༄༅། །ངེས་དོན་སེམས་ཀྱི་གླུ་སྒྲ། །

      ཀ་དག་གནས་ལུགས་མི་མཐོང་གཡམ་རྒྱུགས་ཀྱི་གྲོང་ན། །
      ཁ་ཁོག་ངེས་གཏན་མེད་པའི་དེང་རབས་ཀྱི་ཤེས་ལྡན། །
      ག་ལེར་དཔྱད་ན་ཐོས་བསམ་གང་ཡང་གིས་དབེན་པའི། །
      ང་རྒྱལ་ཁེངས་གྲགས་སྤོང་རོགས་རིགས་མཐུན་གྱི་གྲོགས་དག །
      
      ཅ་ཅོ་འདུ་འཛིན་ལ་ཞེན་སྲིད་ངན་གྱི་གྲོང་ན། །
      ཆ་ལུགས་སྣ་ཚོགས་བསྒྱུར་བའི་ཚིགས་མེད་ཀྱི་ན་གཞོན། །
      ཇ་ཆང་འདོད་སྲེད་སོགས་ལ་ཅི་དགའ་རུ་སྤྱད་ནས། །
      ཉ་ཤ་གསོན་ཟོས་མ་བྱེད་རང་རིགས་ཀྱི་ཞབས་འདྲེན། །
      
     ཏ་ཐྭ་ག་ཏའི་དགོངས་དོན་མ་རྟོགས་ཀྱི་བར་དུ། །
     ཐ་མར་ལོག་རྟོག་ཚིག་གི་དམོད་ངན་ཀུན་དོར་ནས། །
     ད་སྔོན་བསགས་པའི་ལས་ལ་ནོང་འགྱོད་ཤིག་གྱིས་དང༌། །
     ན་རྒས་འཆི་ཚེ་སྣ་ཚོགས་སྡུག་བསྔལ་ལས་གྲོལ་ངེས། །
    
     པ་ཏྲའི་རིས་ལྟར་འཇིགས་རྟེན་འདུ་འཛི་ཡི་གྲོང་ན། །
     ཕ་མེས་རིགས་རུས་ཕྱོགས་ཞེན་ངན་སྤྱོད་ལ་འཕྲེང་བཞིན། །
     བ་གླང་སུག་རྗེས་བསྙེགས་ལས་རྙེད་དཀའ་བའི་ལུས་འདི། །
     མ་ལྟར་རང་རིགས་དོན་དུ་ཅིའི་ཕྱིར་ན་མི་འབུལ། །
  
     ཙ་རི་གངས་ཀྱི་རི་བོ་རྒྱབས་ཕྱོགས་སུ་བཞག་སྟེ། །
     ཚ་རུང་འཇིགས་པའི་འཕྲང་ལ་ཕྱིར་མིག་ཞིག་ལྟོས་དང༌། །
     ཛ་དྲག་འཇབ་བུ་ཇག་གི་ལས་ཀུན་ལ་ཞུགས་ནས། །
     ཝ་སྐྱེས་ཇི་བཞིན་སྐྱིད་ཉལ་བྱེད་རན་ཞིག་ཡིན་ནམ། །

    ཞྭ་ལྟར་གཙུག་ཏུ་བཀུར་འོས་ཟུང་འབྲེལ་གྱི་ཆོས་སྲིད། །
    ཟ་འཐུང་ལྟོ་གོས་ཙམ་གྱི་ཆེད་དུ་ནི་མ་བཙོང༌། །
    འ་ཅག་བོད་པ་ཚང་གྀ་རྒྱལ་བསྟན་གྱི་བླ་སྲོག །
    ཡ་མཚན་འདི་ལས་མེད་ཕྱིར་བདག་སྲུང་ཞིག་གནང་རོགས། །