ནང་བསྟན་དར་སྤེལ་གཏོང་ཕྱོགས་ཀྱི་བགྲོ་གླེང།

དེ་ནི་ད་བར་ཅོག་ཙེ་སྒོར་མོའི་ཚོགས་འདུའི་རྣམ་པས་བོད་ཀྱི་སྐད་ཡིག་རང་གི་ཐོག་ནས་མཁན་སྤྲུལ་དགེ་བཤེས་ལྷན་ཚོགས་ཀྱི་རིས་མེད་བགྲོ་གླེང་འདི་ལྟ་བུ་ཞིག་གནང་བ་ཐའེ་ཝན་ལ་ཕལ་ཆེར་ཐོག་མ་ལྟ་བུ་ཆགས་ཡོད་འདུག གཙོས་གསེར་ཁྲི་རིན་པོ་ཆེ། གཞུང་དོན་གཅོད་ཁང་གི་ཆོས་དགེ་དགེ་བཤེས་འཇམ་དཔལ་ཆོས་འཛིན། དགེ་བཤེས་ཆོས་ཀྱི་དབང་པོ་སོགས་དགེ་ལུགས་ཀྱི་དགེ་བཤེས་དང་སྤྲུལ་སྐུ། འབྲི་གུང་འགར་རྣམ་གྲོལ་རིན་པོ་ཆེ། སྤྲུལ་བསོད་ནམས་ཆོས་འཕེལ་སོགས་བཀའ་བརྒྱུད་ཀྱི་མཁན་སྤྲུལ་སློབ་དཔོན། དཔལ་ཡུལ་སྨུག་སངས་སྐུ་ཆེན་རིན་པོ་ཆེ། ཞེ་ཆེན་མཁན་པོ་ཨོ་རྒྱན་དྲི་མེད། ཉག་རོང་མཁན་སྤྲུལ་རིན་པོ་ཆེ་སོགས་རྙིང་མའི་ཕྱོགས་ཀྱི་མཁན་སྤྲུལ། སློབ་དཔོན་བསོད་ནམས་ཕུན་ཚོགས་སོགས་ས་སྐྱའི་སློབ་དཔོན་ཁག་ཅིག་བཅས་ཀྱི་ཐོག་ཞིབ་འཇུག་ཚོགས་པ་རང་གི་རྐང་འཛིན་མཁན་སྤྲུལ་རྣམ་པ་བཅས་ཚུད་པའི་ཆོས་བརྒྱུད་ཆེན་པོ་བཞིའི་མཁན་སྤྲུལ་སློབ་དཔོན་ཉི་ཤུ་རྩ་ལྔ་ཙམ་མཉམ་ཞུགས་གནང་བའི་ཐོག་ནས་བོད་བརྒྱུད་ནང་བསྟན་གྱིས་སྤྱི་ཚོགས་ཀྱི་དགོས་མཁོ་ཇི་ལྟར་བསྐང་རྒྱུ་དང་། ཆོས་ཚོགས་མང་པོ་ཞིག་ཉམས་རྒུད་དུ་འགྲོ་བཞིན་པའི་རྒྱུ་རྐྱེན་ལ་དཔྱད་ནས་མ་འོངས་པར་སྲ་བརྟན་ཡོང་བའི་ཐབས་ལམ་ལ་ཇི་ལྟར་འབད་བརྩོན་བྱ་རྒྱུ། བསྟན་པའི་གོ་རིམ་དང་མཐུན་པའི་ནང་ཆོས་ཇི་ལྟར་སྤེལ་ཚུལ་སོགས་བརྗོད་གཞི་དོན་ཚན་དགུའི་ཐོག་བགྲོ་གླེང་གནང་མཐར། གཙོ་བོ་ཆོས་བརྒྱུད་བར་གྱི་མཐུན་ལམ། ཁྱད་པར་ཡུལ་དུས་དང་མཐུན་པའི་ཀུན་སྤྱོད་གཟབ་ནན་གྱི་ཕྱོགས་ལ་སྔར་ལས་ལྷག་པའི་ཤུགས་སྣོན་ཇི་ལྟར་བྱ་ཕྱོགས་བཅས་ཀྱི་སྐོར་ལ་བགྲོ་གླེང་ཤུགས་ཆེན་བྱས། དེ་བཞིན་ནང་ཆོས་ངོ་སྤྲོད་ཀྱི་དུས་དེབ་དང་སློབ་དེབ་རྩོམ་སྒྲིག་གི་སྐོར་ལ་ཡང་གྲོས་སྡུར་དང་། ཁྱད་པར་ལོ་འགའི་སྔོན་ནས་ཤུགས་ཆེ་རུ་གཏོང་བཞིན་པའི་ཐའེ་ཝན་གྱི་ཚོགས་པ་དང་མི་སྒེར་རེ་ཟུང་གིས་བོད་བརྒྱུད་གསང་སྔགས་དང་བོད་ཀྱི་བླ་གྲྭ་ལ་གཞི་མེད་སྐུར་འདེབས་བྱེད་པའི་བྱེད་སྟངས་ཁག་ལ་གདོང་ལེན་བྱེད་ཕྱོགས་ཐད་དུ་ཡང་བགྲོ་གླེང་བྱུང་ཡོད་ཅིང་། རང་ངོས་ནས་ནང་ཁུལ་སྔར་ལས་ལྷག་པའི་མཉམ་འབྲེལ་བྱ་རྒྱུ་དང་། སྒེར་གྱི་ཡང་དག་པའི་འཚོ་བ་དང་ཡང་དག་པའི་ཆོས་ཀྱི་ངོ་སྤྲོད་སོགས་ཀྱི་བྱ་ཐབས་ལ་སྔར་ལས་ལྷག་པའི་ཤུགས་བསྣན་ཏེ། ཐའེ་ཝན་རྒྱ་ཆེའི་མི་མང་གིས་བོད་ཀྱི་ནང་ཆོས་ཐད་སྔར་ལས་ལྷག་པའི་གོ་རྟོགས་མཐོ་རུ་ཡོང་བ་དང་། མིག་ལྟོས་ལེགས་པོ་ཞིག་བསྐྲུན་རྒྱུ་གལ་འགངས་ཆེ་བའི་དུས་ལ་བསླེབས་ཡོད་པར་དགོངས་ཚུལ་གཅིག་མཐུན་བྱུང་འདུག བགྲོ་གླེང་འདི་ཆོ་ག་ཕྱག་ལེན་ཙམ་མིན་པར་ཁ་ཡོད་ལག་ཡོད་ཀྱི་ཐོག་ནས་ཐུན་མོང་གི་དམིགས་ཡུལ་ཡོད་པའི་བརྗོད་གཞི་ཞིག་གི་ཐོག་ཏུ་འབབ་ཐུབ་པ་བྱུང་ཡོད།

དགོང་མོ་དེར་ཚོགས་པའི་གཙོ་འགན་བཞེས་མཁན་མཁན་སྤྲུལ་རྣམ་པ་ད་ཐེངས་ཐའེ་ཝན་དུ་མཛད་ཕྲིན་སྐྱོང་བཞིན་པའི༸སྐྱབས་རྗེ་རྫོང་སར་རིན་པོ་ཆེའི་མདུན་དུ་ཆེད་གཅར་གྱིས་ཚོགས་པའི་སྐོར་དང་ཁྱད་པར་ཚོགས་འདུའི་སྐོར་གྱི་གྲུབ་དོན་སྙན་སེང་དང། འབྱུང་འགྱུར་ལམ་སྟོན་ཞུས་པར་དགྱེས་བརྩེའི་དབུགས་དབྱུང་དང་ཚད་མཐོའི་བསྔགས་བརྗོད་གལ་ཆེའི་ལམ་སྟོན་བཅས་ཐོབ་ཡོད།

དེ་ཡང་ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པ་འདི་ནི་ཕྱི་ལོ་༢༠༠༩ ལོར་ཐའེ་ཝན་དུ་ས་སྐྱ་བདག་ཆེན་རིན་པོ་ཆེ་དང་རང་གཞུང་ཐའེ་ཝན་དོན་གཅོད་སོགས་ཀྱི་མཐུན་གྱུར་དབུ་བཞུགས་ཀྱི་མཛད་སྒོ་ཟབ་རྒྱས་གནང་བའི་ཐོག་ནས་དབུ་བརྙེས་ཤིང་གཞུང་འབྲེལ་ཚད་ལྡན་དེབ་སྐྱེལ་བྱས་པའི་ཁྲིམས་མཐུན་ཚོགས་པ་ཞིག་དང་། ཆབ་སྲིད་དང་སྒེར་དོན་བཅས་ལ་མ་འདྲེས་པའི་ཐོག་ནས་བོད་བརྒྱུད་བསྟན་པ་ལ་ཞབས་འདེགས་ཞུ་བའི་ཆོས་བརྒྱུད་གྲུབ་མཐའ་རིས་མེད་ཀྱི་ཚོགས་པ་ཞིག་ཡིན། མིག་སྔར་མཁན་པོ་ཚུལ་རྣམ་དང་། ཀཿ་ཐོག་རིག་འཛིན་ཆེན་མོ། སྤྲུལ་སྐུ་ཐུབ་བསྟན་ནོར་བུ། མཁན་པོ་ཆོས་ཉིད་དོན་རྟོགས། མཁན་པོ་ཚེ་བཀྲ་བཅས་ཀྱིས་གཙོ་འགན་འགན་ཁུར་བཞིན་པ་དང་། ཚོགས་གཙོ་དང་དྲུང་ཆེ་རྩིས་གཉེར་སོགས་ཐའེ་ཝན་གྱི་དད་སློབ་ཚོགས་མི་དག་གི་ནང་ནས་འདེམས་བཞིན་ཡོད་པ་རེད། ཚོགས་པ་འདིར་ད་ལྟའི་ཆར་ཚོགས་མི་བརྒྱ་དང་སུམ་ཅུ་ལྷག་ཡོད་པས་ཁྲིམས་ཐོག་ནས་རྒྱལ་ཡོངས་རང་བཞིན་གྱི་ཚོགས་པའི་ངོས་འཛིན་ཐོབ་ཡོད།

ད་བར་སྐད་སྒྱུར་དང་ཚིག་མཛོད་སྐོར་གྱི་ཉམས་ཞིབ་ཚོགས་འདུ་ཐེངས་གཉིས་དང་དེ་མིན་ཞིབ་འཇུག་ཚོགས་འདུ་དང་། དེབ་དང་བརྙན་འཁོར་པར་སྐྲུན་སོགས་ཀྱི་ལས་དོན་གང་ལེགས་སྒྲུབ་བཞིན་ཡོད་པ་དང་མ་འོངས་པར་གོམ་གང་མདུན་སྤོས་ཀྱིས་སྔར་ལས་ལྷག་པའི་ནུས་པ་ཐོན་པའི་ལས་དོན་གང་མང་སྒྲུབ་རྒྱུའི་འཆར་གཞི་ཡོད། དེ་དག་གི་ཁོངས་ནས་གཙོ་བོ་འདི་ལོའི་ཕྱི་ཟླ་དྲུག་པར་རྒྱ་བོད་ནང་བསྟན་རིག་གཞུང་ཉམས་མྱོང་བརྗེ་རེས་ཀྱི་མཁས་པའི་བགྲོ་གླེང་ཞིག་དང་། ཕྱི་ཟླ་དགུ་པར་རྒྱལ་སྤྱིའི་ནང་བསྟན་ཉམས་མྱོང་བརྗེ་རེས་ཀྱི་མཁས་པའི་བགྲོ་གླེང་ཞིག དེ་བཞིན་དུས་ཚོད་ངེས་མེད་ནང་རིས་མེད་སྨོན་ལམ་ཞིག་ཀྱང་འཚོགས་འཆར་ཡོད་པའི་གསལ་བསྒྲགས་བཅས་ཚོགས་ཐོག་རང་དུ་གནང་ཡོད།

ཚོགས་པ་འདིར་སྐད་ཡིག་སུམ་ལྡན་གྱི་དྲ་རྒྱ་ http://www.buddhajnana.orgཡོད་པ་དང་ལོ་རེ་བཞིན་གྱི་ལོ་མཇུག་ཚོགས་མིའི་གྲོས་ཚོགས་དང་ལྟ་ཞིབ་པའི་ཚོགས་འདུ། དངོས་འབྲེལ་དགོས་བབ་ཀྱི་གནས་སྐབས་ཚོགས་འདུ་སོགས་ཀྱང་རིམ་བཞིན་ལག་ལེན་དུ་བསྟར་དང་བསྟར་བཞིན་ཡོད། ཞིབ་ཆ་དྲ་ཚིགས་སོགས་སུ་གཟིགས་རོགས། འོན་ཀྱང་མགོ་བཙུགས་ནས་དུས་ཡུན་རིང་པོ་མ་ལོན་པའི་ཚོགས་པ་ཞིག་གི་ངོས་ནས་ལས་དོན་མང་པོ་ཞིག་བསྒྲུབས་ཟིན་པ་ལས་བསྒྲུབ་རྒྱུ་མང་བ་ལྷག་ཡོད་པ་ང་ཚོས་གསལ་བོར་ཤེས་བཞིན་ཡོད་པས་ཚོགས་པ་འདིར་དོན་ཕན་ལྡན་པའི་རྒྱབ་སྐྱོར་དང་དགོངས་འཆར་སོགས་འཛེམས་ཟོན་མེད་པར་གནང་རོགས་ཞེས་ང་ཚོས་ཡང་ཡང་ཞུ་བཞིན་ཡོད།

གནས་ཚུལ་མཁོ་གཏོང་བ་རྫ་ཚེ་རིང་བཀྲ་ཤིས།

{jcomments on}