ཆེད་བརྗོད།
བཙན་བྱོལ་བོད་པའི་སྤྱི་ཚོགས་འདི་ལ་མཚོན་ན་གནས་ཡུལ་གཞུང་གི་ཁྲིམས་ལུགས་ཀྱི་ཐོག་ནས་དཀའ་ངལ་འཕྲད་པ་མ་ཡིན་པར། བཙན་བྱོལ་བོད་མི་རང་ངོས་ནས་བཅའ་ཁྲིམས་སྦོ་ལུག་ནས་གོམ་པ་རྒྱག་ཐབས་མེད་པའི་དཀའ་ངལ་ཆེ་ཤོས་དེ་འཕྲད་ཡོད། བཙན་བྱོལ་བོད་མིའི་བཅའ་ཁྲིམས་གྱིས་གཙོས་ཁྲིམས་སྒྲིག་ཁག་ནི། གང་ཟག་གི་དབང་སྒྱུར་མ་ཡིན་པར་ཁྲིམས་ཀྱི་དབང་སྒྱུར་ཚད་ལྡན་གྱི་ལམ་ཁ་ཞིག་ཏུ་བསྐྱོད་ཐུབ་པ་དང་། དེ་ལ་བརྟེན་ནས་སྤྱི་ཚོགས་འདི་ཉིད་མང་གཙོའི་ལམ་ལུགས་བཞིན་དྲང་བདེན་མཉམ་གནས་ཀྱི་སྤྱི་ཚོགས་ཤིག་ཏུ་བསྒྱུར་ཐུབ་པའི་ཆེད་དུ་དམིགས་པ་འབའ་ཞིག་རེད། འོན་ཀྱང་ཁྲིམས་སྒྲིག་ཁག་གཏན་འབེབས་བྱེད་པའི་སྐབས་དང་། བསྐྱར་བཅོས་བྱེད་སྐབས་ཕུགས་རྒྱང་རིང་པོའི་དཀའ་ངལ་སེལ་ཐུབ་པའི་བསམ་བློ་གཏོང་མ་ཐུབ་པ་དང་། སྒྲིག་འཛུགས་དང་སྤྱི་ཚོགས་ལས་གང་ཟག་གཙོ་བོར་འཛིན་དྲགས་པའི་སྐྱོན་ཆ་རེ་ཟུང་ཡོད་པའང་སྨྲོས་མི་དགོས་པ་རེད། དེར་བརྟེན་མ་འོངས་པར་ཁྲིམས་སྒྲིག་ལ་བརྟེན་ནས་དཀའ་ངལ་འཕྲད་ངེས་རེད་ལ། ད་ལྟའི་ཆར་ཡང་དཀའ་ངལ་ཡོད་མུས་རེད།
ད་ལྟའི་ཆར་སྤྱི་ཚོགས་ནང་དོ་སྣང་དེ་ཙམ་མེད་པ་དང་། ལྷག་པར་དུ་གསར་འགྱུར་བརྒྱུད་ལམ་ཁག་གིས་དོ་སྣང་གི་ཡུལ་དུ་གཏན་ནས་མ་གྱུར་པ་ནི། བོད་མི་མང་སྤྱི་འཐུས་ལྷན་ཚོགས་ཀྱི་སྒྲིག་འཛུགས་དེ་ཕྱི་ཟླ་༥ ཚེས་༢༧ ཉིན་ནས་རང་བཞིན་གྱིས་སྒོ་ཐེབས་ཡོད་པ་དང་། ཁ་སང་ཕྱི་ཚེས་༨ ཉིན་སྤྱི་འཐུས་༤༤ ཡིས་བརྒྱུད་ལམ་མི་འདྲ་བ་གཉིས་ཀྱི་ཐོག་ནས་དམ་འབུལ་ཞུས་ནས་སྤྱི་འཐུས་ལྷན་ཚོགས་ཀྱི་གྲུབ་ཆ་འདི་ཉིད་བསྐྱར་གསོ་ཐུབ་པའི་མཚམས་སུ་སླེབས་སྐབས། བར་བརྒལ་ཚོགས་གཙོ་ཟླ་བ་ཚེ་རིང་གིས་ཁྲིམས་སྒྲིག་གི་དགོངས་དོན་དང་ལམ་ལུགས་བཅས་གང་དང་ཡང་མི་མཐུན་པར། རང་ཉིད་ཀྱི་སར་དམ་འབུལ་བྱེད་མཁན་སྤྱི་འཐུས་༢༡ གི་མིང་གཞུང་འོས་བསྡུ་ལས་ཁང་དུ་སྤྲད་ཡོད་པ་དང་། འོས་བསྡུ་ལས་ཁང་ནས་ཀྱང་དེ་ལ་ཁ་གཡར་ནས་སྤྱི་འཐུས་རྩ་འབོར་གསུམ་ཆ་གཉིས་ཀྱི་གྲུབ་ཆ་ལོངས་མི་འདུག་པས། བཅའ་ཁྲིམས་ཀྱི་དགོངས་དོན་བཞིན་ཚོགས་གཙོ་ཚོགས་གཞོན་འོས་བསྡུ་བྱ་ཐབས་མི་འདུག་ཅེས་ཁྱབ་བསྒྲགས་བྱས་ནས་ཚོགས་གཙོ་ཚོགས་གཞོན་གྱི་འོས་བསྡུ་བཀག་འགོག་བྱས་ཡོད།
སྤྱི་འཐུས་ལྷན་ཚོགས་བསྐྱར་གསོ་ཡོང་ལ་ཉེ་བའི་སྐབས་འགལ་རྐྱེན་འདི་ལྟ་བུ་ཞིག་འཕྲད་པ་ནི་རྒྱུ་མེད་རྐྱེན་མེད་ཅིག་མ་རེད་ལ། རང་བཞིན་གྱིས་བྱུང་བ་ཞིག་ཀྱང་མ་ཡིན་པར་བར་བརྒལ་ཚོགས་གཙོ་དང་། འོས་བསྡུ་ལས་ཁང་། ད་དུང་དེའི་རྒྱབ་ལོགས་སུ་ཆེ་དགུ་གཉན་བཅུ་མང་པོ་ཞིག་ལྕགས་ཐག་ལག་སྦྲེལ་གྱི་ཚུལ་དུ་ཡོད་པའང་སྨྲོས་མི་དགོས་པ་རེད། ད་དུང་འཆར་འགོད་འདིའི་རྗེས་སུ་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ཧམ་ཤེད་ཀྱིས་བདག་བཟུང་བྱེད་མཁན་དག་ཀྱང་རིམ་པས་བེད་སྤྱོད་གཏོང་འཆར་ཡོད་འདུག་པ་མ་ཟད། འཆར་གཞི་དེ་དག་ལག་བསྟར་བྱ་རྒྱུའི་ལས་རིམ་དང་ཡིག་ཆ་ཁག་ཀྱང་ཁྲིམས་དྲུང་གིས་སྔོན་ཚུད་ནས་གྲ་སྒྲིག་ཆ་ཚང་བྱས་ཟིན་ཡོད་ཤག་རེད་སྙམ། ད་ལྟ་འཆར་འགོད་འདིའི་བང་རིམ་གྱི་ཆ་ནས་འོས་བསྡུ་འགན་འཛིན་གྱི་མཚམས་སུ་སླེབས་འདུག་ཀྱང་། དོན་དངོས་སུ་བཅའ་ཁྲིམས་དོན་ཚན་༤༥ པ་དང་འོས་བསྡུའི་སྒྲིག་གཞི་དོན་ཚན་༥༥ པར་གསལ་བ་བཞིན་ཚོགས་གཙོ་ཚོགས་གཞོན་འོས་བསྡུ་བྱ་རྒྱུ་ནི་འོས་བསྡུ་ལས་ཁང་གི་ལས་འགན་ཡིན་པ་དེར་གཡོལ་ཐབས་གཏན་ནས་མེད།
སྤྱི་འཐུས་ལྷན་ཚོགས་སྒོ་བརྒྱབ་ནས་དེ་རིང་བར་ཉིན་གྲངས་༡༤ ཙམ་སོང་ཟིན་པ་དང་། ད་དུང་མུ་མཐུད་སྒོ་ཕྱེ་ཐུབ་མིན་ཡང་བཤད་ཚོད་ཐིག་དཀའ་བ་ཞིག་ཏུ་གྱུར་འདུག་ཀྱང་། མི་མང་གིས་བདམས་པའི་སྲིད་སྐྱོང་གི་ངོས་ནས་ད་དུང་མུ་མཐུད་སྤྱི་འཐུས་ལྷན་ཚོགས་ཡོད་མེད་དང་། ཁོང་གི་ཕྱག་རོགས་བཀའ་བློན་རྣམས་གསར་འདེམས་ཐུབ་མིན་ཐོག་ནས་ཁྱད་པར་གང་ཡང་མེད་པའི་རྣམ་འགྱུར་གསལ་པོར་གྱུར་འདུག ཉེ་སྔོན་སྐབས་བཅུ་དྲུག་པའི་གྲོས་ཚོགས་འཕར་མ་འཚོགས་མ་བཅུག་པ་དང་། ཁྲིམས་ཞིབ་པའི་ལས་གནས་ནས་འཕོ་འགྱུར་བཏང་ཟིན་པ་རྣམས་རང་གནས་སུ་སླར་ལོག་བྱས་པ་སོགས་ཀྱི་འཆར་གཞི་འདི་དག་ཀྱང་། སྔ་ཕྱི་གོ་རིམ་བྱས་ནས་བྱུང་ཡོད་པ་དང་། ཐོག་མ་འཆར་གཞི་འདི་ཉིད་གཞུང་ཞབས་ཟུར་པའི་དྲ་ཚོམས་སུ་འཆར་འགོད་བྱས་པ་ཞིག་ཡིན་པ་དེ་ཡང་གསལ་པོར་གྱུར་ཟིན། དེ་ཡང་ཕན་ཚུན་ལྕགས་ཐག་ལག་སྦྲེལ་གྱི་ཚུལ་དུ་བྱུང་བ་ཞིག་ཡིན་པ་དེ་བཀའ་བློན་གྱི་འོས་གཞིའི་མི་འགྲོ་དེ་དག་ལ་བལྟས་ན་ད་ཆ་ཤེས་རྟོགས་ཐུབ་པ་ཞིག་ཏུ་ངོས་འཛིན་བྱེད་ཆོག
མདོར་ན་བོད་མིའི་སྒྲིག་འཛུགས་འདི་ཉིད་མུ་མཐུད་སྲ་བརྟན་རྒྱུན་གནས་ཐུབ་པ་ཞིག་དགོས་པ་དེ་བོད་དོན་འཐབ་རྩོད་ཀྱི་ཐོག་ནས་གལ་གནད་ཆེན་པོ་ཡིན་པ་དང་། བཙན་བྱོལ་བོད་མིའི་སྤྱི་ཚོགས་བདེ་དོན་གྱི་ཐོག་ནས་ཀྱང་གལ་གནད་ཆེན་པོ་ཞིག་ཏུ་གྱུར་ཡོད། སྐབས་སོ་སོའི་བོད་མིའི་སྒྲིག་འཛུགས་ཀྱི་མགོ་ཁྲིད་མཁན་རྣམས་ལ་འགན་ཁུར་ཆེན་པོ་ཡོད་པ་དང་། སྐབས་སུ་བབ་པའི་མགོ་ཁྲིད་དག་གིས་རང་ཉིད་ཀྱི་ལས་ཡུན་ནང་གནས་སྟངས་ཡག་སྡུག་ག་འདྲ་ཞིག་བྱུང་ཡང་། དེའི་འགན་དེ་གཡོལ་ཐབས་མེད་པ་ཞིག་ཏུ་ངོས་འཛིན་བྱེད་དགོས་པ་ཞིག་རེད། བོད་མིའི་སྒྲིག་འཛུགས་དང་བོད་དོན་འཐབ་རྩོད་ཀྱི་གནས་བབས་གང་ཐད་ནས་བོད་སྤྱིའི་བདེ་སྡུག་གི་ཆེད་དུ་བསམ་བློ་གཏོང་དགོས་པ་ཞིག་ལས། རང་ཉིད་དང་ལངས་ཕྱོགས་མཐུན་མིན། སྣང་བར་འགྲོ་མིན་ཙམ་རྒྱུ་མཚན་དུ་བྱས་ནས་དཔུང་སྒྲིག་དང་སྒྲིག་འཛུགས་ཀྱི་ལས་དོན་ཁག་དེའི་ཆེད་དུ་བེད་སྤྱོད་བཏང་ན། བོད་སྤྱི་པ་དང་བོད་མིའི་སྒྲིག་འཛུགས་ལ་གྱོང་གུད་རག་འགྲོ་བ་ཞིག་ལས་མགོ་ཁྲིད་དང་ཆབ་སྲིད་མི་སྣ་སྒེར་རེ་ཟུང་ལ་གྱོང་ཕོག་འགྲོ་བ་ཞིག་གཏན་ནས་མ་རེད།།
