སྐྱབས་གནས་དགེ་འདུན་གྱི་སྡེའི་སྐྱབས་འོག་ནས་འཁོར་བ་དང་ངན་སོང་གི་གནས་སུ་དུས་ནམ་ཡང་མི་གཏོང་བའི་ཛ་དྲག་གིས་གསོལ་འདེབས་ཞུ་དགོས་པ་དང་། དེ་མཚུངས་འབྱུང་བའི་རྐྱེན་ངན་འོག་ནས་ཚེ་ལས་འདས་པ་དང་། རྨས་སྐྱོན་བྱུང་བ་དེ་དག་སྡུག་བསྔལ་ལས་སྐྱོབས་ཐབས་ཡུལ་མཆོག་གནས་བཞི་ལས་ལྷག་པ་ཞིག་རྙེད་ཐབས་མེད་པས་ཚང་མས་དཀོན་མཆོག་ལ་སྐྱབས་ཐབས་ཀྱི་གདུང་འབོད་དང་།
མཆོད་འབུལ་གསོལ་འདེབས་རྒྱ་གང་ཆེ་གནང་སྐྱོང་ཡོང་བའི་ཡོངས་ཁྱབ་གསལ་བསྒྲགས་སུ། ཞེས་འཁོད་པ་ལྟར་བལ་ཡུལ་མདོ་ཁམས་ཆུ་བཞི་སྒང་དྲུག་གིས་གོ་སྒྲིག་འོག་ཕྱི་ལོ་ ༢༠༡༠ ལོའི་ཟླ་ ༤ ཚེས ༡༨ ཉིན་བལ་ཡུལ་མཆོད་འཇོར་གཞིས་ལས་ཁང་དུ་སེར་སྐྱ་མི་མང་སྟོང་ཕྲག་ལྷག་གདན་ཞུས་ཀྱིས་ཉིན་གཅིག་རིང་སྨོན་ལམ་གསོལ་འདེབས་དང་།
མ་ཎི་གསོག་སྒྲུབ་ཀྱི་ལས་འགུལ་གཞི་རྒྱ་ཆེ་བ་ཞིག་སྤེལ་གནང་བ་དང་། དགོང་མོ་ཆུ་ཚོད་ ༥ པ་ནས་དབུ་བཙུགས་ཏེ་མཚན་མོ་ཆུ་ཚོད་ ༡༠།༣༠ བར་མཆོད་པའི་རྟེན་དང་བཀུར་བའི་ཞིང་མཆོག་བླ་ན་མེད་པ་བྱ་རུང་ཁ་ཤོར་གྱི་མདུན་དུ་འདས་པོ་དེ་དག་གི་ཆེད་དུ་འཇིག་རྟེན་འཁོར་བའི་མུན་པ་སེལ་བའི་གསལ་བའི་སྒྲོན་མེ་ཁྲི་ཕྲག་ལས་བརྒལ་བ་འདེགས་འབུལ་ཞུས་ཡོད་པ་དང་།
ད་དུང་ཡང་གདུང་སེམས་མཉམ་བསྐྱེད་ཀྱི་ལས་འགུལ་ནུས་ལྡན་སྤེལ་འཆར་ཡོད་འདུག་པ་ལྟར་མདོ་ཁམས་ཆུ་སྒང་སྤྱི་སྒེར་ཚང་མས་དུས་ཐོག་ཆར་པའི་ལས་འགུལ་སྤེལ་རིགས་འཕྲལ་དུ་དབུས་སྤྱི་ཁྱབ་རྒྱུན་དུ་སྙན་གསན་ཞུ་དགོས་པ་བཅས། ཆུ་སྒང་རྒྱུན་ལས་ཁང་ནས་གསལ་བསྒྲགས་ཤིག་སྤེལ་འདུག
