འཚམས་འདྲིའི་ཤིས་ཚིག
གུས་འབངས་རྣམས་ནས་སོར་བཅུའི་འདབ་མ་སྙིང་གར་བཀོད་དེ་ལྷ་ཕྱག་གྲངས་མེད་དང་བཅས་ཏེ་ཞུ་གསོལ་འདེབས་སྙིང༌། འདི་ཕྱིའི་༧སྐྱབས་གནས་བཀྲིན་ཟླ་མེད་༧གོང་ས་རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ཞི་བདེའི་དེད་དཔོན་ཆེན་པོས་གཟེངས་རྟགས་འབུལ་བཞེས་བསྐྱངས་གནང་མཛད་དེ་འདི་ལོ་བར་ལོ་ངོ་ཉི་ཤུ་ཧྲིལ་པོར་འཁོར་བའི་དུས་ཆེན་ཁྱད་པར་ཅན་གྱི་ཉིན་མོ་འདིར་ཕྲན་ཚོས་གཞིས་བྱེས་གཉིས་སུ་གནས་པའི་བོད་མི་ཡོངས་ཀྱིས་ངོ་ཚབ་ཞུས་ཏེ་འཚམས་འདྲིའི་བཀྲིས་བདེ་ལེགས་བརྒྱ་ཕྲག་དང༌། མགོན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་དང༌། འཛམ་གླིང་སྤྱི་དང་ཁྱད་པར་དུ་གངས་ཅན་ལྗོངས་སུ་ཞི་བདེ་བརྟན་ལྷིང་དང་འགྲོ་བ་མིའི་ཐོབ་ཐང༌། ནད་ཡམས་དང་དམག་འཁྲུག།བཙན་གནོན་མནར་གཅོད། འབྱུང་བའི་འཁྲུག་རྐྱེན་སོགས་དུས་ནམ་ཡང་མི་འབྱུང་ཞིང་རང་ཡུལ་གངས་ཅན་ལྗོངས་སུ་བོད་གཞིས་བྱེས་མཉམ་འཛོམས་བདེ་སྐྱིད་ཀྱི་ཉི་མ་མགྱོགས་ནས་མྱུར་དུ་འཆར་བ་དང༌། ཞར་བྱུང་དུ་རྒྱ་དམར་གཞུང་གི་དཔོན་རིགས་ཀླད་མཁྲེགས་ཅན་རྣམས་ཀྱི་རྒྱུད་ལ་འཛམ་གླིང་སྤྱིའི་འགན་ཁུར་དང༌། ལས་རྒྱུ་འབྲས། གཞན་ཕན་ལྷག་བསམ། ལེགས་ཉེས་བླང་དོར་འབྱེད་བའི་ཤེས་རབ་མགྱོགས་མྱུར་སྐྱེས་པའི་ཐུགས་སྨོན་སྐྱབས་འཇུག་གནང་སྐྱོང་ཡོང་བ་ཅི་ནས་མཁྱཻན་མཁྱེན། མཁྱཻན་མཁྱེན། མཁྱཻན་མཁྱེན། ཞེས་བོད་གཞུང་དབུས་སྨན་རྩིས་ཁང་ནད་བཅོས་ཉམས་ཞིབ་སྡེ་ཚན་གྱི་སྨན་ལས་ཐུན་མོང་ནས་སྒོ་གསུམ་གུས་ཕྱག་ངང་རྒྱལ་བའི་བསྟན་པ་སྤྱི་དང་ཡང་སྒོས་ཀུན་ཕན་སྨན་རྩིས་བསྟན་པ་རྒྱས་པའི་སྨོན་ལམ་དང་བཀྲིས་བདེ་ལེགས་གྲངས་མེད་དང་བཅས་ཕྱི་ལོ༢༠༠༩ ཟླ༡༢ ཚེས༡༠ བཟང་པོར་
ཕུལ།།
