གདན་ས་འབྲས་སྤུངས་མཇལ་རྗེས།

མང་པོའི་འཚོ་བ་སྣུམ་པོ་ཁུར་དུ་བླངས་ནས།། 
བཟའ་བཏུང་ཚོང་གི་རིན་གོང་ཆུ་ཁར་གཡུག་སྟེ།། 
འདོད་ཆུང་གྲྭ་བའི་འཚོ་ཐབས་གནའ་མར་བསུས་པའི།། 
འདུས་ཚོགས་དགེ་འདུན་རྒྱས་པའི་གླིང་ཆེན་ཁྲ་མོ།།

གླེགས་བམ་སྔས་སུ་བསྙལ་བའི་ངང་ཚུལ་མཛེས་པོ།།
གནད་དོན་སེམས་ལ་རྒྱན་པའི་ལམ་ལུགས་ཡག་མོ།། 
ཐམས་ཅད་བོད་ལ་སེམས་པའི་གཤིས་ལུགས་བཟང་པོ།།
དྲན་ན་བློ་ཁ་བདེ་བའི་འབྲས་སྤུངས་ཆོས་སྡེ།།

ལྷབ་ལྷུབ་མཆོད་པའི་རྒྱན་ཕྲེང་མཁའ་ལ་འཕྱོ་ཞིང་།། 
དྷི་སྐད་རྩོད་པའི་སྒྲ་དབྱངས་ཕྱོགས་སུ་བཀྱེ་བའི།། 
རིགས་པའི་ཚ་རླབས་འཕྱུར་བའི་གདན་ས་ཆེན་པོ།། 
ང་ཡི་རིགས་པའི་གྲོགས་ཀྱི་བློ་ཤེད་རྒྱས་ས།།

སྣ་མང་མི་རིགས་འདུས་པའི་ལྡུམ་ར་ཆེན་མོ།། 
བཀུར་སྟིའི་སྣེ་ལེན་ཟབ་པ༷འི་མགྲོན་ས་བཟང་པོ།། 
ཐུ་མིའི་ཡིག་ཚོགས་མོད་པའི་ཁ་བ་དཀར་པོ།། 
ལ་རྒྱའི་ཁ་བ་མཐུག་སའི་འབྲས་སྤུངས་ཆོས་སྡེ།།

༸གོང་མ་ལྷ་ཡི་མེ་ཏོག་ལན་མང་འཐོར་ས།། 
མང་མོས་དཔོན་གྱི་དང་པོ་བྱེས་ནས་ཕེབས་ས།། 
མ་འོངས་འདུག་ཆུས་རྩོད་པའི་གྲྭ་རྒོད་འཚར་ས།། 
མཐོང་ན་སྤོབས་པ་སྩོལ་བའི་འདུས་ཚོགས་ཆེན་མོ།།

ཕ་སྐད་གསེར་གྱི་པ་ཊ་རྒྱན་དུ་འཆང་ས།། 
རིག་གཞུང་དུང་དཀར་གཡས་འཁྱིལ་རྒྱུན་དུ་འབོད་ས།། 
ཚན་རྩལ་རིག་པའི་སྣང་བ་གཡང་དུ་འགུགས་ས།། 
མི་རིགས་ཚེ་སྲོག་བཟུང་བའི་ལྕགས་སྐུད་སྦོམ་པོ།།

༣༡་༡་༡༠༡༡ མཚན་མོ་མེ་འཁོར་ནང་དུ་བྲིས།།