ཕྱི་ཟླ་ ༤ ཚེས་ ༡༠ བར་ཛ་དྲག་གི་གནས་སྟངས་ཇེ་སྡུག་སོང་བའི་བརྒྱུད་རིམ་མདོར་བསྡུས།
ཕྱི་ཟླ་ ༤ ཚེས་ བརྒྱད་ཡས་མས་ཤིག་ལ་སླར་ཡང་འཛམ་ཐང་རྫོང་བར་མ་ཞང་ཉེན་རྟོག་ལས་ཁུངས་མདུན་ནས་མི་གྲངས་སུམ་ཅུ་ཙམ་གྱིས་ངོ་རྒོལ་སྐད་འབོད་བྱས་སྐབས་འཕྲལ་དུ་ཉེན་རྟོག་མི་སྣས་གཅར་རྡུང་དྲག་པོ་བཏང་སྟབས་བོད་མི་གཞོན་སྐྱེས་ལོ་ ༣༠ ཡས་མས་ཅན་ཞིག་རྐྱེན་ལམ་དུ་བཏང་ཡོད་པ་དང་དེ་རྗེས་མི་མང་གཅིག་སྟོང་ལྷག་གིས་ངོ་རྒོལ་སྐད་འབོད་བྱས་པར་རྒྱ་སྒོར་འབུམ་བདུན་ཙམ་སྤྲད་རྒྱུ་བྱས་ཏེ་སྐབས་དེའི་གནས་སྟངས་ཞི་འཇགས་བྱུང་ཡོད་ཀྱང་དེ་རྗེས་བཀག་སྡོམ་ནན་མོ་བྱས་པ་སོགས་རྒྱ་ནག་གཞུང་གིས་འཕྲལ་འཕྲལ་དུ་དྲག་གནོན་དང་བཀག་སྡོམ་བྱས་པར་མ་ཟད། དུས་དེ་ནས་བཟུང་ཉི་མ་རེ་རེ་བཞིན་རྔ་པ་རྫོང་དང་འཛམ་ཐང་རྫོང་ན་མདའ་ཞང་། བར་མ་ཞང་། ལྷག་པར་རྔ་པ་ཀིརྟིའི་དགོན་པ་དང་རྔ་པ་ཁུལ་མཐོ་འབྲིང་སློབ་གྲྭ་སོགས་ལ་དམག་དཔུང་འབོར་ཆེན་འགྲེམས་འཇོག་གིས་བཀག་སྡོམ་ནན་མོ་བྱས།
ཕྱི་ཟླ་བཞི་པའི་ཚེས་ཤར་ནས་རྔ་པ་ཀིརྟིའི་དགོན་པ་བཀག་སྡོམ་བྱེད་མཁན་གྱི་དམག་མི་རྣམས་དགོན་པའི་གླིང་གི་ལྕགས་རིའི་ནང་ལ་སླེབས་ཏེ་གྲྭ་པ་རྒན་པ་རྣམས་ཕྱག་སྐོར་ལ་ཕེབས་རྒྱུའང་བཀག་སྡོམ་བྱས་པ་དང་། དགོན་པའི་མཆོད་རྟེན་གྱི་བང་རིམ་རེ་རེ་བཞིན་རྒྱ་དམག་གིས་རྒྱང་ཤེར་བཙུགས་ནས་དགོན་པའི་ཕྱི་ནང་ལ་སོ་ལྟ་བྱེད་བཞིན་པ། ད་བར་འདི་ནས་ཤེས་རྟོགས་བྱུང་བ་བོད་མི་སུམ་ཅུ་ལྷག་གང་བྱུང་འཛིན་བཟུང་བཀག་ཉར་བྱས་པ། (འཛམ་ཐང་རྫོང་ནས་་་་་སློབ་གྲྭའི་དགེ་རྒན་དཔལ་ཁོ། རྡོ་རྗེ། ཨ་རྡོར། འོད་གསལ་རྡོ་རྗེ་སོགས་མི་བརྒྱད་དང་། རྔ་པ་རྫོང་ནས་་་་་་མཐའ་བ་འགབ་མའི་ཚེ་རིང་སྐྱིད། མཐའ་བ་གོང་མའི་བློ་བཟང་འཇམ་དབྱངས། དབང་ཕྱུག བསོད་ནམས་སོགས་མི་བརྒྱད། རྨེའུ་རུ་མའི་ཕུན་ཚོགས། རྔ་པ་ཀིརྟིའི་དགོན་གྱི་གྲྭ་བློ་བཟང་བརྩོན་འགྲུས། ཕུན་ཚོགས་ཀྱི་སྤུན་ཆུང་བ་བློ་བཟང་སྐལ་བཟང་། བསམ་འགྲུབ། བློ་བཟང་བསྟན་འཛིན། བློ་བཟང་ཆོས་འཕེལ། བློ་བཟང་དངོས་གྲུབ། བློ་བཟང་ཚེ་དཔག དོན་ཡོད་རྡོ་རྗེ། བསྟན་འཛིན་རྒྱམ་ཁོ། བཀྲ་ཤིས་(ཞིས་བཀྲ)། ཕ་ཡུལ་ཡུལ་ཤུལ་ནས་ཡིན་པའི་གྲྭ་དཀོན་ཚེ། ཕ་ཡུལ་ཡུལ་ཤུལ་ནས་ཡིན་པའི་གྲྭ་དཔལ་ལྡན། གཅའ་རུ་བའི་བཀྲ་ཤིས། ཆོས་རྗེ་མའི་སེང་གེ། ཁང་སར་མའི་བསྟན་ཚེ། དཀོན་མཆོག་ཚུལ་ཁྲིམས་བཅས་གྲྭ་བཅུ་བཞི་འཛིན་བཟུང་བཀག་ཉར་བྱས་པའི་ཁོངས་ནས་ད་ལྟ་བཀག་ཉར་འོག་ཡོད་པ་གྲྭ་པ་བརྒྱད་དང་། མི་སྐྱ་བཅུ་གཅིག་ཡིན།) ཕྱི་ཟླ་ ༣ ཚེས་ ༢༠ ཉིན་ནས་ཉིན་ལྔ་ལྷག་རིང་རྔ་པ་ཀིརྟིའི་དགོན་པའི་ནང་ལ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་སྤེལ་བ་དང་། དེ་རྗེས་དགོན་པའི་ནང་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་བར་ཡོང་བའི་རྒྱ་གཞུང་གི་ལས་བྱེད་པ་རྣམས་ཁག་བགོས་བྱས་ཏེ་གླིང་ཡོངས་ཀྱི་གྲྭ་ཤག་རེ་རེ་བཞིན་ཉུལ་ནས་གྲྭ་པ་རྒན་གཞོན་ཚར་མར་བསམ་ཚུལ་བསྡུ་ལེན་ཟེར་བའི་མིང་གཡར་ཏེ་བསུན་གཙེར་སྣ་ཚོགས་བཟོས་དང་བཟོ་བཞིན་པ།
ཕྱི་ཟླ་ ༣ ཚེས་ ༡༩ ཉིན་ནས་དགོན་པའི་ཆོས་ལུགས་ཀྱི་བྱེད་སྒོ་ཆ་ཚང་བཀག་འགོག་བྱས་དང་བྱེད་བཞིན་པ། མཚན་མོ་རྟག་པར་གླིང་བར་ལ་དྲག་ཆས་དམག་མི་དང་ཉེན་རྟོག་མི་སྣས་ཁྱི་ཁྲིད་དེ་གསང་ཉུལ་བྱེད་བཞིན་པར་ཐུག་པའི་དགེ་འདུན་པ་རྣམས་གཅར་རྡུང་དྲག་པོ་གཏོང་བ། གྲྭ་པ་རྣམས་ཀྱིས་དགོང་མོ་དཔེ་གཟིགས་གནང་སྟེ་འཕྱི་བོ་སྡོད་མི་ཆོག་པ། ཕྱི་ཟླ་བཞིན་པའི་ཚེས་ཤར་ནས་ལྕགས་རི་བརྒྱབ་མེད་པའི་དགོན་པའི་བྱང་གི་ཕྱོགས་སུ་རྒྱ་གཞུང་གིས་ལྕགས་ཚེར་གྱི་ར་བ་རྒྱག་བཞིན་པ། དགོན་པའི་དགེ་འདུན་པ་རྣམས་ལ་བཞེས་ལག་གི་དཀའ་ངལ་ཡོད་པར་བརྟེན། མི་མང་གིས་དང་བླངས་ངང་རྩམ་པ་དང་མར་འཕྱུར་སོགས་དགོན་པ་གཞུང་ལ་སྤྲད་དེ་དགོན་པ་གཞུང་ངོས་ནས་དགེ་འདུན་པ་རྣམས་ལ་རྩམ་པ་མར་སོགས་བགོ་འགྲེམས་བྱས་ཡོད་ཀྱང་། ཕྱི་ཚེས་ ༤ ཚེས་ ༨ ཡས་མས་ནས་མི་མང་ལའང་བཟའ་བཅའི་རིགས་སྤྲོད་རྒྱུ་བཀག་འགོག་བྱས་ཏེ་ད་ཆ་སྔར་ལས་ལྷག་པའི་གནས་སྟངས་ཛ་དྲག་ཏུ་གྱུར་བཞིན་ཡོད་པ་དང། ཉིན་ཤས་གོང་ནས་རྔ་པ་རྫོང་གི་གྲོང་སྡེའི་ལས་ཁུངས་མང་པོར་མི་མང་བསྡུས་ནས་གུང་ཁྲན་ཏང་ལ་བསྟོད་བསྔགས་ཀྱི་ཚོགས་འདུ་འཚོགས་ཡོད་པ་དང། རྒྱ་གཞུང་གིས་ད་ལྟ་ད་དུང་རྔ་པ་རྫོང་ཐོག་དང་རྔ་པ་ཀིརྟིའི་དགོན་པ་བཀག་སྡོམ་བྱེད་མཁན་གྱི་དམག་མི་མང་དུ་གཏོང་གི་ཡོད་འདུག་ན། ད་ལྟ་བར་དུ་དགོན་པ་གཞུང་གི་བླ་མ་ལས་སྣེས་ལམ་སྟོན་གནང་བ་ཇི་བཞིན་གྲྭ་མང་གིས་བཟོད་བསྲན་ཆེན་པོས་ཞི་འཇགས་ལྷོད་ཡངས་ཡོང་རེ་བྱས་མོད། ཕྱི་ཟླ་ ༤ ཚེས་ ༣ ཡས་མས་ནས་དགོན་པའི་ཤར་ཕྱོགས་ཀྱི་གྲྭ་ཤག་མང་པོའི་ནང་རྒྱ་དམག་བཙན་ཤེད་ཀྱིས་འཛུལ་ནས་སྒོ་དང་སྒེའུ་ཁུང་བཅག་པ་དང་། བཅའ་དངོས་རྐུ་འཕྲོག་བྱས་པ། གྲྭ་པ་རྣམས་ལ་རྡུང་རྡེག་དྲག་པོ་བཏང་དང་གཏོང་མུས་ཡིན་པར་མ་ཟད། ད་དུང་ཕྱི་ཟླ་ ༤ ཚེས་ ༩ ཉིན་དམག་མི་ ༨༠༠ གསར་དུ་རྔ་པ་རྫོང་ལ་སླེབས་ཡོད་པའི་གནས་ཚུལ་འདུག་པ་སོགས་འབྱུང་འགྱུར་མུ་མཐུད་གནས་སྟངས་སྡུག་ཏུ་ཕྱིན་ན་ཛ་དྲག་གི་གནས་སྟངས་ཅི་འགྱུར་ཚོད་དཔག་དཀའ་བ་བཅས། དེ་རིང་བར་གྱི་གནས་སྟངས་ཇི་བཞིན་མདོར་བསྡུས་སུ་བཀོད་པ་ལགས་ན། དེ་ལུགས་ཀྱིས་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་སྡེ་ཚན་ཁག་གིས་མཚོན་པའི་རྒྱལ་སྤྱིའི་ཚོགས་སྡེ་ཁག་དང་། ལྷག་པར་དུ་རྒྱ་ནག་དབུས་གཞུང་ལ་གནས་སྟངས་ཇི་བཞིན་འགྲེལ་བརྗོད་དང་འབྲེལ་འཕྲལ་དུ་ལྷོད་ཡངས་དང་བཀག་ཉར་འོག་ཡོད་པ་རྣམས་གློད་གྲོལ་ཡོང་བའི་འབོད་སྐུལ་ནན་བཤད་ཡོང་ཐབས་གནང་སྐྱོང་ཡོང་བའི་རེ་བ་དང་བཅས། བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་ ༢༠༡༡ ཟླ་ ༤ ཚེས་ ༨ ལ།
