ལྷ་སྤྱི་ཚོགས་ཞབས་ཞུ་ཚོགས་པས་གོ་སྒྲིག་བྱས་ནས་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེའི་འཁྲུངས་སྐར་སྲུང་བརྩི།

སློབ་དཔོན་ཟམ་གདོང་རིན་པོ་ཆེའི་འཁྲུངས་སྐར་དེ་ཕྱི་ཟླ་༡༡ ཚེས་༥ ཡིན་པར་བརྟེན། རྡ་སར་ཡོད་པའི་ལྷ་སྤྱི་ཚོགས་ཞབས་ཞུ་ཚོགས་པས་གོ་སྒྲིག་འོག་འཁྲུངས་སྐར་སྲུང་བརྩི་ཞུས་སོང་།

བོད་ཀྱི་ཟློས་གར་ཚོགས་པའི་ཚོགས་ཁང་དུ་སྐུའི་འཁྲུངས་སྐར་སྲུང་བརྩི་ཞུས་པའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་དང་། ཆེ་བསྟོད་སྐུ་མགྲོན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར། དམིགས་བསལ་སྐུ་མགྲོན་སྤྱི་ཟུར་ས་རྭ་མཐོ་སློབ་ཀྱི་དགེ་རྒན་ཆེན་མོ་འབུམ་རམས་པ་བསོད་ནམས་རྒྱལ་མཚན། དགའ་ལྡན་ཕོ་བྲང་ཡིག་ཚང་གི་དྲུང་ཆེ་ཡང་སྟེང་རིན་པོ་ཆེ། དེ་བཞིན་རྡ་སར་ཡོད་པའི་ཚོགས་པ་སྒྲིག་འཛུགས་ཁག་གི་གནད་ཡོད་མི་སྣ་མང་པོ་དང་སེར་སྐྱ་མི་མང་གང་མང་བཅར་འདུག

མཛད་སྒོ་དབུ་འཛུགས་སྐབས་བོད་ཀྱི་ཟློས་གར་ཚོགས་པས་གསར་རྩོམ་བྱས་པའི་”ཟམ་གདོང་རིན་པོ་ཆེ་ལ་བསྟོད་པ་རིན་ཆེན་རྣམ་གསུམ་ལས་བརྩམས་པའི་བསྟོད་གླུ་”ཞེས་པའི་གཞས་ཤིག་དང་། བདག་ཉིད་ཆེན་པོ་༧སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གི་མཛད་རྣམ་སྙིང་བསྡུས་”ལུགས་ཟུང་གསེར་གྱི་འཁོར་ལོ་”ཞེས་པའི་བོད་དབྱིན་གཉིས་ཀྱི་པར་རིས་ལྡན་པའི་མཛད་རྣམ་དེབ་གཅིག་དབུ་འབྱེད་གནང་སོང་།

དེ་རྗེས་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེས་༧སྐྱབས་རྗེ་ཟམ་གདོང་རིན་པོ་ཆེའི་འཁྲུངས་སྐར་དང་འབྲེལ་བའི་༧གོང་ས་ཏཱ་ལའི་བླ་མ་མཆོག་གི་རླབས་ཆེན་གྱི་བཀའ་དགོངས་སྒྲུབ་ཐབས་ལ་སློབ་དཔོན་ཟམ་གདོང་རིན་པོ་ཆེས་ཕུལ་དུ་བྱུང་བའི་རྣམ་དཔྱོད་དང་སྙིང་སྟོབས་སྐོར་གསུང་བཤད་གནང་སོང་། ཁོང་གི་གསུང་བཤད་ནང་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་ཁོང་གི་འདུལ་བྱ་རྣམས་ལ་མ་འོངས་པར་སངས་རྒྱས་ཀྱི་བསྟན་པ་དེ་སྔར་ལས་གོང་འཕེལ་ཡོང་ཆེད་དུ་འདུལ་བྱ་གཞན་རྣམས་ལ་སངས་རྒྱས་ཡུལ་གང་དང་དུས་གང་ལ་སངས་རྒྱས་ཡོད་མེད། མཛད་པ་འཕྲིན་ལས་རྣམས་ངོ་སྤྲོད་བྱེད་རྒྱུ་གལ་ཆེན་པོ་ཡིན་པ་གསུངས་ཡོད་པ་བཞིན། ང་ཚོས་ཀྱང་རང་རེའི་སྐྱེས་བུ་དམ་པ་རྣམས་ཀྱི་མཛད་པ་འཕྲིན་ལས་རྣམས་དྲན་གསོ་བྱེད་དགོས་པ་དང་། དེ་དག་གི་བཀའ་དྲིན་རྗེས་དྲན་བྱེད་རྒྱུ་གལ་ཆེན་པོ་ཡིན་ཡང་། བར་སྐབས་ཤིག་ནས་བོད་པའི་སྤྱི་ཚོགས་ནང་སྐབས་རེ་སྐྱེས་བུ་དམ་པ་དེ་དག་གི་སྐྱོན་ཁོ་ན་ལས་ཡོན་ཏན་ལ་མི་ལྟ་མཁན་དེ་འདྲ་ཡོང་གི་འདུག ང་ཚོ་ནི་ད་ལྟ་ཡོད་ཚད་བརླགས་ཤོར་ཟིན་པའི་མི་རིགས་ཤིག་ཡིན་པ་དང་། དེ་ཡང་སྣོད་བཅུད་དང་རིག་གཞུང་། སྐད་ཡིག ཐ་ན་ས་ཆ་ལག་མཐིལ་ཙམ་མེད་པའི་མི་རིགས་ཤིག་ཡིན་དུས་ང་ཚོས་ངེས་པར་དུ་འདས་པའི་མི་བུ་གོང་མ་ཚོའི་མཛད་རྗེས་དང་བྱས་རྗེས་རྣམས་ལ་བཀའ་དྲིན་རྗེས་སུ་དྲན་རྒྱུ་ཧ་ཅང་གལ་ཆེན་པོ་ཡིན་པ་གསུངས་སོང་།

དེ་བཞིན་༧སྐྱབས་རྗེ་ཟམ་གདོང་རིན་པོ་ཆེས་༧གོང་ས་མཆོག་གི་བཀའ་དགོངས་སྒྲུབ་ཐབས་ཆེད་དུ་རྣམ་དཔྱོད་དང་ལྡན་པའི་ཐོག་ནས་ཕྱི་ནང་གཉིས་ཀའི་བར་ཆད་དང་རྐྱེན་ངན་བཟོ་མཁན་རྣམས་ལ་ཡིད་གཉིས་ཐེ་ཚོམ་མེད་པའི་ཐོག་ནས་གདོང་ལེན་བྱས་ཡོད་ཅིང་། ཤེས་ཡོན་དང་ཆབ་སྲིད་གང་ཐད་ནས་ཕུལ་དུ་བྱུང་བའི་མཛད་རྗེས་བཞག་ཡོད་པར་བརྟེན། མ་འོངས་པར་ང་ཚོས་མི་རེ་ངོ་རེ་ནས་སྐྱེས་བུ་དམ་པ་ཁོང་ཚོའི་བཀའ་དགོངས་སྒྲུབ་ཐབས་ཆེད་དུ་འབད་བརྩོན་བྱེད་དགོས་པ་སོགས་གསུངས་སོང་།

དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་ནས་ཁོང་མོ་ཐོག་མར་ཌལ་ཧོར་སློབ་གྲྭར་ཡོད་དུས་རིན་པོ་ཆེ་ནས་སློབ་གྲྭའི་ནང་སློབ་མའི་མཐུན་ཚོགས་སམ་གྲོས་ཚོགས་བཙུགས་ནས་སློབ་གྲྭའི་ནང་དམངས་གཙོའི་གོ་རྟོགས་སྤེལ་བ་དང་། དེ་བཞིན་ཁོང་བཀའ་བློན་ཁྲི་པའི་ཕྱག་ལས་གནང་བའི་སྐབས་སུ་བདེན་པ་དང་། ཡང་དག་པ། འཚེ་བ་མེད་པའི་ལྟ་གྲུབ་གསུམ་པོ་གཞི་ལ་བཞག་ནས་ཧ་ཅང་གི་གཟེངས་སུ་ཐོན་པའི་ཕྱག་ལས་གནང་པ་དག་ལ་བོད་མི་ཚོས་བཀའ་དྲིན་རྗེས་དྲན་ཞུ་དགོས་པ་བརྗོད་གནང་སོང་།  དེ་རྗེས་དམིགས་བསལ་སྐུ་མགྲོན་སྤྱི་ཟུར་ས་རཱ་མཐོ་སློབ་ཀྱི་དགེ་རྒན་ཆེན་མོ་འབུམ་རམས་པ་བསོད་ནམས་རྒྱལ་མཚན་ལགས་ཀྱིས་མཛད་སྒོའི་སྐབས་སུ་གསུང་བཤད་གནང་དོན་ལ། ༧སྐྱབས་རྗེ་ཟམ་གདོང་རིན་པོ་ཆེ་ནི་ཕུལ་དུ་བྱུང་བའི་དབུ་ཁྲིད་ཅིག་ཡིན་པ་དང་། ཁོང་གིས་ད་ལྟ་བར་༧གོང་ས་མཆོག་གི་བཀའ་དགོངས་སྒྲུབ་ཐབས་ཆེད་མཛད་རྗེས་མང་པོ་ཡོད་པ་ནང་ནས་གཅིག་དེ་ནང་དོན་རིག་པ་དེ་སྲོལ་རྒྱུན་གྱི་ལམ་ལུགས་ཤིག་ནས་དེང་རབས་ཀྱི་སློབ་ཚན་དང་ལྷན་དུ་གཏད་འབེབས་བྱས་ནས་སློབ་ཁྲིད་བྱེད་རྒྱུ་ཡོད་པ་ཞིག་བཟོས་པ་དེ་ཡིན་པ་དང་། ནང་པའི་ཆོས་ལུགས་དེ་དེང་རབས་གཙུག་ལག་མཐོ་སློབ་ཀྱི་ཤེས་ཡོན་ལམ་ལུགས་ནང་བཅུག་པ་དེ་རེད། དེ་ནི་གཟེངས་སུ་ཐོན་པའི་མཛད་པ་རྒྱ་ཆེན་པོ་ཞིག་རེད་ཅེས་གསུངས། དེ་བཞིན་ད་ཆར་བོད་ནང་རྒྱ་ནག་གི་བོད་ཀྱི་སྐད་དང་ཡི་གེ་རྩ་མེད་བཟོ་བཞིན་ཡོད་པ་བརྟེན། ༧སྐྱབས་རྗེ་ཟམ་གདོང་རིན་པོ་ཆེ་ལ་ཡུན་རིང་ནས་དགོངས་པར་ཡོད་པའི་ཤེས་ཡོན་ལམ་ལུགས་གསར་པ་དེ་ནི་དུས་ཐོག་བབས་པའི་ཆར་པ་ཡིན་པས་ང་ཚོས་ངེས་པར་དུ་ཁོང་གི་བཀའ་དྲིན་དྲན་དགོས་པ་སོགས་བརྗོད་གནང་སོང་། ཆེ་བསྟོད་སྐུ་མགྲོན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་གྱིས་གསུང་དོན་ལ། བོད་པ་ཚོ་༧གོང་ས་མཆོག་དང་༧སྐྱབས་རྗེ་ཟམ་གདོང་རིན་པོ་ཆེན་ཁོང་རྣམ་པའི་བཀའ་དགོངས་ག་རེ་ཡིན་མིན་ངོས་འཛིན་ཐུབ་པའི་ཐོག་ནས་ཤེས་ཡོན་སློབ་སྦྱོང་ཐད་འབད་བརྩོན་བྱེད་རྒྱུ་ནི་ཧ་ཅང་གལ་ཆེན་པོ་ཡིན་པ་དང་། དེ་བཞིན་མ་འོངས་པ་༧སྐྱབས་རྗེ་ཟམ་གདོང་རིན་པོ་ཆེའི་འཁྲུངས་སྐར་དེ་གཞུང་འབྲེལ་ནས་བསུ་བརྩི་ཞུ་ཐུབ་དགོས་རྒྱུ་གལ་ཆེ་པོ་ཡིན་ཞེས་གསུངས། ད་དུང་ཁོང་ནས་བོད་པའི་སྤྱི་ཚོགས་ཁྲོད་མི་ཤེས་ཡོན་ཅན་དང་འཇོན་ཐང་ཅན་ཚོར་མཐོང་ཆེ་བྱེད་རྒྱུ་གལ་ཆེ་ཡིན་ཞིང་། སྤྱི་ཚོགས་ཁྱོན་ཡོངས་མཐུན་ལམ་རྡོག་རྩ་གཅིག་སྒྲིལ་བྱེད་རྒྱུ་གལ་ཆེ་ཡིན་པ་གསུངས་སོང་།

ཉིན་རྒྱབ་གནད་ཡོད་མི་སྣ་ཁག་ཅིག་ནས་༧སྐྱབས་རྗེ་ཟམ་གདོང་རིན་པ་ཆེའི་ཆབ་སྲིད་དང་ཤེས་ཡོན། བོད་པའི་མང་གཙོ་འཕེལ་རིམ་ཐད་ཀྱི་མཛད་རྗེས། དེ་བཞིན་ཆོས་ཕྱོགས་ཀྱི་མཛད་རྗེས་སོགས་ཀྱི་མཛད་རྗེས་འདྲ་མིན་ཐོག་བགྲོ་གླེང་གནང་ཡོད་པ་རེད།།

གསར་འགོད་པ། བསོད་ནམས་ཕུན་ཚོགས།