རྩོམ་པ་པོ་སྒོ་ཡོན་སོགས་འཛིན་བཟུང་།
དེ་ཡང་གནས་ཚུལ་གནས་ཚུལ་མཁོ་སྤྲོད་པས་བརྗོད་པ་ལྟར་ན་སྤྱི་ཟླ་༦ཚེས་༥ཉིན་གྱི་དགོང་མོའི་དུས་ཚོད་༡༡དང་༡༢ཡས་མས་སུ་།་སྒོ་ཡོན་དང་ཐུར་རམ་དགེ་འདུན་བཟང་པོ།ཁོང་གཉིས་ཀྱི་སློབ་གྲོགས་གསེར་རྟ་ཤེས་རབ་གསུམ་ཁྲིན་ཏུའུ་གྲོང་ཁྱེར་གྱི་བོད་མི་སྡོད་སྒར་ཁྲོམ་གྱི་བྱང་གི་སྲང་ལམ་ཞིག་ཏུ་དགོང་ཟས་ཤིག་ཟ་རུ་འགྲོ་སྐབས། གློ་བུར་དུ་ཉེན་རྟོག་པའི་རླངས་འཁོར་གཅིག་དང་རླངས་འཁོར་གཞན་འགའ་ཡི་ནང་ནས་དྲག་ཆས་སྤྲས་མེད་པའི་ཉེན་རྟོག་བཅོ་ལྔ་ཡས་མས་ཤིག་བབས་ནས་ཁོང་གསུམ་རུབ་ཏེ་ཁོང་ཚོའི་ལུས་སྟེང་དུ་སྦྲིད་རྫས་ཤིག་གཏོར་རྗེས་ལྕགས་དབྱུག་སོགས་ཀྱིས་མགོ་དངརྐང་པ་ལ་གང་བྱུང་གཞུས་ནས་དྲན་པ་འཐོར་རྗེས་རླངས་འཁོར་ནང་བཅུག་ནས་ཁྲིམས་ལས་ཁང་ཞིག་ཏུ་ཁྱེར་ཞིང༌།དེ་ན་རྐང་ལག་ཡོད་ཚད་སྡོམ་ནས་ཆབ་སྲིད་ཀྱི་ལས་ཀ་ཅི་ཞིག་བྱས་ཡོད་པ་སོགས་ཀྱི་ཚ་འདྲི་དང་གློག་རྒྱུག་སོགས་ལག་ཆ་འདྲ་མིན་གྱི་རྡུང་རྡེག་ཚད་མེད་བཏང་པ་མ་ཟད།གཟུགས་པོ་དང་ཁུག་མ། ཁ་པར་དང་པར་ཆས་སོགས་བསྔོག་གཤེར་ཡང་བྱས་འདུག ད་དུང་མེ་མདའ་ཐོད་པར་བཙུགས་ཏེ་དྲང་པོ་མ་བཤད་ན་ད་ལྟ་ཉིད་དུ་འདི་ནས་གསོད་ངེས་ཡིན་ལུགས་ཀྱི་འཇིགས་སྐུལ་ཡང་བྱས་འདུག
ཁོང་ཚོས་རང་ཉིད་འཇུ་བཟུང་དགོས་དོན་ཅི་ཡིན་མིན་ཉེན་རྟོག་མི་སྣར་ཕར་དྲིས་དུས་སྔར་ལས་ཆེ་བའི་བཅར་རྡུང་བྱེད་པ་ལས་གསལ་བཤད་ཅི་ཡང་བྱས་མི་འདུག
ཁོང་གསུམ་ལ་ཚ་འདྲི་དང་རྡུང་རྡེག་ཁུག་མ་དང་དཔར་ཆས་སོགས་བསྔོགས་གཤེར་བྱས་པ་ལས་ཁྲིམས་ཀྱི་ནག་ཉེས་འཕོག་པའི་གནད་དོན་གང་ཡང་མ་རག་སྟབས།འདྲ་པར་ཁ་ཤས་སྒྲོན་ནས་ཐོབ་ཐང་དཔང་ཡིག་གི་ཨང་གྲངས་མཉམ་དུ་དྲ་ལམ་ཞིག་ཏུ་ཉར་ཚགས་བྱས་ཏེ་སྔ་དྲོའི་དུས་ཚོད་༨ཡས་མས་སུ་ཁོང་ཚོ་ཕྱི་རུ་གློད་གྲོལ་བཏང་འདུག འགྲོ་ཁར་ད་དུང་དུས་ཚོད་ངེས་མེད་ཐོག་འཛིན་བཟུང་བྱ་ཆོག་ཆོག་ཡིན་པའི་ཉེན་བརྡ་ཡང་བཏང་འདུག
རྩོམ་པ་པོ་སྒོ་ཡོན་ནི་བྲག་འགོ་སྒོ་ཆེན་དགོན་པའི་གྲྭ་བ་དང་གངས་གཞོན་སྨྱུག་ཚོགས་ཀྱི་ཚོགས་མི། «བོད་»ལོ་དེབ་དང«སྤུར་རྒྱལ་གྱི་རྣམ་ཤེས»ལོ་དེབ་གཉིས་ཀྱི་རྩོམ་སྒྲིག་པ་ཡིན་འདུག་ལ།རྩོམ་པ་པོ་ཐུར་རམ་ཧོར་དགེ་འདུན་བཟངཔོ་བྲག་འགོ་ནས་ཡིན་་པ་དང་རང་དབང་རྩོམ་པ་པོ་ཞིག་ཡིན་འདུག། རྩོམ་པ་པོ་ཤེས་རབ་ནི་གསེར་རྟ་ནས་ཡིན་འདུག་པ་དང་།ཁོང་གསུམ་ཀ་ཁམས་གསེར་རྟ་བླ་རོང་དགོན་པ་ནས་སློབ་སྦྱོང་བྱས་ཤིང་།ད་ལྟར་ཁྲིན་ཏུ་རུ་རྒྱ་ཡིག་ལ་སློབ་གཉེར་བྱེད་བཞིན་ཡོད་འདུག
གུས་པ་འབའ་པ་སྐལ་བཟང་འཕྲིན་ལས་ནས་
ཕུལ