ས་ག་ཟླ་བའི་ཚེས་བཅོ་ལྔ་ཉིན་མི་མང་འཇུ་བཟུང།
རྒྱ་ཡིས་བསླངས་པའི་རྡོ་རིང་ལ་རྒྱབ་བསྟན་ཏེ་ཕོ་བྲང་པོ་ཏཱ་ལ་རུ་ཁ་ཕྱོགས་ནས་མི་རེས་ཁ་བཏགས་རེ་བཟུང་ནས་ལྷ་རྒྱལ་ལོ་ཟེར་བའི་འབོད་སྒྲ་ཤུགས་ཆེར་བསྒྲགས་པ་དང༌། དེ་རྗེས་གནས་ཆུང་གསོལ་དུ་ཕྱིན་སྐབས་རྒྱ་དམག་དྲག་ཆས་ཐོགས་པ་མང་པོས་བཀག་པར་བརྟེན། ཕྱིར་ལོག་ཡོད་ནའང་ཕྱི་དྲོ་ཆུ་ཚོད་༤ ཙམ་ལ་སླར་ཡང་ཁྲོམ་གཟིགས་ཁང་དུ་འབྱོར་བ་དང་དེའི་སྐབས་མི་མང་དུ་ཕྱིན་ཡོད་འདུག་ཅིང། རྒྱ་དམག་གིས་བཀག་སྟེ་བོད་མི་རྣམས་ལ་ག་རེ་བྱེད་ཀྱི་ཡོད་མེད་ཀྱི་སྐད་ཆ་དྲིས་སྐབས། ཁོང་ཚོས་མགྲིན་དབྱངས་གཅིག་གྱུར་གྱིས་ཆོས་ལུགས་དད་པ་རང་མོས་ཐོག་ཆོས་བྱེད་ཀྱི་ཡོད་ལུགས་བཤད་ཡོད་འདུག ཐོག་མར་རྒྱ་དམག་གིས་བོད་མི་མང་པོ་འཛིན་བཟུང་བྱས་ཡོད་འདུག་ཀྱང༌། མཐར་ཕ་ཡུལ་སྡེ་དགེ་ནས་ཡིན་པའི་པད་རྡོ་དང༌། སྡེ་དགེ་བ་ཕུར་པ། སྡེ་དགེ་བ་སྒྲོལ་སྐྱབས། རྡོ་སྐྱབས། སྡེ་དགེ་བ་རྡོ་རྗེ་ཚེ་རིང༌། སྡེ་དགེ་བ་པདྨ་དྲི་མེད། ནང་ཆེན་པ་ཐུབ་པ་བཅས་འཛིན་བཟུང་བཀག་ཉར་བྱས་པ་དང། ཁོང་རྣམས་ལ་དེ་རིང་ལས་འགུལ་འདི་འདྲ་སྤེལ་དགོས་པའི་གནད་དོན་ཇི་ཡིན་སྐོར་སྐད་ཆ་འདྲི་རྒྱུ་ཙམ་ལས་འཛིན་བཟུང་བཙོན་འཇུག་བྱ་རྒྱུ་མིན་སྐོར་བཤད་ཡོད་འདུག བོད་མི་རྣམས་ཀྱིས་ཁོང་ཚོ་གློད་དགོས་པའི་དགོས་འདུན་བཏོན་ནས་དགོང་མོ་ཆུ་ཚོད་༨ བར་བསྒུགས་ཡོད་འདུག་ཀྱང། ཟླ་འདིའི་ཚེས་༩ ཉིན་གློད་བཀྲོལ་བཏང་མེད་པ་རེད། བོད་མི་རྣམས་ཀྱིས་ཁོང་ཚོ་གློད་བཀྲོལ་མ་གཏང་བ་ཡིན་ཚེ་གཞི་རྒྱ་ཆེ་བའི་འོས་ལངས་བྱ་རྒྱུ་ཡིན་སྐོར་བཤད་ཀྱི་ཡོད་འདུག
གནས་ཚུལ་མཁོ་སྤྲོད་པས་བཤད་གསལ་ལྟར་ན། དེ་ཉིན་ས་ག་ཟླ་བའི་ཚེས་༡༥ འཁེལ་ཡོད་པ་དང་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་ཧྥ་རན་སིའི་གྲོང་ཁྱེར་པཱེ་རི་སེའི་ཡུལ་མིའི་མཚན་མཐོང་ཕྱག་ཁྱེར་འབུལ་གྱི་ཡོད་པ་དང་སྟབས་བསྟུན་པ་ཞིག་ཡིན་སྐོར་འགྲེལ་བརྗོད་གནང་འདུག།།
