ཡུལ་ཤུལ།

ངས་མ་ཎི་འདོན་བཞིན་ཡོད་ལ།

གསོལ་འདེབས་ཞུ་བཞིན་ཡོད།

ཁྱོད་ཀྱི་རྣམ་ཤེས་ལྟོས་དང་།

ངས་མཆོད་མེ་འབུལ་བཞིན་ཡོད་ལ།

ཕྱག་གསུམ་འཚལ་བཞིན་ཡོད།

ཁྱོད་རང་བདེ་བར་གཤིགས་དང་།

བླ་མ་བཟང་པོས་ཁྱོད་ལ་ལམ་སྣ་འདྲེན་བཞིན་ཡོད་ལ།

དགེ་འདུན་སྟོང་གིས་ཁྱོད་ལ་སྐྱེལ་མ་མཛོད་བཞིན་ཡོད།

མ་ཚད། སྤུན་ཟླ་འབུམ་གྱིས་ཁྱོད་ལ་ལམ་རྒྱག་གནང་བཞིན་ཡོད།

ང་ནི། པོ་ཏ་ལའི་མདུན་ཕྱོགས་ན་ཁྱོད་རང་སྒུག་ནས་བསྡད་ཡོད།

ང་ལ་ཡིད་ཆེས་ཡོད། ང་ཚོ་སླར་ཡང་མཐོ་སྒང་ན་འཛོམས་ནས།

བླ་མ་གཅིག་གི་སློབ་མ་དང་། སྟོན་པ་གཅིག་གི་ཆོས་བྱེད་ནས།

ཡིད་བརྟེན་མེད་པའི་འཇིག་རྟེན་འདི་ནས་ཁ་བྲལ་ཆོག་ལ།

སྡུག་གི་རྨི་ལམ་འཁྲུག་པའི་སྲིད་པ་འདི་ནས་ལྷན་དུ་ཐོན་ཆོག

སྤུན་ཟླ་ལགས་མགྱོགས་ནས་མྱུར་དུ་ཕེབས་རོགས།

ང་ཁྱེད་རང་སྒུག་ནས་བསྡད་ཡོད།

ཁ་ཆབ་དང་བུ་ཡུག་འཚུབ་རུང་། དྲག་ཆར་དང་ལྷག་རླུང་ལྡང་རུང་།

ཚ་གྲང་གི་གནམ་ཤིས་ཇི་ལྟར་འཁྲུག་རུང་།

ང་ནི་ཁྱོད་རང་སྒུག་ནས་བསྡད་ཆོག

སྤུན་ཟླ་ལགས་མྱུར་དུ་ཕྱིར་ཕེབས་རོགས།