སེང་འབྲུག་དཔུང་པ་མཉམ་བསྡེབས་བྱེད་རོགས།
བོད་ཀྱི་ཁྱིམ་མཚེས་རྒྱལ་ཁབ་འབྲུག་ཡུལ་ནི་འཛམ་གླིང་རྒྱལ་ཁབ་སུས་ཀྱང་དབང་བསྒྱུར་བྱེད་ཐུབ་མེད་པས་ལོ་རྒྱུས་ནང་རང་བཙན་ཏུ་གནས་པས་སྔོན་རྒྱ་གར་རང་བཙན་ཐོབ་དུས་ཁྲིམས་ཐོག་ནས་རྒྱ་གར་རང་བཙན་ཅན་གྱི་རྒྱལ་ཁབ་ཏུ་གྱུར་པར་ངོས་འཛིན་བྱེད་མཁན་གྱི་རྒྱལ་ཁབ་ཐོག་མ་དེ་ཡིན་པས་བོད་པ་ཚང་གིས་སྤོ་པ་བྱེད་ཡུལ་ཞིག་ཀྱང་ཡིན། ད་ཆ་མཉམ་འབྲེལ་རྒྱལ་ཚོགས་དང་ལྷོ་ཨེ་ཤ་ཡའི་ས་གནས་མཉམ་འབྲེལ་མཐུན་ཚོགས་ཀྱི་ཚོགས་མི་ཡིན་ལ། ལོ་ངོ་སྟོང་ཕྲག་དུ་མའི་རིང་བོད་ཀྱི་ཁྱིམ་མཚེར་རྒྱལ་ཁབ་ཉེ་ཤོས་དེ་ཡིན་པས། གུས་པར་མཚོན་ན། མ་འོངས་བོད་ཀྱི་བདེན་མཐའ་སེལ་བར་བདེན་པའི་ཡར་ལངས་བྱེད་མཁན་ཨང་དང་པོར་རེ་བ་བཅོལ་ས་ཞིག་ཡིན།ངས་ནམ་རྒྱུན་འབྲུག་རྒྱལ་ཁབ་ཀྱི་རྒྱལ་གླུའི་གཞས་ཚིག་གི་ཚིགས་རྐང་གཅིག་སྟེ། འབྲུག་ཙན་དན་བཀོད་པའི་རྒྱལ་ཁབ་ནང་།། དཔལ་ལུགས་གཉིས་བསྟན་སྲིད་སྐྱོང་བའི་མགོན།། འབྲུག་རྒྱལ་པོ་མངའ་བདག་རིན་པོ་ཆེ།། སྐུ་འགྱུར་མེད་བརྟན་ཅིང་ཆབ་སྲིད་འཕེལ།། ཞེས་དྲན་ཚེ་རང་གི་སེམས་ནང་འབྲུག་རྒྱལ་དབུ་འཕང་མཐོ་བའི་སྨོན་ཚིག་རེ་ཡང་འདེབས་མྱོང་། དམར་ཤོག་དང་ནུབ་ཕྱོགས་པ་རྣམས་ཀྱིས་འབྲུག་ཡུལ་འདི་རྒྱལ་པོའི་རིང་ལུགས་རེད་ཅེས་ཟུར་ཟའི་ངང་བརྗོད་ཀྱི་ཡོད་ཀྱང་། འབྲུག་གི་རྒྱལ་པོ་ནི་འབྲུག་པའི་མི་མང་ཀུན་གྱིས་བཀུར་བའི་ཡུལ་མཆོག་སྟེ་མང་གཙོའི་ལམ་སྟོན་པ་དང་སངས་རྒྱས་བསྟན་པ་རིན་པོ་ཆེའི་ཆོས་རྒྱལ་ཞིག་ཡིན་པ་དང་། ལྷག་པར་དུ་ད་ལྟའི་འབྲུག་རྒྱལ་ཁབ་ཀྱི་ཆོས་སྲིད་ཀྱི་ལམ་ལུགས་ནི་ནུབ་ཀྱི་མང་གཙོ་ལམ་ལུགས་དང་རྒྱ་ནག་གིས་དམར་ཤོག་རིང་ལུགས་ལས་ཆེའི་ལེགས་པ་དང་ཚགས་ཚུད་ཡོད་པ་རེད། དེ་སྔོན་རྒྱ་རིགས་ཀྱི་གྲོགས་པོ་ཞིག་གིས་རྒྱ་ནག་ནི་འབྲུག་གི་རྒྱལ་ཁམས་ཤིག་རེད་ཅེས་བརྗོད་ཀྱང་། དོན་དངོས་སུ་ཕྲན་གྱིས་དེ་ལྟར་མི་འདོད་དེ། འབྲུག་གི་རྒྱལ་ཁམས་ཞེས་ཡོངས་སུ་གྲགས་པའི་རྒྱལ་ཁབ་དངོས་དེ་ནི་བོད་ཀྱི་ལྷོ་ཕྱོགས་སུ་ཡོད་པའི་བྷུ་ཐན་ཞེས་པའི་ཡུལ་འདིར་འདོད། ཡུལ་དེར་མཚོན་ན། མིང་གི་རྣམ་གྲངས་དུ་མ་ཡོད་དེ། ལྷོ་མོན། ལྷོ་ཙན་དན་ལྗོངས། ལྷོ་སྨོན་ཁ་བཞི། ལྷོ་སྨན་ལྗོངས་སོགས་སོ། འབྲུག་གི་ལོ་རྒྱུས་དེབ་ཐེར་ཁག་ཏུ་བྷུ་ཐན་ཞེས་པ་ནི་སམ་སྐྲྀ་ཏའི་ཐ་སྙད་བྷུ་ ཨུ་ཐམ་ལས་ཟུར་ཆགས་པར་འདོད་པ་དང་། དེའི་དོན་ནི་མཐོ་སྒང་ཞེས་བརྗོད་པ་དང་། ཡང་བྷོ་ཊ་ཨན་ཊ་སྟེ་བོད་ཀྱི་མཐའ་མཚམས་ཞེས་འདོད་ཚུལ་གཞན་ཞིག་ཀྱང་ཡོད་པ་འདྲ་ཡང་གུས་པས་མཐོང་བའི་སྐབས་མ་བྱུང་བས་གསལ་ངེས་མི་ཤེས། གང་ལྟར་འབྲུག་འདི་ལོ་རྒྱུས་ཐོག་རྒྱལ་ཁབ་རང་སྐྱ་བ་ཞིག་ཡིན་པ་དང་།
མི་རིགས་ཐུན་མིན་ཞིག་ཏུ་ཞེ་ཐག་པ་ནས་སེམས། ལར་འབྲུག་ལ་མཚོན་ན། ནང་ཆོས་ཆོས་རྒྱལ་མྱ་ངན་མེད་སྐབས་ནས་དར་བས་ལོ་རྒྱུས་ཐོག་བོད་ལས་སྔ་བའི་ནང་བསྟན་ཆོས་འབྱུང་ཡོད་པ་རེད། ད་ལྟ་དྲ་གྲོགས་ཚོས་འབྲུག་པ་བོད་རིགས་ཡིན་མིན་དང་འབྲུག་ཡིག་བོད་ཡིན་མིན་སྐོར་ལ་གླེང་སློང་མང་དག་ཅིག་སྤེལ་བཞིན་ཡོད་པ་རེད། ངོས་ཀྱིས་ལྟས་ན་དེ་ནི་ཕན་ནུས་དང་དགེ་མཚན་གང་ཡང་མེད་པའི་གླེང་གཞི་ཞིག་ཏུ་འདོད། ལྷག་པར་དུ་ད་ལྟའི་འབྲུག་ནང་ཁྲིམས་ཐོག་ལས་རྒྱལ་ཁབ་ཀྱི་སྐད་ཡིག་ཏུ་སྤྱོད་ཆོག་པ་ནི་ལྷོ་བྲག་པའི་ཡི་གེའམ་རྗོང་ཁ་ཞེས་འབྲུག་ཡིག་ཏུ་ཡོངས་སུ་གྲགས་པ་དང་། དེང་དུ་རྒྱལ་སྤྱིའི་ཡི་གེ་དབྱེ་སྟངས་ལྟར་ན་འབྲུག་ཡིག་གམ་ཆོས་སྐད་ཅེས་པ་འདི་བོད་ཡིག་གི་ཁོངས་སུ་དབྱེས་ཡོད་ཀྱང་། སུས་ཀྱང་ཁ་ཚོན་ཆོད་པོའི་བཤད་རྒྱུ་མེད་པ་ཞིག་རེད། གང་ཡིན་ཟེར་ན་སྔོན་ཕྱི་ལོ ༡༨༢༧ ལོར་འབྲུག་པའི་ལོ་རྒྱུས་ཀྱི་ཡིག་ཆ་རྣམས་སྤུ་ན་ཁ་ཞེས་པའི་རྒྱལ་ས་རྙིང་པ་རུ་མེ་དགྲར་ཤོར་ཟིན་པས། སྐབས་དེར་ལོ་རྒྱུས་ཀྱི་ཡིག་ཆ་རྣམས་མེ་ཡི་ལྷག་མར་གྱུར་ཡོད་སྐད། དེ་ལྟར་ནའང་བོད་རྒྱལ་ཁབ་འདི་རྒྱ་དམར་གྱིས་བཙན་འཛུལ་བྱས་པ་དང་། ད་ཆ་བོད་མི་རྣམས་ཡུལ་གྱར་བ་དང་རང་དབང་མེད་པའི་མི་ཡུལ་གྱི་དམྱལ་བའི་ཡུལ་གྱི་ སྐྱེ་འགྲོ་ལྟར་གྱུར་ཡོད།
དེའི་ལྡོག་ཕྱོགས་ནས་བཤད་ན། འབྲུག་པ་རྣམས་རང་དབང་དང་ཞི་བདེའི་ངང་མུ་ཡུལ་གྱི་སྐབས་གསུམ་པ་ལྟར་གནས་ཡོད། འོན་ཀྱང་ལོ་རྒྱུས་ནང་ཕྱིར་ལྟས་ཞིག་བྱས་ནས་བརྗོད་ན། བོད་འབྲུག་གཉིས་ཀྱི་བར་ལོ་རྒྱུས་དང་སྐད་ཡིག རིག་གཞུང་དང་ཆོས་སྲིད་སོགས་ཕན་ཚུན་ཤན་ཞུགས་དང་འབྲེལ་ལམ་ཧ་ཅང་ཆེན་པོ་ཡོད། མ་འོངས་པར་ཡུལ་ལུང་འདི་གཉིས་ཀྱི་སེམས་དང་བསམ་པ། སྣོད་བཅུད་ལེགས་བྱང་སོགས་ཀྱི་འབྲེལ་བ་ཇེ་ཆེ་ཇེ་ཟབ་རེད་ལ། བོད་ཡིག་དང་འབྲུག་ཡིག་གཉིས་བུ་སྤུན་རེད་ཟེར་ནའང་མི་ཆོག་པ་མེད། བོད་ཡིག་འབྲུག་ཡིག་རེད་ཅེས་བརྗོད་ཀྱང་འབྲུག་བོད་གཉིས་ལ་ཁྱད་པར་མེད། དེ་ལྟར་ལོ་རྒྱུས་ལ་འགྱུར་བ་སུས་ཀྱང་གཏོང་མི་ཐུབ་སྟེ་བདེན་པ་ལ་འགྱུར་བ་གཏོང་རྒྱུ་མེད་པས་སོ། དེས་ན་ངེས་པར་ཏུ་ཤེས་དགོས་པ་ཞིག་ནི། འབྲུག་རིགས་དང་བོད་རིགས་རྣམས་ཧི་མ་ལ་ཡའི་མི་རིགས་དང་། ནང་པ་སངས་རྒྱས་པའི་རྗེས་འབྲངས་གཅིག་པ་རེད།
འབྱུང་འགྱུར་འཛམ་གླིང་གཅིག་གྱུར་གྱི་སྲིད་ཇུས་ལག་བསྟར་བྱེད་ཕྱོགས་ལ་བསམ་ན། ང་ཚོའི་གདོང་ལེན་བྱེད་ས་དང་ཁ་གཏད་གཅོག་ས་ནག་ཕྱོགས་ཀྱི་ཀླ་ཀློའི་རིང་ལུགས་རེད། བོད་འབྲུག་གཉིས་སྣོད་བཅུད་ཀྱི་བཀོད་པ་ཁོ་ནའི་ཐོག་ནས་ཀྱང་འཛམ་གླིང་གི་ཕན་བདེའི་འབྱུང་གནས་ཡིན་པ་དང་། ནང་བསྟན་རིག་གནས་ཐོག་ནས་ཤོད་དགོས་མེད་རེད། དེ་དོན་ང་ཚོས་དུ་ནམ་ཡང་ཕན་ཚུན་འཁང་ར་མ་བྱས་པར་གདུང་སེམས་མཉམ་སྐྱེད་ཐོག་ལངས་ ཕྱོགས་གཅིག་ཏུ་འགྲོ་དགོས།
འབྲུག་པ་རྣམས་ལ་དམིགས་བསལ་ཞུ་འདོད་པ་ཞིག་ལ། གལ་ཏེ་བོད་ལ་རེ་བ་ཧ་ལམ་མེད་པ་ལྟ་བུ་ཞིག་ཆགས་ན། དེའི་སྐབས་འབྲུག་པ་ཡང་ཉེན་ཁའི་གནས་སུ་སླེབས་ངེས་རེད་སྙམ། བྱས་ཙང་དོན་མེད་རྩོད་པའམ་ཕན་ཚུན་ཧམ་པ་བྱེད་རེས་ཀྱིས་བཙན་རྒྱལ་རིང་ལུགས་པར་དཔེ་མ་ལྟ་བའི་ཐོག རིག་གཞུང་གི་ལེགས་ཆ་རྣམས་ཕན་ཚུན་སྤེལ་རེས་དང་། དུས་རབས་གསར་པའི་ཟང་ཟིང་གི་འགྲན་རྩོད་དང་གླང་སྤྱོད་རིགས་ལ་སེང་འབྲུག་དཔུང་པ་མཉམ་གཤིབས་ཀྱིས་དཀར་ཕྱོགས་ཀུན་ཏུ་རྒྱལ་བར་སྐྱིད་སྡུག་མཉམ་མྱོང་བྱེད་རོགས་ཞུ།
