གཞོན་ལྷན་གྱིས་མ་འོངས་པའི་ལས་དོན་བྱེད་ཕྱོགས་སྐོར་ལ་བགྲོ་གླེང།

སྐབས་དེར་༧གོང་ས་མཆོག་གིས་ཚོགས་པ་གཉིས་ཀྱི་ཆབ་སྲིད་ཀྱི་ལངས་ཕྱོགས་མི་གཅིག་ཀྱང། ཕན་ཚུན་འཆམ་མཐུན་དང། བསམ་ཚུལ་བརྗེ་ལེན་གྱིས་བགྲོ་གླེང་སོགས་བྱས་ན་ཡག་པོ་ཡོད་སྐོར་གྱི་བཀའ་སློབ་གནང་རྗེས། ཚོགས་མི་ཚོའི་བཀའ་འདྲི་ལ་ལན་འདེབས་གནང་ཡོད་འདུག

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་༡༤ པ་ད་ལྟ་འཚོག་བཞིན་ཡོད་པ་དང། ཚོགས་ཆེན་འདིའི་ཐོག་བོད་ཀྱི་གཞོན་ལྷན་གྱི་སྐབས་༡༣ པའི་ལོ་གསུམ་རིང་གི་ལས་དོན་ལ་བསྐྱར་ཞིབ་དང། མ་འོངས་པའི་ལོ་གསུམ་རིང་ལས་དོན་བྱེད་ཕྱོགས་ལ་བགྲོ་གླེང་དང་གྲོས་ཆོད་འཇོག་གི་ཡོད་པ་རེད།
ཟླ་འདིའི་ཚེས་༢ ཉིན་ཚོགས་འདུ་འགོ་འཛུགས་དང། ཚེས་༣ ཉིན་དབུས་དང་ས་གནས་ཀྱི་ལས་བསྡོམས་ཐོག་བགྲོ་གླེང་དང་བསྐྱར་ཞིབ་བྱས་ཡོད་པ་རེད། ཚེས་༥ ཉིན་གཞོན་ལྷན་གྱི་ཚོགས་ཆེན་ཐོག་བོད་ནང་གི་ཆབ་སྲིད་བཙོན་པ་གློད་གྲོལ་ཡོང་ཐབས་དང། དེ་བཞིན་བོད་ནང་གི་ཁོར་ཡུག་ལ་རྒྱ་ནག་གིས་གཏོར་བཤིག་ཚབས་ཆེན་གཏོང་བཞིན་པ་དེ་སྔོན་འགོག་གི་ལས་འགུལ་སྤེལ་ཕྱོགས་སོགས་ཀྱི་ཐད་བགྲོ་གླེང་གནང་ཡོད་པ་རེད།    
གཞོན་ལྷན་གྱི་ཚོགས་ཆེན་ཐེངས་༡༤ པ་དེ་ཟླ་འདིའི་ཚེས་༨ ཉིན་མཇུག་བསྒྲིལ་གྱི་ཡོད་པ་དང། ཐེངས་འདིར་གཞོན་ལྷན་གྱི་དབུས་རྒྱུན་གསར་པ་འོས་འདེམས་བྱེད་དགོས་ཀྱི་ཡོད་པ་རེད།
བོད་ཀྱི་གཞོན་ནུ་ལྷན་ཚོགས་ནི་བཙན་བྱོལ་སྤྱི་ཚོགས་ནང་གི་ཚོགས་པ་ཆེ་ཤོས་དང། རང་བཙན་འཐབ་རྩོད་ཀྱི་སྒྲིག་འཛུགས་ཆེ་ཤོས་དེ་ཡིན་པས། བོད་མི་ཡོངས་དང། སྒོས་སུ་རང་བཙན་འཐབ་རྩོད་པ་ཚོས་གཞོན་ལྷན་གྱི་སྒྲིག་འཛུགས་དང། དབུས་རྒྱུན་དེ་གནད་འགག་ཆེན་པོར་བརྩི་ཡི་ཡོད་པ་རེད།།{jcomments on}