འབྲས་བློ་གླིང་དུ་ཆོས་ཚན་ཟུང་འབྲེལ་གྱི་ཟབ་སྦྱོང།
ཟབ་སྦྱོང་དེའི་ཐོག་སྐུ་མགྲོན་གཙོ་བོ་མོན་གྷོ་ས་གནས་གཞིས་འགོ་དཔལ་ལྡན་དོན་གྲུབ་དང་འབྲས་སྤུངས་ཁྲི་པ་རིན་པོ་ཆེ། དགའ་ལྡན་ཤར་བྱང་གཉིས་དང་འབྲས་སྤུངས་བློ་གསལ་གླིང་སྒོ་མང་། རྭ་སྟོད། བཙུན་དགོན་བྱང་ཆུབ་ཆོས་གླིང་སོགས་གྲྭ་ཚང་ཁག་གི་མཁན་རིན་པོ་ཆེ་རྣམས་དང་དགེ་སྐོས་ཕྱག་མཛོད་རྣམ་པ།དེ་བཞིན་ཕྱི་རྒྱལ་ནས་ཕེབས་པའི་ཚན་རིག་ཟབ་ཁྲིད་པ་རྣམ་པ་དང། གྲྭ་ཚང་ཁག་ནས་ཕེབས་པའི་སློབ་མ་བདུན་ཅུ་དོན་གཉིས་བཅས་མཉམ་ཞུགས་གནང་ཡོད་པ་རེད།
དེ་ཡང་ཐོག་མར་ས་གནས་གཞིས་འགོ་དཔལ་ལྡན་དོན་གྲུབ་ལགས་དང་ཚན་རིག་ཟབ་སྦྱོང་དེའི་སྦྱིན་བདག་འཇར་མན་ནས་ཕེབས་པའི་སྐུ་ཞབས་ཁི་རི་སི་ཀྲོབ་ཝོན་སྦོ་རོན་ལགས་དང་། སྐུ་ཞབས་ཁི་རི་སི་ཀྲོབ་སྦུ་རུན་ལགས་བཅས་ཀྱིས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེའི་མདུན་དུ་ཁ་བཏགས་དང་སྣང་གསལ་མར་མེ་སྒྲོན་འབུལ་ཀྱིས་མཛད་སྒོ་དབུ་འཛུགས་གནང་སོང་ལ། རིམ་པས་སྐུ་མགྲོན་གཙོ་བོ་དག་གིས་ཚན་རིག་ཟབ་སྦྱོང་དེ་དང་འབྲེལ་བའི་སྐོར་ལ་ལམ་སྟོན་གསུང་བཤད་གནང་དོན། ཚན་རིག་གལ་ཆེན་པོ་ཡིན་པ་དང་༧གོང་ས་མཆོག་གི་དགོངས་གཞི་ཡིན་པ་སྨྲ་བསམ་བརྗོད་མེད་རེད། ཡིན་ཡང་ང་ཚོས་ཕྱི་མིག་ཅིག་བལྟས་ན་ཕལ་ཆེར་ལོ་ལྔ་བཅུའི་སྔོན་ལ་བོད་ཀྱི་ནང་བསྟན་དགོན་པ་ཞིག་གི་ནང་འདི་ལྟ་བུའི་ཚན་རིག་དང་ནུབ་ཕྱོགས་ཀྱི་ལྟ་གྲུབ་བཤད་ས་ཞིག་ཡོད་མེད་ང་རང་ཚོས་བསམ་ཞིབ་བྱེད་རྒྱུ་ཞིག་རེད། ད་ལྟའི་ཆར་༧གོང་ས་སྐྱབས་མགོན་ཆེན་པོའི་དགོངས་པ་གུ་ཡངས་སྒམ་དཀྱེལ་ཆེ་བ་འཛམ་གླིང་ཡོངས་ཁྱབ་ཀྱི་དབུ་ཁྲིད་ཅིག་ཆགས་པ་ནང་བཞིན་མི་རིགས་ཡོངས་རྫོགས་རྡོག་རྩ་གཅིག་ཏུ་སྒྲིལ་ཐུབ་པའི་ནུས་པ་ཡོད་པའི་དབུ་ཁྲིད་ཅིག་གིས་ལམ་སྟོན་བཟང་པོའི་འོག ང་ཚོ་ནང་པའི་ཆོས་སྡེར་སྔར་མེད་པའི་གོ་སྐབས་ཤིག་གསར་དུ་རག་གི་ཡོད་པ་ནི་མི་རབས་འདིའི་བསོད་ནམས་ཀྱི་སྒོ་སྐལ་ཆེ་ཤོས་ཤིག་ལ་ངོས་འཛིན་བྱེད་ཀྱི་ཡོད། ༧གོང་ས་སྐྱབས་མགོན་ཆེན་པོའི་དགོངས་གཞི་གཞིར་བཟུང་ནང་ཆོས་དང་ཚན་རིག་གཉིས་མཉམ་འབྲེལ་ཐོག་སློབ་སྦྱོང་བྱེད་རྒྱུའི་དུས་ཚོད་དང་གོ་སྐབས་ཁྱེད་རང་ཚོར་དམིགས་བསལ་རག་པ་དེ་ཆུད་ཟོས་སུ་མི་གཏོང་བར་རིག་པས་བརྟག་ཅིང་དཔྱད་ནས་བླང་དོར་དབྱེ་འབྱེད་ཀྱི་བློ་སྔོན་སོང་ཐོག་དོན་དང་ལྡན་པའི་སྦྱང་བརྩོན་གནང་རོགས་ཞེས་གསུངས་སོང་།། མོན་གྷོ་གསར་འགོད་པས།
