ཨུ་རུ་སུ་དང་བྱང་ཀོ་རི་ཡ་གཉིས་བར་སྣུམ་དང་གོ་མཚོན་གྱི་ཚོང་འབྲེལ་བྱེད་ཀྱི་ཡོད་ཀྱི་འདུག
ཨུ་རུ་སུ་དང་ཡུག་རེན་གཉིས་ཀྱི་དམག་འཁྲུག་ཁྲོད་དམག་མི་དང་གོ་མཚོན་ཧ་ཅང་དགོས་ཀྱི་ཡོད་པ་དང་། ད་ཆར་དམག་འཁྲུག་འགོ་བཙུགས་ནས་ལོ་གཉིས་ཙམ་འགྲོ་བཞིན་ཡོད་པའི་སྐབས་འདིར། ཉེ་ཆར་བྱང་ཀོ་རི་ཡ་ནས་དམག་མི་ཕོན་ཆེན་ཞིག་ཨུ་རུ་སུ་ལ་བཏང་བ་དང་། ད་ཆར་ཨུ་རུ་སུ་ནས་བྱང་ཀོ་རི་ཡ་ལ་སྣུམ་ཕོན་ཆེན་འཚོང་གི་ཡོད་པ་ཤེས་རྟོགས་བྱུང་འདུག
ཕྱི་ཚེས་༢༣ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཨུ་རུ་སུ་ལ་རྒྱལ་སྤྱིའི་ཐོག་ནས་དཔལ་འབྱོར་གྱི་ཉེས་ཆད་ག་ཚོད་བཅད་ཀྱང་ཨུ་རུ་སུས་བྱང་ཀོ་རི་ཡ་དང་ལྷན་དུ་གོ་མཚོན་དང་སྣུམ་གཉིས་ཚོང་འབྲེལ་བྱས་ཏེ་དཔལ་འབྱོར་ཉེས་ཆད་ལས་གཡོལ་ཐབས་བྱེད་བཞིན་ཡོད་པ་འཁོར་སྐར་བརྒྱུད་ནས་ཤེས་རྟོགས་བྱུང་ཡོད་འདུག་ལ། དེ་ཡང་དབྱིན་ཡུལ་ནང་རྟེན་གཞི་བྱས་པའི་ཉམས་ཞིབ་ཁང་(the Open Source Centre)ཟེར་བ་ཞིག་གིས་འཁོར་སྐར་བརྒྱུད་ནས་རྙེད་དོན་ལ། ཨུ་རུ་སུས་སྣུམ་ཕོན་ཆེན་པོ་ཞིག་བྱང་ཀོ་རི་ཡ་ལ་དབོར་འདྲེན་བྱེད་ཀྱི་ཡོད་པ་ཤེས་རྟོགས་བྱུང་འདུག དབྱིན་ཡུལ་གྱི་ཕྱི་འབྲེལ་དྲུང་ཆེ་ཡིས་ཨུ་རུ་སུས་བྱང་ཀོ་རི་ཡ་ལ་སྣུམ་སྤྲོད་དོན་ནི་བྱང་ཀོ་རི་ཡས་ཨུ་རུ་སུ་ལ་གོ་མཚོན་དང་དམག་མི་བཏང་ཡོད་པ་དེ་ལ་རིན་པ་ལྟར་ཚོང་འབྲེལ་བྱེད་ཀྱི་ཡོད་པ་སྦི་སྦི་སིའི་གསར་ཁང་ལ་བརྗོད་འདུག འཛམ་གླིང་མཉམ་འབྲེལ་རྒྱལ་ཚོགས་ཀྱིས་བྱང་ཀོ་རི་ཡ་ལ་རྒྱལ་ཁབ་གཞན་གྱིས་སྣུམ་ཚད་གཞི་ཉུང་ཉུང་ཞིག་ལས་བཙོང་ཆོག་གི་མེད་ཀྱང་ཨུ་རུ་སུས་བྱང་ཀོ་རི་ཡ་ལ་སྣུམ་ཕོན་ཆེན་པོ་འཚོང་གི་ཡོད་པ་ཤེས་རྟོགས་བྱུང་ཡོད་འདུག་པ་དང་། དེ་ནི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁྲིམས་དང་འགལ་གྱི་ཡོད་པར་བརྗོད་འདུག འདས་པའི་ཟླ་བ་༨ ནང་སྣུམ་བླུགས་སྣོད་གྲུ་གཟིངས་ཆེན་པོ་ཐེངས་༤༣ ཨུ་རུ་སུའི་བྱང་ཕྱོགས་ཀྱི་མཚོ་འགྲམ་དུ་འབྱོར་ཡོད་འདུག དེ་བཞིན་བྱང་ཀོ་རི་ཡ་ནས་སྣུམ་བླུགས་སྣོད་གྲུ་གཟིངས་སྟོང་པ་ཨུ་རུ་སུ་ལ་འབྱོར་བཞིན་ཡོད་འདུག་པ་དང་། ཕར་སྣུམ་བླུགས་ནས་གཏོང་གི་ཡོད་པར་བརྗོད་འདུག
ད་བར་ཨུ་རུ་སུའི་ཕྱི་འབྲེལ་ལྷན་ཁང་ནས་དེའི་སྐོར་ལན་འདེབས་གང་ཡང་བྱས་མི་འདུག ཨུ་རུ་སུ་ནས་བྱང་ཀོ་རི་ཡ་ལ་སྣུམ་ཐོག་མ་དེ་འདི་ལོའི་ཕྱི་ཟླ་༣ ཚེས་༧ ཉིན་འབྱོར་ཡོད་འདུག་ཅིང་། དེ་རྗེས་བྱང་ཀོ་རི་ཡ་ནས་ཨུ་རུ་སུ་ལ་གོ་མཚོན་བཏང་ཡོད་འདུག དེ་བཞིན་ཕྱི་ཟླ་༡༡ ཚེས་༥ ཉིན་བྱང་ཀོ་རི་ནས་དམག་མི་ཕོོན་ཆེན་པོ་ཨུ་རུ་སུ་ལ་བཏང་ཡོད་འདུག་ཅིང་། དབྱིན་ཡུལ་གྱི་ཕྱི་འབྲེལ་དྲུང་ཆེ་ཡིས་ད་ཆར་ཨུ་རུ་སུས་ཡུག་རེན་ནང་དམག་འཁྲུག་དེ་མུ་མཐུད་ནས་མཇུག་སྐྱོང་བ་ལ་བྱང་ཀོ་རི་ཡའི་གོ་མཚོན་དང་དམག་ལ་མ་བརྟེན་པར་གནས་ཐབས་མེད་པ་ཆགས་བཞིན་ཡོད་པ་དང་། གནད་དོན་དེ་ཡིས་ཡུ་རོབ་དང་། ལྷོ་ཤར་ཨེ་ཤེ་ཡ། ཞི་བདེ་རྒྱ་མཚོའི་མངའ་ཁུལ་སོགས་ཀྱི་བདེ་འཇགས་ལ་ཉེན་ཁ་ཆེན་པོ་ཆགས་ཀྱི་ཡོད་ཅེས་བརྗོད་འདུག བྱང་ཀོ་རི་ཡ་ལྟ་བུར་མཚོན་ན་དུས་རྒྱུན་ནས་མི་མང་ཚོས་རྡོ་སོལ་བེད་སྤྱོད་ཀྱི་ཡོད་འདུག འོན་ཀྱང་། རྒྱུན་ལྡན་དངོས་ཟོག་དབོར་འདྲེན་བྱེད་ཆེད་སྣུམ་ཧ་ཅང་གལ་ཆེན་པོ་ཆགས་ཀྱི་ཡོད་འདུག་པར་བརྟེན། ད་ཆར་ཨུ་རུ་སུ་ནས་སྣུམ་རིན་གོང་ཆུང་ཆུང་བྱས་ནས་ཉོ་རྒྱུ་རགས་ཀྱི་ཡོད་འདུག
ཉེ་ཆར་ཨུ་རུ་སུ་དང་བྱང་ཀོ་རི་ཡ་གཉིས་བར་བདེ་འཇགས་སྲུང་སྐྱོབ་ཀྱི་གྲོས་མཐུན་དེ་འདྲ་བཞག་ཡོད་འདུག་ལ། བྱང་ཀོ་རི་ཡའི་དམག་མི་སྟོང་ཚོ་མང་པོ་ཨུ་རུ་སུའི་བཏང་ནས་ད་ཆར་དམག་འཁྲུག་ནང་དངོས་སུ་འཛུལ་ཞུགས་བྱེད་བཞིན་ཡོད་འདུག ལྷོ་ཀོ་རི་ཡས་སྦི་སྦི་སི་ལ་ཁོང་ཚོས་སེམས་ཁྲལ་ཆེ་ཤོས་ནི་ཨུ་རུ་སུས་བྱང་ཀོ་རི་ཡ་ལ་འཕྲུལ་རིགས་དང་གོ་མཚོན་འདྲ་མིན་སྤྲད་ནས་བྱང་ཀོ་རི་ཡས་ལྷོ་ཀོ་རི་ཡའི་བདེ་འཇགས་སྲུང་སྐྱོབ་ལ་ཉེན་ཁ་བཟོ་ཡོང་བསམ་པ་དེ་ཡིན་ཚུལ་བརྗོད་འདུག།
གསར་འགོད་པ། བསོད་ནམས་ཕུན་ཚོགས།
