ལས་འཆར་ཚོགས་ཆུང་གི་སྙན་ཐོ་བཀླགས་པ།

དེ་ནས་༸གོང་ས་མཆོག་གིས་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་བཟོ་དགོས་པའི་ལམ་སྟོན་བཀའ་ནན་ཕེབས་ཡོད་པ་རེད། དེ་ཡང་༸གོང་ས་མཆོག་གིས། ད་ལམ་བཅའ་ཁྲིམས་བསྐྱར་བཅོས་སྐབས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས་ཤིང༌། ཞེས་ནན་ཏན་དུ་གསུངས་གནང་ཡོད། ཡིན་ནའང་ད་ལན་བཅའ་ཁྲིམས་བཟོ་བཅོས་ཀྱི་ཁ་ཕྱོགས་འདིའི་ཐོག་རྩ་བ་ནས་གོམས་པ་སྤོས་ཡོད་པ་མ་རེད། དེ་ཡང་ད་ལན་བཅའ་ཁྲིམས་བཟོ་བཅོས་ཀྱི་ཁ་ཕྱོགས་ནི། ༸གོང་ས་མཆོག་གིས་བོད་ཀྱི་ཆབ་སྲིད་དབང་ལུང་བརྒྱུད་སྤྲོད་གནང་བ་ཡིན་ནའང་བསྟན་སྲིད་སྤྱི་དོན་ཡལ་བར་འདོར་མི་སྲིད་ཅིང༌། བོད་ཀྱི་རྩ་དོན་སྒྲུབ་ཐབས་དང༌། ཆོས་ཕྱོགས་ཀྱི་བྱེད་སྒོ་མཐའ་དག་རྒྱུན་འཁྱོངས་ངེས་པར་བྱེད་རྒྱུར་ཚང་མས་བློ་གཡེང་མི་དགོས། ཅེས་དང་། བཙན་བྱོལ་བོད་མིའི་སྒྲིག་འཛུགས་འདི་རྒྱུན་གནས་ཐུབ་པ་དང༌། བོད་མིའི་དྲང་བདེན་གྱི་འཐབ་རྩོད་རྒྱུན་སྐྱོང་ཐུབ་པ་ཞིག་དགོས་གལ་ཤིན་ཏུ་ཆེ་ཞིང༌། ཅི་སྟེ་ད་དུང་ལོ་བཅུ་ཕྲག་འགའ་ཤས་མུ་མཐུད་གནས་དགོས་པ་བྱུང་ན་ངོས་ནས་འགོ་ཁྲིད་བྱེད་མ་ཐུབ་པའི་དུས་ཤིག་ངེས་པར་ཡོང་རྒྱུ་ཡིན་པ་ནི་ཚང་མས་ཤེས་གསལ་དང༌། ད་ལྟ་ངོས་རང་བདེ་ཐང་ཡོད་སྐབས་ནས་བཙན་བྱོལ་བོད་མིའི་སྒྲིག་འཛུགས་ཀྱི་འགན་ཁུར་ཆ་ཚང་ྋརྒྱལ་བ་རིན་པོ་ཆེར་བརྟེན་མི་དགོས་པར་རང་ཚུགས་ཐུབ་པ་ཡོང་རྒྱུའི་གོམས་གཤིས་འཇགས་ཐབས་སུ། ལམ་སྲོལ་འདི་ད་ལྟ་ནས་ལག་བསྟར་བྱེད་རྒྱུ་བྱུང་ན་དཀའ་ངལ་འཕྲད་ཚེ་སེལ་ཐབས་སུ་ངོས་ཀྱིས་མཐུན་འགྱུར་བྱེད་ཐུབ། དེ་མིན་འདི་མུར་ལུས་ཏེ་ནམ་ཞིག་གློ་བུར་ངོས་ཀྱི་འགོ་ཁྲིད་མེད་པའི་དུས་སྐབས་ཤར་ཚེ་ཅི་བྱ་གཏོལ་མེད་ཀྱི་གནས་ཚུལ་ཞིག་ཡོང་སྲིད་པས་དེ་འདྲ་མི་ཡོང་ཆེད་ད་ལྟ་ནས་ངེས་པར་ལག་ལེན་བྱེད་དགོས་པ་དེ་བོད་མི་ཡོངས་ཀྱི་གལ་ཆེའི་ལས་འགན་ཞིག་ཏུ་གྱུར་ཡོད། ཅེས་ཡང་ཡང་ནན་ཏན་དུ་གསུངས་པའི་བླ་ན་མེད་པའི་ལམ་སྟོན་ལ་ཡིད་ཆེས་ཡོད་ན་ད་ལན་༸གོང་ས་མཆོག་གི་ལམ་སྟོན་བཞིན་བྱེད་དགོས་པ་ལ་དེ་བཞིན་བྱེད་ཀྱི་མི་འདུག 
དེ་ཡང་༸གོང་ས་མཆོག་གིས་བོད་ཀྱི་ཆབ་སྲིད་ཀྱི་ལས་དོན་ཡོངས་རྫོགས་འགན་ཁུར་བྱེད་དགོས་པ་སྟེ་བོད་ཀྱི་ཆབ་སྲིད་འཐབ་རྩོད་མི་རབས་བརྒྱུད་སྤྲོད་བྱེད་དགོས་པའི་ལམ་སྟོན་སྣང་མེད་དུ་བཏང་ནས་མུ་མཐུད་འགན་ཚང་མ་༸གོང་ས་མཆོག་གིས་ཁུར་དགོས་པའི་ལས་འཆར་ཞིག་བཏོན་ཡོད་པ་དང་གཅིག ༸གོང་ས་མཆོག་གི་ལམ་སྟོན་བཞིན་བཙན་བོད་ཀྱི་ཡུལ་མིའི་སྲིད་གཞུང་བཟོ་རྒྱུ་ལས་ལྡོག་སྟེ་བཙན་བྱོལ་བོད་མི་ཚོའི་བདེ་སྡུག་ལ་བལྟ་རྟོགས་བྱེད་མཁན་གྱི་ཚོགས་སྡེ་བཙན་བྱོལ་བོད་མིའི་སྒྲིག་འཛུགས་ཟེར་བ་དོན་དངོས་སུ་བསྒྱུར་རྒྱུ་དང་གཉིས། ལས་དོན་འདི་གཉིས་༸གོང་ས་མཆོག་གི་བཀའ་དགོངས་དང་མཐུན་གྱི་ཡོད་མེད་དེ་གནད་འགག་ཆགས་ཡོད་པ་རེད།