གནམ་གཤིས་འགྱུར་ལྡོག་ལྷན་ཚོགས་སུ་བོད་མི་མཉམ་ཞུགས།
བོད་ཀྱི་ཆུ་བོ་དང་རང་བྱུང་གི་ཁོར་ཡུག་དེ་ཨེ་ཤ་ཡའི་མི་འབོར་ཐེར་འབུམ་མང་པོ་ཇི་ཙམ་གལ་ཆེན་ཡིན་མིན་གྱི་སྐོར་གསུང་བཤད་གནང་པ་དང་དངོས་བྱུང་གི་གློག་བརྙན་སོགས་གཟིགས་འབུལ་ཞུས་ཡོད་པ་རེད།
དེ་ཡང་ཟླ་འདིའི་ཚེས་༡༤ ཉིན་བོད་ཀྱི་དྲ་གནས་ཐོག་གནས་ཚུལ་སྤེལ་བ་ལྟར་ན། བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་སྡེ་ཚན་གྱི་འགན་འཛིན་དང་ཁོང་གི་ཕྱག་རོགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་དང་ཕྱག་རོགས། བོད་ཀྱི་དགུ་བཅུ་གསུམ་གྱི་ཚོགས་གཙོ་སོགས་འཐུས་མི་ཁག་གཅིག་འཛུལ་ཞུགས་གནང་བ་དང་བསྟུན་ནས། མཐོ་སྒང་བོད་ཀྱི་ཁོར་ཡུག་དང་བོད་ནས་བྱུང་བའི་ཆུ་བོ་ཁག་ལ་གཅེས་སྐྱོང་འཐུས་ཚང་ཞིག་བྱེད་མ་ཐུབ་ན། མི་འབོར་ཐེར་འབུམ་མང་པོའི་འཚོ་གནས་དང་འབྲེལ་བ་ཆགས་ཡོད་ཚུལ་སོགས་གསུང་བཤད་གནང་ཡོད་པ་དང་།
དེ་བཞིན་བོད་ནང་གི་འབྲོག་པའི་གནས་སྟངས་ཐོག་གནམ་གཤིས་འགྱུར་ལྡོག་གིས་རྗེས་འབྲས་ཇི་བྱུང་དང༌། དེ་བཞིན་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ནས་ཁོར་ཡུག་གི་དཀའ་ངལ་ལས་སྤྱི་ཚོགས་ནང་དཀའ་ངལ་བྱུང་བར་བརྟེན་རྒྱ་གཞུང་གིས་བོད་མི་ཚོ་འཛིན་བཟུང་བྱེད་ཀྱི་ཡོད་སྐོར་སོགས་གསལ་བཤད་གནང་རྗེས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ནས་བོད་ཀྱི་སྨར་ཁམས་ཁུལ་དུ་རྒྱ་གཞུང་གིས་གཏེར་ཁ་སྔོག་འདོན་བྱས་པར་བརྟེན་གནམ་གཤིས་འགྱུར་ལྡོག་གི་རྗེས་འབྲས་ཇི་བྱུང་གསལ་བཤད་གནང་ཡོད་པ་རེད།
བཙན་བྱོལ་སྤྱི་ཚོགས་ནང་བོད་མི་ན་གཞོན་ཚོས་གནམ་གཤིས་སྐོར་གོ་རྟོགས་ཇི་ཡོད་དང་འགན་ཇི་འདྲ་འཁྱེར་བཞིན་ཡོད་པའི་སྐོར་དང། བོད་ནང་གི་གནས་བབས་མཚོན་པའི་དངོས་བྱུང་གི་གློག་བརྙན་གཟིགས་འབུལ་གནང་ཡོད་པ་རེད། དེ་བཞིན་ཟླ་འདིའི་ཚེས་༡༢ ཉིན་འཛམ་གླིང་སྣེ་གསུམ་པའི་ཚོགས་འདུ་ཞེས་པའི་ནང། དབྱིན་ཡུལ་སོགས་ཡུ་རོབ་རྒྱལ་ཁབ་ཁག་ཏུ་ཡོད་པའི་བོད་རང་དབང་སློབ་ཕྲུག་ཚོགས་པའི་ཚོགས་མི་མཉམ་ཞུགས་གནང་ནས་དངོས་བྱུང་གི་གློག་བརྙན་སོགས་གཟིགས་འབུལ་ཞུས་ཡོད་འདུག །
