དགེ་ལུགས་སྤྱི་འཐུས་ནས་དགོངས་ཞུ།

དགོངས་ཤོག་ནང་འཁོད་དོན། ཕྲན་སྤྱི་འཐུས་བེ་རི་དགེ་བཤེས་འཇིགས་མེད་དབང་རྒྱལ་དགེ་ལུགས་སྤྱི་འཐུས་སྔོན་འགྲོའི་སྐབས་མང་ཚོགས་ཀྱིས་གདེང་འཇོག་ཆེན་པོས་འོས་འཕེན་གནང་བ་ལ་བརྟེན་ནས་འོས་གྲངས་རྩེ་ཏོག་གྲས་སུ་སླེབས་འདུག་པས། གལ་ཏེ་དངོས་གཞིའི་འོས་སུ་བསྡད་ན་རྒྱལ་ཁ་ཐོབ་མིན་ཐེ་ཚོམ་མི་དགོས་མོད། དེ་ལྟ་ན་ཡང་ཐེངས་འདིར་ཕྲན་སྤྱི་འཐུས་དངོས་གཞིའི་འོས་ཞུགས་ལས་དགོངས་ཞུ་མི་གཏོང་མཐུ་མེད་བྱུང་བའི་རྒྱུ་མཚན་དོན་ཚན་ཁ་ཤས་ཞུ་དགོས་བྱུང་།

༡༽ དངོས་གཞི་འོས་གྲོགས་ཚོ་དགེ་ལུགས་རྒྱུགས་སྤྲོད་ཕེབས་མཁན་ལ་བརྟེན་རྒྱུན་ལས་བཞུགས་རྒྱུ་ཁག་བའི་ཐོག་ཕྲན་ཡང་རྒྱུན་ལས་བསྡད་ལོང་མེད་པ།
༢༽ འོས་འགྲོ་བང་རིམ་རྗེས་མ་ཆེས་དམིགས་བསལ་བའི་སྐྱེས་ཆེན་ཡིན་པས་འོས་ཁོངས་སུ་ཚུད་ཐབས།
༣༽ གྲྭ་ཚང་རིན་པོ་ཆེའི་ཆོས་འབྱུང་ཛམྦུའི་གསེར་གྱི་འཁྲི་ཤིང་གླེགས་བམ་གསུམ་བཞི་གཉིས་གང་མགྱོགས་རྩོམ་གྲུབ་པ་དགོས་པའི་ཕྱག་བྲིས་ནན་ཆེ་གནང་བ་མ་ཟད། དགའ་ལྡན་ཁྲི་རིན་པོ་ཆེ་གཙོས་རྩ་བའི་བླ་མ་དུ་མའི་བཀའ་དགོངས་ཡིན་པས་མཇུག་སྐྱེལ་དགོས་པ།
༤༽དགའ་ལྡན་ཁྲི་ཐོག་བརྒྱ་པའི་རྣམ་ཐར་རྩོམ་རྒྱུ། ༸གོང་ས་མཆོག་ནས་(༢༠༠༥)ལོར་བཀའ་གནང་བའི་ས་བོན་ཙམ་གྲུབ་ཀྱང་། དངོས་གཞི་མ་ཚར་བས་གང་མགྱོགས་རྩོམ་དགོས་པ།
༤༽ ད་ལྟའི་ཆར་ཝཱ་ཎའི་བོད་ཀྱི་གཙུག་ལག་སློབ་གྲྭ་ཆེན་མོར་བོད་ཀྱི་རྩོམ་རིག་ལོ་རྒྱུས་ཀྱི་ཉམས་ཞིབ་པར་གདན་ཞུས་གནང་དོན་ལྟར། ལོ་ཤས་རིང་ཉམས་ཞིབ་ཀྱི་དེབ་དེ་ཉིད་རྩོམ་པའི་ཞོར་ལ། དགེ་འོས་(B.ed)འཛིན་དགེ་སོགས་བྱེད་བཞིན་པ། ཝཱ་ཎར་སྡོད་རིང་གོང་གསལ་ལས་འཕྲོ་དེ་དག་མཇུག་སྐྱེལ་གྱི་དུས་ཚོད་ངེས་ཅན་ཡོད་པ་བཅས་ལ་བརྟེན་ནས་ཡིན། དེར་བརྟེན་ད་ཐེངས་འོས་གཞིའི་མཚན་གཞུང་ལས་ཕྲན་ཕྱིར་འཐེན་གནང་རོགས་ཞུ་རྒྱུ་ཡིན།

མཐའ་དོན། འཕགས་མཆོག་ཕྱག་ན་པདྨོའི་ཐུགས་ཀྱི་གཞེད་པ་མཐའ་དག་ལྷུན་གྱིས་གྲུབ་པ་དང་། བོད་དོན་བདེན་པའི་ཉི་མ་མྱུར་བར་འཆར་བའི་སྨོན་འདུན་བཅས།
དགེ་མིང་ཟུར་ཙམ་འདྲེན་པ་བེ་རི་འཇིགས་མེད་ཀྱིས། གནས་མཆོག་ཝཱ་ཎའི་གཙུག་ལག་སློབ་གྲྭ་ཆེན་མོ་ནས། གུས་འདུད་བཅས ལྕགས་སྟག་(༢༠༡༡)ལོ་ སྤྱི་ཟླ  ༡ ཚེས་ ༧ ཉིན་ཕུལ་ཞེས་འཁོད་འདུག །

{jcomments on}