སྲིད་སྐྱོང་སྤེན་པ་ཚེ་རིང་ཡུ་རོབ་ཏུ་གཞུང་འབྲེལ་ཕྱོགས་ཕེབས་ཀྱིས་བོད་དོན་ཞུ་གཏུག་གནང་བཞིན་འདུག

སྤྱི་ལོ་༢༠༢༤ཕྱི་༡༠ཚེས་༧ཉིན་ནས་བོད་མི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་ཡུ་རོབ་ཏུ་གཞུང་འབྲེལ་ཕྱོགས་ཕེབས་འགོ་འཛུགས་གནང་བ་བཞིན་ཡུ་རོབ་ཀྱི་རྒྱལ་ཁབ་སུད་སི། ནི་དར་ལེནྜ། ལཀ་ཛམ་བརྒ་དང་ཅེཀ་རྒྱལ་ཁབ་ཀྱི་རྒྱལ་ས་པ་རག་བཅས་སུ་འཚམས་གཟིགས་གནང་འདུག་པ་བཞིན།

ཕྱི་ཚེས་༨ཉིན་དཔལ་ལྡན་སྲིད་སྐྱོང་ནས་ཛུ་རིག་གློག་བརྙན་དུས་སྟོ་ཐོག་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་མཛད་རྣམ་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་”wisdomofhappiness’’ཅེས་པའི་གཟིགས་འབུལ་གྱི་མཛད་སྒོའི་ཐོག་མཉམ་ཞུགས་གནང་བ་དང་། གློག་བརྙན་གཟིགས་འབུལ་རྗེས་སུ་དེ་འབྲེལ་གྱི་གསུང་བཤད་གནང་འདུག།ཕྱི་ཚེས་༩ཉིན་མཁའ་ལམ་བརྒྱུད་ཨེམ་ཀྲར་གྲམ་དུ་ཕེབས་འབྱོར་བྱུང་སྟེ།

ཕྱི་ཚེས་༡༠ཉིན་སྲིད་སྐྱོང་ཚེ་རིང་ལཀ་ཛམ་བརྒ་LUXEMBOURGདུ་འབྱོར་ཏེ་ཡུ་རོབ་གྲོས་ཚོགས་འཐུས་མི་ཟུར་པ་དང་ཡུ་རོབ་རྩིས་ཞིབ་ཚོགས་པའི་ཚོགས་མི་ལྕམ་ Laima Andrikiene ལྷན་དུ་མཇལ་འཕྲད་དང་སྦྲགས། ཁོང་མོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་ ༩༠ ཕེབས་པའི་༧སྐུའི་འཁྲུངས་སྐར་གྱི་སྐུ་མགྲོན་དུ་མགྲོན་འབོད་གནང་འདུག དེ་བཞིན་ལཀ་ཛམ་བརྒ་བོད་དོན་རྒྱབ་སྐྱོར་ཚོགས་པའི་ཚོགས་མི་དང་མཇལ་འཕྲད་དང་མི་མང་ལ་བོད་དོན་གསུང་བཤད་བཅས་གནང་འདུག་པ་དང་། ཕྱི་ཚེས་༡༡ཉིན་Green Party of Luxemberg   ལྷན་དུ་མཇལ་འཕྲད་དང་ལཀ་སམ་བརྒ་གི་གནད་ཡོད་མི་སྣ་ཁག་ཅིག་དང་མཉམ་དུ་བོད་དོན་སྐོར་གླེང་སློང་གནང་ཡོད་འདུག

ཕྱི་ཚེས་༡༣ཉིན་དཔལ་ལྡན་སྲིད་སྐྱོང་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཏུ་ཕེབས་འབྱོར་གྱིས་བོད་དོན་རྒྱབ་སྐྱོར་ཚོགས་པ་དང་མཇལ་མོལ་དང་། དེ་མཚུངས་ཉིན་དེར་༢༠༠༠ཞི་བདེའི་གླེང་སྟེགས་ཐེངས་༢༨པའི་མཛད་སྒོ་ཚོགས་ཤིང་སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་ནས་ཐའེ་ཝན་སྲིད་འཛིན་ཟུར་པ་ཚའི་ཨིང་ཝན་དང་མཇལ་འཕྲད་བྱུང་འདུག།མཛད་སྒོ་དེའི་དབུ་འབྱེད་ཐོག་ཅེཀ་སྤྱི་མཐུན་རྒྱལ་ཁབ་ཀྱི་གནད་ཡོད་དཔོན་རིགས་མི་སྣ་ལྷན་དུ་མཇལ་མོལ་དང་བགྲོ་གླེང་སོགས་གནང་ཞིང་། དེར་ཉིན་གཉིས་པ་སྟེ་ཕྱི་ཚེས་༡༤ཉིན་ཚོགས་འདུ་དེའི་ཐོག་མཉམ་བཞུགས་གནང་ཡོད་འདུག ཚོགས་འདུའི་རྗེས་སུ་ཕྱི་སྲིད་ལྷན་ཁང་དུ་ཆེས་མཐོའི་དཔོན་རིགས་མཇལ་འཕྲད་དང་བོད་དོན་ཞུ་སྐུལ་གནང་ཡོད་འདུག་ལ། དེ་བཞིན་བོད་དོན་རྒྱབ་སྐྱོར་ཚོགས་པ་དང་བོད་མི་མཉམ་སྦྲེལ་གྱིས་ལས་དོན་ཇི་སྤེལ་གྱི་ལས་བསྡོམས་ཕུལ་བ་དང་། བོད་དོན་དང་འབྲེལ་བའི་དཔེ་དེབ་གཉིས་ངོ་སྤྲོད། བོད་ཀྱི་གནད་དོན་དངོས་ཡོད་ཇི་ཡིན་རྟོགས་ཞིབ་གནང་དགོས་པ་ལས། རྒྱ་ནག་གཞུང་གི་འཁྱོག་བཤད་ལ་ཉན་མི་འོས་པའི་གསུང་བཤད་སོགས་གནང་ཡོད་འདུག

གསར་འགོད་པ། བསྟན་འཛིན་ཆོས་དབྱངས།