ཨ་རིའི་སྲིད་འཛིན་གསར་པ་ཊོམ་གྱིས་མ་འོངས་པར་ཐའེ་ཝན་ལ་སྲིད་བྱུས་གང་འདྲ་ཞིག་འཛིན་ནམ།

ཐའེ་ཝན་གླིང་ཕྲན་ལ་རྒྱ་ནག་གིས་འཇིགས་སྐུལ་ཡང་ཡང་བྱེད་ཀྱི་ཡོད་པའི་རྐྱེན་གྱིས་ཨ་རིའི་གཞུང་གིས་ཐའེ་ཝན་གྱི་བདེ་འཇགས་ལ་སྲུང་སྐྱོབ་བྱེད་དགོས་རྒྱུ་ནི་གལ་ཆེན་པོ་ཡིན་པར་བརྟེན། ད་ཆར་ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་ཊོམ་ལ་སྲིད་འཛིན་གྱི་རྒྱལ་ཁ་ཐོབ་ཡོད་པའི་རྐྱེན་གྱིས་མ་འོངས་པར་ཐའེ་ཝན་གྱི་བདེ་འཇགས་ཐད་བསམ་ཚུལ་འདྲ་མིན་ཡོང་བཞིན་ཡོད་འདུག

ཕྱི་ཚེས་༢༢ ཉིན་ཨེ་ཤེ་ཡའི་དུས་བབ་གསར་ཁང་གིས་ཨེ་ཤེ་ཡའི་མངའ་ཁུལ་གྱི་དམག་དོན་སྐོར་མཁས་པ་ཡིན་པའི་ཨ་རི་བ་(GRANT NEWSHAM)གྷེར་ཏྲེ་ནོའུ་ཤེམ་ཟེར་བ་ཞིག་གིས་ཊོམ་སྲིད་གཞུང་གིས་མ་འོངས་པའི་ཐའེ་ཝན་སྐོར་སྲིད་བྱུས་གང་འདྲ་འཛིན་མིན་སྐོར་དཔྱད་རྩོམ་ཞིག་བཏོན་གནང་འདུག དཔྱད་རྩོམ་དེའི་ནང་ལོ་རྗེས་མའི་ཕྱི་ཟླ་༡ པོའི་ནང་ཨ་རིའི་ཕོ་བྲང་དཀར་པོའི་ནང་ཊོམ་སྲིད་འཛིན་ཡོང་རྒྱུ་ཡིན་པར་བརྟེན། ཊོམ་གྱིས་ཐའེ་ཝན་ལ་འཛིན་པའི་སྲིད་བྱུས་དེ་ཧ་ཅང་གལ་ཆེན་ཆགས་ཀྱི་ཡོད། རྒྱུ་མཚན་ནི་རྒྱ་ནག་གིས་ཐའེ་ཝན་གླིང་ཕྲན་དེ་ནི་རྒྱ་ནག་གི་ཞིང་ཆེན་ཞིག་ཡིན་པས། གང་མགྱོགས་རྒྱ་ནག་དང་ལྷན་དུ་ཟླ་སྒྲིལ་གཏོང་རྒྱུ་ཡིན་ཚུལ་རྗོད་བཞིན་པའི་སྐབས་འདིར། ཐའེ་ཝན་ལ་ཨ་རིའི་ངོས་ནས་བདེ་འཇགས་སྲུང་སྐྱོབ་ཐད་རོགས་རམ་བྱེད་རྒྱུ་ནི་ཧ་ཅང་གལ་ཆེན་པོ་ཆགས་ཀྱི་ཡོད་། འོན་ཀྱང་། འདི་ལོའི་ཨ་རིའི་སྲིད་འཛིན་འོས་བསྡུའི་དྲིལ་བསྒྲགས་སྐབས་སུ་ཊོམ་གྱིས་ཐའེ་ཝན་དང་འབྲེལ་བའི་གནད་དོན་སྐོར་ཁ་གསལ་གང་ཡང་གླེང་མེད་པར་བརྗོད། རྒྱུ་མཚན་དེ་ལ་བརྟེན་ནས་མ་འོངས་པར་ཐའེ་ཝན་ལ་ཊོམ་སྲིད་གཞུང་ནས་བདེ་འཇགས་སྲུང་སྐྱོབ་ཐད་རོགས་རམ་དང་། འགན་ལེན་བྱེད་ཀྱི་རེད་དམ་ཞེས་པའི་དྲི་བ་ཞིག་རང་བཞིན་གྱིས་ཡོང་གི་ཡོད་འདུག
དྲི་བ་དང་པོ་དེ།
༡ མ་འོངས་པར་ཊོམ་སྲིད་འཛིན་དུས་ཡུན་ཐེངས་གཉིས་པའི་སྐབས་ཐའེ་ཝན་ལ་སྲིད་བྱུས་གང་འདྲ་ཞིག་འཛིན་ནམ། ཐའེེ་ཝན་ད་ཆར་བདེ་འཇགས་སྲུང་སྐྱོབ་ཐད་ཨ་རི་ཡིས་རོགས་རམ་བྱེད་མིན་ལ་སེམས་ཁྲལ་འབྱུང་བཞིན་ཡོད་དམ།
ཐའེ་ཝན་སྐོར་ཨ་རིའི་སྲིད་འཛིན་སུ་ཡིས་སྲིད་བྱུས་གང་འདྲ་བཟུང་མིན་ནི་འོས་བསྡུའི་དྲིལ་བསྒྲགས་སྐབས་སུ་ཁྱད་པར་ཆེན་པོ་བཟོ་ཡི་ཡོད་མི་འདུག་ལ། མི་མང་གིས་ཀྱང་སྲིད་འཛིན་སུས་ཐའེ་ཝན་སྐོར་ལངས་ཕྱོགས་གང་འདྲ་འཛིན་མིན་ཡང་ལྟ་ཡི་ཡོད་མི་འདུག ཊོམ་སྲིད་འཛིན་དུས་ཡུན་དང་པོའི་སྐབས་ཕྱི་ལོ་༢༠༡༧ ནས་༢༠༢༡ བར་གྱི་སྲིད་བྱུས་ལ་བསྐྱར་ཞིབ་བྱེད་དུས་ཊོམ་སྲིད་འཛིན་དུས་ཡུན་དང་པོའི་སྐབས་སུ། ཐའེ་ཝན་སྐོར་དེ་འདྲ་གང་ཡང་གླེང་སློང་ཆེན་པོ་བྱས་ཡོད་མི་འདུག་ཀྱང་། དེ་སྔོན་ཨོ་བྷ་མའི་སྲིད་འཛིན་ཡིན་དུས་ལས་བསྡུར་ན། ཐའེ་ཝན་ལ་གོ་མཚོན་མཁོ་སྤྲོད་མང་བ་བྱས་པ་དང་། རོགས་སྐྱོར་སྤྲད་པ། ཐའེ་ཝན་སྐོར་སྔར་ལས་དོ་སྣང་མང་བ་ཊོམ་གྱིས་བྱས་ཡོད་པར་བརྗོད་འདུག དེ་བཞིན་ཨ་རིའི་གཞུང་གི་འགོ་ཁྲིད་ད་ལྟ་ལས་གནས་ཐོག་ཡོད་པ་དང་། རྒས་ཡོལ་ཞུས་པ་སོགས་འགོ་ཁྲིད་མང་པོ་ཞིག་ཐའེ་ཝན་ལ་ལྟ་སྐོར་ཕྱིན་པ། དེ་བཞིན་ཨ་རིའི་ལོ་རྒྱུས་ནང་སྲིད་འཛིན་(Nixon)ནེ་སིན་སྐབས་སུ་རྒྱ་ནག་དང་འབྲེལ་ལམ་བཙུགས་པ་ནས་བཟུང་ད་ལྟ་བར་རྒྱ་ནག་ཐོག་དམ་དྲག་ཆེ་ཤོས་བྱེད་མཁན་སྲིད་འཛིན་ནི་ཊོམ་གཅིག་པུ་ཡིན་པ་ཡང་བརྗོད་འདུག ཊོམ་གྱི་སྲིད་འཛིན་དུས་ཡུན་དང་པོའི་སྐབས་སུ་ཁོང་གི་སྲིད་གཞུང་ནང་ཡོད་པའི་འགོ་ཁྲིད་(Mike Pompeo)མེ་ཁེ་ཕང་ཕེ། (Matt Pottinger)མ་ཊོ་པོ་ཏྲ་གེ་སོགས་གནད་ཡོད་མི་སྣ་མང་པོ་ཞིག་གིས་རྒྱ་ནག་ཐོག་དམ་དྲག་ཤུགས་ཆེན་བྱས་པའི་རྐྱེན་གྱི་རྒྱ་ནག་གིས་མི་དེ་དག་ལ་མི་དགའ་བ་ཆེན་པོ་བྱས་ཡོད་འདུག

༢ མ་འོངས་པར་ཨ་རིའི་སྲིད་གཞུང་ནས་ཐའེ་ཝན་གྱི་གནད་དོན་དེ་སྟངས་འཛིན་གང་འདྲ་བྱེད་སྲིད་དམ། ད་ཆར་ཊོམ་གྱིས་གསར་དུ་བསྐོ་བཞག་བྱས་པའི་ཨ་རིའི་ཕྱི་འབྲེལ་དྲུང་ཆེ་(Marco Rubio)མ་ཁོག་རུག་སྦེའུ་དང་། རྒྱལ་སྲུང་སློབ་སྟོན་པ་(Mike Waltz)མེ་ཁ་ཝོ་ཛེ་གཉིས་ནི་རྒྱ་ནག་ཐོག་ལྟ་བ་ཧ་ཅང་མཁྲེགས་འཛིན་བྱེད་མཁན་ཞིག་དང་། དམར་ཤོག་ལ་མི་དགའ་མཁན་གཉིས་ཡིན་འདུག་ལ། ཁོང་གཉིས་ཀྱིས་ཐའེ་ཝན་གྱི་གལ་གནད་རྟོགས་ཀྱི་ཡོད་པར་བརྟེན། མ་འོངས་པར་ཨ་རིའི་ངོས་ནས་ཐའེ་ཝན་ཐོག་བཟང་ཕྱོགས་ཀྱི་སྲིད་བྱུས་ཤིག་འཛིན་རྒྱུའི་རེ་བ་བྱེད་ཀྱི་ཡོད་འདུག
༣ ཐའེ་ཝན་ངོས་ནས་མ་འོངས་པར་ཨ་རི་ལ་རྒྱལ་སྲུང་ཆེད་དུ་དངུལ་སྤྲོད་དགོས་འབྱུང་སྲིད་དམ།
ཊོམ་གྱི་འོས་བསྡུའི་དྲིལ་བསྒྲགས་སྐབས་སུ་ཨ་རི་ཡིས་ཐའེ་ཝན་གྱི་བདེ་སྲུང་སྲུང་སྐྱོབ་བྱེད་དགོས་ན། ཐའེ་ཝན་ངོས་ནས་དངུལ་སྤྲོད་དགོས་ཀྱི་རེད་ཅེས་བརྗོད་ཡོད་འདུག གནད་དོན་དེ་ཧ་ཅང་གླེང་སློང་ཆེན་པོ་བྱེད་ཡུལ་ཞིག་ཏུ་གྱུར་ཡོད་འདུག ཊོམ་གྱིས་དེ་ལྟར་བརྗོད་དགོས་དོན་ནི་འདས་པའི་ལོ་༣༠ རིང་ཐའེ་ཝན་རང་ཉིད་ཀྱི་ངོས་ནས་ལོ་རེའི་ཡོང་འབབ་ནས་རྒྱལ་སྲུང་ཆེད་དུ་མ་དངུལ་དེ་ཙམ་གཏོང་གི་མི་འདུག་ཅེས་རྗོད་ཀྱི་ཡོད་འདུག དེ་བཞིན་ཨ་རིའི་མི་མང་ཚོས་ཨ་རིའི་དམག་མི་ཐའེ་ཝན་གྱི་ས་ཐོག་ནས་ཤི་འཇུག་འདོད་མེད་པ་དེ་ད་ལྟའི་ཨ་རིའི་ནང་གི་ཆབ་སྲིད་ཡིན་པར་བརྟེན། ཐའེ་ཝན་རང་ཉིད་ཀྱི་ངོས་ནས་རྒྱལ་སྲུང་ཆེད་དུ་འགྲོ་གྲོན་མང་ཙམ་གཏོང་དགོས་ཀྱི་རེད་ཅེས་རྗོད་ཀྱི་ཡོད་འདུག འོན་ཀྱང་། ཕྱོགས་གཞན་ཞིག་ནི་ཨ་རིའི་ནང་ཡོད་པའི་ལོ་ཆུང་དམག་མི་ཚོས་ཐའེ་ཝན་གཅིག་པུ་མ་ཡིན་པ། ཡུ་རོབ་དང་། ཉི་ཧོང་། ཨོ་སི་ཌོ་ལི་ཡ། ཁེ་ནེ་ཌ་སོགས་ནང་ཡོད་པའི་ཨ་རིའི་དམག་གི་རྟེན་གཞི་ཁག་ལ་འགྲོ་འདོད་བྱས་ནས་སྙན་ཞུ་འབུལ་མཁན་མང་པོ་ཡོད་པར་བརྗོད་འདུག
༤ ཐབས་ལམ་གང་འདྲ་ཞིག་སྤྱད་ནས་ཐའེ་ཝན་གྱི་རྒྱལ་སྲུང་མ་དངུལ་མང་དུ་གཏོང་འཇུག་ཐུབ་བམ། ཐའེ་ཝན་གྱིས་རང་གི་རྒྱལ་སྲུང་ཆེད་དུ་མ་དངུལ་ག་ཚོད་གཏོང་མིན་གྱིས་ཐའེ་ཝན་རང་ཉིད་སྲུང་སྐྱོབ་ག་ཚོད་བྱེད་འདོད་པ་དེ་མངོན་གྱི་ཡོད་པར་བརྗོད་འདུག
གཤམ་ལ་མ་འོངས་པར་ཐའེ་ཝན་གྱི་ངོས་ནས་གྲ་སྒྲིག་བྱེད་དགོས་པའི་ཐབས་ལམ་འགའ་ཤས་བརྗོད་འདུག
༡ དང་པོ་དེ་ཐའེ་ཝན་གྱི་མི་མང་ཁྲོད་རྒྱ་ནག་གིས་འཇིགས་སྐུལ་བྱེད་བཞིན་པ་དང་། དམག་འཁྲུག་ཡོང་རྒྱུའི་ཉེན་ཁ་ཡོད་པས་མི་མང་ཁྲོད་དམག་སྦྱོང་ཚད་ལྡན་སྤྲོད་རྒྱུ་གལ་ཆེ་ཡིན་པ།
༢ ཐའེ་ཝན་ངོས་ནས་ལོ་རེའི་ཡོང་འབབ་ཁྲོད་མང་ཤོས་དེ་རྒྱལ་སྲུང་ཆེད་དུ་གཏོང་དགོས་པ།
༣ ཐའེ་ཝན་གྱི་དམག་སྡེའི་ཁྲོད་འགྱུར་བ་ཆེན་པོ་ཞིག་གཏོང་དགོས་པ་དང་། དེ་ཡང་ལོ་ཆུང་དམག་མི་མང་བ་བསྡུ་རུབ་བྱེད་དགོས་པ། ལོ་ཆུང་བ་མང་བ་ཡོད་ན་གལ་སྲིད་དམག་འཁྲུག་དངོས་སུ་བྱུང་ན་ལོ་ཆུང་ཚོས་ནུས་པ་ཆེ་བ་ཡོད་པར་བརྗོད།
༤ མི་མང་ཁྲོད་དམག་སྦྱོང་ཚད་ལྡན་ཡོད་མཁན་གྱི་ཤོག་ཁག་ཞིག་ཡོད་དགོས་པ་དང་། དེ་ཡང་དམག་འཁྲུག་དངོས་སུ་འབྱུང་དུས་རྒྱལ་སྲུང་ཆེད་དུ་མི་མང་ཚོས་ནུས་པ་འདོན་ཐུབ་མཁན་མང་པོ་དགོས་པར་བརྗོད་འདུག
༥ རྒྱ་ནག་གི་སོ་མྱུལ་བ་མང་པོ་ཞིག་ཐའེ་ཝན་ནང་གཏོང་གི་ཡོད་པ་དང་། དེ་བཞིན་རྒྱ་ནག་གིས་ཐའེ་ཝན་གྱི་ཆབ་སྲིད་ཁྲོད་རྩོད་རྙོག་མང་པོ་བཟོ་བཞིན་པ་དག་ལ་གདོང་ལེན་དང་། བཀག་འགོག་ཚད་ལྡན་བྱེད་ཐུབ་དགོས་པར་བརྗོད།
༦ རྒྱང་རིང་པོ་སྙོབ་ཐུབ་པའི་གོ་མཚོན་རིགས་ལ་མ་རྩ་བཙུགས་ནས་བཟོ་སྐྲུན་བྱེད་དགོས་པ། མཚོ་ཐོག་བེད་སྤྱོད་བྱེད་རྒྱུའི་འཕྲུལ་རིགས་དང་། བརྡ་འཕྲིན་འཕྲུལ་འཁོར་ཐད་མ་རྩ་འཛུགས་དགོས་པ། གློག་ཀླད་ཐད་དེ་བཞིན་ནུས་པ་ཆེ་རུ་གཏོང་དགོས་པ་སོགས་བྱས་ན་རྒྱ་ནག་གིས་གལ་སྲིད་དམག་བརྒྱབས་ནའང་ཐའེ་ཝན་འཚོ་གནས་ཐུབ་པར་བརྗོད།
༧ ཐའེ་ཝན་གྱི་ངོས་ནས་རང་ཉིད་སྲུང་སྐྱོབ་ཆེད་དུ་ནུས་པ་ཡོད་ཚད་བཏོན་ན་ཨ་རིའི་ངོས་ནས་དེ་བཞིན་རོགས་རམ་ཡོང་རྒྱུའི་རེ་བ་ཆེན་པོ་ཡོད་པ་དང་། རང་དབང་ཅན་གྱི་རྒྱལ་ཁབ་ཚོས་ཀྱང་རོགས་རམ་བྱེད་རྒྱུའི་རེ་བ་ཆེན་པོ་ཡོད་ཅིང་། ཨུ་རུ་སུ་དང་ཡུག་རེན་གཉིས་ཀྱི་དམག་འཁྲུག་ཁྲོད་ཡུག་རེན་ལ་ནུབ་ཕྱོགས་རྒྱལ་ཁབ་ཚོས་རོགས་རམ་བྱེད་དོན་ནི་ཡུག་རེན་རང་ཉིད་ཀྱི་ནུས་པ་ཡོད་ཚད་བཏོན་ནས་རྒྱལ་སྲུང་བྱེད་ཀྱི་ཡོད་པའི་རྐྱེན་གྱིས་ཡིན་པར་བརྗོད་འདུག

གསར་འགོད་པ། བསོད་ནམས་ཕུན་ཚོགས།