མོན་གྷོ་རུ་གྲྭ་ཕུན་ཚོགས་དང་བློན་ཆེན་རྡོ་རྗེ་མཁའ་འགྲོའི་ཆེད་བསྔོ་སྨོན་མཆོད་འབུལ།
དགོང་དྲོ་ཆུ་ཚོད་༦ ཐོག་འབྲས་སྤུངས་བློ་གསལ་གླིང་གྲྭ་ཚང་གིས་གོ་སྒྲིག་འོག་འབྲས་བློ་གླིང་འདུ་ཁང་གསར་པའི་ནང་གྲྭ་མང་ཡོངས་འཚོགས་ནས་བསྔོ་སྨོན་མཆོད་འབུལ་རྒྱ་ཆེན་བྱས་སོང། སྐབས་དེར་བློ་གླིང་ཕྱག་མཛོད་མཁྱེན་རབ་ཆོས་རྗེ་ལགས་ཀྱི་གསུང་དོན། རྒྱལ་གཅེས་དཔའ་བོ་གྲྭ་བློ་བཟང་ཕུན་ཚོགས་ལགས་ཀྱིས་བོད་རྒྱལ་ཁབ་དང་མི་རིགས་ཀྱི་དོན་རང་སྲོག་བློ་བཏང་གནང་བའི་རྗེས་སུ་ཨ་མདོ་རྔ་བ་ཁུལ་གྱི་ཡུལ་མིར་རྒྱ་གཞུང་གིས་ཚད་ལས་བརྒལ་བའི་གཅར་རྡུང་དང་བཙོན་འཇུག་བྱེད་བཞིན་ཡོད་པའི་གཞིས་ལུས་སྤུན་ཟླ་ཡོངས་དང་། བོད་བསྟན་སྲིད་ཀྱི་ཆེད་དུ་གཤེགས་ཟིན་པའི་དཔའ་བོ་དཔའ་མོ་རྣམས་སྐྱེ་བ་ནས་ཚེ་རབས་ཐམས་ཅད་དུ་འཕགས་མཆོག་ཕྱག་ན་པདྨོས་རྗེས་སུ་བཟུང་ནས་དལ་འབྱོར་རྟེན་བཟང་རིམ་པར་བརྒྱུད་ནས་བླ་མེད་རྗོགས་བྱང་མྱུར་དུ་ཐོབ་པ་དང་། ལུས་སེམས་གཉིས་ལ་དཀའ་ངལ་འཕྲད་བཞིན་པའི་བོད་རིགས་སྤུན་ཟླ་ཡོངས་དཀའ་སྡུག་ལས་གྲོལ་ནས་རང་དབང་གི་ཉི་མ་མགྱོགས་ནས་མྱུར་དུ་ཤར་བ་དང། དེ་དང་མཉམ་དུ་ཨ་རུ་ནཱ་ཅལ་མངའ་སྡེའི་བློན་ཆེན་རྡོ་རྗེ་མཁའ་འགྲོ་དང་འབྲེལ་ཡོད་དཔོན་རིགས་འགའ་རྐྱེན་འདས་སུ་སོང་བ་བཅས་ཀྱི་ཆེད་དུ་དམིགས་བསལ་གྱི་བསྔོ་སྨོན་མཆོད་འབུལ་བྱེད་དགོས་པའི་རྒྱུ་མཚན་དེ་ལྟར་ཡིན་ཞེས་གསར་འགོད་པར་འགྲེལ་བརྗོད་གནང་སོང་།
དེ་བཞིན་ཟླ་འདིའི་ཚེས་༥ ཉིན་མོན་གྷོ་ས་གནས་ཆོལ་གསུམ་ས་རྒྱུན་ཐུན་མོང་གི་གོ་སྒྲིག་འོག་རྒྱལ་གཅེས་དཔའ་བོ་གྲྭ་བློ་བཟང་ཕུན་ཚོགས་ལགས་ཀྱི་སྐུ་སྲོག་ཤོར་ནས་ཉིན་གྲངས་ཞེ་དགུ་འཁོར་བའི་དུས་ཚིགས་སྲུང་བརྩི་ཞུས་ཡོད་པ་དང་། དུས་དྲན་ཐོག་མོན་གྷོ་ས་གནས་གཞིས་གྲོང་ཁག་དགུའི་མི་མང་མཉམ་ཞུགས་ཀྱིས་མར་མེ་སྟོང་མཆོད་ཕུལ་བ་དང་། མ་ཎི་གསོག་སྒྲུབ་དང་བསྔོ་སྨོན་མཆོད་འབུལ་རྒྱ་ཆེན་བྱས་སོང་།
གཞན་ཡང་ཉིན་དེའི་དགོང་དྲོ་འབྲས་སྤུངས་བླ་སྤྱིའི་གོ་སྒྲིག་འོག་ཨ་རུ་ནཱ་ཅལ་མངའ་སྡེའི་བློན་ཆེན་རྡོ་རྗེ་མཁའ་འགྲོ་དང་འབྲེལ་ཡོད་དཔོན་རིགས་འགའ་དུས་མིན་རྐྱེན་འདས་སུ་སོང་བར་བསྔོ་སྨོན་ཞིག་ཀྱང་གནང་ཡོད་གནང་སོང།།
རྒྱ་གར་ལྷོ་ཕྱོགས་ནས་མོན་གྷོ་གསར་འགོད་པས།
