རྒྱ་གཞུང་གིས་མནར་གཅོད་བཏང་བའི་སྐོར་གྱི་གཏམ་བརྗོད།

གཏམ་བརྗོད་དེའི་ནང་དོན་ནི། སྔ་ལོར་ས་བྱི་ཞི་རྒོལ་ཆེན་མོའི་སྐབས་སུ་རྒྱ་གཞུང་གིས་བོད་མི་རྣམས་ལ་སྡུག་སྦྱོང་ཇི་ལྟར་བཏང་མིན་དང། དམར་གསོད་ཇི་ལྟར་བཏང་མིན། བཙོན་འཇུག་ཁྲིམས་ཆད་ཇི་ལྟར་བཏང་མིན་བཅས་དངོས་ཡོད་གནས་ཚུལ་ལ་གཞི་བྱས་ནས་འཁྲབ་སྟོན་བྱས་པ་ཞིག་རེད།
དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་དང་ཚོགས་གཞོན་གཙོས་པའི་སྤྱི་འཐུས་ཁག་ཅིག་དང། ཆོས་རིག་བཀའ་བློན་གཙོས་པའི་བཀའ་བློན་ཁག་ཅིག གཞན་ཡང་གཞུང་ཞབས་མི་སྣ་ཁག་ཅིག་སོགས་ཁྱོན་མི་གྲངས་བརྒྱ་ཕྲག་མང་པོ་འདུ་འཛོམས་བྱུང་སོང་ལ། སྤྱི་འཐུས་ཚོགས་གཙོ་མཆོག་གིས་ཆོལ་གསུམ་བོད་མི་རྣམས་ཀྱིས་རྡོག་རྩ་ཆིག་སྒྲིལ་གྱིས་ལས་འགུལ་སྔར་ལས་ཤུགས་ཆེ་བ་སྤེལ་དགོས་པའི་གསུང་བཤད་ཀྱང་གནས་སོང་།
གཏམ་བརྗོད་འཁྲབ་སྟོན་བྱེད་དགོས་པའི་དམིགས་ཡུལ་ནི། འདས་པའི་མི་ལོ་དྲུག་ཅུ་ཙམ་གྱི་རིང་རྒྱ་ནག་གུང་ཁྲན་སྲིད་གཞུང་གིས་བོད་གངས་ཅན་ལྗོངས་ཀྱི་སྣོད་བཅུད་ཡོངས་ལ་བསམ་ཡུལ་ལས་འདས་པའི་གོད་ཆག་བཏང་ནས། བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རང་ཡུལ་ནས་ཞལ་བྲལ་དགོས་བྱུང་བ་དང། གཞིས་བཞུགས་བོད་མི་རྣམས་དམྱལ་བ་མི་ཡུལ་དུ་འཕོས་པ་ལྟ་བུའི་དཀའ་སྡུག་འོག་གསོད་སྦྱོང་མནར་གཅོད་དང། འཛིན་བཟུང་བཙོན་འཇུག དམ་དྲག་བཀའ་སྡོམ་སོགས་ངན་དགུ་ཚང་བའི་བྱ་སྤྱོད་མུ་མཐུད་བཞིན་པ་མ་ཟད། བོད་གངས་ཅན་པའི་བསྟན་སྲིད་མི་རིགས་དང་བཅས་པ་རྩ་བརླག་ཏུ་གཏོང་བའི་སྲིད་བྱུས་ངན་པ་མཚམས་འཇོག་རྩ་བ་ནས་མ་བྱས་པར་བརྟེན། ཕྱི་ལོ་༢༠༠༨ ལོར་གཞིས་སྡོད་བོད་མི་སེར་སྐྱ་རྒན་གཞོན་དང། རིགས་རུས་དབྱེ་འབྱེད་མེད་པའི་ཆོལ་ཁ་གསུམ་གྱི་ས་ཁྱོན་ཡོངས་ནས་གཞི་རྒྱ་ཆེ་ལ་དོན་སྙིང་ལྡན་པའི་ཞི་རྒོལ་རྔམ་སྟོན་གྱི་ལས་འགུལ་སྤེལ་བའི་སྐབས་ཀྱི་དངོས་མྱོང་བདེན་པ་ར་སྤྲོད་ཀྱི་ཆེད་དུ་ཡིན་པ་རེད།
ད་ཐེངས་ཀྱི་གཏམ་བརྗོད་འཁྲབ་སྟོན་འདི་བརྒྱུད་ནས་བོད་ཆོལ་ཁ་གསུམ་པོ་སྔར་ལས་རྡོག་རྩ་ཆིག་སྒྲིལ་ཡོང་བའི་དམིགས་ཡུལ་ཤུགས་ཆེན་པོ་བཟུང་ཡོད་པའི་སྐོར་མ་འདུས་ཚང་མགོན་པོ་ལགས་ཀྱིས་ངོ་སྤྲོད་གནང་སོང།།