་དབང་དང་འདོད་མོས་ལ་ངེས་པར་དུ་བསམ་ཞིབ་ནན་ཏན་བྱ་དགོས།
༧) བོད་ཀྱི་འབྲོག་པའི་འཚོ་བ་སྐྱེལ་སྟངས་ལ་བརྩི་བཀུར་དགོས་པ་ལས། ཡར་རྒྱས་ཀྱི་བརྒྱུད་རིམ་ཁྲོད་འབྲོག་པ་རྣམས་སྐྱེ་ཁམས་ཀྱི་ཡུལ་གྱར་བ་གཏན་ནས་བཟོ་མི་རུང་།
༨) བོད་མི་རིགས་ཀྱི་སྐད་ཡིག་ལ་ངེས་པར་དུ་བརྩི་བཀུར་དང་སྲུང་སྐྱོབ་བྱེད་དགོས་པ་དང་། བོད་ཀྱི་མང་ཚོགས་འདུ་གནས་ཁག་དང་གཞུང་དོན་བྱེད་སྒོ་ཡོངས་རྫོགས་ནང་བོད་ཀྱི་སྐད་ཡིག་དེ་གཞུང་འབྲེལ་སྐད་ཡིག་དང་པོར་འཇོག་དགོས།
༩) བོད་ཀྱི་སྐད་ཡིག་དང་ལོ་རྒྱུས་ཀྱི་སློབ་དེབ་རྩོམ་སྒྲིག་བྱེད་སྐབས། མི་རིགས་རང་ཉིད་ཀྱི་ལོ་རྒྱུས་དང་རིག་གཞུང་གི་ནང་དོན་ངེས་པར་དུ་མངོན་ཐུབ་པ་བྱ་དགོས།

བོད་མིའི་སྒྲིག་འཛུགས་ལ་འབོད་སྐུལ།

༡༠) བོད་མིའི་སྒྲིག་འཛུགས་ཀྱིས་ལོ་ལྟར་བོད་ཡིག་དང་། ཨིན་ཡིག རྒྱ་ཡིག དེ་བཞིན་སྐད་ཡིག་གཞན་གྱི་ཐོག་འབྲི་རྩོམ་བྱས་པའི་དཔེ་དེབ་གྲངས་འབོར་གྲངས་བཤེར་གནང་བ་དང་དུས་མཚུངས་སུ། བོད་ཡིག་ཐོག་རྩོམ་འབྲི་ལ་སྐུལ་སློང་གནང་གལ།
༡༡) འཛམ་གླིང་བོད་བརྒྱུད་ནང་བསྟན་གྱི་ཚོགས་ཆེན་བསྐོང་ཚོགས་གནང་སྟེ། བོད་བརྒྱུད་ནང་བསྟན་ཆོས་ཚོགས་དབར་འབྲེལ་མཐུད་དང་། མཉམ་རུབ་ལ་ཤུགས་སྣོན་གནང་རྒྱུ།
༡༢) བོད་རྒྱའི་དབར་གྲོས་བསྡུར་གྱི་ཚོགས་འདུ་མུ་མཐུད་བསྐོང་ཚོགས་གནང་རྒྱུ།

གཞུང་འབྲེལ་མིན་པའི་ཚོགས་སྡེ་ཁག་ལ་འབོད་སྐུལ།

༡༣) འགྲོ་བ་མིའི་བཟང་སྤྱོད་ཀྱི་ལངས་ཕྱོགས་ཐོག་ནས་བོད་མིའི་རང་ལུས་མེར་སྲེག་གི་འཐབ་རྩོད་གནང་སྟངས་མཚམས་འཇོག་ཡོང་བའི་འབོད་སྐུལ་ཞུ་རྒྱུ།
༡༤) དྲྭ་རྒྱའི་བརྒྱུད་ལམ་གང་ཐུབ་བེད་སྤྱོད་བྱས་ཏེ་བོད་ཀྱི་དངོས་ཡོད་གནས་སྟངས་དང་། རང་དབང་མང་གཙོའི་ལྟ་གྲུབ་ཁྱབ་སྤེལ་དང་། རྒྱ་ནག་མི་དམངས་ཀྱི་བསམ་བློ་བརྗེ་བསྒྱུར་དང་གོ་རྟོགས་སྤེལ་རྒྱུར་སྐུལ་འདེད་བྱ་རྒྱུ།
༡༥) རྒྱ་གཞུང་གིས་བོད་ནང་མི་སེར་སྤེལ་ཡུལ་རིང་ལུགས་དང་། རིག་གཞུང་རྩ་གཏོར་གྱི་སྲིད་བྱུས་ལག་བསྟར་བྱེད་པ་བཀག་འགོག་བྱ་རྒྱུ།
༡༦) རྒྱལ་སྤྱིའི་བོད་རྒྱ་མཛའ་འབྲེལ་ཚོགས་པའི་འབྲེལ་མཐུད་བྱ་ཡུལ་བཙུགས་ཏེ་ལས་འཆར་ཁག་ལག་བསྟར་ལ་མཐུན་འགྱུར་སྦྱར་རྒྱུ། །