སའི་གོ་ལའི་གནམ་གཤིས་འགྱུར་ལྡོག་སྐོར་གྱི་ལྷན་ཚོགས།
དུས་རབས་ཉི་ཤུ་པའི་ནང་འཛམ་གླིང་བཟོ་ལས་ཅན་དུ་བསྒྱུར་ནས། འཕྲུལ་རིགས་སྣ་ཚོགས་བཟོ་སྐྲུན་བྱེད་བཞིན་ཡོད་པ་དང། དཻ་དང་བསྟུན་ནས་རྫས་རིགས་སྣ་ཚོགས་སྔོག་འདོན་དང་བཞུ་ཞུན་བྱེད་དྲགས་པའི་རྐྱེན་གྱིས། སའི་གོ་ལའི་ཚ་དྲོད་འབར་ནས་མི་ལོ་ས་ཡ་མང་པོའི་རིང་གི་འཁྱག་རོམ་རྣམས་ཞུ་ནས་རྒྱ་མཚོའི་འཕེལ་ཁ་མགྱོགས་པ་དང། ཧི་མ་ལ་ཡའི་གངས་རི་རྣམས་ཞུ་ནས་ཚ་དྲོད་ཆེ་རུ་འགྲོ་བཞིན་པའི་རྟགས་མཚན་མངོན་གསལ་ཐོན་བཞིན་ཡོད་པས། འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་སྒྲིག་འོག་ཟླ་ཕྱེད་ཙམ་གྱི་རིང་ལ་སའི་གོ་ལའི་གནམ་གཤིས་འགྱུར་ལྡོག་གི་སྐོར་ལ་ལྷན་ཚོགས་ཆེན་པོ་རེ་འཚོག་གི་ཡོད་པ་རེད།
དེ་ཡང་ཟླ་འདིའི་ཚེས་༡༤ ཉིན་བྷི་བྷི་སིའི་གསར་ཁང་ནས་གནས་ཚུལ་སྤེལ་བ་ལྟར་ན། ལྷན་ཚོགས་དེར་ མི་མང་སྟོང་ཕྲག་བརྒལ་བས་ངོ་རྒོལ་བྱས་ཡོད་པ་དང། རྒྱལ་ཚོགས་ཀྱི་གནམ་གཤིས་འགྱུར་ལྡོག་ཞི་མོལ་ལྷན་ཚོགས་ཀྱི་ཚོགས་གཙོས། རྒྱལ་ཁབ་སྣ་མང་གི་འཐུས་མི་དང་དཔོན་རིགས་ཚོས། འཆར་འགོད། བསམ་ཚུལ་སོགས་ཁྱེར་ནས་ཚོགས་འདུའི་སྟེང་ཕེབས་ཡོད་པས། འབྱུང་འགྱུར་གོ་ལའི་གནམ་གཤིས་ལ་འགྱུར་ལྡོག་ལ་བཟང་ཕྱོགས་ནས་ཤུགས་རྐྱེན་ཐེབས་རྒྱུ་ཡིན་པའི་ཁྱབ་བསྒྲགས་བྱས་ཡོད་པ་རེད།
ངོ་རྒོལ་བ་ཚོས་སྐད་འབོད་འདྲ་མིན་བརྒྱབ་ཡོད་པ་དང༌། ལ་ལས་རྒྱལ་ཚོགས་ཀྱིས་བཤད་པ་མ་གཏོགས་ལག་ལེན་ལ་བསྟར་གྱི་མི་འདུག་ཟེར་བ་དང༌། ལ་ལས་བགྲོ་གླེང་ལ་རང་དབང་དགོས་ཀྱི་ཡོད་ཟེར་བ། ཡང་འགའ་རེས་བོད་སོགས་ལ་རང་དབང་དགོས་ཀྱི་འདུག་ཟེར་བ་སོགས་ངོ་རྒོལ་ཤུགས་ཆེན་བྱས་ཡོད་པས། ཡུལ་དེའི་ཉེན་རྟོག་པས་ངོ་རྒོལ་བ་བརྒྱ་ཕྲག་མང་པོ་བཀག་ཉར་བྱས་ཡོད་འདུག ལྷན་ཚོགས་དེའི་དཀའ་ངལ་ཆེ་ཤོས་ནི་ཡར་རྒྱས་སོང་ཟིན་པའི་རྒྱལ་ཁབ་དང་འགྲོ་བཞིན་པའི་རྒྱལ་ཁབ་གཉིས་དབར་གྲོས་འཆམ་ཡོང་མི་ཐུབ་པ་དེ་ཡིན་འདུག རྒྱ་ནག་དང་རྒྱ་གར་ལྟ་བུ་ཡར་རྒྱས་འགྲོ་བཞིན་པའི་རྒྱལ་ཁབ་ཁག་གི་བཟོ་གྲྭ་རྣམས་ཉུང་དུ་བཏང་ན། ལུང་པའི་དཔལ་འབྱོར་ཡར་རྒྱས་ལ་ཉེན་ཚབས་ཆེ་བའི་དཀའ་ངལ་ཡོད་ལུགས་སོགས་འགྲེལ་བརྗོད་བྱས་ཡོད་པའི་གནས་ཚུལ་ཐོན་ཡོད་པ་རེད།།
