༧གོང་ས་མཆོག་གིས་མ་འོངས་བོད་ཀྱི་ཆེད་དུ་བོད་ཀྱི་དབུ་ཁྲིད་མཛད་སྟངས་ཕན་ནུས་ཆེ་ཤོས།

དེ་ནས་གནད་དོན་གཙོ་བོ་དེ་བཅའ་ཁྲིམས་ཀྱི་སྔོན་གླེང་དང་བཅའ་ཁྲིམས་བསྐྱར་བཅོས་བྱུང་བ་དེར་བཙན་བྱོལ་བོད་གཞུང་ལ་ཁྲིམས་མཐུན་གྱི་ནུས་པ་དགོས་པ་དང་། ཁྲིམས་མཐུན་གྱི་ནུས་པ་དེ་ཡང་བོད་ཡུལ་དེ་བོད་ཡུལ་དུ་ངོས་འཛིན་དང་། ང་བོད་མི་ཡིན་སྙམ་པ་ལས་ང་རྒྱ་མི་མིན་སྙམ་པའི་བོད་མིའི་རང་བཞིན་ལྷན་སྐྱེས་ཀྱི་བསམ་བློ། མར་ལེ་རིང་ལུགས་ཀྱི་རྩ་བའི་དམར་པོའི་ལྟ་གྲུབ་དང་རྒྱལ་སྤྱིའི་ཁྲིམས་ལུགས་ཀྱི་ཐོག་ནས་ང་ཚོ་བོད་མི་ཐུན་མོང་ལ་སོ་སོའི་མ་འོངས་པའི་མདུན་ལམ་ཐོག་རང་ཐག་རང་གཅོད་ཀྱི་རང་བདག་གི་དབང་ཆའམ་རང་དབང་ཡོད་པ་དེ་གཞུང་གི་ཁྲིམས་མཐུན་གྱི་རྨང་གཞིའི་ཐོག་ངེས་པར་འཇོག་དགོས་པ་དང་། བཙན་བྱོལ་བོད་གཞུང་ཟེར་བའི་ཚིག་བརྗོད་དེ་ལ་འགྱུར་བ་རྩ་བ་ནས་གཏོང་མི་དགོས་པའི་ལྟ་ཚུལ་འདོན་རྒྱུ་ཡིན། བསམ་བློ་འདི་འདྲ་ཞིག་གི་འོག་ནས་ཚོགས་ཆེན་ལ་རང་གི་ངོས་ནས་བོད་ཀྱི་བྱུང་རབས་ལོ་རྒྱུས་ལ་འགན་ཁུར་བའི་ཐོག་ནས་དྭངས་བླངས་ཚོགས་བཅར་བྱེད་ཀྱི་ཡོད།

དྲི་བ། བཅའ་ཁྲིམས་བསྐྱར་བཅོས་ཟིན་བྲིས་སུ་བཅའ་ཁྲིམས་ཀྱི་དོན་ཚན་གཉིས་པར་༼བཙན་བྱོལ་བོད་གཞུང་༽ཞེས་པའི་ཚབ་ཏུ་༼བཙན་བྱོལ་བོད་མིའི་གཞུང་གི་སྒྲིག་འཛུགས་༽ཅེས་དང་། བཅའ་ཁྲིམས་ཀྱི་དོན་ཚན་ང་བདུན་པར་༼རྒྱལ་ཁབ་༽ཅེས་པའི་ཚབ་ཏུ་༼མི་རིགས་༽ཅེས་བཅུག་གནང་ཡོད་པ་དེའི་ཐད་དགེ་སྐྱོན་ག་རེ་གཟིགས་ཀྱི་འདུག རྒྱུ་མཚན་གསུངས་རོགས།

ལན། བཅའ་ཁྲིམས་བསྐྱར་བཅོས་ཀྱི་ཟིན་བྲིས་སུ་དེ་ག་རང་གསལ་འདུག བཙན་བྱོལ་བོད་གཞུང་ཞེས་ལབ་དུས་བོད་ཟེར་བའི་རྒྱལ་ཁབ་གཅིག་ངོས་བཟུང་བའི་ཐོག་ནས་རྒྱལ་ཁབ་དེའི་གཞུང་ལ་གོ་གི་ཡོད་པ་རེད། ཡིན་ནའང་བཙན་བྱོལ་བོད་མིའི་གཞུང་གི་སྒྲིག་འཛུགས་ཟེར་དུས་བཙན་བྱོལ་ནང་གི་བོད་མི་ཚོའི་སྒྲིག་འཛུགས་སམ་སྐྱིད་སྡུག་ལ་ལྟ་མཁན་གྱི་ཚོགས་པ་ལ་ཟེར་གྱི་ཡོད་རེད། དེ་འདྲ་ཡིན་རྒྱུ་མ་རེད། གཞུང་ཟེར་བའི་ཚིག་འདུག་བསམ་སྲིད་པ་རེད། ཡིན་ནའང་གཞུང་ཞེས་པའི་ཚིག་དེ་དབྱིན་སྐད་ཀྱི་གཞུང་གི་སྐད་དོད་ Government ཟེར་བ་དེར་གོ་གི་མེད་པ་ཉེ་སྔོན་གསལ་པོ་བཟོས་ཟིན་པ་རེད། དེར་བརྟེན་རྒྱལ་ཁབ་ཀྱི་ཚབ་ཏུ་མི་རིགས་ཟེར་བ་བཅུག་ཡོད་པ་དང་། བོད་རིགས་ཟེར་བ་དེ་ཡང་བོད་རིགས་རྣམས་གྲངས་ཉུང་མི་རིགས་ལྔ་བཅུ་ང་ལྔའི་ནང་གི་མི་རིགས་གཅིག་རང་ལ་ངོས་འཛིན་བྱེད་ཀྱི་ཡོད་ཅེས་ཡིག་ཐོག་ནས་རྒྱ་ནག་ལ་ཁས་བླངས་པ་དེར་གོ་དགོས་ལ། བོད་རིགས་ཟེར་བ་དེའི་ནང་བོད་པ་ཆ་ཚང་ངམ་བོད་མི་ཆ་ཚང་རྩ་བ་ནས་ཚུད་ཀྱི་མེད་པ་ངེས་པར་དུ་ཤེས་དགོས་པ་ཞིག་རེད། གལ་ཏེ་བཙན་བྱོལ་བོད་མིའི་གཞུང་གི་སྒྲིག་འཛུགས་ཟེར་བ་དང་མི་རིགས་ཟེར་བ་འདི་གཉིས། བཙན་བྱོལ་བོད་གཞུང་དང་རྒྱལ་ཁབ་ཟེར་བའི་ཚབ་ཏུ་བཅའ་ཁྲིམས་བསྐྱར་བཅོས་སུ་གཏན་འཁེལ་སོང་ན་བཙན་བྱོལ་བོད་གཞུང་བོད་མི་ཚོས་རང་འདོད་ཀྱིས་སྒོ་རྒྱབ་པ་རེད་ཅེས་བརྗོད་ན་འགྲིག་གི་རེད། བོད་ཀྱི་གནད་དོན་ཐག་གཅོད་གང་ཡང་མ་བྱུང་གོང་ནས་འདི་ལྟར་གནང་དོན་ནི་རྒྱ་ནག་གི་ཁྲིམས་དང་ལྟ་ཚུལ་ལ་ཡོངས་སུ་མཐུན་ཐབས་བྱེད་པ་དེ་ཡིན་པ་ཧ་གོ་ན་བཅའ་ཁྲིམས་བསྐྱར་བཅོས་ཀྱི་ཟིན་བྲིས་དེའི་ཁ་ཕྱོགས་གང་འདྲ་ཞིག་ཏུ་ཡོད་པ་གསལ་པོ་ཆགས་ཀྱི་རེད། དེ་ལ་༸གོང་ས་མཆོག་གིས་གསུངས་དོན་དུ། ད་ལམ་བཅའ་ཁྲིམས་བསྐྱར་བཅོས་སྐབས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས། ཅེས་ནན་ཏན་གྱི་སྒོ་ནས་ཡིག་ཐོག་ནས་གསུངས་པ་དང་ཏག་ཏག་སྡོད་ཀྱི་མེད་པའི་ཟོལ་འདྲ་པོ་མཐོང་གི་ཡོད། དེ་བསམ་བློ་གཏོང་དགོས་པའི་གནད་དོན་གཅིག་རེད་བསམ་གྱི་ཡོད།

དྲི་བ། བཅའ་ཁྲིམས་དོན་ཚན་དང་པོ་གསར་དུ་བཅུག་དགོས་དོན་ནི་ཐབས་མཁས་པ་འདྲ་པོ་བྱས་ནས་༧གོང་ས་མཆོག་བླ་ན་མེད་པའི་དབུ་ཁྲིད་ཀྱི་ངོ་བོ་དེ་བཟོས་ཡོད་པའི་སྐད་ཆ་རེད། དཱ་དངོས་ཤུགས་བརྒྱུད་གསུམ་ནས་ཚང་མ་བཏོན་དགོས་ཀྱི་འདུག དངོས་སུ་འདུག་སེ་བཏོན་བཞག་ན་འགྲིག་གི་འདུག བརྒྱུད་ནས་འདུག་སེ་བཏོན་ན་འགྲིག་གི་འདུག དེ་ང་རང་ཚོས་བསམ་བློ་གཏོང་ཡག་རེད་ཅེས་ཚོགས་གཙོ་སྤེན་པ་ཚེ་རིང་མཆོག་གིས་སྦེལ་ཀོབ་ཏུ་གསུངས་ཡོད་པ་རེད། འདིའི་ཐད་ལ་ཁྱོད་རང་གིས་ཚོགས་ཆེན་ཐོག་བསམ་ཚུལ་ག་རེ་འདོན་རྒྱུ་ཡིན།

ལན། ཚོགས་གཙོ་མཆོག་གིས་གསུངས་པ་འདི་དང་། བཅའ་ཁྲིམས་བསྐྱར་བཅོས་ཟིན་བྲིས་ཀྱི་དོན་ཚན་དང་པོའི་ནང་དོན་ལ་བསམ་ཡོངས་དུས་གནས་ཚུལ་ག་རེ་གསལ་པོ་ཆགས་ཀྱི་ཡོད་རེད་ཟེར་ན། ༧གོང་ས་མཆོག་གིས་གྲོས་ཚོགས་སུ་བསྩལ་བའི་གསུང་འཕྲིན་གྱི་དགོངས་དོན་ལ་དོན་གྱིས་ངོས་ལེན་ཞུས་མེད་པ་དེ་རེད། ད་ལྟ་ང་ཚོས་ངོས་འཛིན་གསལ་པོ་བྱེད་དགོས་པ་ནི། ༧གོང་ས་མཆོག་བོད་ཀྱི་དབུ་ཁྲིད་དུ་མི་དགོས་མཁན་གྱི་བོད་མི་ཞིག་ཡོད་མ་རེད་བསམ་གྱི་ཡོད། ཡིན་ནའང་༧གོང་ས་མཆོག་གིས་ང་ཚོར་ཧ་ཅང་ནན་ཏན་ཆེན་པོས་འདི་ལྟར་བྱེད་དགོས་པར་གསུངས་པ་དེ་བོད་དང་བོད་མི་བློས་བཏང་བ་ཞིག་མ་ཡིན་པར་མ་ཟད། ༧གོང་ས་མཆོག་གིས་བོད་དང་བོད་མིར་བརྩེ་བ་ཚད་མེད་པ་ཞིག་ཡོད་ཙང་བོད་མི་ཚོར་འདོད་པ་མེད་བཞིན་འདི་ལྟར་བྱེད་དུ་འཇུག་གི་ཡོད་པ་བོད་ཀྱི་དོན་དུ་ཡིན་པ་ངོས་ཟིན་དགོས་པ་རེད། དེར་བརྟེན་༧གོང་ས་མཆོག་གི་ལམ་སྟོན་བཞིན་བྱས་ན་བོད་ཕུང་གི་རེད་དམ། ཡང་ན་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ཐབས་ཤེས་བཞིན་བྱས་ན་བོད་སྐྱོབ་ཀྱི་རེད། དེ་འདྲ་སོང་ཙང་བཅའ་ཁྲིམས་བསྐྱར་བཅོས་སུ་གསར་དུ་བཅུག་པའི་དོན་ཚན་དང་པོ་དེ་༧གོང་ས་མཆོག་གི་ཞལ་བཞེས་གནང་གི་མ་རེད་བསམ་གྱི་འདུག་ལ། ༧གོང་ས་མཆོག་ཐུགས་མཉེས་པར་བྱེད་འདོད་པ་དང་བོད་ལ་བརྩེ་བའི་དབང་གིས་ཡིན་ན་གྲོས་ཚོགས་སུ་བསྩལ་བའི་གསུང་འཕྲིན་ཇི་བཞིན་ལག་བསྟར་བྱས་ན་བོད་ལ་ཕན་རླབས་ཆེ་བ་ཡོད་པའི་ཡིད་ཆེས་བྱེད་ཀྱི་ཡོད།

མཇུག་ཏུ་ཞུ་རྒྱུར། གནད་འགག་འདི་འདྲའི་སྐབས་སུ་འགྱུར་བ་འདི་ཚོ་སྦུག་སྦུག་ཏུ་མ་བཞག་པར་མི་མང་ལ་ཕྱི་གསལ་ནང་གསལ་བཟོ་དགོས། མ་གཞི་རྒྱལ་ཁབ་དང་། ཚོགས་སྡེ་སུ་ཡིན་རུང་མང་ཚོགས་ཀྱི་མངོན་འདོད་ཚོགས་འདུ་བརྒྱུད་བསྡུས་པ་ཡིན་ཟེར་བ་དེ་ཁ་གཡར་ས་ཡོད་ན་མེད་ན་ཞིག་ཡིན་པ་ཡང་ཧ་གོ་དགོས་པ་རེད།