“སྐད་གཉིས་སློབ་གསོ”འི་ཐབས་ལ་བརྟེན་ནས་བོད་ཀྱི་སྐད་ཡིག་རྩ་མེད་བཟོ་བཞིན་པ། 

འགྲོ་བ་མིའི་ཐོབ་ཐང་ལྟ་ཞིབ་ཁང་(Human Right Watch)ནས་གསར་དུ་བཏོན་པའི་སྙན་ཐོ་ཞིག་གི་ནང་། རྒྱ་ནག་གཞུང་གིས་[བཙན་བཟུང་བྱས་པའི]བོད་ཀྱི་ས་ཁུལ་དུ་ལག་བསྟར་བྱེད་ཀྱིན་པའི་“སྐད་གཉིས་སློབ་གསོའི་སྲིད་ཇུས”ཞེས་པ་དེས། བོད་ཀྱི་སྐད་ཡིག་འཇིག་པའི་མྱུར་ཚད་ཆེ་རུ་གཏོང་བཞིན་ཡོད་ཚུལ་བརྗོད་འདུག 

དེ་རིང་སྟེ་ཕྱི་ཟླ་ ༣ ཚེས་ ༥ ཉིན་འགྲོ་བ་མིའི་ཐོབ་ཐང་ལྟ་ཞིབ་ཁང་ནས་ཤོག་གྲངས་ ༩༡ ལྡན་པའི་སྙན་ཐོ་ཞིག་བཏོན་པའི་ནང་། རྒྱ་ནག་གི་“སྐད་གཉིས་སློབ་གསོ”ཞེས་པའི་སྲིད་བྱུས་དེས་བོད་ཀྱི་སྐད་ཡིག་ཉམས་ཉེས་སུ་འགྲོ་བའི་མྱོར་ཚད་ཆེ་རུ་གཏོང་བཞིན་ཡོད་ཚུལ་དང་། རྒྱ་ནག་གཞུང་གིས་འདས་པའི་ལོ་ངོ་བཅུ་ཕྲག་རིང་བོད་ཀྱི་ས་ཁུལ་དུ་ལག་བསྟར་བྱས་དང་བྱེད་མུས་སུ་ཡོད་པའི་སྲིད་བྱུས་དེའི་འོག བོད་ཀྱི་སློབ་ཆུང་རྣམས་ཀྱི་ནང་དུ་བོད་ཀྱི་སྐད་ཡིག་རང་གི་བརྒྱུད་ལམ་ཐོག་ནས་སློབ་ཚན་འཆད་ཉན་བྱེད་པའི་ལམ་སྲོལ་མེད་པ་བཟོས་ཚུལ་འཁོད་འདུག 

“རྒྱ་ནག་གིས་བོད་དུ་བཟུང་བའི་’སྐད་གཉིས་སློབ་གསོ’འི་སྲིད་བྱུས་འོག བོད་ཀྱི་སྐད་ཡིག་བརྒྱུད་ལམ་ཐོག་ནས་སློབ་ཁྲིད་བྱེད་པའི་ལམ་སྲོལ་འཇིག་ཉེན་ལ་ཐུག་ཡོད”ཅེས་པའི་སྙན་ཐོ་དེའི་ནང་། རྒྱ་ནག་གཞུང་གིས་སློབ་གསོ་ཡར་རྒྱས་གཏོང་གི་ཡོད་ཚུལ་བཤད་དེ་བོད་དུ་གྲངས་ཉུང་མི་རིགས་ཀྱི་ཤེས་ཡོན་སློབ་གསོའི་ཐོབ་ཐང་མེད་པ་བཟོ་བཞིན་ཡོད་པ་མ་ཟད། “མི་རིགས་ཀྱི་མཐུན་སྒྲིལ་སྲ་བརྟན་གཏོང་བ”འི་མིང་ཐོག་ནས་བོད་ཕྲུག་རྣམས་ལོ་གསུམ་ནས་ངེས་པར་དུ་“སྐད་གཉིས་”བུ་བཅོལ་ཁང་དུ་བཞག་སྟེ་རྒྱ་ནག་གི་སྐད་ཡིག་དང་། རྫུན་བསྒྲགས་རྣམས་ཡོངས་སུ་རྒྱུད་ལ་འཇགས་པའི་སྲིད་བྱུས་འཐེན་བཞིན་ཡོད་སྐོར་བཤད་འདུག 

གནས་ཚུལ་འདི་དང་འབྲེལ་བའི་ཐད་ལ། འགྲོ་བ་མིའི་ཐོབ་ཐང་ལྟ་ཞིབ་ཁང་གི་རྒྱ་ནག་ཉམས་ཞིབ་འགན་འཛིན་སོ་ཧྥིའི-རི་ཆར་ཌི་སོན་(Sophie Richardson)གྱིས་བརྗོད་དོན། “རྒྱ་ནག་གི་’སྐད་གཉིས་སློབ་གསོ’འི་སྲིད་བྱུས་ནི་ཆབ་སྲིད་ཀྱི་དགོས་མཁོས་ཀུན་ནས་བསླངས་པ་ཞིག་ཡིན་པ་ལས་ཤེས་ཡོན་མ་རེད། རྒྱ་ནག་གཞུང་གིས་བོད་མི་རྣམས་ལ་བོད་ཀྱི་སྐད་ཡིག་ཐོག་ནས་སློབ་ཚན་འཆད་ཉན་བྱེད་པའི་མཐུན་རྐྱེན་སྦྱོར་གྱི་མེད་པ་དེ་རྒྱ་ནག་གིས་བརྩི་སྲུང་བྱེད་རྒྱུའི་ཁས་བླངས་པའི་རྒྱལ་སྤྱིའི་ཁྲིམས་དང་འགལ་ནས་ཡོད།”

རྒྱ་ནག་གི་རྩ་ཁྲིམས་ནང་གྲངས་ཉུང་མི་རིགས་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱེད་པའི་ཐོབ་ཐང་འཁོད་ཡོད་པའི་ཐོག ཆབ་སྲིད་ལྟོས་བཅས་ཀྱིས་ཅུང་གུ་ཡངས་པའི་སྐབས་ཏེ།  ཕྱི་ལོ་ ༡༩༨༠ གྱ་གྲངས་ནང་བོད་རང་སྐྱོང་ལྗོངས་ཀྱི་དམའ་རིམ་སློབ་གྲྭ་ཁག་གི་སློབ་ཚན་རྣམས་བོད་ཡིག་ནང་སློབ་ཁྲིད་བྱེད་འགོ་བརྩམས་ཡོད་མོད། འོན་ཀྱང་ད་ལྟ་ཆབ་སྲིད་ཀྱི་མཁའ་དབུགས་ཇེ་དོག་ནས་ཇེ་དོག་ཏུ་འགྱུར་བཞིན་པའི་སྐབས་འདིར། ས་གནས་བོད་མི་ཚོའི་སྐད་ཡིག་སྲུང་སྐྱོབ་ཀྱི་ལས་འགུལ་ཆུང་ཚགས་རྣམས་ཀྱང་རྒྱ་ནག་གི་འགོ་ཁྲིད་ཚོས་“ཁ་བྲལ་རིང་ལུགས་ཀྱི་བྱ་སྤྱོད་”དུ་ངོས་འཛིན་བྱེད་ཀྱི་ཡོད། 

ཕྱི་ལོ་ ༢༠༡༠ ནས་ ༢༠༡༢ ཀྱི་ནང་ཚུན་ལ། མཚོ་སྔོན་ས་ཁུལ་དུ་སློབ་ཚན་རྣམས་རྒྱ་ཡིག་ཐོག་ནས་ཁྲིད་པའི་སྲིད་བྱུས་གཏན་ལ་འབེབས་ཐབས་བྱས་པ་དེར་སློབ་གྲྭ་ཚོས་ངོ་རྒོལ་བྱས་ཏེ་སྲིད་བྱུས་དེ་རེ་ཞིག་རྩིས་མེད་བཟོ་ཐུབ་མོད། འོན་ཀྱང་ཕྱི་ལོ་ ༢༠༡༩ ཟླ་ ༥ ནང་མགོ་ལོག་ཁུལ་དུ་ཕྱི་ཟླ་དགུ་པའི་སློབ་དུས་ནས་བཟུང་སློབ་ཚན་ཡོངས་རྫོགས་རྒྱ་ཡིག་ཐོག་ནས་སློབ་ཁྲིད་བྱེད་རྒྱུ་ཡིན་པའི་གསལ་བསྒྲགས་བྱས་ཡོད། 

ད་ལྟའི་ཆར་བོད་རང་སྐྱོང་ལྗོངས་སུ་དེ་ལྟ་བུའི་གསལ་བསྒྲགས་བྱས་མེད་པ་དང་། འགོ་ཁྲིད་ཚོས་སློབ་ཆུང་རེ་རེ་ལ་སློབ་ཚན་འཁྲིད་བྱེད་ཀྱི་སྐད་ཡིག་དེ་བོད་ཡིག་ནས་རྒྱ་ཡིག་ཏུ་སྒྱུར་མི་སྒྱུར་གྱི་གདམ་ག་ཡོད་ཚུལ་བཤད་ཀྱི་ཡོད་མོད། འོན་ཀྱང་འགྲོ་བ་མིའི་ཐོབ་ཐང་ལྟ་ཞིབ་ཁང་ནས་འབྲེལ་ཡོད་འགོ་ཁྲིད་ཚོས་ཐབས་བྱུས་སྣ་ཚོགས་ལ་བསྟེན་ནས་བོད་ཀྱི་ས་གནས་སློབ་ཆུང་རྣམས་ཀྱི་སྐད་ཡིག་རྒྱ་ཡིག་ཏུ་སྒྱུར་བའི་གནོན་ཤུགས་སྤྲོད་བཞིན་པའི་དཔང་རྟགས་ར་སྤྲོད་བྱས་འདུག་སྟེ། རྒྱ་ནག་གཞུང་གིས་བཀོལ་བའི་ཐབས་བྱུས་དེ་དག་གི་ཁྲོད་དུ། “བོད་ལ་རོགས་སྐྱོར”བྱེད་པའི་ལས་འགུལ་འོག་རྒྱ་ནག་གི་ས་ཁུལ་ནས་བོད་ཀྱི་སྐད་ཡིག་མི་ཤེས་མཁན་གྱི་དགེ་རྒན་སྟོང་ཕྲག་མང་པོ་བོད་དུ་གཏོང་བ་དང་། “མི་རིགས་ཀྱི་མཐུན་སྒྲིལ”ཆེད་དུ་“མི་རིགས་འདྲེས་པའི་འཛིན་གྲྭ”གོང་དུ་སྤེལ་བ་སོགས་འདུས་ཡོད་སྟབས། ཐད་ཀར་རྒྱ་ཡིག་བཀོལ་སྤྱོད་དགོས་པའི་བཙན་བཀའ་མ་བཏང་ཡང་རྒྱའི་སྐད་ཡིག་མི་སྤྱོད་ཐབས་མེད་ཡིན་པའི་གནས་སྟངས་ཤིག་བསྐྲུན་ནས་ཡོད། ། 

གསར་འགོད་པ་དཀོན་མཆོག་རབ་བརྟན།