སྦེལ་ཀོབ་ཁུལ་གྱི་འོས་བསྡུའི་དཀའ་ངལ།
དེ་ཡང་ཉིན་འདིར་སྔ་དྲོ་སྦེལ་ཀོབ་གཞིས་ཆགས་གསར་རྙིང་གཉིས་སུ་ཐེངས་འདིའི་བཀའ་སྤྱིའི་སྔོན་འགྲོའི་འོས་བསྡུ་བྱས་ཡོད་པ་དང་། གོ་སྒྲིག་གི་ངོས་ནས་བཤད་ན་གསང་བའི་འོས་བསྡུ་ཞིག་གི་ངོ་བོར་འོས་བསྡུ་བྱེད་ཐུབ་ཡོད་པ་མ་རེད། དེ་ཡང་མང་ཚོགས་ཚང་མས་དུས་གཅིག་ཏུ་ཕན་ཚུན་སྐད་ཆ་ཤོད་བཞིན་དང་། སུ་ལ་འོས་བླུག་དགོས་མིན་འདྲི་བཞིན་འོས་བླུག་ཡོད། ཡིན་ནའང་ཐེངས་འདིར་མང་ཚོགས་ཀྱི་ངོས་ནས་རང་ཚུགས་གང་འཚམས་བཟུང་འདུག་ལ། མི་མང་པོ་ཞིག་གིས་རང་ངོས་ནས་སོ་སོའི་འདོད་པའི་མི་རེ་གཉིས་ཀྱི་མིང་ལས་བྲི་གི་མི་འདུག ཉིན་འདིར་སྔ་དྲོ་ཆུ་ཚོད་ ༨ དང་ ༩ ནས་འགོ་འཛུགས་ཀྱིས་དགོང་མོ་ཆུ་ཚོད་ལྔ་པ་བར་འོས་བླུག་ཡོད་ལ། ཉིན་གང་པོར་འོས་བླུག་མཁན་གྱི་མི་འཚང་ཀ་ཤིག་ཤིག་བྱུང་ཡོད་ཅིང་། ཉིན་འདིར་རྒྱ་གར་ལྷོ་ཕྱོགས་མེ་སོར་གྲོང་ཁྱེར་གྱི་མཐོ་སློབ་ཀྱི་སློབ་མ་སྐོར་ཅིག་ས་གནས་སུ་འོས་བསྡུ་ཚོགས་ཆུང་མེད་སྟབས་ཆུ་ཚོད་གཉིས་ལྷག་གི་ལམ་ཐག་བརྒྱུད་ནས་སྦེལ་ཀོབ་གཞིས་ཆགས་སུ་འོས་བླུག་པར་འབྱོར་འདུག་ལ། ཁོང་ཚོ་མང་ཆེ་བའི་དོ་སྣང་དེ་བཀའ་ཁྲིའི་འོས་བསྡུ་ལ་བྱེད་ཀྱི་འདུག གཞན་ཡང་ཉིན་འདིར་གོ་ཐོས་བྱུང་དོན་ལ། ཕ་མ་སྐོར་ཅིག་གིས་བུ་ཕྲུག་ལ་མི་འདིར་འོས་བླུག་དགོས་སྐོར་སོགས་བརྗོད་སྐབས། བུ་ཕྲུག་ཚོས་སུ་ལ་བླུག་མིན་དེ་མི་སྒེར་གྱི་ཐོབ་ཐང་ཞིག་ཡིན་པས་བྱུས་ཏོག་མ་བྱས་ན་ཡག་པོ་ཡོད་རེད་ཅེས་བཤད་ཚུལ་འདུག་པ་དང་། ཡང་ཁྱོ་ག་ཞིག་གིས་སྤྱི་འཐུས་འོས་མིང་བཏོན་ཏེ་འདི་ཚོ་བླུག་ན་ཞེས་ལབ་དུས་བཟའ་ཟླས་ཁྱོ་གས་བཏོན་པའི་ནང་ནས་ཁ་ཤས་ཁས་ལེན་བྱས་ཡོད་མི་འདུག ཡང་ཕ་གཅིག་གིས་བུ་མོར་འོས་མི་ངོ་སྤྲོད་བྱེད་སྐབས་བུ་མོ་དེས་བུད་མེད་ཀྱི་མིང་མང་ཙམ་དགོས་པའི་ཨུ་ཚུགས་བྱས་སྟབས་གློ་བུར་དུ་བུད་མེད་ཁག་གི་མིང་དང་། ཕ་ཡུལ་སོགས་བརྩད་གཅོད་བྱེད་དགོས་བྱུང་ཡོད་འདུག དེ་ལྟར་སྤྱི་ཡོངས་ཀྱི་ཆ་ནས་ཐེངས་འདིའི་འོས་བསྡུའི་ནང་ཆ་ཤས་གང་ལེགས་བླངས་འདུག ཡིན་ནའང་སྦེལ་ཀོབ་བོད་ཁྱིམ་ལ་མཚོན་ན། ལོ་ཚོད་དང་རང་དབང་གཅེས་འཛིན་ལག་དེབ་གཉིས་ཀའི་ཆ་རྐྱེན་ཚང་བའི་སློབ་མ་ཕལ་ཆེ་བས་འོས་བསྡུའི་ནང་ཆ་ཤས་ལེན་ཐུབ་མེད་ལ། ཉིན་འགའི་སྔོན་དུ་སློབ་ཕྲུག་སྐོར་ཅིག་ས་གནས་འོས་བསྡུ་ཚོགས་ཆུང་གི་ཚོགས་མི་དང་འབྲེལ་བ་བྱས་པ་བརྒྱུད་དབུས་འོས་བསྡུའི་འགན་འཛིན་ལ་འབྲེལ་བ་བྱས་ཏེ་འོས་འཕེན་པ་དང་དེབ་སྐྱེལ་གཉིས་ཀ་དུས་གཅིག་ཏུ་ཡོང་ཐབས་བྱས་འདུག་ཀྱང་དབུས་འོས་བསྡུ་ལས་ཁང་གིས་ཁས་ལེན་བྱས་ཡོད་མི་འདུག དེར་བརྟེན་སྔོན་འགྲོའི་འོས་བསྡུའི་ཉིན་སློབ་མ་སྐོར་ཅིག་གིས་དེབ་སྐྱེལ་བྱེད་མ་ཐུབ་པའི་བོད་མིའི་རང་དབང་གཅེས་འཛིན་ལག་དེབ་བཅོ་ལྔ་བཅུ་དྲུག་ལག་ཏུ་བཟུང་ནས་སྦེལ་ཀོབ་གཞིས་གྲོང་དང་པོར་འགྲོ་བཞིན་འདུག ཐེངས་འདིར་དེབ་སྐྱེལ་གྱི་གོ་སྐབས་ཤོར་བའི་སློབ་མ་ཁག་གིས་བསམ་ཚུལ་གསུང་དོན་ལ། སྤྱིར་དུས་རྒྱུན་ཡིན་ན་རྩེད་མོ་རྩེ་ས་དང་། བོད་དོན་གློག་བརྙན་ལྟ་བ་ཚུན་ཆད་ལ་བོད་ཁྱིམ་སྒྲིག་འཛུགས་བརྒྱུད་འགྲོ་གི་ཡོད་པ་རེད། སྒྲིག་འཛུགས་ཀྱིས་སྣེ་ཁྲིད་བྱེད་ཀྱི་ཡོད་རེད། ཡིན་ནའང་ད་ལན་དེ་གནང་མ་སོང་ཟེར་གྱི་འདུག་ལ། གནས་ཚུལ་འདི་ལ་ཕྱིར་བལྟས་བྱེད་སྐབས་ཟླ་འགའི་དུ་ང་ཚོའི་སློབ་གྲྭའི་འཛིན་གྲྭ་བཅུ་གཉིས་པའི་སློབ་མ་ཚོས་སློབ་གྲྭའི་ནང་བཀའ་ཁྲི་སུ་ལ་རྒྱབ་སྐྱོར་བྱེད་ཀྱི་ཡོད་མེད་སྐོར་ཤོག་བུ་བཀྲམ་ནས་ཚོད་ལྟའི་ཉམས་ཞིབ་ཞིག་བྱས་པའི་མཐའ་འབྲས་སུ། དགེ་ལས་མང་ཆེ་བས་བཀྲས་མཐོང་བསྟན་འཛིན་རྣམ་རྒྱལ་ལགས་དང་། སློབ་མ་བརྒྱ་ཆ་ ༨༠ ཡིས་མཁས་དབང་བློ་བཟང་སང་གེ་ལ་རྒྱབ་སྐྱོར་བྱེད་ཀྱི་ཡོད་པའི་གསལ་བསྒྲགས་སློབ་མའི་འདུས་ཚོགས་ནང་གཏམ་བཤད་བྱས་པ་རེད། གནས་ཚུལ་འདི་ཚོ་སློབ་གྲྭའི་ངོས་ནས་ང་ཚོར་ལམ་སྟོན་དང་གསལ་བཤད་ཡག་པོ་མི་བྱེད་པའི་རྒྱུ་རྐྱེན་དུ་གྱུར་འདུག་སྙམ་གྱི་ཡོད། ཅེས་བཤད་ཀྱི་འདུག་ལ། གནས་ཚུལ་འདིའི་ཐད་བོད་ཁྱིམ་འགན་འཛིན་གྱིས་གསལ་བཤད་གནང་དོན་ལ། ཐེངས་འདིའི་འོས་བསྡུའི་དེབ་སྐྱེལ་དེ་བཞིན་རང་ངོས་ནས་བྱེད་དགོས་པ་ཞིག་ཡིན་སྟབས་གསལ་བསྒྲགས་འབྲེལ་ཡོད་ལས་བྱེད་བརྒྱུད་བཏང་བ་ཡིན། ལས་བྱེད་ཚོ་ནི་དུས་རྒྱུན་རང་དབང་གཅེས་འཛིན་ལག་དེབ་ཀྱི་དཔྱ་ཁྲལ་དང་འབུལ་བབ་བོད་ཁྱིམ་ལས་ཁུངས་བརྒྱུད་འབུལ་བསྡད་ཀྱི་ཡོད་སྟབས་ཐེངས་འདིར་ཡང་དེབ་སྐྱེལ་དེ་བཞིན་ལས་ཁུངས་ཀྱི་ངོས་ནས་བྱས་ཡོད་སྐོར་འགྲེལ་བརྗོད་གནང་གི་འདུག་ལ། སློབ་མ་ཚོས་འོས་བསྡུའི་དེབ་སྐྱེལ་བྱེད་ཡག་ཡོད་པའི་སྐབས་སུ་དེབ་སྐྱེལ་བྱེད་ཡག་གི་ཆེད་དུ་སློབ་མར་དེབ་སྐྱེལ་བྱེད་ཕྱོགས་ཀྱི་ལམ་སྟོན་དང་དམིགས་བསལ་དུས་ཚོད་བཏོན་ཡོད་མེད་ཐད་བོད་ཁྱིམ་འགན་འཛིན་གྱིས་བརྗོད་དོན་ལ། ང་ཚོས་ལམ་སྟོན་གྱི་ལས་རིམ་སྤེལ་བ་ཏན་ཏན་བྱུང་ཡོད་མ་རེད། ང་ཚོའི་ངོས་ནས་འོས་བསྡུའི་དེབ་སྐྱེལ་བྱེད་ཡག་གི་ཆེད་དུ་དམིགས་བསལ་དུས་ཚོད་བཏོན་མེད། ཅེས་འགྲེལ་བརྗོད་གནང་སོང་། ཐེངས་འདིའི་བོད་ཁྱིམ་གྱི་གནས་ཚུལ་ལ་ལྷོ་ཕྱོགས་ཁུལ་གྱི་སེར་སྐྱ་མང་ཚོགས་ལ་ཚོར་སྣང་ཧ་ཅང་ཆེན་པོ་འདུག་ལ། གནས་ཚུལ་གང་ཡིན་གསལ་པོ་ཤེས་རྟོགས་ཆེད་གུས་པ་གསར་འགོད་པ་ཡིན་སྟབས་ཉིན་གཅིག་གི་ནང་ཁ་པར་ཐེངས་མང་བཏང་བྱུང་ལ། གནས་ཚུལ་དངོས་གང་འདྲ་ཡིན་མིན་སྐད་ཆ་འདྲི་གི་འདུག
