བོད་མི་ཚོས་རྒྱ་ནག་གི་སྲིད་འཛིན་ཧུའུ་ལ་ངོ་རྒོལ།

དེ་ཡང་ཟླ་འདིའི་ཚེས་༡༣ ཉིན་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཨ་རིའི་རྒྱལ་ས་ཝ་ཤིན་ཊོན་དུ་རྒྱལ་ཁབ་༤༦ ཙམ་གྱི་འཐུས་མི་རྣམས། འཛམ་གླིང་རྡུལ་ཕྲན་བདེ་འཇགས་ལྷན་ཚོགས་སུ་ཚོགས་བཅར་ལ་འབྱོར་ཡོད་པ་དང། དེའི་ནང་རྒྱ་ནག་གི་སྲིད་འཛིན་ཧུའུ་ཅིན་ཐའོ་ཡང་འབྱོར་ཡོད་པས། རྒྱ་ནག་གི་ཆོས་འཁོར་སྒོམ་སྒྲུབ་ཚོགས་པའི་ངོ་རྒོལ་བ་ཚོས་ཁྲོམ་གཞུང་དུ་སྒོམ་བརྒྱབ་ནས་ངོ་རྒོལ་བྱས་ཡོད་པ་དང། བོད་མི་བརྒྱ་ཕྲག་བརྒལ་བས། བོད་ལ་རང་དབང་དགོས། ཨ་རིས་བོད་ལ་རྒྱབ་སྐྱོར་བྱེད་དགོས། ཧུའུ་ཀྱིས་འཛམ་གླིང་མགོ་བསྐོར་གཏོང་བཞིན་པ་མཚམས་འཇོག་དགོས་ཟེར་བ་སོགས། ངོ་རྒོལ་སྐད་འབོད་ཤུགས་ཆེར་བྱས་ཡོད་འདུག
སྐབས་དེར་ཧུའུ་ལ་དགའ་བསུ་ཞུ་མཁན་རྒྱ་རིགས་ཕྱོགས་ཁག་གཅིག་དང། ངོ་རྒོལ་བྱེད་མཁན་བོད་རིགས་དང་རྒྱ་ནག་གི་ཆོས་འཁོར་སྒོམ་སྒྲུབ་ཚོགས་པའི་རྒྱ་རིགས་བཅས། ཕྱོགས་ཁག་གཉིས་སུ་རང་རང་གི་རྒྱལ་དར་མཁའ་དབྱིངས་སུ་འཕྱར་ནས། ངོ་རྒོལ་གྱི་སྐད་འབོད་དང་དགའ་བསུའི་འབོད་སྒྲ་གཉིས་ཀྱིས་ཝ་ཤིན་ཊོན་གྱི་ཁྲོམ་གཞུང་འཁྲུག་ཆ་དོད་དུ་སོང་ཡོད་འདུག
ཆོས་འཁོར་སྒོམ་སྒྲུབ་ཚོགས་པའི་ངོ་རྒོལ་བ་ཚོས། ཨ་རི་དང་ཡུ་རོབ་རྒྱལ་ཁབ་ཁག་གིས་རྒྱ་ནག་དང་མཉམ་དུ་ཚོང་ལས་ཁོ་ནར་དམིགས་ཡོད་པས། རྒྱ་ནག་ནང་གི་འགྲོ་བ་མིའི་ཐོབ་ཐང་དང་། ཆོས་ལུགས་དད་པ་རང་མོས་ཡིན་མིན་བཅས་ལ་དོ་སྣང་བྱེད་ཀྱི་མི་འདུག་པས། གནད་དོན་དེ་ངེས་པར་དུ་ལྷན་ཚོགས་འདིའི་ནང་གླེང་སློང་བྱེད་དགོས་ཀྱི་ཡོད་ཅེས་བརྗོད་ཀྱི་ཡོད་པ་དང། དེ་བཞིན་བོད་མི་ངོ་རྒོལ་བ་ཚོས། བོད་ལ་རང་དབང་ཐོབ་ན་བོད་དེ་སྟོབས་ཆེན་རྒྱལ་ཁབ་གཉིས་ཀྱི་དབར། ཞི་བདེའི་བསྟི་གནས་ཤིག་ཆགས་རྒྱུ་ཡིན་པས་རྡུལ་ཕྲན་བདེ་འཇགས་ཀྱི་གནད་དོན་དེའང་རང་བཞིན་ངང་གིས་ཡོང་ངེས་ཡིན་ཞེས་སོགས་བརྗོད་ཡོད་པ་རེད།