རྣམ་གྲོལ་གླིང་ནས་འཆམ་ར་དྲན་པ།
བྱིན་རླབས་གཟི་བྱིན་འབར་བའི་རྟེན་གསུམ་དང་།།
ཞི་དུལ་སློབ་སྤྱོད་བཟང་པའི་འཕགས་པའི་ཚོགས།།
མིག་ཟུང་བསོད་ནམས་སྐལ་དུ་བབས་ལགས་པས།།
དད་པའི་དགའ་བ་འབུམ་གྱིས་རང་རྒྱུད་སྨྱོས།།
ད་ནས་ཆོས་ཀྱི་མཇལ་སྐོར་ཡོངས་གྲུབ་ནས།།
ཆོས་མཛོད་ཆེན་པོར་ཁྱུག་ཙམ་ཉུལ་དགོས་དྲན།།
ལམ་བར་གྲྭ་བ་བཙུན་མར་སུ་ཐུག་ཚེར།།
ཆོས་མཛོད་གང་ཡོད་ཅེས་པའི་དྲི་རྟགས་བཀོད།།
འོན་ཀྱང་ལན་དུ་ཚྰ་ཡྰི་ན་སྐད་སྦྱིན་པས།།
དེང་རབས་ཤེས་བྱས་འཕོངས་པའི་གྲྭ་རྐྱང་ང་།།
གོ་བའི་ཚབ་ཏུ་དོགས་པའི་དྲི་རྟགས་རྣམས།།
ཀླད་པའི་ངོས་སུ་སྐར་མདའ་བརྒྱབ་པ་བཞིན།།
ཐ་མར་འུ་ཐུག་བརྒྱ་ཡིས་ཐབས་ཟད་དེ།།
ABCDརྡོ་ཆག་བཙན་བསྒྲིགས་ཀྱིས།།
LIBRARY་ཞེས་ཚིག་གི་མདའ་ལམ་ནས།།
མདོ་སྔགས་ཆོས་མཛོད་ཆེན་པོའི་ལམ་སྣེ་རྙེད།།
དུས་རབས་སྲོལ་དང་མཐུན་པའི་དཔེ་དེབ་དང་།
གནའ་བོའི་མན་ངག་བརྒྱུད་པའི་པོ་ཏི་སོགས།།
ཡོད་ཚད་མ་ཚང་མེད་པའི་ཆོས་མཛོད་དེས།།
ང་ལ་དཔེ་མཛོད་མིང་གི་གོ་དོན་སྤྲད།།
དཔེ་མཛོད་ཅེས་པའི་ཁ་བྱང་སྨུག་པོའི་འོག།
ཇ་དང་ཆུ་དང་ཚེམ་དྲུབ་སོགས་ལ་བྲེལ།།
གནའ་དེང་དཔེ་ཆ་བཙོན་དུ་བཅུག་པ་ཡི།།
“དཔེ་མཛོད་ཁང་”དེ་དཔེ་མཛོད་མིན་པར་ཤེས།།
འདི་ལྟར་རྒྱུས་མེད་ཡུལ་དུ་རྒྱུས་མེད་མི།།
ཆ་རྒྱུས་མེད་པར་ཆ་མེད་གྱུར་པ་ན།།
ས་འདི་བརྒལ་ནས་ས་མཐར་འཁྱམས་པ་ཡི།།
འཆམ་ར་མིང་གི་བསྙད་པའི་འཆམ་རྒན་དྲན།།
རྣམ་གྲོལ་གླིང་ནས་རྣམ་པ་གྲོལ་པ་བཞིན།།
དྷ་སའི་ཕྱོགས་སུ་དབྱིན་ཇི་དྷི་དྷི་སར།།
འཆམ་སར་སྨྱོན་པ་གློ་བུར་འཆམ་མེད་ན།།
ད་ཐེངས་ང་ཚོ་ད་ལྟ་ཉིད་འཛོམས་ནས།།
རྐུ་ཤུ་ན་གྷ་རྐུ་མའི་ས་ཆ་རུ།།
ཉ་ཉུང་བསྲེས་པའི་ཉ་ཤ་སྐམ་པོ་སོགས།།
ཁོལ་མའི་ཆུ་ལྟར་འཕྱུར་པའི་ཁོལ་ཁོལ་སོགས།།
ལྷན་དུ་རོལ་པའི་སྤྲོ་སྟོན་བྱ་དགོས་དྲན།།
ལྷོ་བྱང་ཡུལ་གྱིས་རྒྱང་ཐག་བསྐལ་ན་ཡང་།།
ཆོས་དང་འཇིག་རྟེན་ལྟ་བ་མཐུན་པ་ཡི།།
ལྷད་མེད་སེམས་གཉིས་གཅིག་ཏུ་མཐུན་པ་ཡི།།
རྒྱང་རིང་གྲོགས་པོ་ཁྱེད་ཉིད་ལྷག་པར་དྲན།།
སེར་ར་ནས་མེེ་སོར་ཡོང་བའི་ལམ་བར་གྱི་འགྲུལ་སྐྱེལ་རླངས་འཁོར་ནང་དུ་བྲིས།།༢༠༡༠་༦་༡༦དགོང་མོར་མེ་འཁོར་ནས་དྲ་ཐོག་ན་འཇོག