ཚོགས་པ་ཁག་ཉི་ཤུས་ཨ་རིའི་སྲིད་འཛིན་ལ་ཞུ་འབོད་བྱས་འདུག
ཟླ་འདིའི་ཚེས་༡༧ ཉིན་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། རྒྱ་ནག་གི་སྲིད་འཛིན་ཨ་རིར་སླེབས་ལ་ཉེ་བ་དང། ཨ་རིའི་ས་གནས་གཞོན་ནུ་དང་བོད་རང་དབང་སློབ་ཕྲུག་ཚོགས་པ། བོད་དོན་རྒྱབ་སྐྱོར་ཚོགས་པ་ཁག ཡུ་གུར་རྒྱལ་སྤྱིའི་མང་གཙོ་ཚོགས་པའི་ལས་འགུལ་བ། རྒྱ་ནག་མང་གཙོ་ཚོགས་པ། རྩ་རླུང་ཆོས་འཁོར་སྒོམ་སྒྲུབ་ཚོགས་པ། དེ་བཞིན་ཨ་རྒྱ་གཉིས་ཀྱིས་ལྷོ་བྱང་ཀོ་རི་ཡའི་དམག་དོན་ལ་ཐེ་བྱུས་བྱས་པ་ལ་ངོ་རྒོལ་བྱེད་མཁན་སོགས་ཀྱིས། ད་ཐེངས་རྒྱ་ནག་གི་སྲིད་འཛིན་ཨ་རིར་སྐོར་བསྐྱོད་ཡོང་བ་དང་བསྟུན་ནས་ངོ་རྒོལ་གྱི་ལས་འགུལ་ཤུགས་ཆེན་སྤེལ་འཆར་ཡོད་པ་དང། དེ་བཞིན་བོད་དང་བོད་དོན་རྒྱབ་སྐྱོར་ཚོགས་པ་ཁག་ཉི་ཤུ་ཙམ་གྱིས། ཨ་རིའི་སྲིད་འཛིན་སྐུ་ཞབས་ཨོ་བྷ་མར་རྒྱ་ནག་གི་སྲིད་འཛིན་ཧུའུ་ཅིང་ཐའོ་ཨ་རིར་སྐོར་བསྐྱོད་ཕེབས་པ་དང་བསྟུན་ནས། བོད་དོན་ཐོག་དོན་ཕན་ལྡན་པའི་གླེང་སློང་ཤུགས་ཆེན་གནང་དགོས་པའི་ཞུ་འཕྲིན་ཡང་ཕུལ་ཡོད་པ་རེད།
ཞུ་འཕྲིན་དེའི་ནང་། བོད་དེ་ཨ་རི་དང་རྒྱ་ནག་གཉིས་ཀྱི་བཟང་སྤྱོད་དང་ལོ་རྒྱུས། འཐབ་ཇུས་ཀྱི་རྒྱུ་མཚན་བཅས་དང་ཁ་བྲལ་ཐབས་མེད་པའི་ཆ་ཤས་ཤིག་ཆགས་ཡོད་པ་དང། ཨ་རྒྱ་གཉིས་ཀྱི་ཆེས་མཐོའི་དཔོན་རིགས་ལྷན་འཛོམས་འདིའི་ཐོག ཨ་རིའི་འཛིན་སྐྱོང་གི་ངོས་ནས་བོད་དོན་ཐོག་བཟུང་བའི་གནས་བབ་ཀྱི་འོས་འགན་དང། བོད་ཀྱི་གནད་དོན་ཐད་དོན་དང་ལྡན་པའི་གླེང་སློང་བྱེད་རྒྱུའི་གོ་སྐབས་བཟང་པོ་ཞིག་ཡིན་པས། ཨ་རིའི་གཞུང་འདི་མང་གཙོ་དང་སྨྲ་བརྗོད་རང་དབང་སོགས། ནུས་པ་ལྡན་པའི་ལམ་ལུགས་དང་རིན་ཐང་བཅས་གསལ་སྟོན་བྱེད་དགོས་ཞེས་བཀོད་ཡོད་པ་དང།
དེ་བཞིན་ཉེ་དུས་བོད་ནང་གི་སློབ་ཕྲུག་ཚོས། བོད་ཡིག་སློབ་ཚན་རྒྱ་ཡིག་ཐོག་བསྒྱུར་རྒྱུའི་སྲིད་ཇུས་ལ། སྐད་ཡིག་རང་དབང་གི་ཞི་རྒོལ་བྱས་པའི་གནད་དོན་ཐོག་ད་ཐེངས་གླེང་སློང་དགོས་ཚུལ་དང། བོད་ནང་ཁོར་ཡུག་འགྱུར་ལྡོག་གིས་བོད་ཀྱི་གཙང་པོ་རྣམས་རྒྱུགས་ཡུལ་གྱི་རྒྱལ་ཁབ་ཁག་ཏུ་དཀའ་ངལ་མང་དུ་འགྲོ་བཞིན་ཡོད་པས། བོད་ཀྱི་ཁོར་ཡུག་གི་སྐོར་ལ་གླེང་སློང་དགོས་ཚུལ་སོགས་ཀྱི་རེ་འདུན་མང་པོ་ཞིག་བཏོན་ཡོད་རུང། ཟླ་འདིའི་ཚེས་༡༩ ཉིན་ཨ་རྒྱ་གཉིས་ཀྱི་སྲིད་འཛིན་དངོས་སུ་ཐུག་འཕྲད་སྐབས། བོད་དང་འབྲེལ་བའི་གནད་དོན་ཐད་ལ་གླེང་སློང་བྱེད་རྒྱུ་ཡིན་མིན་ལ་ཐེ་ཚོམ་བྱེད་མཁན་ཡང་མང་དུ་འགྲོ་བཞིན་ཡོད་པ་རེད།།
