སྐབས་དྲུག་པའི་སྦྲང་ཆར་རྩོམ་རིག་བྱ་དགའ།
《སྦྲང་ཆར》དུས་དེབ་དེ་ཐོག་མའི་ཤོག་ངོས་༦༨ ཡོད་པ་དང། ད་ལྟ་ཤོག་ངོས་༢༠༨ ཡོད་པའི་རྒྱལ་ཡོངས་གྲངས་ཉུང་མི་རིགས་ཀྱི་སྐད་ཡིག་དུས་དེབ་ཁྲོད་རྣམ་པ་དང་ལེ་ཚན་ཕྱོགས་གང་ཅིའི་ཐད་ནས་རྒྱ་ཆེ་ཞིང་ནང་དོན་ཕུན་སུམ་ཚོགས་པའི་རྩོམ་རིག་དུས་དེབ་ཅིག་ཡིན་ལ། སྔ་གཞུག་ཏུ་རྒྱལ་ཁབ་རིམ་པའི་བྱ་དགའ་མང་བོ་ཐོབ་མྱོང་བར་མ་ཟད། ད་ལོ་ཡང་ཀྲུང་གོའི་བྱང་ཕྱོགས་ཀྱི་ཕུལ་བྱུང་དུས་དེབ་བཅུའི་ཁྲོད་དུ་ཚུད། «སྦྲང་ཆར»དུས་དེབ་ད་ལྟའི་བར་སྤྱིའི་དེབ་གྲངས་བརྒྱ་དང་བཅུ་བཞི་པར་སྐྲུན་བྱས་པ་དང་དེའི་རིང་ལ་བོད་ཀྱི་རྩོམ་པ་པོ་གང་མང་སྐྱེད་བསྲིང་བྱས་པའི་མོད་ལ་ནམ་ཡང་མི་རིགས་ཀྱི་སྲོལ་རྒྱུན་དར་སྤེལ་དང་དུས་རབས་གསར་པར་ཁ་ཕྱོགས་པ། རྩོམ་ཡིག་གི་བསམ་བློའི་ཆ་དང་སྒྱུ་རྩལ་གྱི་རིན་ཐང་བཅས་ལ་མཐོང་ཆེན་བྱེད་ཀྱིན་ཡོད། དེ་མིན་བོད་ཀྱི་རྩོམ་རིག་ལས་དོན་སྔར་ལས་འཕེལ་རྒྱས་དང་བོད་མི་རིགས་ཀྱི་རིག་གནས་གོ་རྟོགས་ཇེ་ལེགས་ཇེ་རྒྱས་སུ་གཏོང་བར་ནུས་པ་བླ་ལྷག་བཏོན་དང་འདོན་བཞིན་མཆིས་པས། བོད་ཀྱི་སྤྱི་ཚོགས་ལས་རིགས་སོ་སོའི་ཀློག་པ་པོ་རྒན་གཞོན་དར་གསུམ་ཀུན་གྱིས་དགའ་བསུ་ཆེན་པོ་ཐོབ་ཡོད། ཐེངས་འདིའི་རྩོམ་རིག་བྱ་དགའ་སྟེར་བའི་ཚོགས་འདུར་མཚོ་སྔོན་ཞིང་ཆེན་རྩོམ་པ་པོའི་མཐུན་ཚོགས་ཀྱི་ཚོགས་གཙོ་མེ་སྒྲོན་སོགས་ཞུགས་ཡོད་པ་རེད།།
