ལྷོ་ཊི་རོལ་རང་སྐྱོང་མངའ་ཁུལ་གྱི་སྤྱི་ཁྱབ་པ་གསུམ་དུས་ཉིན་གྱི་སྐུ་མགྲོན་དུ་ཕེབས་འདུག

ཟླ་འདིའི་ཚེས་༩ ཉིན་གྱི་ཕྱི་དྲོ་དྷ་ས་གངས་སྐྱིད་དུ་རྟེན་གཞི་བྱེད་པའི་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ།  ལྷོ་ཊི་རོལ་རང་སྐྱོང་མངའ་ཁུལ་གྱི་སྤྱི་ཁྱབ་སྐུ་ཞབས་ཨར་ནོ་ཀོམ་པེ་སི་ཆར་Dr. Arno  Kompatscher དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་གཉིས་ཀྱིས་གསར་འགོད་ལྷན་ཚོགས་ཤིག་བསྐོངས་ཡོད་པ་རེད།

སྐུ་ཞབས་ཨར་ནོ་ཀོམ་པེ་སི་ཆར་ནི་བོད་ཀྱི་གསུམ་བཅུའི་དུས་དྲན་མཛད་སྒོའི་ཐོག་སྐུ་མགྲོན་གཙོ་བོར་ཕེབས་ཡིན་པ་དང་། སྲིད་སྐྱོང་གིས་ཁོང་ངོ་སྤྲོད་དང་འབྲེལ། ཁོང་ལ་བོད་མིའི་སྒྲིག་འཛུགས་ནས་མགྲོན་འབོད་ཞུས་པ་ལྟར་ཐེངས་འདིར་དྷ་སར་ཆེད་མངགས་ཕེབས་པ་དེས། བོད་མིའི་རྩ་དོན་དང་། ལྷག་པར་བོད་མིའི་སྒྲིག་འཛུགས་དང་བོད་མི་སྤྱི་ཡོངས་ལ་རྒྱབ་སྐྱོར་དང་ཆེ་མཐོང་གནང་བ་ཞིག་ལ་ངོས་འཛིན་ཞུ་བཞིན་ཡོད་སྐོར་དང་།   ཁོང་དྷ་སར་ཕེབས་པ་ཙམ་གྱིས་གཞིས་ལུས་བོད་མི་ཚོར་རེ་བའི་བརྡ་ལན་ཤུགས་ཆེ་ཞིག་གཏོང་རྒྱུ་ཡིན་སྐོར་དང་།  ལྷོ་ཊི་རོལ་རང་སྐྱོང་མངའ་ཁུལ་དང་བོད་མིའི་སྒྲིག་འཛུགས་དབར་འབྲེལ་བ་བྱུང་སྟངས་རྒྱབ་ལྗོངས་ཀྱི་གནས་སྟངས་ཐོག  དེ་སྔ་ས༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་ལྟར།  བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཐོབ་ཆེད་བོད་མིའི་སྒྲིག་འཛུགས་ཀྱིས་དབུ་མའི་ལམ་གྱི་སྲིད་བྱུས་རྒྱུན་སྐྱོང་འོག་ཐོག་མར་འབྲེལ་བ་བྱུང་ཡོད། དེ་ཡང་གཙོ་ཆེ་དབུ་མའི་ལམ་གྱི་སྲིད་བྱུས་འོག་མིང་དོན་མཚུངས་པའི་རང་སྐྱོང་གི་གནས་བབ་ཅིག་བོད་མི་ཚོས་རྩོད་བཞིན་ཡོད་སྟབས། འཛམ་གླིང་ཁྱོན་དུ་མིང་དོན་མཚུངས་པའི་རང་སྐྱོང་གི་སྲིད་བྱུས་ལག་བསྟར་གནང་མཁན་སྤྱིར་ཧ་ཅང་མང་ཡང་།  ལྷོ་ཊི་རོལ་རང་སྐྱོང་སྲིད་གཞུང་གིས་མཐུན་འགྱུར་སྦྱར་ནས་བོད་མིའི་སྒྲིག་འཛུགས་ཀྱི་སྲིད་ཇུས་ཉམས་ཞིབ་ཁང་གི་ལས་བྱེད་གཙོ་བོར་གྱུར་བའི་འབྲེལ་ཡོད་རྣམ་པ་ཆེད་མངགས་ས་གནས་དེར་ཕེབས་ནས་ཁུལ་དེར་རང་སྐྱོང་གི་གནས་བབ་ཇི་ལྟར་ལག་བསྟར་གནང་བཞིན་པ་རྣམས་རྟོག་ཞིབ་དང་ཟབ་སྦྱོང་སོགས་ནང་མཉམ་ཞུགས་གནང་བ་སོགས་མདོར་ན་ལོ་ངོ་༢༠ མིན་ཙམ་རིང་འབྲེལ་བ་བྱུང་ཡོད་སྐོར། རྒྱ་ནག་གཞུང་གིས་ཕྱི་ཟླ་༣ ཚེས་༣ ཉིན་བོད་ཀྱི་རྒྱལ་ས་ལྷ་སར་རྒྱ་མིའི་དམག་མི་༥༠༠༠ ཙམ་དང་དམག་མིའི་སྣུམ་འཁོར་༡༠༠༠ ཙམ་གྱིས་དམག་སྦྱོང་བྱས་ནས་གསུམ་བཅུའི་དུས་དྲན་སླེབ་ལ་ཉེ་བའི་སྐབས་དམ་དྲགས་ཤུགས་ཆེ་བྱ་རྒྱུའི་རྣམ་འགྱུར་བསྟན་ཡོད་སྐོར་གསུངས་སོང་།

དེ་བཞིན་སྲིད་སྐྱོང་གིས་སྐབས་དེར་ལྷོ་ཊི་རོལ་རང་སྐྱོང་མངའ་ཁུལ་ནས་བཙན་བྱོལ་བོད་མིའི་སྤྱི་ཚོགས་ཀྱི་ཤེས་ཡོན་དང་འཕྲོད་བསྟེན།  མང་གཙོའི་རིང་ལུགས་ཡར་རྒྱས་གཏོང་སླད་ཟབ་སྦྱོང་དང་སློབ་ཡོན་གྱི་མཐུན་འགྱུར་གནང་བཞིན་ཡོད་སྐོར་གསུངས་སོང་།

དེ་རྗེས་སྐུ་ཞབས་ཨར་ནོ་ཀོམ་པེ་སི་ཆར་གྱིས་ལྷོ་ཊི་རོལ་རང་སྐྱོང་མངའ་ཁུལ་གྱི་ཆབ་སྲིད་ཀྱི་སྒྲོམ་གཞི་ཇི་ལྟར་ཡིན་མིན་དང་བཙན་བྱོལ་བོད་གཞུང་གིས་ས་གནས་མི་རིགས་རང་སྐྱོང་རྩོད་ལེན་སྐོར་དང་འགྲེལ་བརྗོད་གནང་དོན། ང་ཚོའི་ཆབ་སྲིད་ཀྱི་སྒྲོམ་གཞིར་ཁྱེད་ཚོས་དཔེ་ལྟ་ཆོག་ཀྱང་ཇི་བཞིན་བྱེད་རྒྱུ་གནས་སྟངས་མི་འདྲ་བ་མང་པོ་ཞིག་གི་ཐོག་ནས་ཁག་པོ་རེད།  ང་ཚོ་ལྷོ་ཊི་རོལ་ས་གནས་ལྟ་བུར་མཚོན་ན་དེ་སྔ་འཛམ་གླིང་དམག་ཆེན་དང་པོའི་སྐབས་བར་ཨོ་སི་ཊི་རི་ཡའི་མངའ་ཁོངས་སུ་གནས་ཤིང་།  ཡུལ་མི་ཚོས་འཇར་མན་སྐད་བེད་སྤྱོད་བྱེད་བཞིན་ཡོད་པ་ལས་ལེ་ཊིན་དང་ཨི་ཊ་ལིའི་སྐད་ཡིག་བཀོལ་སྤྱོད་བྱེད་མི་ཧ་ཅང་ཉུང་། དམག་ཆེན་དང་པོའི་མཇུག་ཏུ་ས་ཁུལ་འདི་ཨི་ཊ་ལིའི་ཁོངས་སུ་ཕྱིན་པ་རེད་ཅེས་གསུངས་སོང་།

ཁོང་གིས་མུ་མཐུད་ཡུལ་དེའི་རང་སྐྱོང་བརྒྱུད་རིམ་སྐོར་གསུང་དོན། དེ་རྗེས་ཨི་ཊ་ལིའི་ནང་གཅིག་བསྡུས་དབང་འཛིན་སྐབས་འཇར་མན་སྐད་ཡིག་དང་རིག་གཞུང་། ཐ་སྙད་སོགས་ལ་སྡང་ཟུག་ཤུགས་ཆེ་བྱས་རྐྱེན་མཐའ་ན་སློབ་གྲྭའི་ནང་འཇར་མན་སྐད་ཡིག་སློབ་ཁྲིད་བྱེད་སྐབས་གསང་བའི་ཐོག་ནས་བྱེད་དགོས་པ་བྱུང་ཡོད། དེ་རྗེས་དམག་ཆེན་གཉིས་པ་མཇུག་སྒྲིལ་རྗེས་ལྷོ་ཊི་རོལ་ཡུལ་མི་ཚོས་དེ་སྔ་ལྟར་སླར་ཡང་ཨོ་སི་ཊི་རི་ཡའི་མངའ་ཁོངས་སུ་འཛུལ་འདོད་བྱས་ཡོད། འོན་ཀྱང་མནའ་འབྲེལ་ཚོགས་པས་གལ་ཏེ་ལྷོ་ཊི་རོལ་ཨོ་སི་ཊི་རི་ཡའི་མངའ་འོག་ཏུ་ཚུད་པ་ཡིན་ན་ཨི་ཊ་ལི་དམར་ཤོག་ཚོགས་པའི་འོག་ཤོར་རྒྱུའི་ཉེན་ཁ་མཐོང་ནས་དེར་མོས་མཐུན་མ་བྱས་པ་རེད། དེར་བརྟེན་ཨོ་སི་ཊི་རི་ཡ་དང་ཨི་ཊ་ལི་གཉིས་དབར་རྒྱལ་ས་པེ་རི་སིར་ཞི་བདེའི་ཆིངས་ཡིག་བཞག་ནས། ཆིངས་ཡིག་དེའི་ནང་ཨི་ཊ་ལིས་ལྷོ་ཊི་རོལ་ལ་རང་སྐྱོང་གི་ཐོབ་ཐང་སྤྲོད་དགོས་པ་དང་།  ས་གནས་སྲིད་གཞུང་ལ་རང་གི་ཐུན་མིན་རིག་གཞུང་དང་སྐད་ཡིག་སྲུང་སྐྱོབ་བྱ་རྒྱུའི་ཐོབ་ཐང་ཡོད་པ་སོགས་འཁོད་ཡོད། འོན་ཀྱང་ད་ལྟ་ལྷོ་ཊི་རོལ་ལ་རང་སྐྱོང་གི་གནས་བབ་ཆ་ཚང་ཡོད་བཞིན་པའི་གནས་སྟངས་འདི་༡༩༧༢ ལོར་གཞི་ནས་གཏན་འབེབས་བྱུང་ཡོད། དེར་བརྟེན་ཕྱི་ལོ་༡༩༡༨ ནས་༡༩༧༢ བར་ང་ཚོས་རང་གི་ཐུན་མིན་རིག་གཞུང་དང་སྐད་ཡིག་སོགས་གཅེས་ཉར་ཆེད་འབད་བརྩོན་བྱས་པ་རེད། ད་ཆ་ང་ཚོར་གྲོས་ཚོགས་ཡོད། ཡུལ་ཁྲིམས་དེ་དག་ང་རང་ཚོ་རང་གིས་བཟོ་བཞིན་པ་དང་།  དེ་བཞིན་སློབ་གྲྭ་དང་སློབ་གྲྭའི་ནང་གི་སློབ་ཚན་སོགས་རང་དབང་ཐོག་ནས་ཐག་གཅོད་བྱེད་བཞིན་ཡོད།  ལྷག་པར་ཡུལ་ཁྲལ་ཐོབ་ཐང་ཡང་ཡོད། ཁྲལ་བབ་དངུལ་དེ་དག་ཆབ་སྲིད་བརྟན་ལྷིང་ཆེད་བེད་སྤྱོད་བྱེད་བཞིན་ཡོད་ཅེས་སོགས་གསུངས་སོང་།།

གསར་འགོད་པ་ཆོས་ཉིད་འོད་ཟེར།