གྲང་ཤུར་ཤུར་གྱི་སྐྱེ་རྒུ་མདོ།
ཐོལ་གྱིས་གཅེར་བུར་ཕྱུང་བའི་ཚེ་སྲོག་དག།
བྱེ་མ་ལ་ཁའི་་འཕྲེད་ལམ་ཕྲ་མོ་ནས།།
ཤུལ་ལུས་གཅེས་ཕྲུག་སྙིང་ནས་བསམ་བཞིན་དུ།།
དྲན་ཆེན་ཕ་མར་ཕྱི་མིག་བོར་བཞིན་དུ།།
སྐྱེས་པའི་སྐྱེས་རྟགས་སྤྱན་རས་གཟིགས་དབང་དང་།།
ཐོབ་པའི་ལྷ་སྐལ་སྤྱན་རས་གཟིགས་དབང་ཁྱོད།།
ངག་ནས་འབོད་བཞིན་སྙིང་ནས་དྲན་བཞིན་དུ།།
མཐིང་ནག་ཡུལ་དེར་ཡ་ང་འཐུང་ཆེད་སོང་།།
གྲང་ཤུར་ཤུར་གྱི་ལུང་ཁོག་གཅེར་བུ་དེར།།
རེ་སྐྱབས་མགོན་གནས་བོར་པའི་སྤུན་ཟླ་ཚོའི།།
སྟོང་སངས་སངས་ཀྱི་སེམས་པའི་བཞི་མདོ་རུ།།
དྲོད་ཀྱིས་ཁྱབ་པའི་ཁྱེད་ཉིད་བཞེངས་བཞིན་འདུག
མིག་ཆུས་སྐྱོར་བའི་རྒྱང་འབོད་གཉོམ་པོ་ཡི།།
ཕྱི་ནང་གཉིས་ཀས་ཁྱེད་ལ་མངོན་ཕྱོགས་ནས།།
བདེ་སྡུག་རེ་བ་ཁྱེད་ཀྱི་ཕྱག་བཅོལ་ནས།།
རེ་བའི་མིག་ཟུང་ཁྱེད་ཉིད་འབེན་དུ་འཛུགས།།
ངང་ཚུལ་དེ་ལྟར་འདུག་པས་སྤྱན་རས་གཟིགས།།
སྤྱན་སྟོང་སྤྱན་སྟོང་སྤྱན་ཀྱང་མི་གདེང་པའི།།
ས་སྟེང་དམྱལ་ཁམས་བུད་པའི་སྐྱོ་གནས་ལ།།
ཐུགས་རྗེའི་སྤྱན་གྱིས་གཟིགས་ཙམ་མ་ཡིན་པར།།
སྒོ་གསུམ་ལག་ལེན་དངོས་ཀྱི་སྦྱོར་བ་ཡིས།།
ས་འོག་ཡ་ང་འགམ་པའི་ཚེ་སྲོག་རྣམས།།
འཕྲེད་ཐིག་མདུད་པ་བརྒྱ་ཡི་སྣེ་བཀྲོལ་ནས།།
ཁྱེད་ཀྱི་གམ་དུ་མྱུར་དུ་ལེན་རོགས་གྱིས།།
ངས་ཀྱང་ཁ་ཁོག་གཉིས་ནས་འཁོལ་བ་ཡི།།
ཁྱེད་ཀྱི་སྙིང་པོ་ཚིག་འབྲུ་དྲུག་པོ་དེ།།
གྲང་ཤུར་ཤུར་གྱི་སྣོད་བཅུད་གཅེར་བུ་ལ།།
སྒོ་གསུམ་ལག་ལེན་ཁྲོད་ནས་སྦྱོར་བཞིན་ཡོད།།
ཕམ་ཁ་ཁེ་ཁའི་གྲོགས་སུ་ལེགས་སྦྲན་ནས།།
སྡུག་བསྔལ་བདེ་བའི་རྐྱེན་གྱི་ལམ་བསྒྱུར་ནས།།
ཞུམ་མེད་དཔའ་སྟོབས་སྙིང་ནས་བཞུར་བཞིན་དུ།།
ཕ་ས་དེ་རུ་བཙན་འཛུལ་བྱ་རོགས་གྱིས།།
༤ ༡༤ ཆུ་ཚོད་༡ ༣༠ ཐོག་ཤར་མར་བྲིས།