མི་སུམ་བརྒྱ་ལྷག་གི་གྲྭ་པ་རྣམས་ཀྱི་ཆེད་དུ་ཤི་ཐུབ་པའི་མཛུབ་ཐེལ།

གྲྭ་པ་ཚོར་ནག་ཉེས་མེད་པས། ང་ཚོས་རང་སྲོག་འབེན་ལ་བཞག་ནས་སྲུང་སྐྱོབ་བྱེད་རྒྱུ་ཡིན་ཚུལ་གཞུང་གི་ལས་བྱེད་པར་བརྗོད་སྐབས། དེར་ཡོད་ཉེན་རྟོག་མི་སྣ་སོགས་ཀྱིས་ཤི་ཐུབ་མཁན་ཚོས་བཛུབ་ཐེལ་རྒྱག་དགོས་ཚུལ་བཤད་པར། མི་སུམ་བརྒྱ་ལྷག་གིས་གྲྭ་པ་རྣམས་ཀྱི་ཆེད་དུ་ཤི་ཐུབ་པའི་མཛུབ་ཐེལ་བརྒྱབ་ཡོད་པ་དང་སྐབས་དེར་མི་མང་གིས་འཚང་ཁ་བརྒྱབ་པར་བརྟེན་མཚམས་བཞག་ཡོད་འདུག

ཁོང་ཚོས་གཏམ་བཤད་སྐབས་བཤད་དོན་དགོན་པ་གཏོར་དང་མི་གཏོར། ཆོས་སྒོ་རྒྱག་དང་མི་རྒྱག་ང་ཚོ་ལ་སྐད་ཆ་གང་ཡང་མེད་པར་དེ་ནི་ཁྱེད་རང་ཚོས་རྣམ་འགྱུར་ལ་རག་ལས་པ་ཞིག་ཡིན་པས་ཁྱེད་རང་ཚོས་བདམས་ག་ཡིན་ཚུལ་བརྗོད་ནས་འཇིགས་སྐུལ་བྱས་ཡོད་ལ། ད་ཆ་དགོན་པ་ཆགས་དང་འཇིག་གི་མཚམས་སུ་སླེབས་པའི་གནས་སྟངས་ཤིག་གི་འོག་ཡོད་འདུག

ཡང་དགོན་པའི་དགེ་འདུན་པ་ཁག་ཅིག་གིས་ཕྱི་ཕྱོགས་ལ་གནས་ཚུལ་འགྲེལ་བརྗོད་བྱེད་ཀྱི་ཡོད་པས། དེ་ཚོ་རང་དགར་མི་འཇོག་ཚུལ་ནན་བརྗོད་བྱས་ཡོད་པ་དང་། དེ་བཞིན་ཕྱི་ལོ་ ༢༠༠༨ ནས་ལོ་ད་བར་ཀིརྟིའི་དགོན་པའི་དགེ་འདུན་པ་ཚོས་ངོ་རྒོལ་ལས་འགུལ་རྒྱུན་མཐུད་བྱས་ཡོད་པས། རྔ་པའི་སྤྱི་ཚོགས་ཁྱོན་ཡོངས་ཀྱི་བདེ་འཇགས་ཀྱི་གནས་སྟངས་ལ་གཏོར་བཤུགས་ཚབས་ཆེན་བཏང་ཡོད་པ་དང། ད་ལྟ་ད་དུང་ལས་འགུར་རྒྱུན་མཐུད་འདོད་པའི་དམིགས་ཡུལ་གསལ་པོ་ཡིན་པ་སོགས་བརྗོད་དེ་རྒྱ་གཞུང་དང་སྲིད་བྱུས་ཀྱིས་བཟོས་པའི་ནག་ཉེས་ཡོད་ཚད་དགོན་པའི་དགེ་འདུན་པ་རྣམས་ཀྱི་སྒང་ལ་གཡོག་གི་ཡོད་འདུག་པ་སོགས་ནང་ལོགས་ཀྱི་བཙན་དྲག་གི་རྣམ་པ་ཤུགས་ཆེ་རུ་གཏོང་གི་ཡོད་འདུག

དགོན་པའི་ནང་ལ་ཉེན་རྟོག་པ་དང་དམག་མི་མཉམ་འབྲེལ་བྱས་ནས་དམ་བསྒྲགས་དང་ལྟ་སྲུང་བྱེད་མུས་ཡིན་པ་དང་དགོང་མོའི་དུས་ཚོད་བརྒྱད་པའི་རྗེས་མི་གཅིག་ཀྱང་རང་རང་གྲྭ་ཤག་གི་ཕྱི་ལ་ཐོན་མི་ཆོག་པ། དེ་རྗེས་གླིང་བར་ལ་ལྟ་སྲུང་བྱེད་མཁན་གྱི་དམག་མི་སོགས་ལ་ཐུག་ན་རྡུང་རྡེག་དྲག་པོ་གཏོང་གི་ཡོད་འདུག གྲྭ་པ་བདུན་ཅན་གྱི་གྲྭ་ཤག་ཅིག་གི་ནང་བཞེས་ལག་རྩ་བ་ནས་མ་རག་པར་ཉིན་གསུམ་རིང་ལྟོགས་སྐོམ་མྱོང་དགོས་བྱུང་ཡོད་འདུག་ལ། དེ་རྗེས་འབྲེལ་ཡོད་ཚོས་ཤེས་རྟོགས་བྱུང་འཕྲལ་གྲྭ་པ་ཚོས་བཞེས་ལག་ཅུང་ཙམ་རེ་བསྡུ་རུབ་བྱས་ཏེ་ཁོང་ཚོ་ལ་སྤྲད་ཡོད་འདུག

དེ་ནི་འདི་ནས་ཤེས་རྟོགས་བྱུང་བའི་དཔེར་མཚོན་ལྟ་བུ་ཡིན་པ་མ་གཏོགས་དེ་དང་དེ་འདྲ་བ་མང་པོ་ཞིག་ཡོད་ཚུལ་འགྲེལ་བརྗོད་གནང་གི་འདུག ཕྱི་ཚེས་ ༡༥ མཚན་མོ་དགོན་པའི་གླིང་བར་ལ་ལྟ་སྲུང་བྱས་ནས་ཡོད་པའི་དྲག་ཆས་དམག་མི་དང་ཉེན་རྟོག་མི་སྣ་སྐོར་ཞིག་གིས་རླངས་འཁོར་གྱིས་གྲྭ་དཔལ་ཁོ་ལགས་ཀྱི་གྲྭ་ཤག་གི་རྭ་བའི་ངོས་སུ་བརྒྱབ་ནས་རྭ་བ་གཏོར་ཡོད་འདུག

ཕྱི་ཟླ་ ༣ ཚེས་ ༢༠ ཙམ་ནས་དགོན་པའི་ནང་ལོགས་ལ་ཡོད་པའི་དགོན་པའི་སྨན་ཁང་གི་སྒོ་གཏན་བརྒྱག་བྱས་ཏེ། དགེ་འདུན་པ་རྣམས་ལ་རྒྱུན་ལྡན་གྱི་སྨན་བཅོས་མཐུན་རྐྱེན་གཅིག་ཀྱང་མ་རག་པའི་དཀའ་ངལ་ཤུགས་ཆེ་ཡོང་གི་ཡོད་འདུག སྨན་ཁང་དེ་ནི་སྨན་པ་གྲྭ་ཚང་གིས་གཉེར་བཞིན་པའི་བོད་ལུགས་དང་ཕྱི་ལུགས་གཉིས་ཀྱི་སྨན་བཅོས་མཐུན་རྐྱེན་ཡོད་པ་ཞིག་ཡིན།

རྒྱུན་དུ་གྲྭ་ཤག་ལ་འཛུལ་སྐབས་གང་ཡིན་འདི་ཡིན་མེད་པའི་མི་ཞིག་གི་མིང་ནས་བཟུང་སྟེ་མི་དེ་འདིར་ཡོད་མེད་འདྲི་བ་དང་མི་དེ་འདྲ་ཞིག་གཏན་ནས་མེད་ཚུལ་བརྗོད་པར་དྲང་བཤད་བྱས་མ་སོང་ཚུལ་བརྗོད་དེ་གཅར་རྡུང་གཏོང་བ་དང་།
གྲྭ་ཤག་ལ་གང་བྱུང་གིས་སྔོག་བཤེར་བྱེད་ཀྱིན་ཡོད་པར་མ་ཟད། བཅའ་དངོས་མང་པོ་རྐུ་འཕྲོག་གི་གནས་ཚུལ་ཡང་ཡོང་གི་ཡོད་འདུག

ཕྱི་ཚེས་ ༡༢ ཉིན་མི་མང་དང་དམག་མི་བར་གདོང་ཐུག་བྱུང་སྐབས་མི་མང་གིས་གལ་སྲིད་དགེ་འདུན་པ་རྣམས་ཀྱིས་ཁྲིམས་དང་འགལ་བའི་ཉེས་པ་དངོས་ཡོད་བསགས་པ་ཡིན་ན། ང་ཚོས་གང་ཡང་བརྗོད་ཀྱི་མེད་ཀྱང་ད་ལྟ་ཉེས་པ་གང་ཡང་མེད་པའི་དགེ་འདུན་པ་རྣམས་བཙོན་ཁང་དུ་ཁྱེར་དགོས་པ་ཡིན་ན། ང་ཚོས་རང་སྲོག་འབེན་ལ་བཞག་ནས་སྲུང་སྐྱོབ་བྱེད་རྒྱུ་ཡིན་ཚུལ་བརྗོད་སྐབས། དེར་ཡོད་ཉེན་རྟོག་མི་སྣ་སོགས་ཀྱིས་ཤི་ཐུབ་མཁན་ཚོས་བཛུབ་ཐེལ་རྒྱག་དགོས་ཚུལ་བཤད་པར་མི་སུམ་བརྒྱ་ལྷག་གིས་གྲྭ་པ་རྣམས་ཀྱི་ཆེད་དུ་ཤི་ཐུབ་པའི་མཛུབ་ཐེལ་བརྒྱབ་ཡོད་པ་དང་སྐབས་དེར་མི་མང་གིས་འཚང་ཁ་བརྒྱབ་པར་བརྟེན་མཚམས་བཞག་ཡོད་འདུག སྐབས་དེར་ཉེན་རྟོག་པ་མང་པོ་ཞིག་གིས་མི་མང་རྣམས་དཔར་ཧ་ཅང་མང་པོ་བརྒྱབས་ཡོད་འདུག

ཕྱི་ཟླ་ ༣ ཚེས་ ༡༦ ནས་ད་བར་དགོན་པའི་དགེ་འདུན་པ་བརྒྱ་ལྷག་གར་སོང་ཆ་མེད་དུ་གྱུར་ཡོད་པ་དགོན་པའི་ཕྱི་
ནང་མང་པོར་རྩད་གཅོད་བྱས་ཡོད་ཀྱང་ད་བར་ཤེས་རྟོགས་བྱུང་མེད་འདུག ཕྱི་ཟླ་ ༣ ཚེས་ ༡༦ ཉིན་རྔ་པ་ཀིརྟིའི་དགོན་གྱི་གྲྭ་རྒྱལ་གཅེས་དཔའ་བོ་ཕུན་ཚོགས་ལགས་ཀྱིས་རང་ལུས་མེར་སྲེག་གི་དོན་དག་བྱུང་མ་ཐག་སྐབས་དེར་མཚོ་སྔོན་ཟི་ལིང་དུ་ཡོད་པའི་རྩོམ་པ་པོ་སྒོ་ཤེས་རབ་ལགས་ཕྱིར་རྔ་པ་རུ་ཡོང་བའི་ལམ་དུ་ཞུགས་ཡོད་ཀྱང་། དེ་ནས་བཟུང་ད་བར་གར་སོང་ཆ་མེད་ཀྱི་གནས་སུ་གྱུར་འདུག་ཅིང་།
འབྲེལ་ཡོད་དགོན་གྲོང་ཚོས་ལམ་བར་ནས་རྒྱ་གཞུང་གིས་འཛིན་བཟུང་བཀག་ཉར་བྱས་པར་ངོས་འཛིན་བྱེད་ཀྱི་ཡོད་འདུག
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས།
ཕྱི་ལོ་ ༢༠༡༡ ཟླ་ ༤ ཚེས་ ༡༦ ལ།

ཕྱི་ལོ་ ༢༠༡༡ ཟླ་ ༤ ཚེས་ ༡༦ ལ།

{jcomments on}