ཨུ་རུ་སུར་རོགས་རམ་བྱས་པའི་ཉེས་མིང་འོག་རྒྱ་གར་གྱི་ཚོང་གཉེར་ཁང་མང་པོར་དཔལ་འབྱོར་ཉེས་ཆད་བཅད་འདུག

རྒྱ་གར་རྒྱལ་ཡོངས་ནང་ཡོད་པའི་ཚོང་གཉེར་ཁང་མང་པོ་ཞིག་གིས་ཨུ་རུ་སུར་གོ་མཚོན་བཟོ་སྐྲུན་དང་འབྲེལ་བའི་དངོས་ཟོག་མཁོ་སྤྲོད་བྱེད་ཀྱི་ཡོད་པའི་ཉེས་མིང་འོག་ཨ་རིའི་གཞུང་གིས་དཔལ་འབྱོར་གྱི་ཉེས་ཆད་བཅད་འདུག

ཕྱི་ཚེས་༢ ཉིན་ “The Hindu” གསར་ཁང་གིས་གནས་ཚུལ་སྤེལ་གསལ་ལྟར་ན། རྒྱ་གར་གྱི་རྒྱལ་ས་ལྡི་ལི་དང་།  (Hyderabad)ཧཡ་དར་བྷཌ། (Bengaluru)སྦེང་ལུ་རུ། (Uttar Pradesh)ཨུད་ཏར་པར་དེ་ཤི་མངའ་སྡེ་བཅས་ནང་ཡོད་པའི་ཚོང་གཉེར་ཁང་མང་པོ་ཞིག་གིས་ཨུ་རུ་སུའི་གོ་མཚོན་བཟོ་ཚོང་ཁང་ལ་གོ་མཚོན་བཟོ་སྐྲུན་གྱི་དངོས་ཟོག་མཁོ་སྤྲོད་བྱེད་ཀྱི་ཡོད་པའི་ཉེས་མིང་འོག་ཨ་རིའི་(The U.S. Treasury Department) ་ནོར་སྲིད་ལྷན་ཁང་གིས་དཔལ་འབྱོར་ཉེས་ཆད་བཅད་ཡོད་འདུག། དེ་ཡང་ཨ་རིའི་ནོར་སྲིད་ལྷན་ཁང་གིས་ཚོང་གཉེར་ཁང་མང་པོ་ཞིག་གི་མིང་ཐོ་བཏོན་ཡོད་པ་དང་། རྒྱ་གར་གྱི་ཚོང་གཉེར་ཁང་མང་ཆེ་བ་ནི་འདས་པའི་ལོ་བཅུ་ཕྲག་འགའི་རིང་ཨུ་རུ་སུ་དང་ཚོང་འབྲེལ་ཡོད་མཁན་ཤ་སྟག་ཡིན་འདུག ཚོང་གཉེར་ཁང་དེ་དག་གིས་ཨུ་རུ་སུར་གནམ་གྲུ་ཆེ་ཆུང་འདྲ་མིན་གྱི་འཕྲུལ་འཁོར་ཆ་ལག་དང་། ཐད་འཕུར་གནམ་གྲུ། འགྲུལ་སྐྱེལ་གནམ་གྲུ་སོགས་དང་འབྲེལ་བའི་ཚོང་འབྲེལ་བྱེད་ཀྱི་ཡོད་འདུག

ལྡི་ལིར་རྟེན་གཞི་བྱས་པའི་(Sudhir Kumar)སུ་དྷིར་ཀུ་མར་དང་། (Vivek Kumar Mishra)བི་བེཀ་ཀུ་མར་མི་ཤི་ར། (Mask Trans)མཱསྐ་ཊ་རནསི་བཅས་ཚོང་གཉེར་ཁང་གསུམ་ནི་ཨུ་རུ་སུར་གོ་མཚོན་བཟོ་སྐྲུན་ཆེད་དུ་དངོས་ཟོག་མཁོ་སྤྲོད་བྱེད་ཀྱི་ཡོད་པའི་ཉེས་མིང་འོག་མིང་ཐོའི་རྩེ་ཕུད་ཁོངས་སུ་བཅུག་ཡོད། ཚོང་གཉེར་ཁང་དེ་དག་གིས་ཨུ་རུ་སུར་ཚོང་རྒྱག་པའི་དངོས་ཟོག་མང་ཆེ་བ་ནི་གློག་གི་འཕྲུལ་ཆས་དང་འབྲེལ་བའི་དངོས་ཟོག་ཡིན་འདུག

དེ་བཞིན་ལྡི་ལི་ནང་ཡོད་པའི་ “Denvas Services Private Ltd of Rajouri Garden” ཟེར་བའི་ཚོང་གཉེར་ཁང་དེ་ཨུ་རུ་སུའི་མི་འགའ་ཤས་ཀྱིས་འཛིན་སྐྱོང་བྱེད་བཞིན་པ་དང་། ཁོང་ཚོས་ཨུ་རུ་སུ་དང་དམག་དོན་མཁོ་སྒྲུབ་ལས་གཞིའི་ནང་འབྲེལ་བ་བྱས་པའི་ཉེས་འཛུགས་བྱས་ཡོད་པ་མ་ཟད། ཨ་རིའི་ནོར་སྲིད་ལྷན་ཁང་ནས་ཨུ་རུ་སུའི་མི་དེ་དག་གིས་ཨ་རིས་བཟོས་པའི་གློག་ཆས་ཕྲ་མོ་རྣམས་དེང་རབས་གོ་མཚོན་ནང་བེད་སྤྱོད་བྱ་རྒྱུའི་ཆེད་དུ་མཁོ་སྒྲུབ་བྱེད་བཞིན་པ་བརྗོད་འདུག

རྒྱ་གར་གྱི་གྲོང་ཁྱེར་(Bengaluru)སྦེང་ལུ་རུར་རྟེན་གཞི་བྱས་པའི་(Emsystech)ཨེམ་སིས་ཊེག་ཅེས་པའི་ཚོང་གཉེར་ཁང་ལ་གློག་ཆས་དང་། རིན་ཆེན་ལྕགས་རིགས་ཀྱིས་བཟོས་པའི་གློག་ཤུགས་གསོག་འཇོག་ཡོ་ཆས་བཅས་ཐེངས་༨༠༠ ལྷག་ཨུ་རུ་སུའི་ཚོང་སྡེ་ཞིག་ལ་བཏང་བའི་ཉེས་འཛུགས་བྱས་ཡོད་འདུག ཚོང་སྡེ་དེས་ཚོད་འཛིན་མ་ལག་དང་རླུང་འཕྲིན་ཡོ་ཆས་སོགས་བཟོ་སྐྲུན་བྱེད་བཞིན་ཡོད་པ་བརྗོད་འདུག

དེ་བཞིན་རྒྱ་གར་གྱི་ཧཡ་དར་བྷཌ་ཏུ་རྟེན་གཞི་བྱས་པའི་(Lokesh Machines)ལོ་ཀེཤ་འཕྲུལ་ཆས་ཚོང་གཉེར་ཁང་དེ་ནི་ཕྱི་ལོ་ ༡༩༨༣ ཟླ་ ༡༢ ཚེས་ ༡༧ ཉིན་དེབ་སྐྱེལ་བྱས་ཡོད་པ་དང་། ད་ལྟ་ཨ་རིས་དམ་བསྒྲགས་བྱས་པའི་ཚོང་སྡེའི་ཐོ་གཞུང་ནང་འཁོད་ཅིང། ཁོང་ཚོས་འཕྲུལ་འཁོར་རྣམས་རྒྱ་གར་དང་། འཇར་མན། ནེ་དར་ལནཌ། ཨི་ཊ་ལི། ཏུར་ཀི། ཨུ་རུ་སུ་བཅས་སུ་ཕྱིར་ཚོང་བྱེད་ཀྱི་ཡོད་འདུག དེའི་དྲ་ཚིགས་ནང་གསལ་བ་ལྟར་ན། ལོ་ཀེཤ་ཡི་འཕྲུལ་ཆས་ནི་རྒྱ་གར་ནང་གི་འཕྲུལ་ཆས་ཡོ་བྱད་བཟོ་མཁན་ཡག་ཤོས་ལྔའི་གྲས་སུ་ཚུད་ཡོད་པ་བརྗོད་འདུག ཁོང་ཚོས་ཨུ་རུ་སུའི་དམག་དོན་ལྷན་ཁང་གི་(Alikhanov)ཨ་ལི་ཁ་ནོབ་ཟེར་བ་དེ་དང་མཉམ་འབྲེལ་བྱས་པའི་ཉེས་འཛུགས་བྱས་ཡོད་འདུག

(Gurgaon)གུར་གོན་དུ་རྟེན་གཞི་བྱས་པའི་(Innovio Ventures)ཨི་ནོ་བི་ཨོ་བེན་ཆར་སི་ཟེར་བ་ནས་གློག་ཆས་དང་གློག་ཤུགས་གསོག་འཇོག་ཡོ་ཆས་སོགས་ཐེངས་༢༠༠ ལྷག་ཨུ་རུ་སུར་བཏང་བའི་ཉེས་འཛུགས་བྱས་ཡོད་འདུག དེའི་ཁྲོད་དུ་ཨུ་རུ་སུའི་དམག་དོན་ཚོང་སྡེ་(entity Testkomplekt)ཊེསཊ་ཀོམ་པེལཀཊ་ཀྱང་ཚུད་ཡོད་འདུག

གོང་གསལ་གྱི་ཚོང་གཉེར་ཁང་དེ་དག་གི་ཨ་རི་ནང་ཡོད་པའི་དངུལ་ཚང་མ་ཨ་རིའི་གཞུང་གིས་བཀག་སྡོམ་བྱ་རྒྱུ་དང་། ཨ་རི་དང་ལྷན་དུ་ཚོང་འབྲེལ་བྱེད་མི་ཆོག་པ། དེ་བཞིན་དཔལ་འབྱོར་གྱི་ཉེས་ཆད་བཅད་ཡོད་འདུག རྒྱ་གར་གྱི་གསར་ཁང་ “Firstpost” ཡིས་བརྗོད་དོན། ཐེངས་འདིའི་དཔལ་འབྱོར་ཉེས་ཆད་དེ་ནི་རྒྱ་གར་གྱི་ཚོང་གཉེར་དེ་དག་གིས་ཨུ་རུ་སུར་རོགས་རམ་ཆེད་དུ་དངོས་ཟོག་ཚོང་འབྲེལ་བྱེད་པ་ཞིག་མ་ཡིན་པར།  ཉེ་ཆར་རྒྱ་དཀར་ནག་གཉིས་བར་ས་མཚམས་རྩོད་རྙོག་འདུམ་སྒྲིག་བྱུང་ནས་རྩོད་གླེང་ཞི་འཇམ་ཡོང་བའི་སྐབས་སུ་ནུབ་ཕྱོགས་རྒྱལ་ཁབ་ཚོས་ཆབ་སྲིད་ཀྱི་གནད་དོན་ཞིག་གི་འོག་ནས་རྒྱ་གར་ལ་ཉེས་ཆད་བཅད་ཡོད་པ་བརྗོད་བཞིན་འདུག

གསར་འགོ་པ། བསོད་ནམས་ཕུན་ཚོགས།