རྙིང་མའི་དབུ་འཛིན་ཀཿ ཐོག་དགེ་རྩེ་རིན་པོ་ཆེ་སྐུ་གཤེགས།

ཟླ་འདིའི་ཚེས་༡༩ ཉིན་རྙིང་མའི་དབུ་འཛིན་ཁྲི་རབས་བདུན་པ་ཀཿ ཐོག་དགེ་རྩེ་རིན་པོ་ཆེ་བལ་ཡུལ་གྱི་གནས་མཆོག་ཡང་ལེ་ཤོད་དུ་སྐུ་གཤེགས་པ་ཡོད་པ་དང་། ཉིན་དེའི་ཞོགས་པར་རྐང་ལམ་བརྒྱུད་ཞབས་ཐང་ལ་ཕེབས་སྐབས་སུ། གློ་བུར་དུ་ལམ་འཕྲང་མི་བདེ་སར་ཕེབས་པའི་ཕེབས་ལམ་ནས་ཞབས་སྣེ་འདྲེད་པའི་རྐྱེན་བྱས་ཏེ་གློ་བུར་སྐུ་གཤེགས་ཡོད་འདུག

དེ་ཡང་ཞག་གསུམ་རིང་གསང་རྒྱ་བྱས་པ་དང་། ཟླ་འདིའི་ཚེས་༢༢ ཉིན་༧སྐྱབས་རྗེ་ཀཿ ཐོག་དགེ་རྩེ་རིན་པོ་ཆེ་མཆོག་གི་འདས་མཆོད་གོ་སྒྲིག་ཚོགས་ཆུང་ནས་སྤེལ་བའི་གནས་ཚུལ་ནང་། སྐུ་མ་གྲོངས་པའི་སྔ་ཉིན་དེེར་རིན་པོ་ཆེས་ཁོང་གི་དངོས་སློབ་དད་པ་དམ་ཚིག་གཙང་ཞིང་ཐུགས་གཙིགས་ཤིན་ཏུ་ཆེ་བའི་ཞབས་ཏོག་པ་རི་ཁྲོད་པ་བླ་མ་གོང་འཕེལ་དང་། རི་ཁྲོད་པ་བླ་མ་གུ་རུ་གཉིས་ལ་ཁོང་གིས་དངོས་སུ་གསུངས་པ་འདིར་མདོར་བསྡུས་ཙམ་ཞིག་ཞུས་ན་མི་རྟག་པའི་གཏམ་དང་འབྲེལ་ནས་༼  སང་ཉིན་ང་ཤི་འདུག་ཡོད་ན་གུ་རུ་ཁྱེད་གཉིས་ཀས་ཤིང་ཨེ་རག་མི་ཤེས་སྣུམ་ཉོས་ནས་ཕ་གའི་རི་སྒང་དུ་མེ་བསྲེག་གཏོང་དགོས་ ༽ ཞེས་དང་། ཕྱི་ཉིན་ཞོགས་པ་བླ་མ་གོང་འཕེལ་དང་མཉམ་དུ་རིན་པོ་ཆེའི་ཐུགས་དགོངས་ནང་བཞིན་རྐང་ལམ་བརྒྱུད་ཞབས་ཐང་ཕེབས་སྐབས་སུ། གློ་བུར་དུ་ལམ་འཕྲང་མི་བདེ་སར་ཕེབས་པ་ན། ཁོང་གི་ཞབས་ཏོག་པ་གོང་འཕེལ་གྱིས་རིན་པོ་ཆེ་འདི་ནས་མ་ཕེབས་མ་གཏོགས་ལམ་ཁ་མི་འདུག་ཅེས་ཞུས་ཚེ། ༼  ཁྱོད་ནི་སྙིང་རྗེ་སྡུག་ལྡན་གྱི་ཕུང་པོ་འདི་ལ་ཅི་འདྲའི་ཞེན་ཆགས་ཆེན་པོ་ཞིག་རེད་འདུག་ཨ་ ༽ ཞེས་སོགས་གསུང་བཞིན་ཤར་རྒྱག་ཕེབས་མཚམས་ཆུ་ཚོད་བཅུ་གཅིག་དང་ཕྱེད་ཀ་ཡས་མས་སུ་ཕེབས་ལམ་ནས་ཞབས་སྣེ་འདྲེད་པའི་རྐྱེན་བྱས་ཏེ་གློ་བུར་དུ་གཟུགས་སྐུའི་བཀོད་པ་ཆོས་དབྱངས་སུ་བསྡུས་པའི་ཚུལ་བསྟན་ཡོད་འདུག

སྐྱབས་རྗེ་ཀཿ ཐོག་དགེ་རིན་པོ་ཆེ་ནི། ཕྱི་ལོ་༡༩༥༤ ལོར་མགོ་ལོག་རྡོ་ཡུལ་མཁར་ནང་གོང་མའི་ལྷ་ཁང་སུམ་མདོ་རུ་ཡབ་བློ་ལྡན་ཕུན་ཚོགས་དང་ཡུམ་ཆོས་འཕགས་སྒྲོལ་གཉིས་ཀྱི་སྲས་སུ་སྐུ་འཁྲུངས། ཨ་ཛོམ་རྒྱལ་སྲས་དང་། རྫོང་སར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། ཀརྨ་པ་རིག་པའི་རྡོ་རྗེ་སོགས་ནས་ངོས་འཛིན་གནང་བ་བཞིན་ཤར་རྒྱལ་བ་ཀཿཐོག་དགོན་དུ་ཕྱི་ལོ་༡༩༨༠ ལོར་ཁྲི་འདོན་མཛད་སྒོ་སྤེལ། རིམ་པར་སྤྲུལ་སྐུ་ཉི་ཟླ་དང་། མཁན་ཆེན་འཇིགས་མེད་ཕུན་ཚོགས། ཀཿ ཐོག་མཁན་རྒན་རྒྱལ་མཚན་ནོར་བུ། རྨོག་ཚ་རིན་པོ་ཆེ། ཨ་འཛོམ་འབྲུག་པ་སོགས་ཀྱི་མདུན་དབང་ལུང་གིས་ཐུགས་རྒྱུད་ཡོངས་སུ་འགང་བར་བྱས། ཕྱི་ལོ་༡༩༩༧ ལོར་འཕགས་ཡུལ་དུ་ཕེབས་པ་དང་། ༧གོང་ས་མཆོག་དབུས། འཁྲུལ་ཞིག་རིན་པོ་ཆེ། རྩེ་སྤྲུལ་རིན་པོ་ཆེ། གྲུབ་དབང་པད་ནོར་རིན་པོ་ཆེ་སོགས་ཀྱི་མདུན་དབང་ལུང་གདམས་ངག་མང་པོ་ཞུས་ཤིང་། འཕགས་པའི་གནས་ཆེན་རྣམས་སུ་སྐུ་འཚམས་ལ་ཡུན་རིང་བཞུགས་ཀྱི་ཡོད་པ་དང་། བར་འཚམས་རྣམས་སུ་འཛམ་གླིང་ཤར་ནུབ་སུ་ཕེབས་ནས་བརྒྱུད་པའི་དབང་ལུང་འཆད་སྤེལ་མཛད་ཀྱིན་ཡོད་པ་རེད། ཕྱི་ལོ་༢༠༡༨ ཟླ་༡ པོའི་ཚེས ༢༤ དང་། བོད་ཟླ་༡༢ པའི་ཚེས་༧ ཉིན་གནས་མཆོག་རྡོ་རྗེ་གདན་དུ་སྔ་འགྱུར་རྒྱལ་ཡོངས་རྙིང་མའི་སྨོན་ལམ་ཆེན་མོ་སྐབས་༢༩ པ་འཚོགས་བཞིན་པའི་ལས་ཉིན་བརྒྱད་པའི་ཐོག ཀཿཐོག་དགེ་རྩེ་རིན་པོ་ཆེ་རྙིང་མའི་དབུ་འཛིན་ཁྲི་རབས་བདུན་པར་བསྐོ་བཞག་ཞུས་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།