སྲིད་སྤྱི་གཉིས་ཀྱི་འོས་བསྡུ་མགོ་འཛུགས་ཀྱི་གཞུང་འབྲེལ་གསལ་བསྒྲགས་གནང་སོང་།
དབུས་འོས་བསྡུ་ལས་ཁང་གིས་ཕྱི་ལོ་༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་མགོ་འཛུགས་ཀྱི་གསལ་བསྒྲགས་གནང་བ་དང་སྦྲགས། ཐེངས་འདིར་འོས་བསྡུའི་དེབ་སྐྱེལ་གསར་དུ་ཞུ་གཏན་འཁེལ་བ་ཡིན་པ་དང་། འོས་གཞིར་བཞེངས་མཁན་ཚོར་དྲིལ་བསྒྲགས་བྱེད་ཕྱོགས་ཀྱི་རྩ་འཛིན་ལམ་སྟོན་དོན་ཚན་༡༢ ཞིག་གསལ་བསྒྲགས་གནང་སོང་།
ཟླ་༨ པའི་ཚེས་༥ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། དབུས་འོས་བསྡུ་ལས་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་དང་། འགན་འཛིན་ལས་འཕར་དགེ་བཤེས་མ་བདེ་ལེགས་དབང་མོ། འགན་འཛིན་ལས་འཕར་སྤྱི་ཟུར་བསོད་ནམས་རྒྱལ་མཚན་བཅས་ཕེབས་ནས། ཕྱི་ལོ་༢༠༢༡ ལོའི་སྲིད་སྐྱོང་དང་བོད་མི་མང་སྤྱི་འཐུས་ཀྱི་འོས་བསྡུ་ཆེན་མོ་མགོ་འཛུགས་ཀྱི་གསལ་བསྒྲགས་སྤེལ་གནང་སོང་། དེ་བཞིན་དབུས་འོས་བསྡུ་ལས་ཁང་གི་གཞུང་འབྲེལ་དྲ་རྒྱ་དབུ་འབྱེད་གནང་སོང་།
དབུས་འོས་བསྡུ་ལས་ཁང་གིས་དེང་སྐབས་ནད་ཡམས་རྐྱེན་པས་དཀའ་ཚེགས་དུ་མ་ཞིག་ཡོད་མུས་ཀྱང་། གནས་སྟངས་ཇི་ཆགས་ལ་མ་ལྟོས་པར་འོས་བསྡུ་ཆེན་མོ་དུས་ཐོག་ཞུ་རྒྱུའི་ཆོད་སེམས་བརྟན་པོ་ཡོད་ན། ས་གནས་འོས་བསྡུ་ལས་ཁང་དང་རྒྱ་ཆེ་མང་ཚོགས་ནས་ཀྱང་ངལ་བ་ཁྱད་བསད་ཀྱིས་ཞུ་སྒོ་ཁག་གནང་ཐབས་དགོས་རྒྱུ། རང་རེའི་འོས་བསྡུ་ཆེན་མོ་འདི་བཞིན་མ་འོངས་བོད་བསྟན་སྲིད་སྤྱིའི་ལས་དོན་གལ་འགངས་ཤིན་ཏུ་ཆེན་པོ་ཡིན་པས། བྱེས་འཁོད་རང་རིགས་ཡོངས་ནས་རྡོག་རྩ་གཅིག་ཏུ་སྒྲིལ་ཏེ་འོས་བསྡུའི་ནང་ཆ་ཤས་བཞེས་རྒྱུ་གནད་ཀྱི་སྙིང་པོ་ཡིན་པ་དང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༡༧།༡༨།༢༠།༢༡ བཅས་ཀྱི་ནང་གསལ་ལྟར་འོས་འཕེན་པའི་མིང་གཞུང་དེབ་འགོད་ཞུ་ཕྱོགས་ཐད། སྒྲིག་གཞི་བསྐྱར་བཅོས་དགོངས་དོན་དང་། བསྐྱར་བཅོས་ཚོགས་ཆུང་གི་རྒྱབ་གཉེར། དུས་ཀྱི་དགོས་མཁོ་སོགས་ལ་གཟིགས་ཏེ་འོས་བསྡུའི་དེབ་སྐྱེལ་གསར་དུ་ཞུ་གཏན་འཁེལ་བ་ཡིན་ན། འོས་འཕེན་པའི་གྲངས་མཛོད་ཚད་འཕེར་འབྱུང་ཐབས་སུ་ས་གནས་འོས་བསྡུ་ལས་ཁང་ཁག་དང་རྒྱ་ཆེ་མང་ཚོགས་བཅས་ནས་དམིགས་བསལ་ཐུགས་སྣང་གཟབ་བཞེས་ཐོག་འདི་ལོ་མིང་གཞུང་དེབ་སྐྱེལ་ངེས་པར་གནང་ཕྱོགས་དགོས་རྒྱུ། ཚང་མས་ཐུགས་སྣང་ཆེན་པོས་འོས་བསྡུའི་སྒྲིག་གཞི་དོན་ཚན་ ༡༨ པའི་ནང་གསེས་ ༤ པའི་ནང་གསལ་འོས་འཕེན་པའི་ཆ་རྐྱེན་རྣམས་ལྡན་དགོས་པ་དང་ལྷག་པར་དང་བླངས་དཔྱ་དེབ་ཡོད་ཐོག་དཔྱ་དངུལ་འབུལ་ཆད་མེད་པ་དགོས་རྒྱུ་གལ་ཆེའི་ཐོག ས་གནས་སོ་སོར་མིང་གཞུང་དེབ་འགོད་ངེས་པར་གནང་དགོས་པ་ཡིན་པ་གསུངས་སོང་། འོན་ཀྱང་ད་ལྟའི་ཆར་འོས་བསྡུ་དེབ་སྐྱེལ་ག་དུས་ནས་མགོ་འཛུགས་བྱེད་རྒྱུ་ཡིན་པ་ཐག་གཅོད་གཏན་འཁེལ་ཐུབ་མེད་འདུག་པས། གཏན་འཁེལ་བྱུང་མཚམས་སུ་གསལ་བསྒྲགས་སྤེལ་རྒྱུ་ཡིན་པ་གསུངས་སོང་།
དེ་བཞིན་དེང་སྐབས་སྤྱི་ཚོགས་ཀྱི་དཀའ་ངལ་ཆེ་གྲས་ཤིག་ནི་འགན་འཁུར་གང་ཡང་མེད་པའི་ཁ་པར་དང་དྲ་ལམ་སོགས་ལ་རྒྱུན་དུ་སྤྱོད་ཐལ་ཆེ་སྐྱོན་ཙམ་དུ་མ་ཟད། དེ་དག་བརྒྱུད་སྒེར་ནད་སྤྱི་སྤུངས་ཀྱིས་ནང་ཁུལ་འཁྲུགས་གཞི། འདི་ལྟའི་གོ་སྐབས་ཕྱི་ཕྱོགས་ནས་དངོས་བརྒྱུད་ཆེད་གཉེར་བདེ་འཇགས་ལ་གནོད་ཚབས་ཡོང་མི་སྲིད་པ་མིན་སྟབས། རྒྱ་ཆེ་མང་ཚོགས་ནས་དགོས་མེད་དཀྲོགས་རྐྱེན་རིགས་ལ་དབུ་མ་འཁོར་བར་དོགས་ཟོན་དང་སྦིར་བསངས་དོད་པོས་བྱ་ར་དམ་འཛིན་གནང་གལ་ཡིན་པ་དང་། དབུས་འོས་བསྡུ་ལས་ཁང་ནས་ས་གནས་འོས་བསྡུ་ལས་ཁང་ཁག་དང་རྒྱ་ཆེ་མང་ཚོགས་བཅས་ལ་འོས་བསྡུ་དང་འབྲེལ་བའི་ལས་དོན་རྣམས་སྒྲིག་མཐུན་ཚགས་ཚུད་ཡོང་ཐབས་སུ་ཟབ་སྦྱོང་དང་། འཕྲིན་ལམ། སྦྱར་ཡིག དྲ་ཐོག་སྦྱོང་བརྡར་སོགས་རིམ་པས་གོ་སྒྲིག་ཞུ་འཆར་ཡོད་ན། ཚང་མས་གལ་ཆེ་དོན་ཆེའི་ཐོག་ནས་ཐུགས་སྣང་དང་ཕྱག་ལེན་གནང་ཐབས་ཡོང་བ། མང་གཙོའི་ཀ་བ་བཞི་པ་ལྟ་བུ་གསར་འགྱུར་བརྒྱུད་ལམ་ཁག་ནས་དུས་བསྟུན་དངོས་ཡོད་གནས་ཚུལ་རྣམས་གཞི་རིམ་མང་ཚོགས་སུ་དུས་ཐོག་འཁྱོལ་ཐུབ་པའི་དམིགས་བསལ་ཁྱད་ནུས་ལྡན་ཡོད་ན། གནས་ཚུལ་རྣམས་ཕྱོགས་ལྷུངས་བྲལ་བའི་དངོས་བརྟག་དྲང་བདེན་དང་ཁུངས་འཕེར་ཁྱབ་སྤེལ་གནང་བའི་ཡིད་ཆེས་དང་། འོས་བསྡུ་ཆེན་མོར་སྨན་པའི་དབུས་འོས་བསྡུ་ལས་ཁང་ལ་མཐུན་འགྱུར་རམ་འདེགས་གནང་བའི་རེ་བ་ཞུ་བཞིན་ཡོད་པ་གསུངས་སོང་།
འོས་བསྡུའི་ལས་དོན་རྣམས་སྒྲིག་མཐུན་ཚགས་ཚུད་འབྱུང་ཐབས་སུ་འོས་འཕེན་པ་རྒྱ་ཆེ་མང་ཚོགས་ནས་འོས་བསྡུ་དང་འབྲེལ་བའི་གནས་དོན་རྣམས་གོ་རྟོགས་འཕེལ་ཐབས་དང་། སྟབས་བདེའི་ཐོག་ནས་འཚོལ་སྒྲུབ་ཐུབ་ཆེད་དུ། དབུས་འོས་བསྡུ་ལས་ཁང་གི་གཞུང་འབྲེལ་དྲ་རྒྱ་དབུ་འབྱེད་གནང་སོང་། ད་ལྟའི་ཆར་དྲ་རྒྱའི་སྐད་ཡིག་བོད་ཡིག་གཞི་འཛིན་ཐོག་རིམ་བཞིན་དབྱིན་ཡིག་ཐོག་འདོན་འཆར་ཡོད་འདུག འདིར་ཁྱད་ཆོས་གཙོ་བོ་བཙན་བྱོལ་བོད་མིའི་བཅའ་ཁྲིམས་དང་། བཙན་བྱོལ་བོད་མིའི་འོས་བསྡུའི་སྒྲིག་གཞི། དབུས་འོས་བསྡུ་ལས་ཁང་ནས་སྐབས་འབྲེལ་ཡོངས་ཁྱབ་གསལ་བསྒྲགས། འོས་བསྡུ་དང་འབྲེལ་བའི་བརྙན་ཐུང་། འདས་པའི་འོས་བསྡུའི་གྲུབ་འབྲས་ཁག དབུས་དང་ས་གནས་ཀྱི་འབྲེལ་གཏུགས་ངོ་སྤྲོད། འོས་འཕེན་པའི་ཤེས་བྱ་དང་ཟབ་སྦྱོང་བཅས་དེང་དུས་དང་མཐུན་པའི་བཀོལ་སྤྱོད་ཀྱི་ཆ་རྐྱེན་ཁག་ལྡན་ཡོད། ད་ལྟའི་དངོས་ཡོད་གནས་སྟངས་དང་བསྟུན་དྲ་ལམ་ཁག་བརྒྱུད་དྲིལ་བསྒྲགས་མང་ཙམ་སྤེལ་འཆར་ཡོད་སྐོར་གསུངས་སོང་།
དབུས་འོས་བསྡུ་ལས་ཁང་ནས་ཕྱི་ལོ་ ༢༠༢༡ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་༡༧ པའི་འོས་བསྡུ་ཆེན་མོའི་འོས་གཞིར་བཞེངས་མཁན་རྣམས་ལ་འོས་བསྡུ་དང་འབྲེལ་བའི་དྲིལ་བསྒྲགས་བྱེད་ཕྱོགས་ཀྱི་རྩ་འཛིན་ལམ་སྟོན་དོན་ཚན་༡༢ གནང་སོང་བ་དང་། དེ་དག་ནི་ ༡)སྲིད་སྐྱོང་དང་སྤྱི་འཐུས་ཀྱི་འོས་གཞིར་ཞུགས་མཁན་རྣམས་ཀྱིས་འོས་བསྡུའི་རྒྱལ་ཁ་ཐོབ་ཆེད་དྲིལ་བསྒྲགས་ཡིག་ཆའི་སྟེང་༧གོང་ས་མཆོག་གི་སྐུ་པར་དང་། བོད་མིའི་སྒྲིག་འཛུགས་ཀྱི་ལས་རྟགས། བོད་རྒྱལ་ཁབ་ཆེན་པོའི་རྒྱལ་དར། བོད་ཀྱི་ས་ཁྲ་སོགས་གང་དུའང་བེད་སྤྱོད་མི་ཆོག
༢) བཙན་བྱོལ་བོད་མིའི་བཅའ་ཁྲིམས་དང་། བཙན་བྱོལ་བོད་མིའི་འོས་བསྡུའི་སྒྲིག་གཞི་ཁག་ལ་སྙིང་ནས་བརྩི་ བཀུར་ཐོག དབུས་འོས་བསྡུ་ལས་ཁང་གིས་འོས་བསྡུ་དང་འབྲེལ་བའི་བྱེད་སྒོའི་ལམ་སྟོན་ཁག་ལ་ཤར་བསྐྱོད་ ཐུབ་པ་གནང་གལ། མང་གཙོའི་དགོས་དམིགས་གཙོ་བོ་སྤྱི་ཚོགས་འདྲ་མཉམ་དང་དྲང་བདེན་གྱི་ཐོག་ནས་མི་ མང་གི་ཆེད་དུ། མི་མང་ནས་བདམས་པ། མི་མང་གི་སྒྲིག་འཛུགས་རྨང་གཞིའི་ཐོག བོད་མི་རིགས་ཀྱི་རིག་ གཞུང་གཅེས་ནོར་སྤྱི་དང་། ལྷག་པར་ཡ་རབས་བཟང་སྤྱོད། འཆམ་མཐུན་ཆིག་སྒྲིལ་འབྱུང་ཐབས་ཀྱི་ཐོག་ནས་འགན་འཁུར་བཞེས་དགོས།
༣) འོས་གཞིར་ཞུགས་མཁན་རྣམས་ནས་ཁྲིམས་མཐུན་གྱི་སྒོ་ནས་རང་ཉིད་ཀྱི་ལངས་ཕྱོགས་དང་འབྱུང་འགྱུར་ཞུ་བྱ་སོགས་ཀྱི་གཏམ་བཤད། སྦྱར་ཡིག ཡིག་འགྲེམས། རང་ཉིད་ཀྱི་དྲ་རྒྱ་སོགས་བརྒྱུད་དྲིལ་བསྒྲགས་གནང་ ཆོག་པ་ཡིན། འོན་ཀྱང་བོད་ཀྱི་ཐུན་མོང་མ་ཡིན་པའི་བཟང་སྤྱོད་དང་བརྒལ་ཏེ་གང་ཟག་སྒེར་གྱི་མི་གཤིས་ སོགས་ལ་སྐྱོན་བརྗོད་དང་། ནང་ཁུལ་འཆམ་མཐུན་ལ་གནོད་ཚབས་དང་འགལ་ཟླ་འགྱུར་གཞིའི་རིགས། རིགས་རུས། ཆོས་ལུགས། ཆོལ་ཁ་ནང་ཕན་ཚུན་མི་མཐུན་པ་འགྱུར་གཞི། ལུང་ཚན་འཐེན་ཁྱེར། དངུལ་དངོས་ལྐོག་རྔན་སྤྲོད་ལེན་དང་བརྒྱུད་སྐུལ་ཐབས་ཤེས་རིགས་ནམ་ཡང་མི་ཆོག
༤) འོས་འཕེན་པ་སྒེར་གྱི་རང་ཆས་སུ་མངའ་བའི་གཞི་རིམ་ཐོབ་ཐང་ཁག་ལ་བརྩི་སྲུང་ངེས་པར་བྱ་དགོས། དེ་ ལས་ལྡོག་སྟེ་བཙན་དབང་ངམ་དྲག་ཤུགས་ཀྱི་སྒོ་ནས་འོས་འཕེན་དུ་འཇུག་པའམ་མི་འཇུག་པ། འོས་གཞི་ནས་ ཕྱིར་འཐེན་བྱེད་དུ་འཇུག་པ་སོགས་ཀྱི་རིགས་ནམ་ཡང་མི་ཆོག
༥) འོས་གཞི་སུ་ཐད་ནས་དབུས་སའི་འོས་བསྡུའི་ལས་དོན་སྐོར་མི་མང་དང་། གསར་འགོད་བསྐོང་ཚོགས་ཀྱིས་ དྲན་བདེན་མིན་པའི་གནས་ཚུལ་གསལ་བསྒྲགས་བྱེད་པ་དང་ཡིག་ཆ་འགྲེམས་སྤེལ་བྱེད་པའི་རིགས་མི་ཆོག
༦) འོས་གཞིར་བཞེངས་མཁན་རྣམས་ནས་གནས་ཡུལ་སོ་སོའི་ཡུལ་ཁྲིམས་ལ་བརྩི་སྲུང་དང་། དབུས་འོས་བསྡུ་ལས་ཁང་ནས་དུས་བསྟུན་ལམ་སྟོན་ཁག་ལ་དང་ལེན། ལྷག་པར་འོས་གཞིར་བཞེངས་མཁན་དང་དེ་འབྲེལ་སུས་ཀྱང་འོས་གཞིར་བཞེངས་མཁན་གཞན་གྱི་ཚོགས་འདུ་ཚུགས་བཞིན་པར་འགོག་རྐྱེན་བཟོས་རིགས་མི་ཆོག
༧) འོས་བསྡུའི་སྒྲིག་གཞི་དོན་ཚན་༢༤ པའི་ནང་གསེས་༧ པ་ནང་གསལ་ཆོལ་གསུམ་སྒྲིག་འཛུགས། ཆོས་ བརྒྱུད་ཁག གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་བཅས་ནས་འོས་གཞི་འདོན་ཐབས་དང་། རྒྱབ་གཉེར་རིགས་མི་ཆོག་པ་བཞིན། འོས་གཞིར་བཞེངས་མཁན་རྣམས་ནས་དེ་དག་བརྒྱུད་ནས་དྲིལ་བསྒྲགས་རིགས་མི་ཆོག
༨) སྒྲིག་གསལ་སློབ་གྲྭ་ཁག་གི་ནང་འོས་བསྡུ་དང་འབྲེལ་བའི་གཏམ་བཤད་དང་། དྲིལ་བསྒྲགས། ཡིག་སྦྱར་ རིགས་མི་ཆོག
༩) དེང་སྐབས་སྤྱི་ཚོགས་དྲ་ལམ་ཁག་བརྒྱུད་དངོས་མིན་གནས་ཚུལ། རྫུན་གཏམ་ཁྱབ་སྤེལ། གཞན་བརྒྱུད་ གཏམ་ཆལ་སོགས་ཀྱི་དཀའ་ངལ་དུ་མ་ཡོད་མུས་བཞིན། འོས་གཞིར་བཞེངས་མཁན་རྣམས་ནས་ཧ་ཅང་ཉེན་ ཚབས་ཆེ་བའི་ཁོར་ཡུག་ནང་མི་ཚུད་པ་ཕྱོགས་ཡོངས་ནས་ཐུགས་གཟབ་གནང་དགོས།
༡༠) ས་གནས་ཁག་ནང་དྲིལ་བསྒྲགས་གཏམ་བཤད་སོགས་ཀྱི་སླད་མི་མང་བསྡུ་བསྐོང་གིས་དྲིལ་བསྒྲགས་དང་། གསར་འགོད་གསལ་བསྒྲགས། ཡིག་འགྲེམས་སོགས་ཀྱི་གནས་དོན་གང་བྱེད་ས་གནས་འོས་བསྡུ་ལས་ཁང་ལ་མཁྱེན་རྟོགས་སྙན་གསན་ངེས་པར་ཞུ་དགོས།
༡༡) སྲིད་སྐྱོང་དང་སྤྱི་འཐུས་འོས་གཞིར་ཞུགས་མཁན་དང་དེ་འབྲེལ་རྣམས་ནས་སྔོན་འགྲོ་དང་དངོས་གཞི་གཉིས་ཀར་དྲིལ་བསྒྲགས་བྱ་འཐུས་ཀྱང་། འོས་བསྡུའི་སྒྲིག་གཞི་དོན་ཚན་༢༤ ནང་གསེས་༧ པ་ནང་གསལ་ བཞིན་འོས་བསྡུའི་དུས་ཚོད་ཀྱི་ཉིན་གཉིས་གོང་ནས་འོས་བསྡུ་མ་ཟིན་བར་རྒྱབ་གཉེར་གསལ་བསྒྲགས་བྱེད་ མཚམས་འཇོག་དགོས། དེ་བཞིན་འོས་འཕེན་པའི་ཉིན་མོར་འོས་འཕེན་པར་བརྒྱུད་སྐུལ་ཤོག་འཛར་འགྲེམས་ སྤེལ་སོགས་དངོས་ཤུགས་བརྒྱུད་གསུམ་ནས་མི་ཆོག
༡༢) གོང་གསལ་དོན་ཚན་གང་རུང་དང་འགལ་བ་དངོས་ར་འཕྲོད་པ་བྱུང་ཚེ། འོས་བསྡུའི་སྒྲིག་གཞི་དགོངས་དོན་འགལ་ཚབས་ལ་གཞིགས་པའི་ཉེས་ཆད་འགེལ་རྒྱུ་བཅས་ཀྱི་རྩ་འཛིན་ལམ་སྟོན་དུ་ཞེས་འཁོད་འདུག
གསར་འགོད་པ་ཞིག་གིས་སྐབས་སྔོན་མའི་འོས་བསྡུ་སྐབས་སུ་སྲིད་སྐྱོང་འོས་མི་ཞིག་ལ་ལངས་ཕྱོགས་དང་སྤྱི་ཚོགས་ནང་གླེང་གཞི་ཡོད་པར་བརྟེན། དགོན་སྡེ་ཁག་ཅིག་ཏུ་གཏམ་བཤད་བྱེད་དུ་བཅུག་མེད་པས། དེའི་སྐོར་བསམ་ཚུལ་གང་ཡོད་དྲིས་པར། འོས་བསྡུ་འགན་འཛིན་དཔེ་ཟུར་དབང་འདུས་ཚེ་རིང་གིས་བཅའ་ཁྲིམས་ནང་དུ་བོད་མི་ཚང་མར་ལས་འགན་དང་ཐོབ་ཐང་གཉིས་སྤྲད་ཡོད་པ་དང་། བཅའ་ཁྲིམས་ནང་དུ་བོད་མི་ཚང་མ་འདྲ་མཉམ་ཡིན་པས། སློབ་གྲྭ་ཁག་ཕུད་པའི་ས་གནས་གཞན་ཏུ་འོས་མི་ཞིག་ལ་གཏམ་བཤད་བྱེད་པའི་རང་དབང་དང་ཐོབ་ཐང་ཡོད་པ་དང་། དེ་ལྟར་ཡོང་ཐུབ་དགོས་པ་བཟོ་རྒྱུ་གལ་ཆེན་ཡིན་པས། དེ་ལྟར་ཡོང་བར་མཐུན་སྦྱོར་རམ་འདེགས་གནང་རོགས་ཞེས་གསུངས་སོང་། དེ་མིན་ད་ལྟའི་ཆར་འོས་བསྡུའི་ཚེས་གྲངས་སོགས་དངོས་སུ་གཏན་འཁེལ་བྱུང་མེད་འདུག་པས། གཏན་འབེབས་བྱུང་མཚམས་སུ་གསལ་བསྒྲགས་སྤེལ་རྒྱུ་དང་། རྒྱ་གར་ནང་དུ་ཏོག་དབྱིབས་ནད་དུག་གི་གནས་སྟངས་ཡག་ཏུ་འགྲོ་རྒྱུའི་རེ་བ་བྱེད་ཀྱི་ཡོད་པ་དང་། དེ་ལྟར་སོང་སྐབས་འོས་བསྡུ་འགན་འཛིན་རྣམས་ས་གནས་ཁག་ཏུ་སྐོར་བསྐྱོད་དུ་འགྲོ་ཐབས་བྱེད་རྒྱུ་ཡིན་སྐོར་གསུངས་སོང་།།
གསར་འགོད་པ་སྐལ་བཟང་དོན་གྲུབ།
