གཞུང་འབྲེལ་གྲོས་ཆོད་ཁག་གཉིས།
གཞིས་བྱེས་བོད་མི་ཡོངས་ཀྱི་ངོ་ཚབ་མཚོན་པའི་བོད་མི་མང་སྤྱི་འཐུས་ལྷན་ཚོགས་ནས་གྲོས་ཆོད་ཅིག་འཇོག་དགོས་རྒྱུ་དུས་ཀྱི་དགོས་མཁོར་མཐོང༌།
གྲོས་ཆོད།
༄ ༅། །སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་དབུ་ཁྲིད་པའི་བཙན་བྱོལ་བོད་ གཞུང་མང་ཡོངས་ནས་རྒྱུན་དུ་གཞིས་བཞུགས་ཆོལ་གསུམ་བོད་མི་རྣམས་ཀྱི་འགྱུར་བ་ མེད་པའི་ལྷག་བསམ་དང༌། ཞུམ་པ་མེད་པའི་སྙིང་སྟོབས། རྒྱུན་ཆད་མེད་པའི་ཆོད་སེམས། མདོར་ན་ལུས་ངག་ཡིད་གསུམ་གྱི་སྐྱིད་སྡུག་མཉམ་མྱོང་གིས་གདུང་སེམས་མཉམ་བསྐྱེད་ ཞུ་བཞིན་པ་མ་ཟད། ལྷག་པར་དུ་ཕྱི་ལོ་ ༢༠༠༨ ལོ་ནས་བཟུང་བཙན་བྱོལ་བོད་མིའི་སྤྱི་ཚོགས་ཁྲོད་གླུ་གར་སྤྲོ་སྐྱིད་སོགས་མཚམས་ འཇོག་བྱས་ཟིན་པ་ལྟར་དང༌། ད་ལན་རྒྱ་ནག་དབུས་སའི་སྲིད་གཞུང་ནས་འཆར་གཞི་དང་གོ་སྒྲིག་བྱས་པའི་ཡར་ལངས་ ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་སྟེ་མི་ལོ་ ༥༠ འཁོར་བའི་དུས་དྲན་ཞེས་པ་ཕྱི་ལོ་ ༢༠༠༩ ཟླ་ ༣ ཚེས་ ༢༨ ཉིན་དགའ་སེམས་འཁོལ་བའི་ངང་བརྩི་སྲུང་ཞུ་རྒྱུ་ཡིན་ཟེར་བ་དང༌། དེ་བཞིན་བོད་ལ་དམངས་གཙོ་བཅོས་བསྒྱུར་བྱས་ནས་མི་ལོ་ ༥༠ འཁོར་བའི་དགའ་སྤྲོའི་དུས་དྲན་བརྩི་སྲུང་ཞུ་རྒྱུ་ཡིན་ཟེར་བ་གཉིས་དོན་དངོས་ དང་མི་མཐུན་ཞིང༌། གཞིས་བྱེས་བོད་མིའི་མངོན་འདོད་དང་མི་འཚམས་པར་བརྟེན། སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ བདུན་པ་འདིའི་ཐོག་རང་ནས་གོང་གསལ་དུས་དྲན་དེ་གཉིས་ལ་ངོས་ལེན་མེད་པ་དང་མཐའ་ གཅིག་ཏུ་ངོ་རྒོལ་བྱ་རྒྱུའི་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༠༩ ཟླ་ ༣ ཚེས་ ༢༧ ལ།། །།
གཞུང་འབྲེལ་གྱི་གྲོས་ཆོད་གྲོས་འཆར། ཡིག་ཆ་ཨང༌། ༧༨
སྔོན་གླེང༌།
༄ ༅། །ཕྱི་ལོ་ ༢༠༠༨ ཟླ་ ༣ ཚེས་ ༡༠ ནས་བཟུང་བོད་ནང་ཛ་དྲག་གི་གནས་སྟངས་ཇི་ཆགས་ཚང་མའི་དགོངས་པར་མངའ་གསལ་ལྟར་དུས་ ད་ལྟའང་རྒྱ་ནག་གཞུང་གི་ངན་བྱུས་དང༌། བཙན་གནོན་འོག་གཞིས་ལུས་བོད་མི་རྣམས་ཉིན་མཚན་འཁྱོལ་དཀའི་མནར་གཅོད་སྡུག་ སྦྱོང་མྱངས་དང་མྱོང་བཞིན་པའི་ཛ་དྲག་གནས་སྟངས་སྐོར་ལ་རང་རེའི་ཕྱོགས་ནས་གཞིས་ ལུས་བོད་མིའི་སྙིང་སྟོབས་དང༌། ཆོད་སེམས་ལ་གདུང་སེམས་མཉམ་བསྐྱེད་དང་འབྲེལ་བའི་ལས་དོན་བྱ་ཕྱོགས་ཇི་དགེའི་ སྐོར་ད་ལམ་བགྲོ་གླེང་ཞིབ་ལྷུག་བྱུང་བའི་མཐའ་དོན་གྲོས་ཆོད་ཅིག་འཇོག་དགོས་ དུས་ཀྱི་དགོས་མཁོ་གལ་ཆེར་མཐོང༌།
གྲོས་ཆོད།
༄ ༅། །གཞིས་བཞུགས་རྒྱལ་གཅེས་དཔའ་བོ་དཔའ་མོ་འདས་གསོན་ཚོའི་ལྷག་བསམ་དང༌། དཔའ་མཛངས་སྙིང་སྟོབས། བླ་ན་མེད་པའི་མཛད་རྗེས་བཅས་ལ་འཛམ་གླིང་གང་སར་ཡོད་པའི་བོད་མི་ཡོངས་ཀྱིས་ གདུང་སེམས་མཉམ་སྐྱེད་དང༌། བོད་མིའི་འདོད་དོན་སྙིང་པོ་བོད་དོན་བདེན་མཐའ་མྱུར་གསལ་སླད་སྤྱི་ནོར་ྋགོང་ས་ ྋསྐྱབས་མགོན་ཆེན་པོ་མཆོག་གིས་དབུས་བཙན་བྱོལ་བོད་མི་ཡོངས་ནས་རྒྱལ་སྤྱིའི་ནང་ འཚེ་མེད་ཞི་བའི་ལས་འགུལ་སྣ་མང་སྤེལ་དང་སྤེལ་བཞིན་ཐོག་སྤྱི་འཐུས་ནང་ཁུལ་ལྷན་ ཚོགས་ནས་ལས་འགུལ་སྤེལ་ཕྱོགས་གོ་བསྡུར་གཏན་འབེབས་ཟིན་པ་ལྟར་ད་དུང་མུ་མཐུད་ རྒྱ་ཆེར་སྤེལ་རྒྱུ་དང༌། སྐབས་དོན་ཁོང་རྣམ་པའི་དཔའ་མཛངས་སྙིང་སྟོབས་དང༌། མཛད་རྗེས་ལ་སྙིང་ནས་གུས་འདུད་དང༌། རྗེས་དྲན་ཞུ་སླད་རྡོ་རིང་ཞིག་ས་གནས་གང་འོས་ཤིག་ཏུ་བཞེངས་རྒྱུར། དེའི་ཆེད་བཙན་བྱོལ་དུ་ཡོད་པའི་བོད་མི་རྒྱ་བལ་འབྲུག་གསུམ་དུ་གནས་འཁོད་རྣམས་ ནས་ཧིན་སྒོར་ ༣།༠༠ རེ་དང༌། དེ་མིན་རྒྱལ་ཁབ་གཞན་ཁག་ཏུ་གནས་འཁོད་བོད་མི་མི་རེས་ཨ་སྒོར་ ༡།༠༠ རེ་བཅས་བསྡུ་འབུལ་གནང་དགོས་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༠༩ ཟླ་ ༣ ཚེས་ ༢༧ ལ།། །།