ནོར་འཁྲུལ་གྱི་ལམ་ཁ་འདི་ནས་ཕྱིར་མིག་བལྟས་དུས།
འདུར་ཁུལ་བྱེད་བཞིན་པའི་སྒོར་མོ་འདི་དག་གིས་ང་རང་གི་དམིགས་ཡུལ་གང་ཡང་སྒྲུབ་ཐུབ་ཀྱི་མེད་ལ། ཐ་ན་རང་གི་ཕ་མ་དག་ལ་རོགས་རམ་ཕྲན་པུ་ཞིག་ཀྱང་བྱེད་ཐུབ་ཀྱི་མེད།
འདི་ནི་ང་རང་གི་ནོར་འཁྲུལ་བྱེད་སའི་ལམ་ཁ་ཞིག་འདེམ་པ་ལས། རང་གི་དམིགས་ཡུལ་འགྲུབ་སའི་ལས་ཀ་ཞིག་མིན་ན་ཡང་། ད་ནི་བྱེད་ཐབས་མེད་པ་ནི། མུ་མཐུད་དུ་སྒོར་མོའི་བྲན་གཡོག་བྱས་དེ་འགྲོ་རྒྱུ་ལས། སྒོར་མོ་ལ་གཡོག་བྱས་པའི་ངོ་གསོ་ཞིག་གཏན་ནས་མེད་པ་མ་ཟད། ཐ་ན་སྒོར་མོ་འདི་དག་ནི་རང་གི་ཁ་རྒྱབ་ཙམ་ལས་བེད་སྤྱོད་བྱེད་ས་ཞིག་མི་འདུག་པར། ཐག་རིང་གི་དམིགས་ཡུལ་དེར་འགྲུབ་པའི་ཆ་རྐྱེན་ཞིག་ལ་གཏན་ནས་ཡོང་ས་མེད་པ་གསལ་བོ་ཤེས་སུ་བཅུགས་སོང་།
སྒོར་མོ་ཡོད་ན་ཐམས་ཅད་འགྲུབ་འདོད་ཀྱི་བློ་ཡོད་མཁན་གྱི་སྤུན་ཟླ་མི་ཉུང་བ་ཞིག་གིས་ཀྱང་། རང་གི་རིགས་རུས་དང་རང་གི་རིགས་ཀྱི་བདེན་དོན་ལ་འགན་མ་འཁུར་བར། ང་དང་འདྲ་བའི་སྒོར་མོ་ཡོང་སའི་ལམ་ཁ་ཞིག་གི་ཆེད་དུ། རང་གི་རིགས་རྒྱུད་གཙང་མ་ཞིག་སྤེལ་བར་ཡང་བློས་གཏོང་བྱེད་ཀྱི་ཡོད་པ་དང་། རང་གི་རིགས་ཀྱི་མི་རིགས་ལ་བཟའ་ཚང་བྱེད་པ་ལས། ཕྱི་རྒྱལ་ཡུལ་གྲུ་ཁག་གི་མི་ལ་རེ་བ་བྱས་དེ། རང་གི་མདུན་ལམ་ཡོད་ཚད་སྒོར་མོའི་བསླུ་བྲིད་འོག་ལ་སོང་ནས། སྒོར་མོ་འཚོལ་སའི་ལམ་ཁ་ཞིག་འཚོལ་བཞིན་ཡོད་པ་རེད།
དེ་ལྟར་ལམ་ཁ་དེར་ཞུགས་ནས་རང་གི་ཉེ་མི་དང་སྤུན་མཆེད། གྲོགས་པོ་སོགས་ལ་རོགས་རམ་བྱེད་པའི་ཀུན་སློང་ཡོད་མཁན་ཡང་མི་ཉུང་བ་ཞིག་ཡོད་པའི་སྤུན་ཟླ་ང་དང་འདྲ་བ་དག་གིས་ཕྱི་རྒྱལ་གྱི་སྒོར་མོ་གསོག་སའི་ལམ་ཁ་འདི་འདེམ་བཞིན་ཡོད་པ་རེད། ལམ་ཁ་འདི་ལ་ཞུགས་རྗེས་སུ། རང་ཉིད་གནས་སའི་ཁོར་ཡུག་ནས་སྒོར་མོ་ཕྲན་པུ་རེ་ཐོབ་ཀྱི་ཡོད་ཀྱང་། དེ་ནི་རང་གི་དམིགས་ཡུལ་གྱི་ཕྱོགས་སུ་གཏོང་རྒྱུར་ཕར་ཞོག ནང་གི་ཟ་འཐུང་འགྲོ་བསྡོད་ཀྱི་འགྲོ་སོང་ཟླ་རེ་བཞིན་གཏོང་བཞིན་སོང་དུས། ད་གཟོད། སྒོར་མོ་རེག་སའི་ཁོར་ཡུག་ནས་ཕྱིར་སྒོར་མོ་དེ་དག་ཡང་ཁོར་ཡུག་དེ་ལ་འཐིམ་འགྲོ་རྒྱུ་ལས། གསོག་དངུལ་ཞིག་ཟུར་འཇོག་བྱེད་རྒྱུ་དཀའ་བ་དེ་ནི། ཡོང་ས་ཡོད་ཀྱང་འགྲོ་ས་མང་བའི་དཀའ་ངལ་གྱིས། ད་གཟོད་ང་དང་འདྲ་བའི་སྤུན་ཟླ་མི་ཉུང་བ་ཞིག་གིས་རང་གི་སྔར་བྱས་ཀྱི་དམིགས་ཡུལ་དེ་དག་ནི་ནམ་མཁའི་འཇའ་མཚོན་མཛེས་ཀྱང་གོན་པ་མི་ཉན་པའི་ངེས་ཤེས་ཟབ་མོ་དེ་སྐྱེ་བཞིན་ཡོད།
འོན་ཀྱང་། ད་དུང་ཐག་རིང་གི་ཕ་མ་དང་སྤུན་མཆེད། དགའ་ཉེ་སྤུན་གྲོགས་དག་གིས་ང་དང་འདྲ་བའི་ཕྱི་རྒྱལ་ཡུལ་གྲུ་ཁག་དུ་གནས་བསྡོད་བྱེད་མཁན་དག་ནི་ཕྱུག་བདག་ལྟ་བུ་ཞིག་ལ་ངོས་འཛིན་བྱེད་ཀྱི་ཡོད་ལ། ཁོང་ཚོ་ཡི་ཉིན་རེའི་འཚོ་བའི་ནང་གི་དཀའ་ངལ་ནི་ནམ་ཡང་ཚོད་དཔག་བྱེད་ཐུབ་ཀྱི་མེད་ལ། བྱེད་པའི་ཕྱོགས་སུ་བསམ་བློ་གཏོང་རྒྱུའི་རྒྱུ་ཆ་ཡང་རེག་གི་མེད་པ་རེད། དེ་ལྟར་ཕན་ཚུན་བར་གྱི་དཀའ་ངལ་ནི། མཐར་ཐུག་ན་སྒོར་མོ་འདིས་བཟོ་བཞིན་ཡོད་ལ། ཁྱིམ་ཚང་གི་བདེ་སྐྱིད་དང་། ཕ་མ་སྤུན་མཆེན་བར་གྱི་དཀའ་ཁག་ཡང་སྒོར་མོ་འདི་ཡིས་བཟོ་བཞིན་ཡོད་པ་རེད། སྒོར་མོ་མེད་ན་འཚོ་ཐབས་དཀའ་བར་རློམ་བཞིན་པའི་སྤྱི་ཚོགས་འདིས་ནང་དུ། ང་དང་འདྲ་བའི་སྤུན་ཟླ་མི་ཉུང་བ་ཞིག་གིས་སྒོར་མོའི་བྲན་གཡོག་བྱས་དེ། རང་གི་དམིགས་ཡུལ་དེ་ཕར་ཞོག ཐ་ན་རང་གི་རིགས་རུས་ཀྱང་གཙང་མ་གཉར་ཐུབ་ཀྱི་མེད་པ་དེ་ནི་སྒོར་མོ་ལས་ཀྱང་གལ་ཆེ་བ་དེ་ངོས་ཟིན་མ་ཐོབ་པར། ད་དུང་ཡང་། སྤུན་ཟླ་ཆེས་མི་ཉུང་བ་ཞིག་གིས་ལམ་ཁ་འདི་བཟང་རབས་དང་རྒྱན་རབས་ཀྱི་རྨི་ལམ་གཏོང་བ་དང་། སྤུན་ཉེ་དགའ་གྲོགས། ངོ་ཤེས་དང་མི་ཤེས་པའི་སྤུན་ཟླ་དག་ལ་ལམ་ཁ་འདི་འདེམ་དགོས་པར་སྐུལ་ལོངས་བྱེད་ཀྱི་ཡོད་པ་རེད།
དོན་དངོས་སུ་ལམ་ཁ་འདི་ཉིད་འདེམ་པ་ནི། མི་རིགས་ཤིག་གི་ཆག་འཇིག་དང་། རིག་གཞུང་ཉམས་ཉེས་འགྲོ་བྱེད་ཀྱི་ལམ་ཁ་དང་བོ་དེ་ཡིན་པར་གླེང་ཆོག་པ་ཡིན། དེས་ན་དེ་རིང་བདག་གི་རང་གི་ནོར་འཁྲུལ་འདི་གཞིར་བཟུང་དེ། སྤུན་ཟླ་མི་ཉུང་བ་ཞིག་ལམ་ཁ་འདིར་ཞུགས་རྩིས་ཡོད་པ་དག་ལ་སེམས་ཁོང་རུས་པའི་གཏིང་ནས་ཞུ་འབོད་ཅིག་བྱེད་འདོད་ཡོད་པ་དེ་ནི། གལ་ཏེ། སྐུ་ཉིད་ཕྱི་རྒྱལ་གང་རུང་ཞིག་ལ་འགྲོ་རྩིས་བྱེད་ཀྱི་ཡོད་ན་ནི། རང་གི་རིགས་ཀྱི་སྤུན་ཟླ་དང་ཤ་ཉེ། དགའ་གྲོགས་ཀྱི་རོགས་རམ་ལ་བརྟེན་ཕྱི་རྒྱལ་དུ་འགྲོ་བཞིན་ཡོད་ན་ནི་མ་འགྲིག་པ་མེད་ཀྱང་། མི་རིགས་གཞན་དང་གཉེན་སྒྲིག་བྱས་དེ་འགྲོ་འདོད་བྱེད་པ་ནི་ནོར་འཁྲུལ་ཡིན་པར་ཐག་བཅད་དེ་བཤད་འདོད་བྱུང་།
ནོར་འཁྲུལ་དང་བོ་དེ་ནི་རང་གི་རིགས་རུས་ཀྱི་འགན་མ་ཆགས་པའི་ནོར་འཁྲུལ་དང་། ནོར་འཁྲུལ་གཉིས་པ་རང་གི་རང་དབང་ཡོད་ཚད་གཞན་དབང་དུ་འགྲོ་དགོས་པའི་ནོར་འཁྲུལ། ནོར་འཁྲུལ་གསུམ་པ་རང་གི་རིག་གཞུང་གོམས་གཤིས་ལ་འགན་མི་ཆགས་པའི་ནག་ཉེས་སོགས་ནོར་འཁྲུལ་ཆེས་མི་ཉུང་བ་ཞིག་གི་ལམ་ཁ་ཡིན་པར་ཤེས་དགོས་པ་དེ་ནི་གལ་ཆེན་ནང་གི་དོན་ཆེན་ཡིན། སྒོར་མོ་མེད་ན་འགྲོ་བ་མི་འཚོ་ཐབས་མེད་ཀྱང་། སྒོར་མོ་ལས་ཀྱང་གལ་ཆེ་བ་ཞིག་ཡོད་ན་མི་རིགས་རེ་ལ་རང་རང་གི་རིགས་གཞུང་ལས་ཀྱང་གལ་ཆེ་བ་དང་རང་གི་རིགས་རྒྱུད་ལས་ཀྱང་གལ་ཆེ་བ་ཞིག་མེད་པ་སེམས་ཁོང་ནས་ངེས་ཟིན་ཐོབ་དགོས་རྒྱུ་དེ་ནི་རང་ཉིད་སྒོར་མོའི་བྲན་གཡོག་བྱེད་རྒྱུ་དེ་ལས་ཀྱང་གལ་ཆེན་ཡིན་པ་ཤེས་པར་གྱིས་ཤིག་ཟེར་ནས་སེམས་ཁོང་རུས་པའི་གཏིང་ནས་འགྱོད་གཤེགས་དང་། ནག་ཉེས་དང་ནོར་འཁྲུལ་གྱི་ལམ་ཁ་ན་འགྲོ་བཞིན་སྤུན་ཟླ་ངས། སྤུན་ཟླ་ཁྱེད་ཅག་ལ་འབོད་སྐུལ་ཞུས་པ་ཡིན།
