ཧོང་ཀོང་ཁྲིམས་ཁང་གིས་མཚན་མཐུན་བཟའ་ཚང་རྣམས་ལ་ཁང་པ་དང་ཤུལ་བཞག་རྒྱུ་ནོར་གྱི་ཐོབ་ཐང་སྤྲད་པ།
དེ་ཡང་རྒྱ་གར་གསར་འགྱུར་Times of India ནང་དུ་གནས་ཚུལ་སྤེལ་གསལ་ལྟར་ན། གཟའ་མིག་དམར་ཉིན་ཧོང་ཀོང་གི་ཁྲིམས་ཁང་མཐོ་ཤོས་ཀྱིས་མཚན་མཐུན་བཟའ་ཟླ་ཚོར་སྡོད་ཁང་དང་ཤུལ་བཞག་རྒྱུ་ནོར་གྱི་ཐོབ་ཐང་ཡོད་པའི་ཁྲིམས་ཐག་བཅད་ནས་གཞུང་ཕྱོགས་ཀྱི་ཞུ་གཏུགས་ལ་ངོས་ལེན་བྱས་མེད་པ་དེ་ནི་རྒྱལ་ཁ་ཆེན་པོ་ཞིག་ཡིན་པར་བརྗོད།
ཐག་གཅོད་དེ་ནི་མི་སེར་(NickInfinger)ནིག་ཨིན་ཕིན་གྷར་གྱིས་ཁོང་གི་མཚན་མཐུན་བཟའ་ཟླ་དང་མཉམ་དུ་སྤྱི་པའི་ཁང་གླ་ཆག་ཡངས་ཐོབ་ཐབས་བྱས་ཀྱང་། ཁོང་གཉིས་ནི་སྤྱིར་བཏང་གི་ནང་མི་ཞིག་ལ་ངོས་འཛིན་མ་བྱས་པར་ཁང་པ་མ་རག་པའི་རྩོད་གཞི་དེ་ལོ་དྲུག་རིང་འགོར་ཡོད་པ་དང་། དེ་རྗེས་HenriLiཧེན་རི་ལི་ཡིས་རང་གི་བཟའ་ཟླ་EdgarNgཨིཌ་གར་༢༠༢༠ལོར་འདས་གྲོངས་སུ་གྱུར་རྗེས་ཤུལ་བཞག་རྒྱུ་ནོར་གྱི་ཁྲིམས་གཞི་ནས་མཚན་མཐུན་བཟའ་ཟླ་ཚོ་ཕུད་པའི་རྩོད་གཞི་གཉིས་མཉམ་དུ་བསྡེབས་ནས་ཁྲིམས་གཏུག་བྱས་ཡོད་འདུག
ཁྲིམས་དཔོན་གཙོ་བོ་AndrewCheungཨན་ཌི་རུ་ཆིང་གིས་མཚན་མཐུན་བཟའ་ཟླ་ཚོ་སྤྱི་པའི་ཁང་གླ་ཆག་ཡངས་དང་ཁང་པ་ཉོ་ཆོག་པའི་ལས་གཞི་ནས་ཕུད་པ་དེ་ནི་རྒྱུ་མཚན་ལྡན་པ་ཞིག་ཡིན་མིན་བརྗོད་མི་ཐུབ་ཅེས་ཁྲིམས་ཁང་གིས་གཅིག་མཚུངས་བཞིན་མཚན་མཐུན་བཟའ་ཟླ་ཚོར་ཁང་གླ་ཆག་ཡངས་དགོས་མཁོ་ཡོད་པ་དང་། དེ་ལྟར་ཕུད་པ་དེས་ཁོང་ཚོར་ཁང་པ་གཅིག་གི་ནང་མཉམ་དུ་འཚོ་བ་སྐྱེལ་རྒྱུའི་གོ་སྐབས་མེད་པ་དང་། དེའི་ཐོག་ཁྲིམས་ཁང་གིས་མཚན་མཐུན་གཉེན་སྒྲིག་མཁན་དང་གཉེན་སྒྲིག་ཟིན་པའི་ཆ་རྐྱེན་ལྡན་པ་ཚོར་འགྲེལ་བཤད་རྒྱག་རྒྱུའི་ཐོབ་ཐང་མེད་པའི་གཏན་འབེབས་ཁྲིམས་ལུགས་དེ་ལག་བསྟར་བྱེད་རྒྱུའི་འོས་བབ་མེད་པའི་ཁྲིམས་བསྒྲགས་བྱས་ཡོད་པ་དང་། ཁྲིམས་དཔོན་JosephForkཇོ་སེབ་ཕོག་དང་Roberto Ribeiroརོ་བྷར་ཊོ་རི་བྷེ་རེ་གཉིས་ཀྱིས་གནད་དོན་འདི་དག་གི་ཐད་མཚན་མཐུན་གཉེན་སྒྲིག་ཚོར་ཁྱད་པར་འབྱེད་པའི་སྲིད་གཞུང་གི་བྱ་སྤྱོད་ལ་འགྲེལ་བཤད་རྒྱག་མ་ཐུབ་པར་སྐྱོན་བརྗོད་བྱས་ཡོད་པ་རེད།
ཁྲིམས་ཁང་ཕྱི་ལོགས་སུ་འཇའ་ཚོན་ལྡན་པའི་དར་ཆ་ཞིག་བསྒྲེངས་འཛུགས་བྱས་ཏེ་Infingerཨིན་ཕིན་གྷར་གྱི་བཀའ་ཁྲོལ་ལ་ཐུགས་རྗེ་ཆེ་ཞུས་པ་དང་ཆབས་ཅིག་ཧོང་ཀོང་ནང་མཚན་མཐུན་གྱི་འདྲ་མཉམ་ཆ་ཚང་བ་ཞིག་ཡོང་བར་དུས་ཚོད་འགོར་གྱི་རེད་ཅེས་ངོས་འཛིན་བྱས་ཡོད་འདུག ཁོང་གིས་ཧོང་ཀོང་ནང་འདྲ་མཉམ་དང་དྲང་བདེན་ཆེ་བ་ཞིག་ཡོང་བའི་རེ་བ་ཡོད་ཅེས་དང་། ཧོང་ཀོང་ནི་ཐའེ་ཝན་དང་ཐེ་ལན་ཌི་ལྟ་བུའི་ཁྲིམས་ལུགས་ལྡན་པའི་ས་ཁུལ་དང་བསྡུར་ན་མཚན་མཐུན་གཉེན་སྒྲིག་གི་ཐོབ་ཐང་སྲུང་སྐྱོབ་ཐད་རྗེས་ལུས་ཐེབས་ཡོད་ཅེས་ངོས་འཛིན་བྱས་ཡོད་འདུག
ལི་ཡིས་འདས་གྲོངས་སུ་གྱུར་པའི་རང་གི་ཁྱོ་གར་སེམས་པ་སྐྱོ་བའི་ཡི་གེ་ཞིག་བྲིས་ནས་བཀའ་ཁྲོལ་ལ་ཐུགས་རྗེ་ཆེ་ཞུས་པ་དང་། ཁོང་གིས་ལོ་མང་རིང་སྡུག་བསྔལ་མྱངས་ཡོད་ཀྱང་འདྲ་མཉམ་གྱི་འཐབ་རྩོད་མུ་མཐུད་ནས་བྱེད་རྒྱུའི་རེ་བ་ཡོད་པའི་སྐོར་བཀོད་ཡོད་འདུག
ཁྲིམས་ཁང་གི་ཐག་གཅོད་དེ་ནི་ཕྱི་ལོ་༢༠༢༣ལོར་ཁྲིམས་ཁང་གིས་མཚན་མཐུན་གཉེན་སྒྲིག་ཁྲིམས་མཐུན་ཡོང་བར་ངོས་ལེན་བྱས་མེད་ཀྱང་། མཚན་མཐུན་ཆགས་སྤྱོད་ཉམས་ལེན་པ་ཚོའི་ཐོབ་ཐང་སྲུང་སྐྱོབ་ཆེད་ལོ་གཉིས་ཀྱི་དུས་ཚོད་སྤྲད་དེ་ཁྲིམས་ཀྱི་སྒྲོམ་གཞི་གཞན་ཞིག་བཟོ་དགོས་པའི་བཀའ་གནང་བ་ལས་བྱུང་བ་ཞིག་ཡིན་འདུག ཧོང་ཀོང་མཚན་མཐུན་གཉེན་སྒྲིག་ལྟ་བུའི་ཚོགས་པ་ཁག་གིས་གཞུང་གིས་མཚན་མཐུན་ཆགས་སྤྱོད་ཉམས་ལེན་པ་ཚོ་གཉེན་སྒྲིག་གི་ཁོངས་ནས་ཕྱིར་འབུད་བྱེད་པ་མཚམས་འཇོག་དང་། ལུས་འབྲེལ་གྱི་འདོད་ཚུལ་ LGBTQ+ ཐོབ་ཐང་ལ་སྲུང་སྐྱོབ་ཆ་ཚང་བ་ཞིག་ལག་བསྟར་བྱེད་དགོས་པའི་འབོད་སྐུལ་བྱས་ཡོད་འདུག
མཚན་མཐུན་གཉེན་སྒྲིག་ལ་མི་མང་གི་རྒྱབ་སྐྱོར་ཇེ་མང་དུ་འགྲོ་བཞིན་ཡོད་པ་སྟེ། ཕྱི་ལོ་ ༢༠༢༣ ལོའི་བསམ་ཞིབ་ལྟར་ཧོང་ཀོང་གི་མི་འབོར་བརྒྱ་ཆ་ ༦༠ ཡིས་རྒྱབ་སྐྱོར་བྱས་ཡོད་འདུག ལས་འགུལ་བ་ཚོས་གཞུང་གི་སྒྲོམ་གཞི་གསར་པ་དེས་མཚན་མཐུན་ཆགས་སྤྱོད་ཉམས་ལེན་པ་ཚོར་སྲུང་སྐྱོབ་ཤུགས་ཆེ་བ་ཞིག་སྤྲོད་རྒྱུའི་རེ་བ་བྱེད་ཀྱི་ཡོད་འདུག
འོན་ཀྱང་། ཁོང་ཚོས་གཞུང་གིས་དོན་སྙིང་ལྡན་པའི་ཁྲིམས་བསྐྱར་བཅོས་བྱེད་པར་མགྱོགས་པོར་ལས་འགུལ་སྤེལ་དགོས་པའི་འབོད་སྐུལ་བྱེད་བཞིན་ཡོད་པས་དོགས་ཟོན་བྱེད་བཞིན་ཡོད་འདུག
གསར་འགོད་པ། བསྟན་འཛིན་ཆོས་དབྱངས།
