བཀའ་བློན་ཁྲི་པའི་འོས་བསྡུའི་བསྒྱུར་བཅོས།
རྒྱ་ནག་འཐབ་ཕྱོགས་གཅིག་གྱུར་གྱི་བློན་ཆེན་གཞོན་པ་ཀྲོའུ་ཝེ་ཆོན་དང། ༧གོང་ས་མཆོག་གི་སྐུ་ཚབ་ཚོའི་དབར་ཐེངས་དགུ་པའི་འབྲེལ་མོལ་གྲུབ་པའི་རྗེས། རྒྱུན་ལྡན་ནས་དྲེགས་ཉམས་ཆེ་བའི་ཁོ་པའི་གསར་འགོད་གསལ་བསྒྲགས་ཀྱི་ཐོག་ཏུ། བློན་ཆེན་གཞོན་པ་ཀྲོའུ་ཝེ་ཆོན་གྱིས་བག་ཚ་མེད་པའི་ཐོག་ནས། བཙན་བྱོལ་བོད་གཞུང་ཟེར་བ་དེ་ཁྲིམས་དང་ཡོངས་སུ་འགལ་བ་ཞིག་རེད་ལ། འདིས་བོད་དང་བོད་མི་མང་གི་ཚབ་མཚོན་ཐུབ་ཀྱི་མ་རེད། <༢༠༡༠ ཟླ་བ་༢ པའི་ཚེས་༡ ཤིན་ཧྭ།> ཅེས་བརྗོད་ཀྱི་ཡོད་པར། ང་ཚོས་ངེས་པར་དུ་སྐད་ཆ་དེ་ནོར་འཁྲུལ་ཅན་ཞིག་ཡིན་པ་གསལ་བརྗོད་བྱེད་དགོས་ཀྱི་ཡོད་རེད། སྟབས་ལེགས་པ་ཞིག་ལ་ཡོང་རྒྱུ་བསྡད་པའི་གོ་སྐབས་བཟང་པོ་ཞིག་སྟེ། རྗེས་མའི་བཀའ་བློན་ཁྲི་པ་འོས་ཤོག་བླུག་རྒྱུ་དེས་རྒྱ་ནག་གཞུང་དང་ཀྲོའུ་ཝེ་ཆོན་གྱི་གདོང་ལ་སྣ་མཛུབ་སྤྲད་དེ། བཙན་བྱོལ་བོད་གཞུང་འདི་ཁྲིམས་མཐུན་ཙམ་མ་ཡིན་པར་མང་གཙོ་སྲ་བརྟན་ཅན་ཞིག་ཡིན་པ་སྟོན་དགོས་ཀྱི་ཡོད་རེད། ཕྱོགས་གཞན་ཞིག་ནས། བོད་མི་ཚང་མས་འོས་འཕེན་གྱི་ཆ་ཤས་མ་བླངས་ན། ཀྲོའུ་ཝེ་ཆོན་གྱིས་ཁྱབ་བསྒྲགས་བྱས་པའི་སྐད་ཆ་དེ་བདེན་པ་ར་སྤྲོད་བྱས་པ་ཞིག་རེད། འདེམས་ཁ་འདི་ནི་ཧ་ཅང་གི་གསལ་པོ་ཡིན་ལ། ཨ་རིའི་སྲིད་འཛིན་ཟུར་པ་ཇོར་ཇི་བྷུ་ཤི་མཆོག་གིས། ཁྱེད་རང་ང་ཚོ་མཉམ་དུ་ཡོད་དམ་ཡང་ན་ཁོ་ཚོའི་མཉམ་དུ་ཡོད་ཅེས་གསུངས་པ་རེད། གནས་ཚུལ་འདི་ང་ཚོས་རྒྱ་ནག་གཞུང་དང་འཛམ་གླིང་གི་མི་མང། བོད་ནང་ཡོད་པའི་བོད་མི་ཚོ་ལ་སྐད་ཤུགས་ཆེན་པོའི་ཐོག་ནས། བཙན་བྱོལ་ནང་ཡོད་པའི་བོད་མི་ཚོས་མང་གཙོའི་རང་དབང་ལོངས་སུ་སྤྱོད་བཞིན་ཡོད་པ་དང་། ང་ཚོས་རང་ཉིད་ཀྱི་མ་འོངས་པའི་ལས་དབང་ལ་སྟངས་འཛིན་གྱི་ཆེད་དུ་མདུན་བསྐྱོད་བྱེད་ཀྱི་ཡོད་ཅེས་གནད་དོན་འདི་བརྡ་གཏོང་དགོས་པ་རེད།
སྟབས་མ་ལེགས་པ་ཞིག་ལ། གལ་སྲིད་ང་ཚོས་འདས་པའི་གནས་སྟངས་ལ་ཕྱིར་མིག་བལྟས་ན། ད་དུང་ང་ཚོ་འགྲོ་དགོས་པའི་ལམ་ཐག་རིང་པོ་ཡོད། རྒྱལ་ཁབ་ཀྱི་འགོ་ཁྲིད་ཚོ་མང་གཙོའི་ལམ་ལུགས་ཐོག་ནས་འོས་བསྡུ་བྱས་པའི་རྒྱལ་ཁབ་གཞན་པ་དང་ང་ཚོ་བསྡུར་ན། བཙན་བྱོལ་ནང་ཡོད་པའི་བོད་མི་ཚོས་སྔོན་མའི་བཀའ་བློན་ཁྲི་པའི་འོས་བསྡུའི་སྐབས་ཆ་ཤས་ལེན་མཁན་སྤྱིའི་འབོར་ཧ་ཅང་དམའ་པོ་ཡིན་པ་རེད། (ཚོད་རྩིས་བྱེད་སྐབས་འོས་འཕེན་གྱི་འོས་ཆོས་ཡོངས་སུ་ཚང་ཡོད་པའམ། ཡང་ན་རང་ལོ་༡༨ ལས་བརྒལ་ཡོད་པའི་ཁོངས་ནས། བརྒྱ་ཆའི་༣༠ ཙམ་གྱིས་མ་གཏོགས་ཆ་ཤས་བླངས་མེད) ང་ཚོས་བརྒྱུད་རིམ་འདི་ཁྱོན་ཡོངས་ནས་བརྗེ་བསྒྱུར་ག་འདྲ་བྱེད་ཐུབ་མིན་དང། འོས་འཕེན་པའི་གྲངས་འབོར་གྱི་ཚད་གཞི་ཧ་ཅང་མཐོ་པོ་ཡོང་ནས་ཚད་ལྡན་གྱི་འོས་མི་འདེམས་སྒྲུབ། བཙན་བྱོལ་བོད་གཞུང་འདི་བོད་ཕྱི་ནང་གཉིས་ཀྱི་བོད་མི་ཚོའི་མང་གཙོ་ཚད་ལྡན་གྱི་ངོ་བོ་མཚོན་ཐུབ་མཁན་ཞིག་ལ་བསྒྱུར་དགོས།
གལ་ཆེའི་བསྒྱུར་བཅོས་རིགས་བྱེད་ཐུབ་ན་དེར་རེ་བ་ཞིག་ཡོད་པ་རེད། དེ་ཡང་ཡར་རྒྱས་ཅན་གྱི་རྒྱལ་ཁབ་དང་ཡར་རྒྱས་འགྲོ་བཞིན་པའི་རྒྱལ་ཁབ་ཁག་ཏུ་དར་ཁྱབ་ཆེ་བའི་འོས་བསྡུ་བསྒྱུར་བཅོས་ཀྱི་སྟབས་བདེའི་ཐབས་ལམ་དེ་ངོ་སྤྲོད་བྱས་ན། དེ་ཡང་བསྒྱུར་བཅོས་ཀྱི་ཁོངས་སུ་སྦྲགས་ལམ་བརྒྱུད་ནས་འོས་འཕེན་འགོ་འཛུགས་རྒྱུ་དང། ངོ་ཚབ་འོས་ཤོག དེབ་སྐྱེལ་མེད་པ་བཟོ་རྒྱུ། ཡང་ན་གལ་སྲིད་དེབ་སྐྱེལ་དེ་དགོས་པ་ཡིན་ན། འོས་འཕེན་དེབ་སྐྱེལ་རྣམས་འོས་བླུགས་པའི་ཉིན་དེ་རང་དང་ཡང་ན་དེའི་སྔོན་དུ་བྱེད་ཆོག་པ་དང་ལྷན་དུ་དང་བླང་དཔྱ་ཁྲལ་ལག་དེབ་ཀྱི་དངུལ་གཅོག་ཆ་བྱེད་དགོས་ལ། དམིགས་བསལ་གྱི་ཡོང་འབབ་མེད་མཁན་ལ་གཅོག་ཆ་བྱེད་དགོས། དེས་ན་བསྒྱུར་བཅོས་འདིས་འོས་འཕེན་གྱི་འབོར་ཚད་ལྡབ་གཉིས་སམ་གསུམ་མང་དུ་འགྲོ་རྒྱུ་ཡིན་ཞིང། འོས་འཕེན་མཁན་གཙོ་གྲས་བལ་གོས་ཚོང་པ་དང། སློབ་ཕྲུག ཕྱི་རྒྱལ་ཁག་ཏུ་ཡོད་པའི་བོད་མི། སློབ་གཉེར་གནང་བཞིན་པའི་དགེ་འདུན་པ། ནང་ལས་བྱེད་མཁན་བུད་མེད་བཅས་ཀྱིས་འོས་འཕེན་གྱི་དཀའ་ངལ་རྣམས་ལས་སླ་པོའི་ཐོག་ནས་གདོང་ལེན་བྱེད་ཐུབ།
འདས་པའི་ལོ་རྒྱུས་ནང་བྱུང་བའི་ང་ཚོ་དང་བསྡུར་འོས་པའི་སྐྱབས་བཅོལ་གཞུང་མང་པོ་ཞིག་གིས་སྙན་པོ་མེད་པའི་གསང་བ་ཞིག་བརྗོད་བཞིན་པ་ནི། གལ་སྲིད་བཙན་བྱོལ་བོད་གཞུང་དེ་གསོན་གནས་མ་ཐུབ་པ་ཡིན་ན། ད་ལྟའི་སྐབས་མདུན་བསྐྱོད་བྱེད་བཞིན་པའི་ལས་འགུལ་འདི་ཉིད་ཞི་འཇམ་ངང་ནས་ཕམ་ཉེས་སུ་འགྲོ་རྒྱུ་ཡིན་པ་དང་། གསོན་གནས་དང་སྲ་བརྟན་ཡོང་བར་བྱེད་པ་ལ་བཙན་བྱོལ་བོད་གཞུང་གི་མང་གཙོའི་ལམ་ལུགས་ལ་ནུས་ཤུགས་བསྐྱེད་དགོས་པ་དེ་ཡིན་ཞིང་། ནུས་སྟོབས་ལྡན་པའི་མང་གཙོའི་ཀ་བ་གཅིག་ནི་བོད་གཞུང་གི་དབུ་ཁྲིད་བཀའ་བློན་ཁྲི་པའི་འོས་འཕེན་གྱི་གནད་དོན་འདི་ཡིན། ང་ཚོ་ཚང་མར་གཅིག་གྱུར་གྱི་མོས་མཐུན་ཡོད་པ་ནི། གལ་སྲིད་བོད་མི་རིགས་ཀྱི་འཐབ་རྩོད་འདི་ད་དུང་མི་ལོ་༥༠ རིང་སྲ་བརྟན་ངང་གནས་དགོས་ན། བཙན་བྱོལ་བོད་གཞུང་འདི་དང་། འདིའི་མང་གཙོའི་སྒྲོམ་གཞི་དེ་རྒྱང་རིང་པོར་འགྲུལ་བཞུད་བྱེད་དགོས་པ་དེ་ཡིན།
སྔོན་མའི་བཀའ་བློན་ཁྲི་པ་འོས་འཕེན་གྱི་སྤྱི་འབོར་དམའ་པོ་བྱུང་ཡོད་པ་དེས་ང་ལ་ཧང་སངས་དགོས་པ་དང་ཡིད་སྐྱོ་དགོས་པའི་གནས་ཚུལ་གཉིས་བྱུང་། མི་སུ་ཡང་ལས་སླ་པོའི་ཐོག་ནས་སེམས་ཤུགས་ཆག་གི་མིན་པས། ངས་རྒྱལ་ཁབ་གཞན་པ་ཁག་གཅིག་གི་འོས་བསྡུའི་གྲུབ་འབྲས་དང་བསྡུར་ནས། ང་ཚོའི་གནས་བབས་འདི་ཉེན་སྐྱོབ་བྱེད་རྒྱུའི་ཐག་བཅད་པ་ཡིན་ལ། གཤིབ་བསྡུར་གྱི་རེ་འདུན་ནི་ང་ཚོའི་འོས་འཕེན་དེ་མདུན་བསྐྱོད་དང་ལེགས་གྲུབ་ཡོང་རྒྱུ། ཡང་ན་ཉུང་མཐའ་ལའང་མང་གཙོའི་རྒྱལ་ཁབ་གཅིག་གམ་གཉིས་ཙམ་ལ་འདྲ་མཉམ་ཡོང་དགོས་པ་དེ་ཡིན་ཞིང་། ང་ཚོས་རང་ཉིད་ཀྱི་རང་དབང་གི་ཆེད་དུ་འཐབ་རྩོད་བྱས་ནས་བཟུང་། འོས་འཕེན་ནང་འཛུལ་ཞུགས་སྤྱི་སྙོམས་ཡོང་དགོས་ངེས་དང་། གལ་སྲིད་མང་གཙོ་སྲ་བརྟན་ཅན་གྱི་རྒྱལ་ཁབ་ཨོ་སི་ཁྲིུ་ལི་ཡ་བརྒྱ་ཆའི་(༩༥.༡༧%)བྷེལ་ཇམ་བརྒྱ་ཆའི(༩༡.༠༨%)ལག་ཛེམ་བྷག་བརྒྱ་ཆའི་(༩༡.༦༨%)ཨོ་སི་ཊིར་བརྒྱ་ཆའི་ (༨༡.༧༡%), ཨི་ཊ་ལིའི་བརྒྱ་ཆའི་(༨༠.༥༤%) བྷིར་ཛིལ།(༨༣.༢༧%)བཅས་རྒྱལ་ཁབ་དེ་དག་ལས་ལྷག་པ་མ་བྱུང་ནའང། རྒྱལ་ཁབ་འདི་དག་གི་འོས་འཕེན་གྱི་བརྒྱ་ཆའི་ཕྱེད་ཙམ་ལ། ང་ཚོའི་འོས་འཕེན་གྱི་བརྒྱ་ཆས་ཟིན་ཐུབ་མེད་པ་དེ་སྐྱོ་བ་སྐྱེ་དགོས་པ་ཞིག་རེད།
ང་ཚོས་ནང་པའི་རྒྱལ་ཁབ་ཁག་དང་གཤིབ་བསྡུར་བྱས་ནའང་། འོག་ཏུ་འགོད་རྒྱུ་ཡིན་པའི་རྒྱལ་ཁབ་ཁག་ཅིག་གི་འོས་འཕེན་གྱི་གྲངས་འབོར་ལས་ལྷག་པ་གཅིག་ཀྱང་ང་ཚོ་མདུན་སྐྱོད་བྱེད་ཐུབ་མེད། དེ་ཡང་སིང་གྷ་ལ་བརྒྱ་ཆའི་ (༧༥.༩༦%), ཐེ་ལན་ཌི་བརྒྱ་ཆའི་(༧༨.༥༡%)ཉི་ཧོང་(༦༧.༤༦%)ལྟ་བུ་རེད། དེ་བཞིན་སྐྱོ་བ་སྐྱེ་དགོས་པའི་གནད་དོན་ཞིག་ནི། ང་ཚོ་ད་དུང་རང་ཉིད་དང་གཅིག་མཚུངས་ཡིན་སྙམ་པའི་ཁྱིམ་མཚེས་རྒྱལ་ཁབ་ཁག་གི་རྗེས་སུ་ལུས་ཡོད། དེ་ཡང་འབྲུག་ལ་བརྒྱ་ཆའི་(༧༩.༤༥%)སོག་པོར་བརྒྱ་ཆའི་(༧༤.༣༡)བལ་ཡུལ་ལ་བརྒྱ་ཆའི་(༦༣.༢༩%)བཅས་རེད། དེ་བཞིན་ང་ཚོའི་འཐབ་རྩོད་ཀྱི་སྦིར་སྒྲ་འདི་གཞིར་བཞག་ན་ཉེ་དུས་རང་བཙན་ཐོབ་པའི་རྒྱལ་ཁབ་ཁལ་ཊི་ཝི་ཡ་ལ་བརྒྱ་ཆའི་(༦༠.༩༨%)སི་ལོ་ཝི་ནི་ཡ་ལ་བརྒྱ་ཆའི་(༦༣.༡%)བཅས་དང་འོས་འཕེན་སྤྱི་སྙོམས་ཡོང་དགོས་ངེས་ཤིག་ཡིན་ཡང་། དེང་སྐབས་རྒྱལ་ཁབ་དེ་དག་གི་འོས་འཕེན་གྱི་གྲུབ་འབྲས་དོན་སྙིང་ལྡན་པའི་ངང་འཕེལ་རྒྱས་བྱུང་ཡོད། རྒྱལ་ཁབ་དེ་དག་གི་ཡུལ་མི་ཚོས་འོས་འཕེན་གྱི་རང་དབང་ལོངས་སུ་སྤྱོད་སྐབས། ཡུལ་དེར་ཡོད་པའི་འཇིགས་སྐུལ་རིང་ལུགས་ཚོགས་པ་ཏ་ལི་བྷན་དང། ཨལ་ཁི་ཌ་སོགས་ཀྱིས་འོས་བླུག་མཁན་ཚོ་གསོད་ཀྱི་ཡོད་པ་དང་། དེ་བཞིན་འོས་བླུག་མཁན་ཡུལ་མི་ཉམ་ཆུང་ཚོའི་འཐེབ་མོ་དང་མཛུབ་མོ་གཏུབ་པའི་གྱོད་གཞི་མང་དུ་འགྲོ་བཞིན་ཡོད་པ་རེད། ཡིན་ནའང་གནས་སྟངས་དེ་འདྲའི་འོག་ནས་ཨ་ཧྥི་གྷ་ནི་སི་ཐན་དང་ཨི་རག་གི་ཡུལ་མི་ཚོས་སྲོག་ལ་ཐུག་ཀྱང་གདོང་ལེན་བྱས་ཏེ། ཨ་ཧྥི་གྷ་ནི་སི་ཐན་དུ་བརྒྱ་ཆའི་(༨༣༌༦༦)དང་ཨི་རག་ཏུ་བརྒྱ་ཆའི་(༥༨.༣༢)འོས་འཕེན་གྱི་གྲངས་འབོར་ཕོན་ཆེན་བྱུང་ཡོད་པ་རེད།
ཨི་རན་དུ་ཡུལ་མི་ཚོས་ཡུལ་དེའི་ཆབ་སྲིད་ཚོགས་པས་འོས་ཤོག་ལ་བསྒྱུར་བཅོས་བཏང་བར་ངོ་རྒོལ་བྱས་ཡོད་པས། ངོ་རྒོལ་བ་ཚོར་མེ་མདའ་བརྒྱབ་ནས་དྲག་གནོན་བྱས་ཡོད་ཀྱང་། འོས་འཕེན་མཁན་གྱི་གྲངས་འབོར་(༥༩༌༧) བྱུང་ཡོད་པས་བཙན་བྱོལ་བོད་མིིའི་གནས་བབས་ལས་མཐོ་བ་ཡོང་ཡོད། དེང་སང་གི་དུས་ལའང་། ཨི་རན་གྱི་ཡུལ་མི་ཚོས་སྲོག་ལ་ཐུག་ཀྱང་འཛེམས་ཟོན་མེད་པ། ཁྲོམ་གཞུང་ཁག་ཏུ་ལོ་སྔོན་མའི་སྲིད་འཛིན་འོས་ཤོག་ཁྲིམས་མཐུན་ཅན་དུ་བསྒྱུར་དགོས་པའི་ངོ་རྒོལ་བྱེད་ཀྱི་ཡོད་པ་རེད། འོས་འཕེན་སྐབས་སྲོག་ལ་འཇིགས་སྐུལ་ཡོད་པའི་གནས་སྟངས་དེ་འདྲ་གཅིག་མིག་དཔེ་ལ་འཛིན་ན། ང་ཚོ་བོད་མི་ཚོར་སྲོག་ཤོར་བའི་ཉེན་ཁ་མེད་པ་དང་། ཡང་ན་གནོད་འཚེ་བྱེད་མཁན་གཉིས་ཀ་མེད་པས་ལས་སླ་པོའི་ཐོག་ནས་འོས་འཕེན་གྱི་ལས་དོན་དེ་བསྒྲུབ་དགོས་པ་ཞིག་ཡིན་ཡང་། ང་ཚོའི་ལས་དོན་ད་དུང་འཐུས་ཤོར་འགྲོ་ཡི་ཡོད། མང་གཙོའི་རྒྱལ་ཁབ་གཞན་གྱི་འོས་བསྡུ་དང་ང་ཚོའི་དབར་གྱི་ཁྱད་པར་ནི། ང་ཚོའི་འོས་བསྡུ་དེ་ཚད་གཞི་སྐྱོ་ཤོས་དང་དམའ་ཤོས་ཆགས་ཀྱི་ཡོད་པ་རེད། པ་ལི་སི་ཐན་ནི་རྒྱལ་ཁབ་དང་ང་ཚོའི་དབར་གྱི་འོས་འཕེན་གྱི་གནས་བབས་བསྡུར་བ་ཡིན་ན། པ་ལི་སི་ཐན་ནི་འོས་འཕེན་གྱི་གྲངས་འབོར་(༧༧༌༧%)ང་ཚོ་ལས་མཐོ་བ་ཡོད།
བོད་མིའི་གྲངས་འབོར་ཧ་ལམ་༡༥༠༠༠༠ ཙམ་ཡོད་པ་དང་། འོས་འཕེན་གྱི་ཁྱད་ཆོས་ཚང་མཁན་(རང་ལོ་༡༨ བརྒལ་བ)ཚོད་རྩིས་བྱེད་སྐབས་༡༢༠༠༠༠ ཙམ་གྱི་གྲངས་འབོར་ཡོད་རེད། སྔོན་མའི་བཀའ་བློན་ཁྲི་པ་འོས་བསྡུའི་སྐབས་འོས་འཕེན་གྱི་དེབ་སྐྱེལ་བྱེད་མཁན་གྲངས་༧༢༠༠༠ ཙམ་བྱུང་ཡོད་པ་དང་། དེའི་ནང་ནས་༣༢༢༠༥ ཙམ་གྱིས་འོས་བླུགས་ཡོད་པས་(༤༤%).ཆགས་ཡོད་པ་རེད། ཟམ་གདོང་རིན་པོ་ཆེར་འོས་ཤོག་༢༩༢༡༦ ཐོབ་ཡོད་པ་དང། དེ་བརྒྱ་ཆ་༩༠༌༧༢ རེད། འོས་ཤོག་གི་བརྒྱ་ཆའི་ཚིག་འགྲོས་ནས་ཡིད་སེམས་སྐྱོ་དགོས་པ་ཤིག་ཤེས་རྟོགས་་ཡོང་གི་ཡོད་པ་སྟེ། དེ་ཡང་འོས་འཕེན་གྱི་ཁྱད་ཆོས་ཚང་མཁན་གྱི་སྤྱི་འབོར་༧༢,༠༠༠ ཡོད་པའི་ནང་ནས། བརྒྱ་ཆའི་༦༠%ཙམ་གྱིས་མ་གཏོགས་འོས་འཕེན་གྱི་དེབ་སྐྱེལ་བྱས་མེད་པ་དང། ཚོད་རྩིས་བྱེད་སྐབས་རྒྱུན་ལྡན་ནས་བརྒྱ་ཆའི་༣༠% ཙམ་གྱིས་འོས་ཤོག་བླུགས་ཡོད་པ་དེ་ཧ་ཅང་གི་སྐྱོ་པོ་རེད། ནམ་ཞིག་དེབ་སྐྱེལ་བྱས་པའི་འོས་འཕེན་པ་གྲངས་ཀ་བརྒྱབ་ན། བོད་མི་འོས་འཕེན་ནང་འཛུལ་ཞུགས་བྱེད་མཁན་དེབ་སྐྱེལ་གྱི་བརྒྱ་ཆའི་༤༤% ཙམ་ལས་་ལོང་གི་མེད། འདིས་ཉེན་བརྡ་ཞིག་གཏོང་གི་ཡོད་པ་ནི། ད་དུང་བོད་མི་བརྒྱ་ཆའི་༤༠% སྐོར་ཞིག་གིས་འོས་འཕེན་གྱི་དེབ་སྐྱེལ་བྱེད་ཀྱི་མེད་པ་དང་། སྙིང་རླུང་ལངས་དགོས་པ་ཞིག་ལ་བརྒྱ་ཆའི་ ༧༠.༥% འོས་ཤོག་བླུགས་ཡོད་མ་རེད། ཡོངས་ཁྱབ་ཀྱི་གྲངས་འབོར་འདིས་དངོས་གནས་འཇིགས་སྐུལ་བྱེད་ཀྱི་ཡོད་པ་དང་། དེ་བཞིན་ང་ཚོས་དམིགས་བསལ་གྱི་དུས་ཚོད་མང་དུ་བཏང་ནས། ང་ཚོའི་འོས་འཕེན་གྱི་བརྒྱུད་རིམ་ལ་བཟོ་དབྱིབས་ཤིག་ཐོབ་དགོས་པ་སྟོན་གྱི་ཡོད། འོས་ཤོག་གི་གྲངས་འབོར་གྱི་ཚད་གཞི་དམའ་པོ་ཡིན་སྐོར་བརྗོད་སྐབས། དམངས་ཁྲོད་དུ་ཟམ་གདོང་རིན་པོ་ཆེ་ལས་ལྷག་པ་མི་མང་གིས་དགའ་ཤོས་བྱེད་སའི་མི་སྣ་མེད་སྐོར་གྱི་རྩོད་པ་རྒྱག་ངེས་པ་རེད། གང་ལྟར་ཡང་ཨོ་སི་ཁྲུ་ལི་ཡ་བརྒྱ་ཆའི་(༩༥.༡༧%) ལག་ཛེམ་བྷག་བཅས་སུ་གོ་གནས་འཛིན་པའི་དུས་ཡུན་ཡིན་རུང་མིན་རུང་། འོས་བླུགས་མཁན་ཚོས་རང་ཉིད་ཀྱི་ཡུལ་མིའི་ཐོབ་ཐང་ལག་བསྟར་བྱས་ནས་འོས་འཕེན་གྱི་གྲངས་འབོར་ཧ་ཅང་ཕོན་ཆེན་བྱུང་ཡོད།
ང་ཚོའི་སེམས་ལ་ངལ་གསོ་ཐེབས་པའི་གནད་དོན་གཞན་ཞིག་ནི་སྐྱབས་བཅོལ་གཞུང་ཤིན་ཅང་དང་། སོག་པོ། འབར་མ་བཅས་བོད་བཙན་བྱོལ་གཞུང་དང་བསྡུར་ན། བོད་གཞུང་ལ་འཛིན་སྐྱོང་དང་མང་གཙོའི་བརྒྱུད་རིམ་བཅས་ཆ་ཚང་ཡོད་པས། སྐྱབས་བཅོལ་གཞུང་དེ་དག་ལས་ཆེས་ཤུགས་རྐྱེན་ཆེ་བ་དང་ནུས་སྟོབས་རྒྱས་ཡོད་པ་རེད། གནད་དོན་དེ་འདྲ་ཡིན་རུང་ང་ཚོའི་དམིགས་ཡུལ་སྐྱོ་ཤོས་ནས་ཡག་ཤོས་ཆགས་རྒྱུ་དང། སྐྱབས་བཅོལ་དུ་མུ་མཐུད་ནས་གནས་རྒྱུ་དེ་མ་རེད། ཡག་གྲས་ནས་ཡག་ཤོས་ཆགས་སྲིད་པ་དེ་འཛམ་གླིང་ལ་ངོམ་དགོས་པ་དང། དེའི་ནང་ནས་རྒྱ་ནག་དང་བོད་ནང་གི་བོད་རིགས་སྤུན་ཟླ་ཚོར་བསྟན་དགོས་པ་རེད། དེས་ན་ང་ཚོས་མང་གཙོའི་གཞུང་ཡན་ལག་ཆ་ཚང་བ་ཞིག་གིས། རྒྱ་ནག་དམར་ཕྱོགས་དབང་ཆ་གཅིག་བསྡུས་ཚོགས་པ་དང་། རྒྱ་ནག་ཧན་མི་རིགས་ཀྱི་བོད་ནང་མི་སེར་སྤེལ་ཡུལ་ལམ་ལུགས་ཀྱི་དབང་ཆ་འཛུགས་སྐྲུན་གྱིས་སྟངས་འཛིན་ཤུགས་ཆེར་བྱེད་བཞིན་པ་རྣམས་བརྗེ་བསྒྱུར་བྱེད་དགོས།
ངས་ནན་ཏན་ངང་བརྗོད་ཐུབ་པ་ཞིག་ནི། བཀའ་ཤག་དང། ཁྲིམས་བཟོ་ལྷན་ཚོགས། འོས་བསྡུ་ལྷན་ཁང་། གཞུང་འབྲེལ་མ་ཡིན་པའི་ཚོགས་པ་བཅས་ཀྱིས། ང་ཚོའི་སྤྱི་ཚོགས་ཀྱི་མང་གཙོའི་བརྒྱུད་རིམ་འདི་འཕོ་འགྱུར་གཏོང་དགོས་པའི་ཉེས་སྐྱོན་མང་པོ་བགྲང་གི་ཡོད་པ་རེད། ཡིན་ནའང་། ཉེས་སྐྱོན་བགྲང་བའི་རྩེད་མོ་དེའི་ཚབ་ཏུ་གནད་དོན་ཤེས་རྟོགས་བྱས་ན་དགེ་མཚན་ཆེ་བ་ཡོད། འོས་འཕེན་གྱི་ཚད་གཞི་དམའ་པོ་ཡིན་པ་དེ་གཞུང་དང་མི་མང་གཉིས་ཀའི་ཕྱོགས་ནས་ཡོང་གི་ཡོད་ཅིང་། ང་ཚོའི་མང་གཙོ་ནུས་ཤུགས་ལྡན་པ་ཞིག་ཡོང་རྒྱུར་ཛ་དྲག་དང་ཧུར་བསྐྱེད་བྱེད་རྒྱུའི་ཚབ་ཏུ། ད་ལྟའི་སྐབས་གང་ཡོད་པ་ཚད་གཞི་གཅིག་ཁོ་ནའི་སྟེང་དུ་བསྐྱོད་པ་དང་། འདོད་པ་མ་ཚིམས་པ་འདི་ཉིད་སྟངས་འཛིན་ཁོ་ན་བྱེད་ཀྱི་ཡོད་པས། རང་བཞིན་གྱིས་དྲི་བ་ཞིག་ཡོང་གི་ཡོད། དེ་ཡང་ད་ལྟ་ཡོད་བཞིན་པའི་འོས་འཕེན་གྱི་སྒྲོམ་གཞི་འདི་ཡར་རྒྱས་ག་རེ་གཏོང་ཐུབ་ཀྱི་ཡོད་མེད་དང་། ལོ་རྒྱུས་ཅུང་ཟད་ཡོད་པའི་བོད་པའི་འོས་བསྡུའི་སྒྲིག་གཞི་འདིས། དུས་ཡུན་རིང་པོའི་རིང་ལ་ཤུགས་རྐྱེན་ཐེབས་ནས་འགྲོ་རྒྱུ་ཡིན་པ་དང་། ཡར་རྒྱས་གཏོང་དགོས་པའི་ལས་གཞི་མང་པོ་ཞིག་ལམ་ལུགས་འདི་ཁོ་ན་བརྒྱུད་ནས་འགྲོ་རྒྱུ་དེ་རེད། ཡིན་ནའང་། གནའ་བོའི་འོས་བསྡུའི་བརྒྱུད་རིམ་ཅན་གྱི་ང་ཚོའི་ལམ་ལུགས་འདི། དུས་རབས་༢༡ པ་འདི་དང་འཚམས་པའི་བསྒྱུར་བཅོས་གཏོང་གལ་ཆེན་པོ་ཡིན།
འོས་འཕེན་སྒྲིག་གཞིའི་ལོ་རྒྱུས།
ཕྱི་ལོ་༡༩༥༩ ཟླ་བ་༡༡ པའི་ཚེས་༡༧ ཉིན་༧གོང་ས་མཆོག་གིས་མཇལ་ཁ་ཐེངས་བཞི་པ་གནང་པའི་སྐབས། ཁོང་གིས་བོད་མི་རྣམས་ཀྱིས་ཆིག་སྒྲིལ་དང་དེང་རབས་གཞུང་འཛིན་ལམ་ལུགས་ལག་ལེན་དུ་བསྟར་དགོས་པའི་གསུང་བཤད་ནན་པོ་གནང་ཡོད་པ་དང་། དེའི་རྗེས་སུ་འབྲངས་ནས་ཕྱི་ལོ་༡༩༦༠ ཟླ་བ་༢ ཚེས ༣ ཉིན་རྡོར་གདན་དུ་མནའ་གན་མཐུ་མོ་ཆེ་འཇོག་པ་དང་། དེ་ནས་ཡུན་རིང་མ་སོང་བར་འདུམ་སྒྲིག་ལམ་ལུགས་གཞིར་བཞག་ནས་ས་ཁུལ་ཁག་གི་འཐུས་མི་འདེམས་དགོས་པའི་སྐོར། ཆོས་བརྒྱུད་ཁག་གི་དབུ་ཁྲིད་ཚོར་བཀའ་སློབ་ནན་པོ་བསྩལ་ཡོད་པ་རེད། གང་ལྟར་ཡང། སྐབས་དེར་འོས་བསྡུའི་སྒྲིག་གཞི་གཏན་འབེབས་བྱས་མེད་པས། འོས་བསྡུའི་ལམ་ལུགས་བརྒྱུད་མི་དགོས་པའི་ཐོག་ནས། མདོ་ཁམས་ཆུ་བཞི་སྒང་དྲུག་གིས་ཁམས་དང་ཨ་མདོའི་ས་ཁུལ་གྱི་འཐུས་མི་མི་གྲངས་༦ བདམས་བཀོད་བྱས་ཡོད་པ་དེ་སྤྱི་འཐུས་ཐོག་མ་དེ་ཆགས་ཡོད་ཅིང་། དེ་དང་ཕྱོགས་མཚུངས་བོད་ཀྱི་ནང་པའི་ཆོས་བརྒྱུད་ཆེན་པོ་བཞིའི་འཐུས་མི་བདམས་བཀོད་གནང་ཡོད་པ་རེད། ཡིན་ནའང་། བོན་གྱི་འཐུས་མི་ཕྱི་ལོ་<༡༩༧༥-༧༨ >སྤྱི་འཐུས་ཐེངས་༦ པའི་སྐབས་བར་འདེམས་བསྐོས་གནང་མེད་པ་རེད། བུད་མེད་འཐུས་མི་སྤྱི་འཐུས་སྐབས་གཉིས་པའི་སྐབས་<༡༩༦༣-༦༦>སུ་༧གོང་ས་མཆོག་གི་བཀའ་རྒྱ་བཞིན་དུ་འདེམས་བསྐོས་གནང་ཡོད་ཀྱང་། ཕྱི་ལོ་༡༩༧༤- ༡༩༩༠ བར་བུད་མེད་འཐུས་མི་རྣམས་དགོས་ངེས་བཞིན་ཐོན་ཐུབ་མེད་པ་དེ། གཅིག་བྱས་ན་སྐྱེས་པའི་དབང་འཛིན་ལམ་ལུགས་ཀྱི་བསམ་བློའི་རྒྱུ་ཕྱོགས་ཀྱིས། བུད་མེད་དེ་དག་ལ་ཤུགས་རྐྱེན་ཐེབས་པ་ཡིན་རྒྱུ་རེད། དབུས་གཙང་ཆོལ་ཁའི་འཐུས་མི་ཁོ་ན་ཕྱིའི་རྣམ་པའི་ཐོག་ནས་སྐབས་དང་པོའི་སྤྱི་འཐུས་འོས་བསྡུའི་རྣམ་པའི་ཐོག་ནས་ཡོང་ཡོད། གང་ཡིན་ཞེ་ན། དབུས་གཙང་ཆོལ་ཁར་དབུས་ཀྱི་ཚོགས་པ་མེད་པས། སི་ཀིམ་དང་དེ་མིན་ས་གནས་གཞན་ཁག་གི་མི་རྣམས་འཛོམས་ཏེ། ཕན་ཚུན་འབྲེལ་ལམ་བརྒྱུད་ནས་དམིགས་འཛུགས་བྱས་པ་དང། ཕྱག་བརྐྱངས་ཀྱི་ཐོག་ནས་འོས་མི་རྣམས་གྲངས་འདྲེན་བྱས་ཏེ་དྷ་སར་བཏང་ཡོད་པ་རེད།
འོས་བསྡུའི་སྒྲིག་གཞི་ཟིན་བྲིས་ཐོག་མ་དེ་ཕྱི་ལོ་༡༩༧༡-༧༥ སྐབས་སུ་གཞི་ནས་ཡོང་ཡོད་པ་རེད། སྐབས་དེར་འོས་བསྡུ་ལས་ཁང་གི་ཚོགས་མི་(བཀའ་ཟུར་བློ་བཟང་དར་རྒྱས་) དང། དེའི་སྐབས་ཅན་དྷི་གྷར་གཙུག་ལག་སློབ་གྲྭ་ཆེན་པོའི་ནང་། ཆབ་སྲིད་ཚན་རིག་ལ་སློབ་སྦྱོང་བྱེད་མཁན་སློབ་མ་འགའ་ཡོད་པ་རྣམས་རྒྱ་གར་གྱི་འོས་བསྡུའི་ཁྲིམས་ལུགས་བོད་ཡིག་ཐོག་བསྒྱུར་མཁན་གྱི་མི་སྣའི་ཁོངས་སུ་གླས་ཡོད་པ་རེད། འོས་བསྡུའི་ཁྲིམས་ལུགས་དེ་བོད་ཀྱི་ལས་དོན་མང་པོ་དང་འབྲེལ་བ་ཆགས་ཡོད་པས་ཡིག་བསྒྱུར་ཚོགས་པས་ཕབ་བསྒྱུར་ཞུས་པ་དང། འོས་བསྡུའི་སྒྲིག་གཞི་དེར་བསྐྱར་ཞིབ་ཡུན་རིང་བྱས་ཏེ་ཕྱི་ལོ་༡༩༩༡ ཟླ་༢ ཚེས་༢༤ ཉིན་དངོས་སུ་ལག་བསྟར་བྱས་ཡོད་ཅིང་། འོས་བསྡུ་དེ་རྒྱ་གར་དང་། བལ་ཡུལ། ཨ་རི། ཡུ་རོབ་བཅས་སུ་དབུས་ས་གནས་འོས་བསྡུ་ཁང་༧༠ ཙམ་རྒྱ་བསྐྱེད་བཏང་ཡོད་པ་རེད། (བོད་མི་ཡོད་སའི་ས་གནས་ཁུག་ཀྱོག་དང་ཡང་ན་བོད་མི་འགའ་ཤས་ལས་མེད་སའི་ས་ཆ། དཔེར་ན། ཀུའུ་ཊིང་དང་། དྷི་མར་པུར། ཀིན་ནུར། བྷོ་པལ། ལིམྦྷི་ནི། ཀ་ལི་ཀ་ཏ་བཅས་སུ་འགྲིམས་འགྲུལ་སོགས་དཀའ་ངལ་གྱི་རྐྱེན་བྱས་ཏེ་འོས་འཕེན་བྱེད་ཐུབ་ཡོད་མ་རེད།)
ད་ལྟའི་འོས་བསྡུའི་སྒྲིག་འཛུགས་ཀྱི་མ་འོངས་འཆར་རྩིས་ལ་མཁས་པའི་ཚིག་འགྲོས་དང་། འོས་འཕེན་གྱི་བརྒྱུད་རིམ་གཉིས། ཕྱི་ལོ་༡༩༦༠ དང་བསྡུར་ན་ཏན་ཏན་ཡར་རྒྱས་ཕྱིན་ཡོད་ཀྱང་། མཐའ་མཇུག་འོས་འཕེན་གྱི་གྲུབ་འབྲས་མུ་མཐུད་ནས་ཚད་གཞི་དམའ་པོ་ཡོང་གི་ཡོད་པ་རེད། འོས་བསྡུའི་སྒྲིག་གཞི་ད་ལྟའི་བར་ལོ་བཅུ་ཕྲག་གཉིས་སོང་བའི་རྙིང་པ་རེད། ད་ལྟ་ང་ཚོ་བཙན་བྱོལ་བའི་གནས་བབས་ཀྱི་དགོས་མཁོ་སྐོང་པའི་འོས་བསྡུའི་བརྒྱུད་རིམ་ངོ་སྤྲོད་བྱེད་པའི་དུས་ལ་སླེབས་ཡོད་པ་རེད། ང་ཚོར་དགོས་པའི་ཐབས་ལམ་ནུས་ཤུགས་ཅན་ཞིག་གཞིར་འཇོག་དགོས་པ་ནི། དེ་ཡང་མཁས་དབང་ཀཱ་སི་སན་སི་ཊིན་(Cass Sunstein) མཆོག་གིས། དཔལ་འབྱོར་ཚན་རིག་ནང་དུ་སྤྱི་ཚོགས་ཀྱི་གནས་བབས་དང་བསྟུན་ནས་སྲིད་ཇུས་དང་ཁྲིམས་ལུགས་གཏན་འབེབས་བྱས་ཏེ། མཇུག་སྐྱོང་དགོས་པ་གལ་འགངས་ཆེན་པོ་ཡིན་སྐོར་གསུངས་པ་དེས། ཁྲིམས་ཀྱི་སྒྲོམ་གཞི་དང་ཆབ་སྲིད་ཀྱི་ལམ་ཕྱོགས་ཞིབ་འཇུག་གིས། རྒྱུན་ལྡན་མི་མང་གི་གཤིས་སྤྱོད་སྟོན་གྱི་ཡོད་པ་རེད།
ཁྲིམས་དང་ཚུལ་མཐུན་གྱི་དཔལ་འབྱོར་ལམ་ལུགས་མ་དཔེ་འོས་འཚམས་ཤིག་བསྐྲུན་རྒྱུ་དང་། དེ་བཞིན་ངའི་བསམ་ཚུལ་ནི་གཤམ་འཁོད་ཀྱི་བྱེད་ཐབས་འདི་ལག་ལེན་བསྟར་རྒྱུར་བསམ་གཞིག་བྱེད་དགོས་པ་སྟེ།
ཀ༽ སྦྲགས་ལམ་བརྒྱུད་ནས་འོས་འཕེན་པ།
ཁ༽ འོས་འཕེན་གྱི་དེབ་སྐྱེལ་མེད་པ་བཟོ་རྒྱུ། གལ་སྲིད་མ་བཟོས་ན། འོས་འཕེན་དེབ་སྐྱེལ་རྣམས་འོས་བླུགས་པའི་ཉིན་དེ་རང་དང་ཡང་ན་དེའི་སྔོན་དུ་བྱེད་ཆོག་པ།
ག༽ དང་བླང་དཔྱ་དངུལ་ལག་དེབ་འབུལ་འབབ་གཅོག་ཆ་བྱེད་རྒྱུ་བཅས་རེད།
ལག་བསྟར་འདི་དག་བསྡུར་གཤིབ་ཀྱིས་བོད་པའི་འོས་འཕེན་གྱི་གནས་བབས་ལ་འཚམས་པའི་ལམ་ཕྱོགས་ཀྱི་ཚད་གཞི་གསར་པ་ཞིག་འཐོབ་ངེས་དང་། ང་ཚོས་ལམ་ལུགས་འདི་དག་ནམ་ཞིག་རྒྱུན་སྐྱོང་གིས། མང་གཙོ་སྲ་བརྟན་ཅན་གྱི་རྒྱལ་ཁབ་ཁག་གི་འོས་འཕེན་གྱི་གྲུབ་འབྲས་བཞིན་བྱུང་ན། དེ་ནི་ང་ཚོའི་མ་འོངས་ཡུན་རིང་གི་དམིགས་ཡུལ་ཞིག་ཏུ་འགྱུར་རྒྱུ་རེད།
བསྒྱུར་བཅོས་ཀྱི་བསམ་འཆར།
སྦྲགས་བརྒྱུད་འོས་འཕེན། སྦྲགས་བརྒྱུད་འོས་འཕེན་འདི་ནི་ཨ་རིའི་ནང་གི་མངའ་སྡེ་ཁ་ཤས་དང་། རྒྱལ་ཁབ་ཁག་གི་ནང་ནས་ཀྱང་འཇར་མན་དང་དབྱིན་ཇི། སུད་སི་བཅས་སུ་ལག་བསྟར་བྱེད་ཀྱི་ཡོད་པ་རེད། འདིའི་ནང་དོན་སྟབས་བདེ་ཞིག་ནི་བོད་མི་ཚོས་རང་ཉིད་ཀྱི་འོས་ཤོག་སྔོན་ཚུད་ནས་ཡིན་ནའང་ཆོག ཡང་ན་འོས་བསྡུ་བྱེད་པའི་ཉིན་དེ་རང་ལ། སྦྲགས་ཟམ་གྱི་ལམ་ལུགས་བརྒྱུད་ནས་འོས་ཤོག་བླུགས་ཆོག དལ་ལྷོད་རང་བཞིན་གྱི་རྒྱ་གར་གྱི་སྦྲགས་ཟམ་ལམ་ལུགས་དེ་བརྒྱུད་དགོས་པའི་སྐབས། དོན་དངོས་ཐོག་བོད་མི་རྣམས་ཧ་ལམ་ལུང་པ་༣༠ ཙམ་ནང་ཁ་འཐོར་ནས་གནས་སྡོད་བྱེད་ཀྱི་ཡོད་པས། ཟླ་གྲངས་གཉིས་ཙམ་གྱི་རིང་ལ་སྦྲགས་ཟམ་འོས་འཕེན་བྱེད་དགོས་ངེས་དང་། དུས་ཚོད་འདིས་དམངས་ཁྲོད་དུ་གྲོས་བསྡུར་བྱེད་རྒྱུར་འུར་སྒྲའི་ཕན་རླབས་ཆེན་པོ་ཞིག་བསྐྲུན་ངེས་ཡིན་ལ། འགུལ་བསྐྱོད་དེ་དག་གིས་བོད་མི་ཚོས་གནད་དོན་དང་འོས་མི་ལ་གོ་བསྡུར་བྱེད་ཐུབ་པ། དེ་ནས་འོས་འཕེན་གྱི་གྲངས་འབོར་ཕོན་ཆེན་བཟོ་ཐུབ།
མི་མང་གིས་འོས་འཕེན་གྱི་ཤོག་བུ་རྣམས་དྲ་ལམ་དངོས་བརྒྱུད་ནས་ལེན་ཐུབ་དགོས་ངེས་དང་། ད་དུང་མི་མང་ལ་བོད་གཞུང་གི་ལས་ཁུངས་དང་། ས་གནས་འོས་བསྡུ་ལས་ཁང་ངམ་འོས་བསྡུ་ཚོགས་པ་བརྒྱུད་དེ། འོས་འཕེན་གྱི་ཤོག་བུ་སྤྲད་ཆོག ཡིག་སྐོགས་དང་པོའི་ནང་འོས་འཕེན་ལ་འོས་ཤོག་གི་དམ་ཕྲུག་དང་མཉམ་དུ་རང་ཉིད་ཀྱི་འདེམས་པའི་འོས་མི་དགོས། ཡིག་སྐོགས་གཉིས་པའི་ནང་འོས་འཕེན་ཚོའི་དཔྱ་ཁྲལ་འབུལ་ཟིན་པའི་དང་བླང་དཔྱ་དངུལ་ལག་དེབ་ཀྱི་ངོ་བཤུས། རབ་བྱུང་ན་ས་གནས་དང་བླང་དཔྱ་དངུལ་ལག་དེབ་ཚོགས་ཆུང་གི་དམ་ཕྲུག་དགོས། ལམ་ཕྱོགས་འདི་བརྒྱུད་ནས་ས་གནས་འོས་བསྡུ་ལྷན་ཁང་གི་མིའམ། ཡང་ན་བོད་གཞུང་གི་ལས་ཁུངས་ཀྱིས་ཡིག་སྐོགས་དང་པོ་དེ་ཁ་ཕྱེས་སྐབས། ཕོ་མོ་སུ་ཡིན་རུང་དེབ་སྐྱེལ་དང་། དཔྱ་ཁྲལ་ཕུལ་ཡོད་མེད་ཞིབ་དཔྱོད་ཀྱིས་གལ་སྲིད་གཉིས་ཀ་ཚུལ་མཐུན་ཡིན་ན། ཁ་མ་ཕྱེས་བའི་ཡིག་སྐོགས་གཉིས་པ་དེ་འོས་སྒམ་ནང་བླུགས་ཏེ་གཞན་ལ་འོས་གཤེར་ཆེད་དུ་གཏོང་དགོས། བརྒྱུད་ལམ་འདི་ནས་འོས་འཕེན་པ་རེ་རེ་ནས་དེབ་སྐྱེལ་དང་། དང་བླང་དཔྱ་དངུལ་ལག་དེབ་ཀྱི་དཔྱ་ཁྲལ་ཞིབ་དཔྱོད་ཀྱི་ཐོག་ནས། འོས་ཤོག་གི་གསང་བ་དམ་པོར་གཅེས་སྐྱོང་བྱེད་ཐུབ། བསྒྱུར་བཅོས་ལས་སླ་པོ་ཞིག་གིས་གྲུབ་འབྲས་ནུས་སྟོབས་དང་ལྡན་པ་ཞིག་ཡོང་ཐུབ། (ཨ་རིའི་མངའ་སྡེ་ཨོར་གྷོན་ནང་སྦྲགས་བརྒྱུད་འོས་འཕེན་གཏན་འབེབས་བྱས་ཚར་བའི་རྗེས་སུ། འོས་འཕེན་གྱི་གྲངས་འབོར་༨༤-༨༧%མང་དུ་སོང་ཡོད།)
ངོ་ཚབ་འོས་ཤོག
ཧོ་ལན་ཌི་རྒྱལ་ཁབ་དང་དེ་མིན་གྱི་རྒྱལ་ཁབ་གཞན་དག་ནང་། མི་གཅིག་གིས་མི་གཞན་ཞིག་གི་ངོ་ཚབ་བྱས་ཏེ་འོས་འཕེན་ཆོག་པའི་ལམ་ལུགས་ལག་བསྟར་བྱས་ཡོད་ལ། མི་ཚང་མས་ཆུ་ཚོད་༣ དང་༤ རིང་ལ་བང་བསྒྲིགས་ནས་བསྡད་མི་དགོས་པར། ཁྱིམ་ཚང་ཁག་གིས་ནང་མིའི་སྐུ་ཚབ་མཚོན་པའི་མི་གཅིག་འོས་འཕེན་ལ་བཏང་བ་དང་། ཡང་ན་ལས་ཁུངས་ཁག་ནས་ལས་རོགས་གཅིག་དེ་ལྟར་འཐུས་མི་གཅིག་བཏང་ཆོག་པ་རེད། འོས་འཕེན་གྱི་ཤོག་བུ་འོས་མ་བླུགས་པའི་ཉིན་ཁ་ཤས་ཀྱི་སྔོན་དུ་འབྱོར་དགོས་ལ། དེ་བཞིན་ནང་མི་ཚང་མས་རང་རང་གིས་འོས་མི་ལ་རྟགས་བརྒྱབ་རྗེས། ནང་མིའི་འཐུས་མིས་ལས་སླ་པོའི་ཐོག་ནས་འོས་ཤོག་དེ་འོས་སྒམ་གྱི་ནང་དུ་བླུག་ན་འགྲིག་གི་ཡོད་པས། འདིས་མི་ཚང་མའི་དུས་ཚོད་འཕྲོག་བརླག་མི་འགྲོ་བར་དམ་འཛིན་བྱེད་ཐུབ།
མྱུར་ཕྲིན་འོས་བསྡུ།
འདི་ནི་མང་ཆེ་བ་སྒེར་གྱི་བཟོ་གྲྭ་ཁག་གིས་ལག་བསྟར་བྱེད་ཀྱི་ཡོད་པ་དང། ཡིན་ནའང་ཨི་སི་ཊོ་ནི་ཡ་ལུང་པའི་ནང་མི་མང་གིས་མྱུར་ཕྲིན་བརྒྱུད་ནས་འོས་འཕེན་གྱི་ཡོད་ཅིང། འོས་འཕེན་གྱི་ལམ་ལུགས་འདི་ནི་ད་ལྟའི་སྐབས་ང་ཚོ་ལས་ཆེས་མྱུར་སྐྱོད་ཆེ་བ་ཡོད་ཀྱང་། དོན་དངོས་ཐོག་བོད་མི་རྣམས་ལུང་པ་སུམ་ཅུ་ཙམ་ནང་ཁ་འཐོར་ནས་གནས་ཡོད་པས། མ་འོངས་པར་དེ་ལྟར་ཡོང་ཐུབ་མིན་ལ་བསམ་གཞིག་ངེས་པར་དུ་བྱེད་དགོས་པ་རེད།
འོས་འཕེན་གྱི་དེབ་སྐྱེལ་མེད་པ་བཟོ་རྒྱུ།
འདི་ཆ་ཚང་བ་འོས་འཚམས་ཡིན་མིན་གང་ལྟར་ཡང་། ལག་ལེན་གྱི་ཐོག་ནས་ཚང་མ་མཉམ་འཛོམས་བྱེད་དགོས་པའི་དེབ་སྐྱེལ་དེ་བརྗེ་བསྒྱུར་བྱེད་དགོས་རྒྱུ་དང་། དང་བླངས་དཔྱ་དངུལ་ལག་དེབ་ལ་ལྟ་ཞིབ་བྱེད་པ་དེས་དེབ་སྐྱེལ་གྱི་དོན་གོ་ཆོད་དགོས། དང་བླངས་དཔྱ་ཁྲལ་ཕུལ་ཡོད་མེད་དེའི་ཐོག་ནས། གང་ཟག་གང་ཞིག་གིས་འོས་འཕེན་ཐུབ་མིན་གྱི་དབྱེ་མཚམས་བྱེད་དགོས་པ་ལས། མི་གཅིག་གིས་དེབ་སྐྱེལ་བྱས་པ་ཙམ་གྱིས་འོས་འཕེན་བྱེད་མི་ཆོག བསྐྱར་བརྗོད་བྱེད་རྒྱུ་ཞིག་ལ། སྔོན་མ་འོས་འཕེན་མཁན་༧༢༠༠༠ ཙམ་མམ། འོས་འཕེན་པའི་ཁྱད་ཆོས་ཚང་བ་བརྒྱ་ཆའི་༦༠ སྐོར་ཞིག་ཡོད་པ་རེད། ཕྱོགས་གཞན་ཞིག་ནས་ད་དུང་བརྒྱ་ཆའི་༤༠ ལས་མང་བས་དེབ་སྐྱེལ་བྱེད་དགོས་ཀྱི་ཡོད་པ་དེ་གྲངས་འབོར་ཕོན་ཆེན་ལ་ཉེན་ཟོན་བྱེད་དགོས་པ་སྟོན་གྱི་ཡོད། དཀའ་ངལ་མང་པོ་ཞིག་སྡེབ་གསོག་བྱས་པ་དེ་ནི། ལོ་ལྔ་རེའི་ནང་གི་འོས་བསྡུ་ཆེན་མོའི་ནང་། རང་ལོ་༡༨ དང་༢༣ ཅན་འོས་འཕེན་པ་གྲངས་ཚད་(༦༠༠༠-༡༠,༠༠༠)དབར་དེབ་སྐྱེལ་གྱི་བྱེད་དགོས་ཀྱི་ཡོད་པ་དང། འོས་བསྡུའི་ལས་འགུལ་རྒྱུ་ཕྱོགས་ཚང་མ་གྲོས་མཐུན་ཡོང་ན་མ་གཏོགས། བར་སྟོང་འདི་སྦྱར་མཐུད་བྱེད་ཐུབ་ཀྱི་མ་རེད་ལ། གང་ལྟར་ཡང་ལས་འགུལ་དེ་ཚོ་ཧ་ཅང་གི་དཀའ་ལས་ཁག་པོ་ཡོད་རེད། རྒྱུ་མཚན་གང་ཡིན་ཟེར་ན། གནས་སྐབས་ཙམ་གྱི་འོས་བསྡུའི་ལྷན་ཚོགས་དེ། ཟླ་གྲངས་འགའི་རིང་ལ་འོས་བསྡུའི་བྱེད་སྒོས་བྲེལ་ནས་འགྲོ་བ་ལས་དེ་ནས་རྒྱུན་གནས་མིན་པ་དང་། མཐོ་རིམ་སློབ་མ་དང་ན་གཞོན་ཁྲོད་ནས་འོས་འཕེན་གྱི་སྤྱི་འབོར་དམའ་ཤོས་ཡོང་བསྡད་པ་དེས་ཡ་མཚན་སྐྱེ་དགོས་པ་ཞིག་མ་རེད། རྒྱུ་མཚན་གང་ཡིན་ཞེ་ན། ཁོ་ཚོར་དེབ་སྐྱེལ་ལ་དཀའ་ངལ་ཡོད་པ་དང་ད་དུང་དེ་རིན་གོང་མཐོ་པོ་ཞིག་ཀྱང་ཆགས་ཀྱི་ཡོད།
ད་དུང་ད་ལྟའི་སྐབས་ཀྱི་འོས་བསྡུའི་སྒྲིག་གཞི་འདིའི་འོག་ནས། འོས་འཕེན་པའི་དཀའ་ངལ་མང་དུ་འགྲོ་རྒྱུ་ཡིན་ལ། མི་མང་གི་ཟླ་གྲངས་གཉིས་ཙམ་གྱི་རིང་ལ་དེབ་སྐྱེལ་བྱེད་དགོས་པ་དང་། སྔོན་མའི་བཀའ་བློན་ཁྲི་པ་ཟླ་བ་གསུམ་པའི་ནང་འོས་བསྡུའི་བྱས་པ་དང་། འདི་དང་འབྲེལ་ནས་སྐབས་དེའི་དེབ་སྐྱེལ་ཟླ་བ་དང་པོའི་ནང་མཇུག་རྫོགས་པ་རེད། དུས་དེར་གཞིས་ཆགས་ཁག་ནང་ཡོད་པའི་བོད་མི་མང་ཆེ་བ་དགུན་ཚོང་གི་ལས་དོན་སྒྲུབ་ཀྱི་ཡོད་པ་དང་། འོས་འཕེན་ལ་དོན་དངོས་ཀྱི་བར་ཆད་གཞན་ཞིག་ཡོད་པ་ནི། གལ་སྲིད་མི་གཅིག་གིས་སྔོན་འགྲོའི་དུས་བཀག་ནས་དེབ་སྐྱེལ་བྱས་མེད་ན། མི་དེས་དེབ་སྐྱེལ་བྱས་ཐུབ་ཀྱི་མེད་པའམ། ཡང་ན། མཐའ་མཇུག་གི་འོས་འཕེན་བཅུག་གི་ཡོད་མ་རེད། འོས་འཕེན་གྱི་བར་ཆད་དེ་དག་གི་འོག་ནས། ཉེ་དུས་འགྲོ་བཞིན་པའི་འོས་འཕེན་པའི་དེབ་སྐྱེལ་གྱི་ཐབས་ལམ་དེ་མེད་པ་བཟོ་ན། དོན་དངོས་དང་དོ་ནན་གྱི་ཐོག་ནས་འོས་འཕེན་པའི་གྲངས་འབོར་མང་དུ་འགྲོ་ངེས་ཡིན།
འོས་འཕེན་སྔོན་གྱི་དེབ་སྐྱེལ།
གང་ལྟར་ཡང་། གལ་སྲིད་འོས་འཕེན་པའི་དེབ་སྐྱེལ་དེ་བརྟན་འཛུགས་བྱེད་ན། དེབ་སྐྱེལ་འདི་འོས་འཕེན་ལ་ཟླ་གྲངས་གཉིས་ཙམ་གྱི་ནང་མཇུག་བསྡུ་བྱེད་མི་རུང་ལ། དེབ་སྐྱེལ་འདི་འོས་བླུགས་པའི་ཉིན་དེ་རང་བར་དུ་རྒྱུན་གནས་བྱེད་དགོས། སྦྲགས་བརྒྱུད་འོས་འཕེན་གྱི་བསམ་འཆར་ལྟར་ན། དེབ་སྐྱེལ་གྱི་དུས་ཚོད་ཟླ་གྲངས་གཉིས་དེས། དེབ་སྐྱེལ་སྐོར་ལ་གྲོས་བསྡུར་གྱི་འུར་སྒྲ་མང་དུ་འགྲོ་བ་ཕན་ཐོགས་ཡོང་རྒྱུ་དང་། བོད་མི་ཚོས་ས་གནས་འོས་བསྡུ་ལྷན་ཁང་དང་། ཡང་ན་དང་བླངས་དཔྱ་དངུལ་ལག་དེབ་ཚོགས་ཆུང་། ཡང་ན་། ས་གནས་བོད་ཀྱི་ཚོགས་པ་བཅས་སུ་འོས་འཕེན་དེབ་སྐྱེལ་བྱེད་པར་བསྐྱོད་ཆོག
འོས་བླུགས་པའི་ཉིན་རང་ལ་དེབ་སྐྱེལ།
འོས་འཕེན་པ་ཚོས་དང་བླང་དཔྱ་དངུལ་འབུལ་བ་དང་། ཡང་ན། འོས་བླུགས་པའི་ཉིན་དེ་རང་ལ་དེབ་སྐྱེལ་བྱེད་ཐུབ། དཔྱ་དངུལ་ཕུལ་དང་དེབ་སྐྱེལ་དེ་དག་གྲུབ་རྗེས། མི་མང་གིས་རང་ཉིད་ཀྱི་འོས་མི་འདེམས་བསྒྲུབ་ཆེད་བང་སྒྲིག་བྱེད་དགོས། བརྒྱུད་ལམ་དེ་ནས་འོས་འཕེན་པ་ཚོས་དང་ཐོག་དེབ་སྐྱེལ་དང་དཔྱ་ཁྲལ་ཕུལ་བ། དེ་ནས་འོས་འཕེན་པ་བཅས་ཀྱི་བང་ཐེངས་གཉིས་བསྒྲིགས་དགོས། འོས་འཕེན་དང་དེབ་སྐྱེལ་འོས་བླུགས་པའི་ཉིན་རང་ལ་ལས་དོན་བསྒྲུབས་པའི་ས་གནས་ཤིག་འོས་སྦྱོར་བྱེད་ན། ༢༠༠༤ ལོར་ཨ་རིའི་སྲིད་འཛིན་འོས་བསྡུའི་སྐབས། ཨ་རིའི་མངའ་སྡེ་མི་ནི་སོ་ཊ་ནང་འོས་བླུགས་པའི་ཉིན་རང་ལ་དེབ་སྐྱེལ་གྱི་ལས་དོན་དེ་བསྒྲུབས་ཡོད་པས། འོས་འཕེན་གྱི་སྤྱི་འབོར་༡༠-༡༢% ཙམ། འོས་བླུགས་པའི་ཉིན་རང་ལ་དེབ་སྐྱེལ་གྱི་ལས་དོན་བསྒྲུབས་མེད་པའི་ཨ་རིའི་མངའ་སྡེ་ཁག་ལས་མཐོ་བ་ཡོང་ཡོད་པ་རེད།
འདི་ནས་ཁོ་བོས་ངེས་པར་དུ་གསལ་བརྗོད་བྱེད་དགོས་པ་གཅིག་ནི། གང་ཟག་རང་ཉིད་དངོས་སུ་འགྲོ་ནས་འོས་བླུགས་དགོས་པའི་ལམ་ལུགས། དེང་སྐབས་ལག་བསྟར་བྱེད་བཞིན་པ་འདི་མུ་མཐུད་ནས་འགྲོ་རྒྱུ་ཡིན་རུང་། དེའི་ཐོག་གོང་བརྗོད་ཀྱི་འོས་བསྡུ་བསྒྱུར་བཅོས་དེ་དག དེང་སྐབས་ལག་བསྟར་བྱེད་བཞིན་པའི་འོས་བླུགས་པའི་ཉིན་རང་ལ་ཁ་སྣོན་རྒྱག་དགོས། ད་དུང་འདི་ནས་དོ་སྣང་བྱེད་དགོས་པ་ཞིག་ནི། སྦྲགས་བརྒྱུད་འོས་འཕེན་དང་འོས་བླུགས་པའི་ཉིན་རང་ལ་དེབ་སྐྱེལ་བྱེད་དགོས་པའི་རིགས་ལ། ངོ་རྒོལ་གྱི་ཚིག་རྙོག་སོགས་མངོན་གསལ་ཅན་དང་རྒྱ་ཁྱབ་ཏུ་འགྲོ་བར་ཡོང་ངེས་ཀྱང། དེ་དག་སྣང་མེད་དུ་འཇོག་ན་འགྲིག གང་གིས་ཞེ་ན། དེང་སྐབས་འགྲོ་བཞིན་པའི་འོས་བསྡུའི་ནང་ཤེས་རྟོགས་ཐུབ་པ་ཞིག་ནི། བོད་མི་རྒན་གྲས་འབྲི་ཀློག་མི་ཤེས་མཁན་ཚོས། རང་ཉིད་ཀྱི་འོས་མི་འདེམས་སྒྲུབ་ཆེད་མི་གཞན་རོགས་པ་འཚོལ་གྱི་ཡོད་པ་རེད། ཡིན་ནའང། དངོས་ཡོད་ཀྱི་གནས་ཚུལ་འདི་སྣང་མེད་དུ་འཇོག་གི་ཡོད་པ་རེད། རྒྱུ་མཚན་གང་ཡིན་ཞེ་ན། གནད་དོན་འདི་སྣང་མེད་བཞག་པ་ཙམ་གྱིས་འོས་འཕེན་བཅས་ལ་ཤུགས་རྐྱེན་ཐེབས་ཀྱི་ཡོད་པ་མ་རེད།
དང་བླང་དཔྱ་དངུལ་ལག་དེབ།
ཁྲིམས་བཟོ་ལྷན་ཚོགས་ཀྱིས་༢༠༠༨ ལོའི་ཟླ་བ་༣ པའི་ནང་ལོ་གཅིག་གི་རིང་དང་བླང་དཔྱ་ཁྲལ་ལག་དེབ་ཀྱི་དེབ་སྐྱེལ་མང་དུ་འགྲོ་ཆེད་དུ་སྒྲིག་གཞི་རང་མོས་ཀྱིས་བློས་བཏང་བྱས་ཏེ། དེའི་ཐོག་ཟླ་བ ༦ ཁ་སྣོན་བྱས་ཏེ་དུས་ཚོད་རྒྱ་བསྐྱེད་བཏང་ཐོག དང་བླང་དཔྱ་ཁྲལ་ལག་དེབ་གཅིག་སྐྱར་གསོ་བྱེད་པར་ཨ་སྒོར་༡༡ མ་གཏོགས་འབུལ་དགོས་ཀྱི་ཡོད་པ་མ་རེད། གནས་སྟངས་འདིས་བྱང་ཨ་རིའི་ནང་གི་དེབ་སྐྱེལ་གྱི་གྲངས་འབོར་༣,༧༩༣ཙམ་ནས། ༢༠༠༨ ཀྱི་ལོ་མཇུག་ནས་མི་འབོར་ཧ་ལམ་༡༥,༠༠༠ ་སྐོར་ཞིག་ནས། མཐའ་མཇུག་གི་དེབ་སྐྱེལ་གྱི་བསྡོམས་འབོར་༧,༦༡༢ ཙམ་མང་དུ་སོང་ཡོད་པ་རེད། དེ་དང་ཕྱོགས་མཚུངས་པ་སུད་སི་ནང་ག་དུས་ཡིན་ཡང་དཔྱ་དངུལ་མཐོན་པོ་འབུལ་བཞིན་ཡོད་པ་མ་གཏོགས། ཡུ་རོབ་རྒྱལ་ཁབ་གཞན་ཁག་ཏུ་དེབ་སྐྱེལ་མང་དུ་འགྲོ་ཐུབ་ངེས་ཡིན་ལ། འདིས་འཕེལ་རྒྱས་གཏོང་ཐུབ་ངེས་ཡིན། གང་ཡིན་ཟེར་ན་༢༠༠༨ ལོར་བོད་ནང་ཞི་བའི་གྱེན་ལངས་བྱས་པའི་སྐབས། གྱེན་ལངས་འདིས་བདེན་པ་དག་སྐྱེལ་གྱི་ཐོག་ནས་གསར་འགྱུར་ཁག་བོད་ཀྱི་གནས་ཚུལ་གྱིས་དབང་དུ་བསྒྱུར་ནས། འཛམ་གླིང་ཁྱོན་བོད་ཀྱི་ཐད་ལ་དོ་སྣང་བསྐྲུན་པ་རེད། དེ་བཞིན་ས་གནས་བོད་རིགས་ཚོགས་པའི་ངོས་ནས་ཀྱང་། དང་བླང་དཔྱ་དངུལ་ལག་དེབ་སྐྱར་གསོའི་ཁ་སྒྱུར་ཕྱོགས་ཐད་ལ་དོ་སྣང་བྱེད་ཐུབ་མེད་པ་དང་། ད་ལྟའི་དུས་ཚོད་འདི་ཁྲིམས་བཟོ་ལྷན་ཚོགས་ཀྱིས་དང་བླང་དཔྱ་དངུལ་ལག་དེབ་སྒྱུར་ཕྱོགས་སླར་ཡང་ངོ་སྤྲོད་ཀྱིས། འདིས་དང་བླང་དཔྱ་དངུལ་ ལག་དེབ་སྐྱར་གསོ་མང་དུ་འགྲོ་རྒྱུའི་གོ་སྐབས་དོན་ཕན་ལྡན་པ་ཞིག་ཆགས་རྒྱུ་རེད།
དེང་སྐབས་རྒྱ་གར་ནང་དཔྱ་ཁྲལ་འབུལ་མཁན་༧༥,༩༣༢ ཡོད་པ་དང་། བལ་ཡུལ་ནང་༡༡,༦༢༩ འབྲུག་ནང་༡,༣༤༨ ཡོད་པ་བཅས་དཔྱ་ཁྲལ་འབུལ་མཁན་མི་མང་གི་བརྒྱ་ཆའི་ངོས་ནས་བརྩིས་ན། རྒྱ་གར་ནང་བརྒྱ་ཆའི་༧༧.༦༧%, དང་བལ་ཡུལ་ནང་༦༧.༠༩% འབྲུག་ནང་ ༧༧.༡༥% བཅས་མི་མང་གི་བརྩི་བཀུར་དང་ལྡན་པའི་ཐོག་ནས་དཔྱ་ཁྲལ་འབུལ་གྱི་ཡོད་པརེད། རྒྱ་བལ་འབྲུག་གསུམ་ནང་དཔྱ་ཁྲལ་གྱི་བསྡོམས་འབོར་ཁྱོན་༨༨,༩༠༩ ཡོད་པ་དེ། མི་མང་གི་བརྒྱ་ཆའི་༧༦.༠༩% ཟིན་གྱི་ཡོད་པ་རེད། རང་ལོ་༦ གི་འོག་ནས་ཡིན་པ་ཟུར་དུ་བཏོན་གྱི་ཡོད་པ་དེ་(བརྒྱ་ཆའི་(༡༠%) ལས་ཉུང་བ་)ཡོད་པ་དེ་རྒྱུ་མཚན་དང་ལྡན་པ་ཞིག་ལ་ངོས་འཛིན་བྱེད་དགོས་པ་སྟེ། བརྒྱ་ཆའི་ ༡༥% ལས་མང་བས་དཔྱ་ཁྲལ་འབུལ་གྱི་ཡོད་པ་མ་རེད། གཅིག་བྱེད་ན་ཁྲིམས་བཟོ་ལྷན་ཚོགས་ལ་འདིའི་སྐོར་གཏམ་བཤད་ཀྱི་ལམ་ཁ་ཞིག་ཡོད་རྒྱུ་རེད། དེ་ཡང་ད་དུང་རྒྱ་གར་དང་བལ་ཡུལ། འབྲུག་བཅས་ཀྱི་ནང་ལས་མེད་དང་གྲྭ་བཙུན་བཅས་ལ། དཔྱ་ཁྲལ་ཉུང་དུ་གཏོང་རྒྱུར་སྤྱི་འཐུས་ཚོས་བསམ་གཞིག་བྱེད་དགོས་པ་དང་། དེས་ན་མི་དེ་དག་ལ་ཟླ་བ་གཅིག་གི་ནང་ཧིན་སྒོར་གཅིག་འབུལ་བཅུག་ན། (ལོ་གཅིག་གི་ནང་༡༢ ཡོང་གི་རེད།) འདིས་འཐུས་སྒོ་ཚང་བའི་ཐོག་ནས་དེབ་སྐྱེལ་མང་དུ་འགྲོ་ཐུབ་རྒྱུ་རེད། རྒྱུ་མཚན་གང་ཡིན་ཞེ་ན། དང་བླང་དཔྱ་དངུལ་ལག་དེབ་ཡོད་ན་བོད་མི་རྒྱལ་གཅེས་པ་ཞིག་ཡིན་པར་ངོས་འཛིན་ཐུབ་རྒྱུར་ཕན་ཐོགས་ཆེན་པོ་ཡོད་ཅིང་། རྒྱལ་ཁབ་མང་ཆེ་བའི་ནང་གང་ཟག་གང་ཞིག་ལ་ཡོང་སྒོ་ཉུང་ངུ་ལས་མེད་ན་དཔྱ་ཁྲལ་ལ་ཆག་ཡང་ཡོད་པ་རེད། འདི་ནི་ལུགས་མཐུན་གྱི་ལག་བསྟར་ཡིན་པས། ང་ཚོས་བོད་མི་ཚོའི་ཆེད་དུ་གཅེས་སྐྱོང་བྱེད་འོས་པ་ཞིག་ཡིན།
མཇུག་བསྡོམས།
དོན་དངོས་ཀྱི་དམིགས་ཡུལ་དང་བཙན་བྱོལ་ནང་གི་མང་གཙོའི་འོས་བསྡུའི་དགོས་དོན་ནི། ང་ཚོར་མང་གཙོའི་ལམ་ལུགས་ཀྱི་བརྒྱུད་རིམ་ཐད་ལ་སློབ་སྦྱོང་ཐོབ་རྒྱུ་དང་། བོད་ནང་ཡོད་པའི་བོད་མི་ཚོ་དང་། འཛམ་གླིང་མི་མང་ལ་མིག་སྟོན་བྱེད་རྒྱུ། རྒྱ་ནག་གི་ལམ་ལུགས་དེ་དག་བརྗེ་བསྒྱུར་བྱེད་དགོས་རྒྱུ་དེ་རེད། དེ་བཞིན་བཙན་བྱོལ་ནང་ང་ཚོར་འོས་བསྡུའི་ཐད་ལ་སློབ་སྦྱོང་ཐོབ་པ་དེས། ང་ཚོ་རང་དབང་ཐོབ་ནས་བོད་ནང་ཕྱིར་ལོག་པའི་སྐབས་ལག་བསྟར་དང་འཛིན་སྐྱོང་བྱེད་ཐུབ་ཀྱི་རེད། གང་ལྟར་ཡང་། ཚུལ་མཐུན་གྱི་བསྒྱུར་བཅོས་དང་སྒྲིག་འཛུགས་ཀྱི་བརྒྱུད་རིམ་ལྡན་པའི་བསྒྱུར་བཅོས་ལ་ཚད་གཞི་ངེས་ཅན་ཡོད་པ་རེད་ལ། མཐའ་མཇུག་གི་གྲུབ་འབྲས་ནི་མི་མང་འོས་འཕེན་ནང་འཛུལ་ཞུགས་བྱེད་དང་མི་བྱེད་ལ་རག་ལས་པ་ཞིག་རེད། གནད་དོན་འདི་ནི་ང་ཚོ་གང་ཟག་མི་རེ་ངོ་རེས། བཙན་བྱོལ་ནང་གི་མང་གཙོ་དོན་ཕན་དང་ལྡན་པའི་ཐོག་ནས་ལག་བསྟར་བྱེད་རྒྱུ་དེ་རེད།
ཉེ་དུས་ང་ཚོའི་མང་གཙོའི་ལམ་ལུགས་ཀྱི་འོས་བསྡུའི་དགོས་དོན་དེ་འགྲུབ་པར་ཧ་ཅང་གི་ཕམ་ཉེས་བྱུང་ཡོད་པ་དང། གལ་སྲིད་ང་ཚོའི་འོས་འཕེན་པ་བརྒྱ་ཆ་དམའ་པོ་༣༠%ཙམ་དེ། ཐེངས་རྗེས་མའི་འོས་བསྡུའི་སྐབས་སུའང་མུ་མཐུད་ནས་གནས་ན། གནས་སྟངས་འདི་ནི་རྒྱ་ནག་གཞུང་གིས་གོ་མཚོན་གྱི་ཚབ་ཏུ་བེད་སྤྱད་ནས། ང་ཚོར་འཕྱ་སྨོད་དང་། བོད་མི་མང་ཆེ་བས་རྒྱབ་སྐྱོར་དང་འོས་འཕེན་བྱེད་ཀྱི་མེད་པས། བཙན་བྱོལ་བོད་གཞུང་ཁྲིམས་དང་མི་མཐུན་པ་ཡིན་ཚུལ་བརྗོད་ཀྱི་རེད་ལ། དེ་བཞིན་ང་ཚོས་ཚོད་དཔག་བྱེད་ཐུབ་པ་ཞིག་ལ། གལ་སྲིད་འོས་འཕེན་པའི་གྲངས་འབོར་དམའ་པོ་ཆགས་ན། རྒྱ་ནག་གིས་བརྒྱུད་ལམ་ཁག་གི་འགོ་བརྗོད་དུ་བཀོད་ནས་སྐྱོན་འཛུགས་ཀྱི་འུར་སྒྲ་བྱེད་ཀྱི་རེད་ལ། གཅིག་བྱེད་ན་ཕྱི་ལོག་ནས་གཞན་དག་གིས་དེ་ལྟར་བསྐྱར་ཟློས་བྱེད་སྲིད་པ་རེད། རྒྱ་ནག་དམར་ཕྱོགས་ཚོགས་པའི་དྲིལ་བསྒྲགས་ལ་བརྡ་ལན་འཚམས་ཤོས་ནི། ཁྲིམ་མཐུན་གྱི་འོས་སྒམ་བེད་སྤྱོད་བརྒྱུད་ནས་འགྲོ་རྒྱུ་དེ་ཡིན་ཞིང་། བོད་མི་ཚོས་འོས་འཕེན་བྱས་པ་དེ་སྤྱི་ཚོགས་ཀྱི་འོས་འགན་ཙམ་མ་རེད་ལ། ལས་དོན་འདི་ནི་བཙན་བྱོལ་བོད་གཞུང་དེ་བོད་དང་བོད་མི་མང་གི་ཁྲིམས་མཐུན་གྱི་སྐུ་ཚབ་ཏུ་བསྒྱུར་བའི་ལས་དོན་ཞིག་ཡིན་པ་དང་། དེ་བཞིན་བོད་ནང་རྒྱ་གཞུང་གིས་མི་སེར་སྤེལ་ཡུལ་བྱེད་བཞིན་པའི་ངན་ཇུས་ཉམས་རྒུད་གཏོང་རྒྱུ། བཙན་བྱོལ་བོད་གཞུང་འདི་བོད་མི་མང་གི་དོན་དངོས་ཀྱི་སྐུ་ཚབ་ཡིན་པ། རྒྱ་ནག་གི་འཁྱོག་བཤད་“བཙན་བྱོལ་བོད་གཞུང་ཟེར་བ་དེ་ཁྲིམས་དང་ཡོངས་སུ་འགལ་བ་ཞིག་རེད་ལ། འདི་ནི་བོད་དང་བོད་མི་མང་གཉིས་་ཀའི་ཚབ་མ་རེད་”ཅེས་(༢༠༡༠ ཟླ་བ་༢ པའི་ཚེས་༡ ཉིན་ཤིན་ཧྭ)ནང་བརྗོད་ཡོད་པར་ལན་འདེབས་ཀྱི་ལས་དོན་ཆགས་ཀྱི་ཡོད་རེད།
དེང་སང་ཨབ་གྷན་ནི་སི་ཐན་དང་ཨི་རག ཨི་རན་བཅས་ཀྱི་མི་མང་གིས་འོས་འཕེན་གྱི་ཆ་ཤས་ལེན་སྐབས་སྲོག་ལ་ཉེན་ཁ་ཡོད་པ་བཞིན། བཙན་བྱོལ་ནང་ང་ཚོ་འོས་འཕེན་སྐབས་འཇིགས་སྐུལ་ལ་གདོང་ལེན་བྱེད་དགོས་པ་དེ་འདྲ་ཡོད་པ་མ་རེད། གང་ལྟར་ཡང་། ང་ཚོར་ཤེས་རྟོགས་ཡོད་པ་བཞིན་༢༠༠༨ ལོ་དེས་བདེན་པ་ར་སྤྲོད་གསལ་པོ་བྱས་པ་རེད་ལ། བོད་ནང་ཡོད་པའི་རྒྱ་ཆེའི་མི་མང་གིས་རང་ཉིད་ཀྱི་འབོད་སྒྲ་གསལ་པོ་བསྒྲགས་ཡོད་པར། དེ་མ་ཐག་ཏུ་གདུག་རྩུབ་ཀྱི་ཐོག་ནས་འབོད་སྒྲ་དེ་ཁ་ཁུ་སིམ་པོར་བཏང་བ་རེད། མི་མང་པོ་ཞིག་གིས་རང་ཉིད་ཀྱི་རྩ་ཆེའི་ཚེ་སྲོག་བཏང་ཡོད་པ་དང་། དེ་བཞིན་དུ་ཁེར་རྐྱང་གི་བཙོན་འཇུག་འོག་ཏུ་བོད་མི་མང་པོ་གནས་ཡོད་པ་རེད། མང་པོ་ཞིག་སྲོག་ཁྲིམས་ལ་བང་བསྒྲིགས་ནས་བསྡད་ཡོད། གང་ཡིན་ཞེ་ན། ཁོ་ཚོའི་སྙིང་སྟོབས་དེས་བརྗོད་འདུན་ཡོངས་རྫོགས་ཕྱིར་བསྒྲགས་བྱེད་ཀྱི་ཡོད་པ་རེད། ཁོ་ཚོས་རང་དབང་དང་མང་གཙོར་རེ་འདུན་བྱེད་བཞིན་ཡོད་པས། དུས་ཚོད་འདི་ནི་ང་ཚོར་བབས་པའི་འོས་འགན་ཏེ་བོད་མི་དེ་དག་གི་རེ་འདུན་སྐོང་རྒྱུ་དང་། ང་ཚོའི་རྨི་ལམ་འགྲུབ་རྒྱུར་འབད་བརྩོན་བྱེད་པའི་དུས་ཡིན་ལ། འོས་འཕེན་རྗེས་མ་འདི་ནི་ང་ཚོ་རང་ཉིད་ཀྱི་རྐང་པའི་སྟེང་ནས་ལངས་དགོས་པ་དང་། རང་ཉིད་ཀྱི་ལས་དབང་ལ་སྟངས་འཛིན་བྱེད་དགོས་པ་བཅས་སོ།།
