བོད་ཡིག་ཅན་གྱི་ལག་ཐོགས་ཁ་པར་དངོས་སུ་བཏོན་པ།
ད་ཐེངས་བཏོན་པའི་བོད་ཡིག་འབྲི་ཐུབ་པའི་ལག་ཁྱེར་ཁ་པར་དེར། GSM ལག་ཁྱེར་ཁ་པར་དང་CDMA ལག་ཁྱེར་ཁ་པར་རིགས་གཉིས་ཚུད་ཡོད་པ་རེད། ཁ་པར་དེར་བོད་ཡིག་གི་འཕྲིན་ཐུང་དང་། ཚོན་འཕྲིན། བོད་ལུགས་པར་རིས་སོགས་འབྱོར་ཐུབ་ལ་གཏོང་ཡང་ཐུབ་པ་དང་། གཞན་ཡང་བོད་ཡིག་གློག་རྡུལ་ཡིག་རིགས་ལ་ལྟ་ཐུབ་པ་སོགས་ཀྱི་དམིགས་བསལ་ནུས་པ་ལྡན་ཡོད་པ་རེད། ཐོན་རྫས་དེས་ཡིག་རིགས་འབྲི་ཐུབ་པ་ཚུད་པའི་ལག་ཁྱེར་ཁ་པར་ལ་ཡོད་པའི་ནུས་པ་ཆ་ཚང་བེད་སྤྱོད་གཏོང་བའི་མ་ལག་ཕྱོགས་བསྡུས་བསྡུ་རུབ་བྱེད་ཐུབ་པ་བྱུང་བས། བོད་མི་རྣམས་ཀྱིས་ལག་ཁྱེར་ཁ་པར་ཐོག་ནས་རང་གིས་རྒྱུས་མངའ་ཡོད་པའི་ཡིག་རིགས་བཀོལ་སྤྱོད་བྱེད་ཐུབ་པ་བྱུང་ཡོད་པ་རེད།
སྤྱི་ལོ༡༩༩༨ ལོར། ལྷོ་ནུབ་མི་རིགས་སློབ་ཆེན་གྱིས་རྩིས་འཁོར་བོད་ཡིག་མ་ལག་ཐད་ལ་ཞིབ་འཇུག་བྱས་པ་ལེགས་གྲུབ་བྱུང་བ་དང་། དེའི་རྨང་གཞིའི་ཐོག ལྷོ་ནུབ་མི་རིགས་སློབ་ཆེན་མི་རིགས་སྐད་ཡིག་ཆ་འཕྲིན་བཅོས་སྒྲིག་ཞིབ་འཇུག་ཁང་གིས་བོད་ཡིག་འབྲི་ཐུབ་པའི་ལག་ཁྱེར་ཁ་པར་ཐོག་བོད་ཡིག་ཡིག་གཟུགས་ནང་འཇུག་བྱེད་ཐབས་དང་བོད་ཡིག་ཡིག་མཛོད་སྐོར་གྱི་ཞིབ་འཇུག་བྱ་གཞིའི་ཚོགས་པ་བཙུགས་པ་དང་། ཚོགས་པ་དེས་རྒྱ་ཁྱབ་ངང་ནས་བོད་ཡིག་ལག་བྲིས་ཡིག་གཟུགས་མི་འདྲ་བ༡༦༢༥༠ འཚོལ་སྡུད་བྱས་ཡོད་པ་དང་། སྟར་ཆགས༢༤ ལྡན་པའི་བོད་ཡིག་སྟར་ཆགས་ཀྱི་ཡིག་མཛོད་གསར་བཏོད་བྱས་ཡོད་པ། ལག་བྲིས་བོད་ཡིག་ལག་ཁྱེར་ཁ་པར་གྱི་ཐ་སྙད༥༠༠༠ ཙམ་ཡིག་སྒྱུར་གནང་ཡོད་པ་རེད་ཅེས་འཁོད་འདུག
