གཞུང་གི་ལས་བྱེད་ཡོངས་རྫོགས་དགོན་པའི་ནང་སླེབས་འདུག
མཛོད་དགེ་རྫོང་གི་ལས་བྱེད་པ་མང་པོ་ཞིག་ཀྱང་རྒྱབ་དཔུང་ལྟ་བུར་ལས་འགུལ་དེའི་ནང་མཉམ་ཞུགས་བྱས་ཡོད་འདུག ས་གནས་ནས་གནས་ཚུལ་འགྲེལ་བརྗོད་པས་དེ་རིང་དགོན་པའི་ནང་ལས་བྱེད་ ༨༠༠ ཡས་མས་སླེབས་ཡོད་ཚུལ་འགྲེལ་བརྗོད་གནང་བྱུང་།
དེ་རིང་སློབ་གསོ་སྤེལ་སྟངས་དེ་ཁ་སང་དང་མི་འདྲ་བ་ནི་དེ་རིང་ནས་མི་རེ་རེ་ཚོགས་དབུས་སུ་ཡར་ལངས་བཅུག་ནས་དྲི་བར་ལན་འདེབས་དང་། བསམ་ཚུལ་བཤད་དགོས་པ་ཡིན་འདུག་པས། དགེ་འདུན་པ་རྣམས་ཀྱིས་རྒྱ་གཞུང་གི་ལས་བྱེད་ཚོའི་འདོད་པ་དང་མཐུན་པའི་དྲིས་ལན་དང་བསམ་ཚུལ་མ་བཤད་པའི་རྐྱེན་གྱིས་ད་ལྟ་ཡང་ཁྱེད་ཚོའི་སློབ་གསོའི་རྣམ་འགྱུར་ཡག་ཏུ་སོང་མི་འདུག་པས། སློབ་གསོའི་དུས་ཡུན་རིང་དུ་འགྲོ་སྲིད་པའི་སྐོར་སོགས་ལས་བྱེད་པས་བཤད་ཡོད་འདུག
དེ་མིན་དགོན་པའི་ཕྱི་ནང་གི་དམ་བསྒྲགས་བྱེད་སྟངས་ཚང་མ་སྔར་བཞིན་གནས་མུས་ཡིན་པ་དང་། དགོན་པའི་བྱང་ཕྱོགས་སུ་རྩིག་པ་རྒྱག་བཞིན་པ་ཚང་མ་བརྒྱབ་ཚར་འདུག་པས། ད་ནས་བཟུང་དགོན་པའི་ཕྱི་ནང་དུ་འགྲོ་འོང་བྱེད་ས་ཕྱོགས་གསུམ་གྱི་སྒོ་ཆེན་གསུམ་པོ་མ་གཏོགས་གཅིག་ཀྱང་མེད་པར་གྱུར་ཡོད་པས་དམ་བསྒྲགས་བྱེད་རྒྱུ་སྔར་ལས་སྟབས་བདེ་རུ་ཆགས་ཡོད་འདུག
དེ་སྔོན་ཕྱི་ཟླ་ ༣ ཚེས་ ༡༧ ཉིན་རྔ་པ་རང་སྐྱོང་ཁུལ་གྱི་མི་རིགས་མཐོ་འབྲིང་སློབ་གྲྭའི་སློབ་མ་རྣམས་ཀྱིས་ཟས་བཅད་ངོ་རྒོལ་གྱི་ལས་འགུལ་རྒྱུན་རིང་པོར་སྤེལ་ཡོད་པ་དང་། དེའི་རྗེས་སུ་ལས་འགུལ་དེའི་སྐོར་གནས་ཚུལ་གསལ་པོ་ཤེས་རྟོགས་མ་བྱུང་ནའང་། དེ་རིང་བོད་ནས་གནས་ཚུལ་ཐོན་པ་ལྟར་ན་སློབ་གྲྭའི་སློབ་མ་རྣམས་ད་ལྟའང་སློབ་གྲྭའི་རྭ་བའི་ཕྱི་ལ་འགྲོ་ཆོག་གི་མེད་པར་བཀག་སྡོམ་འོག་ཡོད་མུས་ཡིན་འདུག
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་ ༢༠༡༡ ཟླ་ ༤ ཚེས་ ༡༧ ལ།
