གསོན་དཀའ་བའི་བཙོན་པ་ཞིག་ནང་མིར་རྩིས་སྤྲོད་བྱས་པ།
དེ་རྗེས་དར་རྩེ་མདོར་ནང་མི་གཉེན་འབྲེལ་རྣམས་རྩིས་ལེན་དུ་ཕྱིན་སྐབས་གུ་རུ་རྡོ་རྗེ་སྐད་ཆ་བཤད་ཐུབ་ལ་མི་ཐུབ་ལ་ཆགས་ཡོད་འདུག་པ་དང་ཁོང་གསོན་པོར་བསྡད་ཐུབ་རྒྱུ་མིན་པའི་ཚོད་དཔག་བྱེད་བཞིན་ཡོད་འདུག ཁོང་ལ་རྒྱ་གཞུང་གིས་ཉེས་བརྡུང་བཏང་རྐྱེན་ནད་པ་ཆགས་པ་ཞིག་ལས་ཐོག་མར་ཁོང་འཛིན་བཟུང་སྐབས་ན་ནད་ཚ་གསུམ་གང་ཡང་ཡོད་མི་འདུག
ཁོང་ནི་དཀར་མཛེས་རྫོང་གི་ཉེ་འགྲམ་ཀཿབྲག་ཤང་གྲུ་ཁང་སྟེང་ནས་ཡིན་པ་དང་ ༢༠༠༨ ཕྱི་ཟླ་ ༣ ཚེས་ ༡༨ ཉིན་དཀར་མཛེས་རྫོང་དུ་ཞི་རྒོལ་གནང་མཁས་གྲས་སུ་ཡོད་ཅིང༌། ཕྱི་ཟླ་ ༣ ཚེས་ ༢༨ ཉིན་དཀར་མཛེས་རྫོང་ནས་འཛིན་བཟུང་བྱས་ཡོད། ཁོང་འཛིན་བཟུང་བཀག་ཉར་བྱས་ཏེ་ཉིན་བཅོ་ལྔ་ཙམ་གྱི་རྗེས་སུ་ཁོང་གི་བཟའ་ཟླ་ཤེས་རབ་གཡང་མཚོ་རང་ལོ་ ༤༠ ནང་སྐོར་ཞིག་སེམས་སྡུག་གིས་རིག་འཚོ་མ་ཟིན་པ་ཆགས་ཏེ་རང་ཁྱིམ་དུ་མི་སྡོད་པར་གང་སར་འཁྱམས་བཞིན་པའི་སྐབས་འདས་གྲོངས་སུ་ཕྱིན་ཡོད། ད་ལྟ་ནང་དུ་ཕྲུ་གུ་ཆུང་ཆུང་གཉིས་དང༌། ཕྲུ་གུ་ཆེ་བ་གཉིས་གྷོ་པ་པུར་བོད་ཁྱིམ་དུ་ཡོད་འདུག འདི་གར་གནས་ཚུལ་མཁོ་སྤྲོད་པ་སྤྱི་འཐུས་དགེ་བཤེས་སྨོན་ལམ་མཐར་ཕྱིན།
ཨ་མདོ་རྔ་བའི་སངས་དགའ་ལ་ཁྲིམས་ཐག་བཅད་པའི་ཟླ་ཚེས་དེ་ཕྱི་ཟླ་ ༡༢ ཚེས་ ༡༤ ཞེས་པ་དེ་ནོར་འདུག་པས་ཕྱི་ཟླ་ ༡༢ ཚེས་ ༩ ལ་བཅོས་རོགས་ཞུ། ཞེས་བཞུགས་སྒར་ཀིརྟིའི་བྱེས་པ་གྲྭ་ཚང་གི་ཛ་དྲག་འབྲེལ་མཐུད་ཚོགས་ཆུང་ནས། ཕྱི་ལོ་ ༢༠༠༩ ཟླ་ ༡ ཚེས་ ༧ ལ།
