བརྩེ་གདུང་གི་ཚེ་སྲོག
ལོ་ཡག་སྡེ་བ་ཟེར་བའི་གྲོང་པ་ཆུང་ཆུང་དེའི་ནང་རིགས་རྒྱུད་བཟང་ཞིང་འབྱོར་བའི་ཕྱུག་པའི་སྟོབས་ལྡན་ཟེར་བ་དང༌། ཆུ་ལོག་སྡེ་བ་ནས་ཡིན་པའི་བུ་མོ་ཟངས་མཚོ་བྱ་བ་གཉིས་ཆུང་དུས་ནས་ཕ་མ་གཉིས་ཀྱིས་བཙན་གྱིས་གཉེན་བསྒྲིགས་ནས་མི་ལོ་ཧྲིལ་པོ་ལྔ་བཅུའི་མཚམས་སུ་རྒལ་ནའང༌། ད་དུང་ཕྲུ་གུ་མ་སྐྱེས། དེ་ནི་ཕན་ཚུན་སེམས་ཁམས་མ་མཐུན་པས་རྐྱེན་གྱི་ཡིན་ནམ། ཡང་ན་ཁོ་གཉིས་བཙན་དབང་གི་མདུན་ལམ་དེ་མ་དགའ་བའི་རྣམ་འགྱུར་ཡིན་ནམ། ཡང་ན་གཞན་ཞིག་རེ་སྒུག་གིས་སྟོང་བསམ་ངང་དུ་ལུས་པ་ཡང་ཡིན་སྲིད། གང་ལྟར་ཁོ་གཉིས་ཕྲུ་གུ་སྐྱེ་རྒྱུའི་དོན་དུ་སྨན་པ་བསྟེན་གཏུག་བྱེད་མྱོང་མེད་ལ། ལུས་ཀྱི་སྒྲིབ་པ་སྦྱོང་ཕྱིར་ཡར་མཆོག་གསུམ་ལ་མཆོད་འབུལ་དང༌། མར་ངན་སློང་ལ་ཕན་པའི་ཟས་སྣ་གཅིག་དང་གོས་ལྷེབ་ཙམ་ཞིག་དེ་བས་སྦྱིན་མྱོང་མེད། དེ་ནི་བཟའ་ཟླའི་ནོར་ལ་སྲིད་ཆེ་བས་མཆོད་འབུལ་སྦྱིན་གཏོང་མི་བྱེད་པར། ད་དུང་སྟོབས་ལྡན་ལ་བཀག་འགོག་ཁོ་ན་བྱེད་ཀྱི་ཡོད།
མུ་འགོད།