བོད་གཞུང་ཟློས་གར་གྱི་དུས་དྲན།
འདི་ལོར་བཙན་བྱོལ་བོད་མིའི་ཁྲོད་ནས་ཚོགས་པ་རྙིང་ཤོས་བོད་གཞུང་ཟློས་གར་ཚོགས་གསར་འཛུགས་བྱས་ནས་ལོ་ལྔ་བཅུ་འཁོར་བར་བརྟེན། རྣམ་པ་འདྲ་མིན་གྱི་སྒོ་ནས་དུས་དྲན་སྲུང་བརྩི་འདྲ་མིན་ཞུ་བཞིན་ཡོད་པ་རེད།
དེ་ཡང་ཟླ་འདིའི་ཚེས་༢ ནས་ཉིན་གསུམ་རིང་བོད་གཞུང་ཟློས་གར་ཚོགས་བཙུགས་ནས་མི་ལོ་ཧྲིལ་པོ་༥༠ འཁོར་བའི་དུས་དྲན་སྲུང་བརྩིའི་སྐབས། ཉིན་དང་པོའི་མཛད་སྒོའི་ཐོག་སྐུ་མགྲོན་གྱི་གཙོ་བོ་བོད་གཞུང་དཔལ་འབྱོར་བཀའ་བློན་ཚེ་རིང་དོན་འགྲུབ་མཆོག་གིས་གཙོས་ཁྲིམས་ཞིབ་པ་དང་དྲུང་ཆེ་རྣམ་པ། སྤྱི་འཐུས་ཚོགས་གཞོན་མཆོག་གིས་གཙོས་སྤྱི་འཐུས་ཁག་གཅིག རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། དེ་བཞིན་ས་གནས་འགོ་འཛིན་དང་ཕྱོགས་མཐའི་ལྷ་མོ་ཚོགས་པའི་འཐུས་མི། དྷ་སའི་ཉེ་འཁོར་གྱི་དགོན་སྡེ་ཁག་གཅིག་གི་འགན་འཛིན་དང་བོད་ཁྱིམ་གྱི་སློབ་ཕྲུག་ཁག་གཅིག་གདན་ཞུས་གནང་ཡོ
ད་པ་བཅས། མི་མང་བརྒྱ་ཕྲག་འཛོམས་ནས་མཛད་སྒོ་སྲུང་བརྩི་གཟབ་རྒྱས་ཞུས་ཡོད་པ་རེད།
ད་ལྟའི་སྐབས་སུ་ཟློས་གར་ཚོགས་པར་རང་གཞུང་ནས་བསྐོ་བཞག་མཛད་པའི་ཕྱི་ཀྱབ་འགན་འཛིན་གཅིག་དང། ཚད་དང་ལྡན་པའི་དགེ་རྒན་༥ འཁྲབ་སྟོན་པ་བྲོ་བ་རྒན་གཞོན་བསྡོམས་༥༠ ལས་བྱེད་པ་གྲངས་༡༩ དགེ་ལས་བགྲེས་ཡོང་བ་༣་འཁྲབ་སྟོན་དང་འབྲེལ་བའི་བཟོ་ལས་གྲངས་༡༣ བཅས་ཁྱོན་བསྡོམས་ཚོགས་མི་གྲངས་༩༠ ཡོད་པ་དེ་དག་གིས་འདས་པའི་གྲུབ་འབྲས་ཇི་བྱུང་ལ་བློ་ཡིད་ཚིམས་ནས་མ་བསྡད་པར་ད་དུང་ཡང་ཡར་རྒྱས་གོང་འཕེལ་གྱི་ཕྱོགས་སུ་བསྐྱོད་རྒྱུའི་དམ་བརྟན་པོ་ཡོད་ཅེས་ཟློ་གར་འགན་འཛིན་གྱིས་གསུངས་ཡོད་པ་རེད།།
ཟློས་གར་ཚོགས་པ་ལོ་༥༠ འཁོར་བའི་དུས་དྲན་ལ་ྋགོང་ས་མཆོག་གིས་གསུང་འཕྲིན་ཞིག་གནང་ཡོད་པའི་ནང་འཁོད་དོན། “རང་རེ་བཙན་བྱོལ་བ་རྣམས་ནས་བོད་ཀྱི་རྩ་ཆེའི་ཆོས་དང་རིག་གཞུང་སྲུང་སྐྱོབ་དང། བསྟན་སྲིད་རང་དབང་སླར་གསོའི་འགན་འཁྲི་ཆེན་པོ་ཕྲག་པར་ཁུར་ནས་རྒྱ་གར་རང་དབང་ལུང་པའི་ནང་ལས་གཞི་མང་པོ་ཞིག་གསར་དུ་བརྩམས་པའི་ནང་ནས་ཟློས་གར་ཚོགས་པ་འདི་འཛུགས་སྔ་ཤོས་ཀྱི་གྲས་ཤིག་ཡིན། མི་རིགས་ཤིག་གི་ཐུན་མིན་ངོ་བོ་མཚོན་བྱེད་རིག་གཞུང་འབུར་དོད་ཡོད་པ་ཟློས་གར་ལས་གོ་རྟོགས་ཀྱི་ནུས་པ་ཆེན་པོ་ལྡན་ཡོད་པ་ལྟར། ད་ཕན་ཟློས་གར་ཚོགས་པའི་མི་རབས་རྒན་གཞོན་རིམ་པས་ལྷག་བསམ་སྙིང་རུས་ཆེན་པོས་དཀའ་ངལ་ལ་གདོང་ལེན་གྱིས་སྒྱུ་རྩལ་གྱི་འཐབ་ས་བརྟན་པོར་བཟུང་ནས་བཙན་བྱོལ་གྱི་སྤྱི་ཚོགས་ཙམ་མ་ཡིན་པར་ཕྱི་རྒྱལ་གྱི་ཡུལ་ལུང་མང་པོར་འཁྲབ་སྟོན་དུ་བསྐྱོད་དེ་རྣམ་ཐར་གླུ་གཞས་མ་ཟད་ཆས་གོས་སོགས་ཁྱད་ཆོས་འབུར་དུ་ཐོན་པའི་མི་རིགས་ཀྱི་གཟུགས་བརྙན་དང། བོད་ཀྱི་བདེན་དོན་ངོ་སྤྲོད་བྱེད་ཐུབ་པ་བྱུང་ཡོད། ད་ལམ་ང་ཚོ་བཙན་བྱོལ་ལ་འབྱོར་ནས་མི་ལོ་ལྔ་བཅུ་དང། ཟློས་གར་ཚོགས་པ་བཙུགས་ནས་མི་ལོ་ལྔ་བཅུ་འཁོར་བའི་དུས་ཚིགས་གཉིས་འཛོམས་ལ་དྲན་གསོའི་བྱེད་སྒོ་གཟབ་རྒྱས་སྤེལ་བ་འདིའི་ཐོག་ཟློས་གར་ཚོགས་པའི་འགོ་ལས་ཚོགས་མི་ཡོངས་ལ་འཚམས་འདྲི་བཀྲིས་བདེ་ལེགས་དང༌། ལྷག་པར་མི་རབས་རྒན་པ་འདས་གསོན་རྣམས་ལ་རྗེས་འཛིན་གྱི་སྨོན་ལམ་ཡོད། ཟློས་གར་ལ་རྣམ་གྲངས་མང་པོ་ཡོད་པ་སྔོན་དུས་བོད་ནང་གར་པ་དང། ནང་མའི་སྐྱིད་སྡུག ལྷ་མོའི་ཚོགས་པ་སོགས་ཁག་སོ་སོར་ཡོད་ཀྱང། དེང་སྐབས་ཟློས་གར་ཚོགས་པས་གཅིག་ལྕོགས་ཀྱིས་འཁྲབ་སྟོན་དང། རྒྱུན་འཛིན་པ་གསོ་སྐྱོང་བྱས་པ་སོགས་གང་ཅིའི་ཐད་ཡར་རྒས་ཀྱི་ལམ་དུ་ཞུགས་པར་བསྔགས་བརྗོད་ཡོད། ལྷག་པར་བོད་ཀྱི་ལྷ་མོའི་སྒྱུ་རྩལ་ནི་གྲུབ་ཆེན་ཐང་སྟོང་རྒྱལ་པོས་གསར་གཏོད་མཛད་པའི་མི་རིགས་ཀྱི་རང་བཞིན་དང། སྒྱུ་རྩལ་གྱི་ཚད་མཐོའི་རང་བཞིན་ལྡན་པའི་ཁྱད་ནོར་ཞིག་ཡིན་པས་རྒྱུན་འཛིན་ཡག་པོ་བྱེད་དགོས། ངོས་ནས་གོ་སྐབས་འདི་དང་བསྟུན་ཏེ་བོད་ཕྱི་ནང་དུ་གནས་པའི་གཞས་སྣ་སྒྱུ་རྩལ་གླུ་པ་སོགས་བོད་མིའི་རྣམ་པ་དང་སྙིང་སྟོབས་འདོན་བསྐུལ་བྱེད་པའི་བོད་མི་སྤུན་ཟླ་ཡོངས་ལ་མཛའ་བརྩེའི་འཚམས་འདྲི་བྱ་རྒྱུ་ཡིན།
ཟློས་གར་ཚོགས་པའི་འགོ་ལས་ཚོགས་མི་བཅས་ནས་ད་ཡོད་ཀྱི་ཡར་རྒྱས་ལ་ཆོག་ཤེས་མིན་པར་བློ་སེམས་གཅིག་བསྒྲིལ་གྱིས་མུ་མཐུད་ཡར་རྒྱས་ཡོང་ཐབས་དང། དུས་རབས་འཕེལ་རྒྱས་ཀྱི་རྗེས་སུ་མཐུན་པའི་ལེགས་ཆ་ལེན་འོས་བླངས་ཏེ་བོད་ཀྱི་བདེན་དོན་འཐབ་རྩོད་དྲིལ་བསྒྲགས་བྱེད་སྒོའི་ནང་གདོང་ལེན་གྱི་ནུས་པ་སྔར་ལྷག་འདོན་སྤེལ་བྱེད་གལ་ཡིན་འཇགས་བྱེད། ”ཅེས་འཁོད་ཡོད་པ་རེད།
ཉིན་དང་པོར་གཟུགས་ཀྱི་ཉི་མའི་འཁྲབ་སྟོན་གནང་ཡོད་པ་དང༌། དེ་ནས་ཉིན་གཉིས་པ་དང་གསུམ་པར། ཁྲི་སྲོང་ཁྲི་རལ་སྐབས་ཀྱི་གཞས་སྣ་དང་ཨ་ཀ་མ་དེང་དུས་རོལ་དབྱངས་སོགས་གཟིགས་འབུལ་ཞུས་པ་སོགས་བོད་ཀྱི་ཐུན་མིན་གྱི་ཁྱད་ཆོས་ལྡན་པའི་འཁྲབ་སྟོན་སྣ་ཚོགས་བྱས་ཡོད་པ་རེད།།
