ཨ་རིའི་རོགས་ཚོགས་ཀྱིས་བོད་མིའི་སྤྱི་ཚོགས་བདེ་དོན་ལ་སྨན་པའི་ལས་གཞི་ཞིག་དབུ་འབྱེད་གནང་སོང་།
ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བ་ཞེས་པ་ཞིག་དབུ་འབྱེད་གནང་སོང་། ཟླ་འདིའི་ཚེས་༢༥ ཉིན་གྱི་ཕྱི་དྲོར། དྷ་ས་བོད་ཀྱི་ཟློས་གར་ཚོགས་ཁང་དུ་ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བ་ཞེས་པ་ཞིག་དབུ་འབྱེད་གནང་སོང་།
སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་། ཨ་རིའི་རོགས་ཚོགས་ཀྱི་རྒྱ་གར་དང་འབྲུག་ཡུལ་ཁུལ་གྱི་ལས་གཞིའི་ངེས་སྟོན་པ་ཨིས་ཀྲི་བིན་ཨོ་ལིབ་ (Steven Olive) གཙོས་པའི་ཨ་རིའི་རོགས་ཚོགས་ཀྱི་སྐུ་ཚབ་ཚོགས་ཆུང་། བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་དང་ལས་ཁུངས་ཁག་གི་དྲུང་ཆེ། འབྲེེལ་ཡོད་ཚོགས་སྡེ་ཁག་གི་འགན་འཛིན་དང་སྐུ་ཚབ་སོགས་ཕེབས་འདུག
སྲིད་ཚབ་ལྕང་ར་ཐར་ལམ་སྒྲོལ་མས་བོད་ས་ཤོར་ནས་ལོ་ངོ་༦༥ ལྷག་འགྲོ་བཞིན་ཡོད་པའི་དུས་ཡུན་རིང་། རྒྱ་གཞུང་གིས་ཐབས་བརྒྱ་བྱུས་སྟོང་གིས་བོད་ཀྱི་ཆོས་དང་རིག་གཞུང་བཅས་ཤུལ་མེད་ནག་བསུབ་གཏོང་ཐབས་བྱས་ཡོད་ན་ཡང་། བཙན་བྱོལ་ནང་༧གོང་ས་མཆོག་གི་དབུ་ཁྲིད་ལམ་སྟོན་འོག་བོད་མི་ཚོས་དཀའ་སྤྱད་འབད་བརྩོན་བྱས་པ་ལ་བརྟེན་ནས་བོད་མིའི་འཐབ་རྩོད་རྒྱུན་འཛིན་དང་བོད་ཀྱི་ཆོས་དང་རིག་གཞུང་གི་གཞི་རྟེན་བརྟན་པོ་བཙུགས་ཡོད་པ་དང་། ད་ལྟའི་ཆར་བོད་ནང་གི་བོད་ཕྲུག་རྣམས་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བཙན་འཛུལ་བྱས་ནས་བོད་ཀྱི་ཆོས་དང་རིག་གཞུང་ལས་ཁ་ཕྲལ་ཏེ། རྒྱ་སྐད་གཙོ་བོར་གྱུར་པའི་ཆབ་སྲིད་ཀྱི་སློབ་གསོ་སྤྲད་ནས་བྱིས་པའི་རྒྱུད་ལ་བོད་མིའི་ངོ་བོ་མེད་པ་བཟོ་ཐབས་བྱེད་བཞིན་པ་ནི་བློ་འཚབ་སྐྱེ་གཞི་ཞིག་ཏུ་གྱུར་ཡོད་པ་རེད་ཅེས་གསུངས་སོང་།
ཨ་རིའི་རོགས་ཚོགས་ཀྱི་རྒྱ་གར་དང་འབྲུག་ཡུལ་ཁུལ་གྱི་ལས་གཞིའི་ངེས་སྟོན་པ་ཨིས་ཀྲི་བིན་ཨོ་ལིབ་ཀྱིས་ཨ་རིའི་གཞུང་དམངས་གཉིས་ཀྱིས་བོད་མི་རྣམས་ལ་ཤ་ཚ་དང་རྒྱབ་སྐྱོར་མཐོན་པོ་གནང་གི་ཡོད་པ་དང་། མ་འོངས་པར་བཙན་བྱོལ་བོད་མིའི་བདེ་དོན་ལ་སྨན་པའི་ལས་དོན་ཐོག་ཐུགས་ཁུར་ཆེ་བཞེས་གནང་རྒྱུ་ཡིན་སོགས་ཀྱི་གསུང་བཤད་གནང་སོང་།
གཞན་ཡང་། བོད་མིའི་སྒྲིག་འཛུགས་ཀྱི་དྲྭ་ཐོག་ཏུ། སྤྱིར་ལོ་ལྔའི་རིང་གི་ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བའི་ལས་གཞི་དེ་ནི་ཨ་རིའི་རོགས་ཚོགས་ཀྱི་བོད་མིའི་སྤྱི་ཚོགས་ལ་ཕན་པའི་ལས་གཞི་ཆེ་ཤོས་ཤིག་ཡིན་པ་དང་། ལས་གཞི་དེ་བརྒྱུད་བོད་མི་རྣམས་ལ་རྒྱུན་གནས་ཐུབ་པའི་འཚོ་བ་སྐྱེལ་རྒྱུ་དང༌། སྤྱི་ཚོགས་ཀྱི་འཚོ་བ་བརྟན་པོ་བཟོ་རྒྱུ། བོད་མིའི་རིག་གཞུང་རྒྱུན་འཛིན་བྱ་རྒྱུའི་དམིགས་ཚད་འཛིན་གྱི་ཡོད་ལ། དེའི་ཆེད་དུ་བོད་མིའི་སྒྲིག་འཛུགས་དང་མཉམ་ལས་ཐོག་ལས་རིགས་སྦྱོང་བརྡར་དང་། ཚོང་འཛུགས་རམ་འདེགས། རིག་རྩལ་གོང་འཕེལ་བཏང་སྟེ། བོད་མི་རྣམས་དཔལ་འབྱོར་ཐོག་རང་ཁ་རང་གསོ་བཟོ་རྒྱུ་དང་། བོད་ཀྱི་སྐད་ཡིག རིག་གཞུང་། སྲོལ་རྒྱུན་མི་ཉམས་རྒྱུན་འཛིན་བྱ་རྒྱུ་ཡིན་པ་རེད་ཅེས་བཀོད་འདུག།།
གསར་འགོད་པ། བློ་བཟང་རྒྱ་མཚོ།
